God na Ol Pren Bilong Em i Laikim Em

LONG nau i no gat wanpela man i save long nem bilong em. Ol man i save long em olsem pikinini meri bilong Jepta. Yumi ken ritim Baibel na kisim save long tupela. Bai yumi kisim save olsem God i laikim tru pikinini meri bilong Jepta na ol pren bilong em tu i laikim em.

Yumi inap ritim stori bilong Jepta na pikinini meri bilong em long Baibel long Buk Hetman sapta 11. Jepta em i wanpela gutpela wokman bilong God, olsem na long olgeta taim em i save toktok wantaim pikinini meri bilong em long ol tok bilong Baibel.

Jepta i bin stap paslain long taim lain bilong God, em ol Israel, i askim God long makim wanpela king bilong graun long bosim ol. Jepta em i wanpela strongpela man na em i save gut long pait. Olsem na ol Israel i askim em long go pas long ol bilong pait long ol Amon, em wanpela kantri i stap klostu na i save pait long lain Israel.

Jepta i laik God i helpim ol long winim ol Amon, olsem na em i mekim wanpela promis. Jepta i tok sapos Jehova i helpim em long winim pait, orait taim em i kam bek long pait, namba wan man o meri i lusim haus bilong em na i kam, em bai givim long Jehova. Long laip olgeta dispela man o meri bai mekim wok long haus lotu sel bilong God​—⁠em ples we ol manmeri i save lotuim God long dispela taim bipo. Yu save long husat i kam ausait pastaim?​—⁠a

Yes, em pikinini meri bilong Jepta! Bel bilong Jepta i bagarap tru. Em i gat wanpela pikinini tasol. Tasol em i mekim wanpela promis pinis long Jehova na em i mas bihainim. Wantu pikinini meri bilong em i tok: “Papa, sapos yu promis pinis long Bikpela, yu mekim long mi olsem yu bin promis.” Orait nau em i askim papa long larim em i stap inap tupela mun na bai em i ken i go long ples maunten na krai sori. Bilong wanem em i krai sori? Long wanem, sapos em i bihainim promis bilong papa bilong em, em i no inap marit na kamapim pikinini. Maski i olsem, em i no tingim laik bilong em i stap nambawan bikpela samting. Em i laik bihainim tok bilong papa bilong em na stap gut long Jehova. Yu ting em i mekim Jehova na papa bilong em i amamas?​—

Olsem na Jepta i larim pikinini meri bilong em i go raun wantaim ol pren bilong em inap tupela mun. Taim em i kam bek, papa bilong em i bihainim promis bilong em na salim pikinini i go long haus lotu sel bilong God long Silo bilong mekim wok inap long laip olgeta bilong em. Long olgeta yia, ol yangpela meri bilong Israel i save go long Silo bilong strongim pikinini meri bilong Jepta.

Yu save long sampela pikinini husat i save bihainim tok bilong papamama bilong ol na laikim Jehova?​—⁠ Em i gutpela samting long save long ol dispela pikinini na kamap pren bilong ol. Sapos yu bihainim pasin bilong pikinini meri bilong Jepta na yu save bihainim gut tok na stap gut long Jehova, yu bai gat ol gutpela pren. Yu bai mekim papamama bilong yu i amamas na Jehova bai laikim yu tu.