Mi Laik i Stap Olsem Pikinini Meri Bilong Jepta
Stori bilong Joanna Soans
Taim mi yangpela yet, mi gat laik tru long kamap olsem pikinini meri bilong Jepta. Nau mi laik stori long olsem wanem mi bin kamap olsem em.
LONG 1956, em namba 1 taim mi go long kibung bilong ol Witnes Bilong Jehova long Bombay (nau ol i kolim Mumbai), long India, na dispela i senisim laip bilong mi. Mi pilim tru wanpela tok i stori long pikinini meri bilong Jepta.
Ating yu bin ritim long Baibel olsem pikinini meri bilong Jepta i tineja yet na em i wanbel olsem em i no ken marit. Long dispela rot, papa bilong em inap truim tok promis em i bin mekim. Olsem na em i stap singel na mekim wok long haus lotu sel bilong Jehova i go inap long taim em i dai.—Hetman 11:28-40.
Mi gat laik tru long kamap olsem em! Tasol i gat wanpela hevi—long dispela taim long India, ol man na meri i no save stap singel.
Famili Bilong Mi
Mi namba 5 bilong 6-pela pikinini bilong Benjamin na Marcelina Soans long taun Udipi, long wes kos bilong India. Tokples bilong mipela em Tulu, na inap 2 milion manmeri i save mekim dispela tokples. Tasol olsem planti man long Udipi, mipela i skul long tok Kannada.
Ol man long dispela hap i ting em i bikpela samting long ol manmeri i mas marit na kamapim pikinini. Long tokples Tulu, mi no harim wanpela tok i makim pasin bilong “stap singel,” “stap wanpis,” o “bel hevi long i stap longwe long famili.” I olsem ol man i no save long ol dispela pasin. Olsem: Long haus bilong mipela i gat ol bubu, ol ankol, ol anti, na planti kasen, ol i stap wantaim mipela!
Long kastam bilong mipela, ol pikinini i save kisim graun samting long sait bilong mama. Sapos ol man i laik save long ol tumbuna bilong famili, ol i save skelim lain bilong mama, na ol pikinini meri i save kisim bikpela hap bilong ol samting bilong papamama. Long sampela komiuniti bilong ol Tulu, taim pikinini meri i marit, em wantaim man bilong em i save stap yet wantaim mama.
Famili bilong mipela i kamap Kristen, olsem na sampela samting long sindaun bilong mipela i narapela kain. Long olgeta nait, bubu man i save go pas long mekim lotu, beten, na ritim Baibel long tokples Tulu. Taim em i opim olpela Baibel bilong em bilong ritim long mipela, i olsem em i opim bokis i gat ol gutpela ston i dia tumas. Mipela i save amamas tru! Song 23:1 (NW ) i kirapim tru tingting bilong mi, em i tok: “Jehova em i Wasman bilong mi. Olsem na mi no inap sot long wanpela samting.” Mi tingting, ‘Jehova em i husat, na bilong wanem Baibel i kolim em wasman?’
Mi Kliagut Moa Long Tok
Bihain long Wol Woa 2, hevi bilong mani i mekim na mipela i go sindaun long Bombay, em i longwe inap 900 kilomita long taun mipela i bin sindaun long en. Long 1945, tupela Witnes Bilong Jehova i kam lukim papa na i givim em wanpela buklet bilong Baibel. Papa i givim bel tru long ritim na kisimgut ol tok bilong en na em i kirap autim dispela tok long ol manmeri i mekim tok Kannada. Long 1952 samting, liklik Baibel stadi grup i kamap bikpela na kamap namba 1 kongrigesen bilong tok Kannada long Bombay.
Papa na mama i bin skulim mipela ol pikinini long givim bel long stadi long Baibel na kamap gutpela tisa. Long olgeta de ol i painim rot bilong beten na stadi wantaim mipela. (Lo 6:6, 7; 2 Timoti 3:14-16) Wanpela taim mi ritim Baibel i stap na mi inap kliagut gut moa long sampela tok mi ritim. Mi kliagut olsem Jehova i olsem wasman bilong sipsip, long wanem, em i save soim rot, givim kaikai, na lukautim ol manmeri i lotuim em.—Song 23:1-6; 83:18.
