Olsem Wanem Ol Pikinini i Senisim Ol Samting Insait Long Marit

PLANTI manmeri bai wanbel olsem taim pikinini i kamap, dispela i save givim bikpela amamas tru long papamama. Baibel i tok ol pikinini i olsem “presen” i kam long God. (Song 127:3) Ol nupela papamama olsem Charles na Mary, ol i save tu olsem wantu ol pikinini inap senisim ol samting insait long marit. Olsem: Ating nupela mama i tingting oltaim long bebi na em i kirap nogut long olsem wanem bel na tingting bilong em i kirap kwik long olgeta liklik samting bebi i mekim. Na ating nupela papa bai i kirap nogut long lukim olsem meri bilong em na bebi i pas gut wantaim, tasol ating em i wari tu olsem meri i no tingim em tumas.

Tru tumas, taim fes pikinini i bon, dispela inap kamapim sampela hevi insait long marit. Sapos bel na tingting bilong wanpela i no strong o tupela marit i gat sampela hevi, dispela bai kamap ples klia na inap i go bikpela taim papamama i gat sampela hatwok long mekim bikpela long pikinini.

Olsem wanem ol nupela papamama inap stretim gut wok insait long ol fes mun we ol i mas lusim bikpela haptaim bilong lukautim bebi? Tupela marit inap mekim wanem bilong pas gut yet wantaim? Ol inap mekim wanem sapos ol i no wanbel long sampela pasin bilong mekim wok papamama? Yumi ken skelim ol dispela hevi na ol stiatok bilong Baibel em ol inap helpim ol marit long stretim ol dispela hevi.

HEVI 1: Wantu pikinini i kisim olgeta taim na strong bilong papamama.

Nupela bebi i kisim olgeta taim na tingting bilong mama. Mama i amamas tru long lukautim bebi bilong em. Taim em i mekim olsem, ating man bilong em bai pilim olsem meri i no tingim em tumas. Manuel, em i sindaun long Brasil, i tok: “Pasin bilong meri bilong mi long oltaim tingim tasol bebi na i no tingim mi tumas, dispela senis i givim hatwok tru long mi. Pastaim mitupela meri tasol i stap, na nau meri na bebi tasol i stap.” Yu inap mekim wanem sapos dispela hevi i kamap?

Rot bilong stap amamas: No ken les kwik.

Baibel i tok: “Man i gat pasin laikim em i no save les kwik, na em i save mekim gutpela pasin. . . . Em i no save tingim em yet, na em i no save belhat kwik.” (1 Korin 13:4, 5) Taim nupela bebi i bon, man na meri marit inap mekim wanem bilong bihainim dispela tok?

Gutpela man marit i soim olsem em i laikim tru meri bilong em taim em i kisim sampela save moa long samting i save kamap long skin na tingting bilong meri taim em i karim pikinini. Sapos em i mekim olsem, em bai luksave long as na ol pasin na filings bilong meri i wok long senis senis.b Adam, em i sindaun long Frans na em i papa bilong wanpela pikinini meri i gat 11-pela mun, em i tok: “Meri bilong mi i save senisim senisim pasin bilong em na sampela taim dispela i givim hatwok long mi. Tasol mi traim long tingim olsem em i no bel hevi long mi, nogat. Ol senis long i stap bilong mipela i mekim na em i gat dispela pasin.”

Olsem wanem? Sampela taim meri bilong yu i save kisim tingting kranki long ol samting yu mekim bilong helpim em? Sapos olsem, orait no ken bel hevi long dispela. (Saveman 7:9) Long gutpela pasin isi, putim laik bilong em i go pas long laik bilong yu yet, na long dispela rot bai yu no inap bel hevi.—Sindaun 14:29.

Na tu, meri i gat savetingting bai helpim man bilong em long mekim gut wok papa. Em bai larim papa i mekim sampela samting bilong lukautim bebi, olsem soim em long pasin bilong senisim nepi o redim botol susu—maski pastaim em i no mekim gut tumas dispela wok.

