Baibel i Save Senisim i Stap Bilong Man
WANPELA man bilong Skotlan i painim wanem samting i winim tru gutpela wok bisnis bilong em? Wanem samting i bin helpim wanpela man bilong Brasil long lusim pasin pamuk na pasin bilong smok krek koken? Olsem wanem wanpela man bilong Slovenia inap lusim pasin bilong dring planti? Ritim stori bilong ol dispela man.
“Mi pilim olsem laip bilong mi i gutpela.”—JOHN RICKETTS
YIA MI BON: 1958
KANTRI: SKOTLAN
BIPO: BISNISMAN
LAIP BILONG MI LONG BIPO: Mi kamap bikpela insait long famili i gat gutpela sindaun. Papa em wanpela ofisa long ami bilong Inglan, olsem na mipela i save go sindaun long ol narapela narapela kantri. Mipela i lusim Skotlan na i go sindaun long Inglan, Jemani, Kenya, Malesia, Aialan, na Saiprus. Kirap long taim mi gat 8-pela krismas, mi go long ol boding-skul long Skotlan. Bihain mi grediuet long Cambridge University.
Taim mi gat 20 krismas, mi kisim wok long wanpela bisnis bilong oil na mi wok inap 8-pela yia. Pastaim mi mekim dispela wok long Saut Amerika, bihain long Afrika, na las long Western Australia. Taim mi go i stap long Australia, mi kirapim wanpela invesmen bisnis na bihain mi salim dispela bisnis.
Mani mi kisim long en i helpim mi long ritaia taim mi gat 40 krismas. Nau mi gat taim bilong raun long ol narapela hap. Mi kisim motobaik na mi raunim Australia inap tupela taim, na bihain mi raun long olgeta hap bilong graun. Mi pilim olsem laip bilong mi i gutpela.
BAIBEL I SENISIM I STAP BILONG MI: Taim mi no ritaia yet, mi laik painim rot bilong tenkyu long God long gutpela laip bilong mi. Mi kirap go long Misin Angliken, em lotu mi kamap bikpela long en. Tasol dispela lotu i no skulim mi tumas long tok bilong Baibel. Bihain mi go long lotu Momon, tasol mi no amamas, long wanem, ol i no strong long kamapim ol tok bilong Baibel.
Wanpela taim ol Witnes Bilong Jehova i kam long haus bilong mi. Wantu mi lukim olsem Baibel i as bilong ol tok ol i kamapim. Wanpela ves ol i kamapim long mi em 1 Timoti 2:3, 4. Ol dispela ves i tok olsem em laik bilong God long “kisim bek olgeta kain man na em i laik bai ol i kisim stretpela save long tok i tru.” Mi kirap nogut long ol Witnes i no laik givim tasol save long man, nogat, ol i strong long kamapim stretpela save em Baibel i as bilong en.
Taim mi stadi long Baibel wantaim ol Witnes Bilong Jehova, ol i helpim mi long kisim dispela stretpela save. Mi kisim save olsem God na Jisas i no hap bilong wanpela god Triwan; God i narapela na Jisas i narapela. (Jon 14:28; 1 Korin 11:3) Mi amamas long kisim save long dispela tok i tru. Na mi kros long mi bin westim bikpela haptaim na strong long traim kisim save long bilip giaman bilong god Triwan we i no gat man inap kliagut long en!
I no longtaim na mi kirap go long ol miting bilong ol Witnes Bilong Jehova. Mi kirap nogut long gutpela pasin pren na stretpela pasin bilong olgeta long miting—ol i olsem ol santuman. Pasin laikim bilong ol i mekim na mi bilip olsem mi painim pinis lotu i tru.—Jon 13:35.
GUTPELA SAMTING I PAINIM MI: Taim mi kisim baptais pinis, mi bungim wanpela gutpela meri tru, nem bilong en Diane. Em i kamap bikpela insait long lain Witnes Bilong Jehova, na em i gat planti gutpela pasin mi save laikim. Bihain mitupela i marit. Diane em i gutpela poroman bilong mi na em i save helpim mi, na dispela i olsem gutpela blesing Jehova i givim long mi.
Mitupela Diane i kisim strongpela laik long go long wanpela hap we ol i sot long ol man bilong autim gutnius bilong Baibel. Long 2010, mipela i go sindaun long Belis, long Sentral Amerika. Mipela i save autim tok long ol manmeri i laikim tru God na ol i hangre long kisim save long Baibel.
Nau mi save tru long God na tok bilong em long Baibel, olsem na tingting na bel bilong mi i stap isi. Mi save mekim wok autim tok fultaim na mi bin kisim amamas long skulim planti man long Baibel. Em i gutpela samting tru long lukim tok i tru bilong Baibel i mekim i stap bilong man i kamap gutpela moa—olsem em i bin mekim long mi. I no gat wanpela samting i winim dispela. Mi painim pinis nambawan gutpela rot bilong tenkyu long God long laip bilong mi.
