Ol Man i Askim . . .

Yu Ting Olgeta Gutpela Kristen i Go Long Heven?

▪ Planti man i bin ritim dispela gutpela tok bilong Jisas: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.” (Jon 3:16) Yu ting tok bilong Jisas i makim olsem olgeta gutpela Kristen husat i lotuim Papa bilong em, God Jehova, ol bai kisim laip bilong i stap amamas oltaim long heven?

Tingim tok bilong Jisas olsem: “I no gat wanpela man i bin i go antap long heven, nogat. Pikinini bilong man, em wanpela tasol i bin lusim heven na i kam daun.” (Jon 3:13) Dispela i makim olsem ol bilipman bilong bipo olsem Noa, Abraham, Moses, na Devit, ol i no bin go long heven. (Aposel 2:34) Sapos olsem, orait olgeta dispela man i go we? Ol dispela bilipman bilong bipo ol i slip i stap long matmat, ol i no inap mekim wanpela samting, ol i wetim kirap bek.​—⁠Saveman 9:​4, 5, 6; Aposel 24:⁠15.

Na tu, Jisas em i namba wan man i stori olsem sampela man bai kisim laip long heven bihain long ol i dai. Em i tokim ol aposel bilong em olsem em bai go na redim ples bilong ol long heven. (Jon 14:​2, 3) Dispela em nupela save long lain bilong God. Bihain aposel Pol i kamapim klia olsem taim Jisas i dai na kirap bek i go long heven, em i ‘opim nupela rot i go long laip long ol disaipel bilong em’​—⁠em rot we bipo i no gat wanpela man bilong graun i bin go long en.​—⁠Hibru 10:​19, 20.

Yu ting dispela i makim olsem kirap long dispela taim, bai olgeta gutpela man i go long heven? Nogat, long wanem, kirap bek bilong kisim laip long heven i poroman wantaim wanpela wok em God i makim sampela manmeri tasol long mekim. Long laspela nait bilong Jisas wantaim ol aposel, em i tokim ol olsem ol bai “sindaun long ol sia king na stap olsem jas” long Kingdom bilong em long heven. Em nau, wok bilong ol em long mekim wok king wantaim Jisas long heven.​—⁠Luk 22:​28-30.

God i givim dispela gutpela wok long ol aposel na long sampela narapela manmeri tu. Long wanpela visen, aposel Jon i lukim Jisas i stap long heven wantaim wanpela lain manmeri i kirap bek, na Baibel i stori long ol olsem ‘ol i kamap king na pris na bosim graun.’ (Revelesen 3:21; 5:10) Hamas manmeri tru i bin stap long heven? Wankain olsem long olgeta gavman, liklik lain tasol i mekim wok bos. Na i wankain tu long dispela Kingdom bilong heven. Jisas, em dispela Pikinini Sipsip Bilong God, bai mekim wok king wantaim lain 144,000, em ol manmeri “God i bin baim bek ol namel long ol manmeri.”​—⁠Revelesen 14:​1, 4, 5.

Tru, 144,000 em liklik namba tasol taim yumi skelim wantaim namba bilong olgeta manmeri i bin stap gut long God long bipo na long nau tu. Tasol i stret ol i liklik lain tasol, long wanem, 144,000 manmeri bai kirap bek na i go long heven bilong mekim wanpela wok holi. Sapos yu laik wokim wanpela haus, bai yu kisim olgeta man i gat gutpela save long mekim wok konstraksen long wokim haus bilong yu? Nogat. Yu bai kisim ol manmeri inap tasol long mekim dispela wok. Olsem tasol, God i no makim olgeta gutpela man bilong mekim dispela wok king wantaim Krais long heven.

Dispela gavman bilong heven bai kamapim laik bilong God long pastaim tru. Jisas wantaim lain 144,000 ol bai bosim wok bilong kamapim Paradais long graun olgeta we bikpela lain manmeri tru bai stap amamas oltaim long en. (Aisaia 45:18; Revelesen 21:​3, 4) Ol manmeri husat i stap long tingting bilong God na kirap bek, ol tu bai kisim dispela gutpela blesing.​—⁠Jon 5:​28, 29.

Olgeta man i stap gut long lotuim Jehova​—⁠long bipo na long nau tu​—⁠ol inap kisim dispela gutpela presen bilong laip oltaim. (Rom 6:23) Liklik lain tasol bai kisim laip long heven bilong mekim wanpela spesel wok, na bikpela lain manmeri tru bai kisim laip long wanpela paradais bai kamap long olgeta hap bilong graun.