Ellen, wanpela mama i gat 26 krismas, em i luksave olsem em i mas senisim sampela pasin em i save mekim long man bilong em. Em i tok: “Mi no ken strong strong tumas olsem bebi em bilong mi tasol. Mi mas tokim mi yet olsem taim man bilong mi i traim long lukautim bebi, mi no ken strong long em i mas bihainim olgeta liklik liklik samting mi tokim em long mekim.”

HEVI 2: Yupela i no pas gut moa olsem bipo.

Ol nupela papamama i save taiet, long wanem, ol i no kisim planti slip na i gat kain kain wok ol i mas mekim, na dispela i givim hatwok long ol long pas gut wantaim. Vivianne, wanpela mama long Frans i gat 2-pela liklik pikinini, em i tok: “Pastaim mi tingim tasol wok bilong mi olsem mama na klostu mi lusim tingting long wok bilong mi olsem meri marit.”

Na tu, ol man marit i mas luksave olsem taim meri i karim pikinini, dispela i mekim bikpela samting long skin, bel, na tingting bilong em. Nupela bebi inap kisim taim na strong em bipo yutupela i bin lusim bilong i stap wantaim. Olsem na ol marit inap mekim wanem na bai gutpela bebi bilong ol i no ken bagarapim pasin bilong ol long pas gut wantaim?

Rot bilong stap amamas: Tokim poroman olsem yu laikim em tru.

Baibel i tok long marit olsem: “Man i save lusim papamama na i pas wantaim meri bilong en, na tupela i kamap wanpela bodi tasol.”c (Stat 2:24) Taim God Jehova i kamapim famili, em i gat tingting olsem bihain ol pikinini bai lusim papamama. Tasol God i tingting olsem man na meri bai stap yet olsem wanpela bodi long laip olgeta bilong ol. (Matyu 19:3-9) Olsem wanem dispela tingting inap helpim tupela marit i gat nupela bebi long holimpas stretpela tingting?

Vivianne, em pastaim yumi kamapim tok bilong em, i tok: “Mi tingim tok bilong Stat 2:24, na dispela ves i helpim mi long luksave olsem mi kamap ‘wanpela bodi’ wantaim man bilong mi—na i no wantaim pikinini bilong mi. Mi luksave olsem mi mas strongim marit bilong mipela.” Theresa, mama bilong wanpela gel i gat 2-pela krismas, em i tok: “Sapos mi pilim olsem mi stap longwe liklik long man bilong mi, wantu mi wok strong long tingim tru em, maski mi mekim olsem inap liklik haptaim tasol long olgeta wan wan de.”

Sapos yu wanpela man marit, yu inap mekim wanem bilong strongim marit bilong yu? Tokim meri bilong yu olsem yu laikim em tru, na kamapim dispela long ol gutpela pasin yu mekim long em. Wok strong tru long mekim meri bilong yu i stap bel isi. Sarah, wanpela mama i gat 30 krismas, em i tok: “Meri marit i mas pilim olsem man i tingim em tru na i laikim em, maski bodi bilong em i no stap wankain olsem paslain long em i gat bel.” Alan, em i sindaun long Jemani na em i papa bilong tupela pikinini man, em i luksave olsem em i mas mekim gut bel bilong meri bilong em. Em i tok: “Long olgeta taim, mi redi long mekim gut bel bilong meri bilong mi taim em i bel hevi.”

Yumi ken save olsem, taim tupela marit i gat nupela bebi, dispela bai mekim sampela samting long pasin bilong ol long slip wantaim. Olsem na man na meri marit i mas toktok gut long dispela samting. Baibel i tok taim i gat sampela senis long pasin bilong ol long slip wantaim, orait tupela i mas “wanbel long mekim olsem.” (1 Korin 7:1-5) Bilong mekim olsem ol i mas toktok gut wantaim. Ating sindaun yu kamap bikpela long en o kalsa bilong ples bai mekim na i hatwok liklik long toktok wantaim poroman bilong yu long ol samting bilong maritpasin. Tasol em i bikpela samting olsem yupela i toktok long dispela samting taim yupela i lain long mekim wok papamama. Pilim gut tingting bilong narapela, no ken les kwik, na kamapim tingting tru i stap long bel. (1 Korin 10:24) Long dispela rot bai yu na man bilong yu i no inap kisim tingting kranki long narapela narapela, na pasin laikim bilong yupela bai i kamap strong moa.—1 Pita 3:7, 8.

