Ol Witnes Bilong Jehova i Orait Long Kisim Ol Marasin Samting Long Dokta?

Jisas i tok: “Ol man i no gat sik ol i no save go lukim dokta, tasol ol sikman ol i save go lukim dokta.” (Matyu 9:12) Em nau, Jisas i soim olsem Baibel i no gat tok long yumi go lukim ol dokta bilong helpim yumi. Olsem na ol Witnes Bilong Jehova i amamas long kisim ol marasin na helpim i kam long ol dokta. Ol i laik bai ol i gat gutpela helt na ol i ken stap longpela taim. Long taim bilong ol aposel, wanpela Kristen nem bilong em Luk, em i wanpela dokta, na long nau tu sampela Witnes Bilong Jehova ol i dokta.​—⁠Kolosi 4:⁠14.

Tasol ol Witnes Bilong Jehova i no orait long kisim ol kain marasin samting i pait wantaim ol stiatok bilong Baibel. Olsem: Ol i no save kisim blut, long wanem, Baibel i tambuim pasin bilong kisim blut bilong helpim bodi. (Stat 9:4; Wok Pris 17:​1-14; Aposel 15:​28, 29) Na tu, Baibel i tambuim olkain pasin bilong oraitim sik we ol i save “mekim wok long narapela kain strong,” olsem wok bilong ol spirit nogut.​—⁠Aisaia 1:13; Galesia 5:​19-21.

Planti dokta i save givim yumi ol marasin samting bilong helpim yumi long abrusim bagarap, na ol dispela samting i no pait wantaim ol lo bilong Baibel. Ol kain samting olsem​—⁠em planti Witnes i orait long kisim​—⁠planti taim ol i gutpela, winim ol marasin samting i no stret wantaim ol lo bilong God.

Tru, ol man i gat kain kain tingting long ol samting bilong oraitim sik. Samting em inap helpim wanpela man, ating em i no inap helpim narapela man. Olsem na sapos man i go long dokta bilong save long sik tru tru bilong em na wanem marasin em i mas kisim, ating em bai go painim narapela dokta tu bilong harim tingting bilong em.​—⁠Sindaun 14:⁠15.

I no olsem olgeta Witnes bai makim wankain marasin samting ol i laik kisim, nogat. Baibel i givim rot long ol Kristen i bihainim maus bilong bel bilong ol yet sapos dispela i no pait wantaim wanpela lo bilong Baibel. (Rom 14:​2-4) Olsem na olgeta wan wan yet i mas skelim gut ol marasin samting em i tingting long kisim, nogut dispela i pait wantaim maus bilong bel bilong em, em Baibel i skulim pinis.​—⁠Galesia 6:5; Hibru 5:⁠14.

Taim wanpela Witnes i skelim samting em bai mekim, dispela i olsem em i draivim kar i kam klostu long rot bung we i gat planti kar i go i kam long en. Sapos em i bihainim nating ol kar i stap paslain long em na spit i go tasol, em inap kamapim bikpela bagarap. Draiva i gat savetingting em bai draiv isi isi na skelim gut ron bilong ol kar pastaim na nau em bai draiv i go. Na olsem tasol, ol Witnes i no save kirap wantu tasol na tingim wanem marasin samting ol bai kisim, na ol i no bihainim nating tingting bilong planti man. Ol i skelim gut ol samting ol inap kisim, na skelim gut ol stiatok bilong Baibel, na nau ol i makim samting ol bai mekim.

Ol Witnes Bilong Jehova i pilim tru hatwok bilong ol dokta na ol narapela lain bilong helpim ol sikman, em ol i givim bel tru long wok bilong ol. Na ol Witnes i tenkyu long ol dispela lain i save helpim gut ol long daunim sik bilong ol.