“Ol i mekim gut tru long mi.”—MAURÍCIO ARAÚJO
YIA MI BON: 1967
KANTRI: BRASIL
BIPO: MEKIM PASIN PAMUK
LAIP BILONG MI LONG BIPO: Mi kamap bikpela long Avaré, em wanpela liklik taun long provins São Paulo. Planti manmeri long dispela taun i save mekim ol wok nating tasol.
Papa bilong mi i dai taim mi stap yet long bel bilong mama. Taim mi liklik mangi yet, mi save putim ol klos bilong mama taim em i no stap long haus. Mi kisim ol pasin olsem meri, na ol man i ting mi man bilong mekim pasin sodom. Bihain mi kirap na slip wantaim ol mangi na ol man i bikpela pinis.
Taim mi gat klostu 20 krismas, planti taim mi wok long painim ol man o meri bilong slip wantaim ol—mi painim ol long ol ba, ol klap, na long ol haus lotu tu. Long taim bilong mekim ol bikpela singsing bilong ples, mi save bilas olsem meri na mi mekim ol danis wantaim ol lain bilong danis long rot. Ol man i amamas long mi na laikim mi.
Ol pren bilong mi em ol man bilong mekim pasin sodom, ol pamukmeri, na ol man bilong kisim drak. Sampela i pulim mi long traim strongpela drak krek koken, na kwiktaim mi kalabus long dispela drak. Sampela taim mipela i save smok i go inap tulait. Na sampela taim mi save stap wanpis na smok koken inap wanpela de olgeta. Mi kamap bun nating stret, olsem na sampela man i tok mi gat sik AIDS.
BAIBEL I SENISIM I STAP BILONG MI: Long dispela taim mi bungim ol Witnes Bilong Jehova. Ol i mekim gut tru long mi. Wanpela Baibel ves ol i bin ritim long mi em Rom 10:13, i tok: “Olgeta manmeri i singaut long nem bilong Jehova, em bai kisim bek ol.” Mi harim dispela tok na mi save, em i bikpela samting long kamapim nem bilong Jehova. Taim mi smok koken long nait olgeta, planti taim mi save opim windo na lukluk i go antap long skai na mi krai na beten long Jehova na askim em long helpim mi.
Mi tingting planti long mama bilong mi. Bel bilong em i bagarap stret long lukim pasin bilong mi long bagarapim skin bilong mi long ol drak. Olsem na mi pasim tok long bel olsem mi bai lusim ol dispela drak. Bihain liklik mi orait long stadi long Baibel wantaim ol Witnes. Ol i tok stadi bai strongim mi long lusim ol drak—na tru tumas em i mekim olsem!
Taim mi stadi long Baibel, mi luksave olsem mi mas senisim pasin bilong mi. Mi hatwok tru long lusim pasin sodom, long wanem, dispela pasin i bin pas long mi kirap long taim mi mangi yet. Tasol samting i bin helpim mi tru, em mi lusim ol samting i pulim mi long mekim dispela pasin. Mi lusim ol poroman bilong mi na mi no go moa long ol ba na ol naitklap.
Tru, i hatwok long senisim ol dispela pasin, tasol mi kisim save olsem Jehova i tingim mi na em i save long hatwok bilong mi, na dispela i mekim gut bel bilong mi. (1 Jon 3:19, 20) Mi wok strong long senisim pasin bilong mi, na long 2002 mi lusim pinis olgeta pasin sodom, na long dispela yia mi kisim baptais na kamap wanpela Witnes Bilong Jehova.
GUTPELA SAMTING I PAINIM MI: Mama i amamas tru long mi bin senisim pasin bilong mi, olsem na em tu i kirap stadi long Baibel. Tasol sori tru, em i kisim sik strok. Maski i olsem, em i wok yet long kisim pasin bilong laikim tumas Jehova na ol tok i tru bilong Baibel.
Inap 8-pela yia pinis, mi mekim wok autim tok fultaim, na mi lusim bikpela haptaim long skulim ol man long Baibel. Tru, sampela taim ol laik nogut i save kamap long bel bilong mi, tasol mi save wok strong long daunim ol dispela laik. Mi save olsem taim mi no bihainim ol dispela laik nogut, Jehova inap orait long mi na dispela i save strongim tru mi.
Mi wok long i go klostu moa long Jehova na bihainim pasin em i laikim, na dispela i helpim mi long rispek long mi yet. Nau mi stap amamas.
