Tok i Tru Inap Senisim Laip Bilong Yu
ATING lotu i bin skulim yu o yu bin harim wanpela bilong ol dispela tok giaman long God em yumi skelim long ol dispela atikol. Tasol ating yu no laik senisim bilip bilong yu, long wanem, yu bin holim ol dispela bilip inap longpela taim pinis.
Sampela lotu i pasim ol man long skelim tok bilong lotu wantaim tok bilong Baibel. Sampela narapela i laik strongim tok giaman na ol i tok i hatwok long kliagut long ol tok bilong Baibel. Planti disaipel bilong Jisas ol i man nating na ol i no bin kisim bikpela skul, tasol ol i lain hariap long ol tok Jisas i bin skulim ol long en.—Aposel 4:13.
Ating yu no laik skelim gut bilip bilong yu, long wanem, yu pret olsem nogut yu mekim olsem na i olsem yu no gat strongpela bilip. Yu ting i stret olsem God bai i no inap amamas sapos yu skelim ol tok bilong Baibel bilong save gut long ol samting em i laik bai yu mas mekim? Nogat. Baibel i tok long yu yet i mas skelim olgeta tok bilong en, na em i tok: “Yupela i ken save tru long laik bilong God, em dispela laik em i gutpela, na em i orait, na i gutpela olgeta.”—Rom 12:2.
Taim yu kisim stretpela save long God, yu wok long kisim nupela save na dispela inap mekim i stap bilong yu i kamap gutpela moa. (Jon 8:32) Deanne, em namba wan atikol i bin stori long em, nau em i bilip long Tok Bilong God. Em i tok: “Olgeta tok bilong Baibel i klia tru, tasol mi no bin save long dispela inap long taim mi kirap stadi long Baibel. Nau mi save long Jehova, em i wanpela gutpela Papa i stap long heven. Mi save long as tru bilong laip.”
Ating yu bin stadi long Baibel bipo, tasol yu pilim olsem ol tok bilong en i no helpim yu. Sapos yu pilim olsem, orait no ken givap. Sapos yu traim long kliagut long Baibel, tasol ol i bin skulim yu long ol tok giaman long God, dispela i olsem yu traim long joinim ol wan wan hap bilong wanpela pilai pasel, tasol yu lukluk long rong piksa bilong stiaim yu. Ating yu joinim ol wan wan hap bilong pasel, tasol yu givap taim yu lukim olsem piksa long pasel i no wankain long piksa ol i givim long yu. Tasol taim yu lukluk long rait piksa, bai yu joinim gut olgeta wan wan hap bilong pasel.
Olsem wanem? Yu laik kisim stretpela save long God? Mipela i laik singautim yu long lukim ol Witnes Bilong Jehova long hap yu sindaun long en o raitim pas i go long atres i stret long yu, olsem i stap long pes 4 bilong dispela nius.
[Rait long pes 9]
“Yupela i ken save tru long laik bilong God, em dispela laik em i gutpela, na em i orait, na i gutpela olgeta.”—ROM 12:2