Na tu, pasin laikim bilong tupela marit inap kamap strong moa taim narapela i tokaut olsem em i amamas long narapela. Gutpela man marit bai save olsem planti wok em nupela mama i mekim, em i no save lukim. Vivianne i tok: “Long pinis bilong de, planti taim mi save pilim olsem mi no mekim wanpela wok—maski mi bisi tru long lukautim bebi!” Maski meri i save mekim planti wok, meri i gat savetingting em bai was gut bambai em i no daunim wok em man i mekim bilong lukautim famili.—Sindaun 17:17.

HEVI 3: Yupela i no wanbel long pasin bilong mekim bikpela long pikinini.

Tupela marit inap luksave olsem sindaun ol i kamap bikpela long en inap mekim na ol i tok pait. Asami, wanpela mama long Japan, na man bilong em Katsuro, ol i gat dispela hevi. Asami i tok: “Mi pilim olsem Katsuro i save isi tumas long pikinini meri bilong mipela, na em i pilim olsem mi strong tumas long em.” Yupela inap mekim wanem bilong abrusim dispela hevi?

Rot bilong stap amamas: Toktok gut wantaim na sapotim poroman marit bilong yu.

Saveman King Solomon i tok: “Bikhetpasin i save kamapim kros na pait. Tasol sapos man i larim ol arapela man i givim tingting long em, orait dispela man i gat gutpela tingting na save.” (Sindaun 13:10) Yu gat wanem save long pasin bilong poroman bilong yu long mekim bikpela long pikinini? Sapos yu wet inap bebi i kamap na yu no toktok gut wantaim long pasin bilong mekim bikpela long pikinini, ating bai yupela i paitim tok i go i kam na yupela i no inap stretim gut hevi.

Olsem, yutupela i wanbel long wanem bekim bilong ol dispela askim: “Olsem wanem yumi inap skulim pikinini bilong yumi long pasin bilong kaikai gut na slip? Taim bebi i krai long nait, long olgeta taim yumi mas holim em? Yumi mas mekim wanem sapos i hatwok long lainim pikinini long yusim toilet? I klia tru olsem ol disisen yupela i mekim bai i narapela long ol disisen ol narapela marit i mekim. Ethan, papa bilong tupela pikinini, em i tok: “Ol marit i mas toktok gut wantaim bambai ol i ken holim wanpela tingting. Orait nau bai ol inap wanbel long mekim gut wok papamama.”

Pikinini Inap Senisim Tru Sindaun Bilong Marit

Tupela nupela manmeri bilong danis long ais ol i mas lusim bikpela haptaim na ol i no ken les kwik bambai ol inap lain long balensim gut ol yet, olsem tasol nupela papamama i mas lusim bikpela haptaim bambai ol i ken lain long nupela wok bilong ol olsem papamama. Bihain yu bai save gut long mekim dispela wok.

Pasin bilong mekim bikpela long pikinini, dispela bai traim wok bilong yu insait long marit na bai senisim tru pasin bilong yu long pas gut wantaim poroman marit bilong yu. Tasol dispela bai i opim tu rot long kisim ol gutpela pasin. Sapos yu bihainim tok bilong Baibel, orait samting i painim yu bai i wankain olsem samting i bin painim wanpela papa nem bilong em Kenneth. Em i tok: “Pasin bilong mekim bikpela long ol pikinini i helpim gut pasin bilong meri bilong mi na mi. Nau mipela i no save tingim tumas laik bilong mipela yet na mipela i kisim pasin bilong laikim na tingim tru narapela.” Ol dispela kain pasin i gutpela samting insait long marit.