“Mi olsem wanpela dram i no gat as bilong en.”—LUKA ŠUC
YIA MI BON: 1975
KANTRI: SLOVENIA
BIPO: MAN BILONG DRING PLANTI
LAIP BILONG MI LONG BIPO: Mama i karim mi long Ljubljana, em nambawan biktaun bilong Slovenia. I kam inap long mi gat 4-pela krismas, sindaun bilong mi i gutpela. Long dispela taim papa i suasaid. Bihain long dispela, mama i mas mekim wok hat bambai em i ken lukautim mi wantaim bikbrata bilong mi.
Taim mi gat 15 krismas, mi go sindaun wantaim bubu meri bilong mi. Mi amamas long i stap wantaim em, long wanem, planti poroman bilong mi i save sindaun long hap bilong em. Na tu, mi stap fri long mekim ol samting mi laikim, winim taim mi bin stap wantaim mama. Taim mi gat 16 krismas, mi kirap poromanim ol lain i save raun na dring long wiken. Mi larim gras bilong mi i go longpela na putim ol bilas olsem ol bikhet mangi i save mekim, na bihain mi kirap smok.
Mi bin traim ol kain kain drak, tasol mi holim strong pasin bilong dring, long wanem, mi laikim moa dispela samting. Pastaim mi save dring tupela o 3-pela glas wain, tasol i no longtaim na mi kirap pinisim wanpela botol olgeta. Maski mi dring spak, mi save gut tru long haitim spak bilong mi. Planti taim smel bilong dring long maus bilong mi i save mekim na ol man i luksave olsem mi bin dring. Na i no gat man inap luksave olsem mi bin dring sampela lita wain o bia—na vodka tu wantaim!
Planti taim mi bin helpim ol poroman long wokabaut gut taim ol i bin dring long disko, maski mi bin dring planti tru, winim ol. Wanpela taim mi harim wanpela pren i tok, mi olsem wanpela dram i no gat as bilong en—long tokples Slovenia em wanpela tok bilong semim man i winim ol narapela long dring. Dispela tok i bagarapim tru bel bilong mi.
Mi kirap tingting long pasin mi save bihainim. Bel bilong mi i kotim mi stret na mi pilim olsem mi pipia nating tasol. Mi lukim olsem olgeta samting mi mekim long i stap bilong mi i no gat as bilong en.
BAIBEL I SENISIM I STAP BILONG MI: Long dispela taim mi lukim olsem pasin bilong wanpela wanklas bilong mi i senis, na em i wok long kisim pasin isi. Mi kirap nogut long pasin bilong em i senis, olsem na mi singautim em i go wantaim mi long haus kaikai. Mitupela i toktok i stap, na em i tok em i bin kirap stadi long Baibel wantaim ol Witnes Bilong Jehova. Em i tokim mi long sampela samting em i bin lainim na ol i nupela samting tru long mi, long wanem, kirap long taim mi liklik yet mi no bin insait long wanpela lotu. Mi kirap i go long ol miting bilong ol Witnes na stadi long Baibel wantaim ol.
Taim mi stadi long Baibel, mi kisim save long planti strongpela tok i tru i kirapim tru bel bilong mi. Mi kisim save olsem nau yumi stap long wanpela taim we Baibel i kolim olsem “taim bilong las de.” (2 Timoti 3:1-5) Na tu, mi kisim save olsem klostu nau God bai pinisim olgeta man nogut bilong graun, na ol gutpela man bai kisim laip oltaim long Paradais. (Song 37:29) Mi kisim strongpela laik long stretim olgeta pasin na wokabaut bilong mi bambai mi ken i stap namel long ol dispela gutpela man.
Mi kirap tokim ol pren bilong mi long ol tok i tru bilong Baibel mi lainim. Planti i tok bilas long mi long ol tok mi kamapim long ol, tasol bihain mi lukim olsem dispela i helpim mi. Pasin ol i mekim i soim mi olsem ol i no pren tru. Bihain mi save olsem wanpela as bilong hevi bilong mi long dring planti em ol poroman bilong mi. Long olgeta de ol i wetim wiken i kamap bambai ol i ken dring spak gen.
Mi lusim ol dispela poroman na mi bung wantaim ol Witnes Bilong Jehova. Mi poroman wantaim ol na dispela i strongim tru bel bilong mi—em ol manmeri i save laikim tru God na ol i wok strong long bihainim ol lo bilong em. Isi isi mi inap lusim pasin bilong dring planti.
GUTPELA SAMTING I PAINIM MI: Mi no gat wok moa long dring planti na bai mi ken stap amamas, na mi tenkyu tru long Jehova long dispela samting. Sapos mi bihainim yet ol pasin bilong mi long bipo, ating bikpela hevi o bagarap inap painim mi. Tasol mi bilip tru olsem i stap bilong mi long nau i gutpela tru.
Inap 7-pela yia pinis mi wok long brens ofis bilong ol Witnes Bilong Jehova long Slovenia. Nau mi save long Jehova na mi mekim wok bilong em, na dispela i mekim na i stap bilong mi i gat as tru bilong en.