Jehova i Holim Han Bilong Mi
Mi kisim baptais bihain liklik long kibung bilong Bombay long 1956. Sikspela mun bihain, mi bihainim pasin bilong bikbrata bilong mi, Prabhakar, na mi mekim wok bilong autim tok fultaim. Mi laik tru long autim tok i tru bilong Baibel long ol narapela, tasol taim mi traim long autim bilip bilong mi, maus i hevi na mi hatwok long toktok. Mi krai na tokim mi yet, ‘Sapos Jehova i helpim mi, bai mi inap mekim dispela wok!’
Jehova i givim helpim long rot bilong tupela misineri, Homer na Ruth McKay bilong Kanada, em ol i bin go long skul bilong ol Witnes Bilong Jehova bilong kamap misineri, long New York, Amerika, long 1947. Ol i helpim mi taim mi kirap nupela long mekim wok autim tok. Long olgeta taim Ruth i save helpim mi long traim traim ol tok bilong mekim long ol haus. Em i save gut long mekim isi bel bilong mi. Taim mi pret, em bai holim han bilong mi na tok: “Yu no ken tingting planti. Yumi ken traim narapela haus.” Gutpela tok bilong em i save strongim tru bel bilong mi.
Wanpela taim mi kisim toksave olsem Elizabeth Chakranarayan, em sista i gat bikpela krismas na i save gut long skulim ol man long Baibel, bai poromanim mi long mekim wok autim tok. Pastaim mi tingting: ‘Olsem wanem bai mi stap wantaim dispela sista? Krismas bilong em i winim tru krismas bilong mi!’ Tasol bihain mi luksave olsem em i nambawan gutpela poroman bilong mi.
“Tru Tru Yumi No Stap Wanpis”
Namba 1 ples wok bilong mipela em biktaun Aurangabad, em i stap 400 kilomita long hap is bilong Bombay. Mipela i luksave olsem mitupela tasol i Witnes long dispela biktaun we i gat klostu 1 milion manmeri long en. Na tu, mi mas lainim tok Marati, em bikpela tokples bilong dispela taun.
Sampela taim mi bel hevi long i stap longwe long famili bilong mi, na mi save krai. Tasol Elizabeth i gat pasin olsem mama, na gutpela tok bilong em i save strongim bel bilong mi. Em i save tok: “Tru, sampela taim yumi bel hevi long i stap wanpis, tasol tru tru yumi no stap wanpis. Maski yu stap longwe long ol pren na famili bilong yu, oltaim Jehova i save stap wantaim yu. Larim em i stap pren bilong yu, na bai yu no pilim olsem yu stap wanpis.” I kam inap long nau mi save tingim yet dispela tok bilong em.
Taim mipela i sot long basfea, mipela i save wokabaut inap 20 kilomita long olgeta de long rot i gat das na graun malumalum, na tu, long taim bilong traipela san na kol. Long taim bilong san, sampela taim ples i hat tru inap 40 digri Selsias. Long taim bilong ren, long sampela hap bilong teritori, graun bai i stap malumalum inap planti mun. Tasol mipela i lukim olsem pasin na tingting bilong ol manmeri i givim bikpela hatwok moa long mipela, winim ren na bikpela san.
Ol meri i no save toktok wantaim ol man long ples klia sapos ol i no wanblut, na ol meri i no save skulim ol man. Olsem na ol i bin tok bilas na toknogutim mipela. Inap 6-pela mun, mitupela tasol i bung na mekim ol miting bilong Baibel long olgeta wik. Bihain sampela i laik harim tok na ol i bung wantaim mipela. I no longtaim na wanpela liklik grup i kamap. Na sampela i autim tok wantaim mipela.
“Mekim Save Bilong Yu i Kamap Bikpela Moa”
Inap 2 na hap yia bihain, ol i salim mipela i go bek long Bombay. Elizabeth i mekim yet wok autim tok, tasol ol i askim mi long helpim papa bilong mi, em wanpela tasol i tanim tok bilong ol buk samting bilong Baibel long tok Kannada. Em i amamas long mi kam helpim em, long wanem, em i gat planti wok insait long kongrigesen.
Long 1966, papamama i pasim tok long i go bek long Udipi, em ples bilong mipela. Taim papa i laik lusim Bombay, em i tok: “Pikinini, mekim save bilong yu i kamap bikpela moa. Tanim tok long pasin ol man inap kisimgut na kliagut long en. Yu no ken ting olsem yu gat olgeta save, nogat, yu mas i gat pasin daun. Bilip na wet long Jehova i helpim yu.” Dispela em laspela skultok em i givim long mi, long wanem, em i dai bihain liklik long taim ol i go bek long Udipi. Mi wok strong long bihainim skultok bilong em long wok bilong mi long tanim tok i kam inap long nau.
“Yu No Laik Marit na Kamapim Famili?”
Em pasin bilong ol papamama India long stretim marit bilong ol pikinini man na pikinini meri taim ol i yangpela yet, na ol i save kirapim ol long kamapim pikinini. Olsem na planti taim ol i save askim mi: “Yu no laik marit na kamapim famili? Husat bai lukautim yu taim yu kamap lapun? Bai yu stap wanpis ya!”
Sampela taim ol kain tok olsem i save bagarapim tru bel bilong mi. Long ai bilong ol man mi save haitim bel hevi bilong mi, tasol taim mi wanpela i stap, mi save autim bel hevi long Jehova. Mi save olsem em i no ting mi singel meri na mi samting nating, na dispela save i mekim gut bel bilong mi. Bilong strongim gen tingting olsem mi bai mekim wok bilong Jehova na mi no ken larim wanpela samting i pulim nabaut tingting bilong mi, mi save tingim pikinini meri bilong Jepta na Jisas tu, em tupela wantaim i bin stap singel na ol i putim tingting olgeta i go long mekim laik bilong God.—Jon 4:34.
Wanpela Presen Jehova i Givim
Mitupela Elizabeth i stap olsem gutpela pren tru inap olsem 50 yia. Em i dai long 2005, taim em i gat 98 krismas. Taim em i lapun pinis, ai bilong em i no gutpela na em i no inap ritim Baibel, olsem na long olgeta de em i save beten long God i go inap planti aua. Sampela taim mi save ting em i kamapim tok bilong skripsa long wanpela meri i stap long rum, tasol bihain mi luksave olsem em i toktok wantaim Jehova. Em i tingim Jehova olsem Man i stap tru tru, na em i mekim olgeta samting olsem Jehova i stap wantaim em. Mi lain olsem dispela em i bikpela samting bilong helpim yumi long i stap strong long mekim wok bilong God olsem pikinini meri bilong Jepta i bin mekim. Mi tenkyu tru long Jehova i givim mi wanpela sista husat i gat bikpela krismas na i gat strongpela bilip, na dispela sista i bin skulim na strongim mi long taim mi yangpela yet na long olgeta taim mi gat hevi.—Saveman 4:9, 10.
Mi bin kisim planti blesing tru taim mi mekim wok bilong Jehova, olsem pikinini meri bilong Jepta i bin mekim! Mi stap singel na bihainim ol tok bilong Baibel, olsem na mi kisim bikpela amamas long ol gutpela samting i painim mi, na mi inap wok yet long “mekim wok bilong Bikpela oltaim na i no gat wanpela samting i pulim nabaut tingting bilong [mi].”—1 Korin 7:35.
[Piksa long pes 28]
Papa i mekim pablik tok long Bombay long 1950 samting
[Piksa long pes 28]
Mi na Elizabeth klostu long taim em i dai
[Piksa long pes 29]
Tokaut long wanpela tok bilong Baibel i kamap long Bombay long 1960
[Piksa long pes 29]
Mi wantaim ol wanwok long ofis bilong tanim tok