I Gat Man i Save Harim Ol Beten?

“Mi bin gat tupela tingting olsem i gat God i stap o nogat. Maski i olsem, sampela taim mi save beten. Mi no save i gat man i harim o nogat, tasol mi laik tru olsem i gat wanpela i stap na i harim beten bilong mi. Mi no amamas na mi pilim olsem laip bilong mi i no gat as bilong en. Mi no laik bilip long God, long wanem, mi ting olsem ol man i no gat strong, ol tasol i save bilip long God.”—PATRICIA,a AIALAN.

SAMPELA taim yu bin pilim wankain olsem Patricia? Yu save beten tu maski yu gat tupela tingting olsem i gat God i stap o nogat? Sapos olsem, i no yu tasol, sampela narapela tu i pilim olsem. Skelim ol dispela ripot.

◼ Ol i bin mekim wok painimaut long 2,200 manmeri long Briten na 22 pesen i bilip olsem i gat wanpela God i stap tru na em i bin wokim olgeta samting na em i save harim ol beten. Na 55 pesen bilong ol i save beten sampela taim.

◼ Ol i bin mekim wok painimaut long 10,000 manmeri long 4-pela kontinen na ol i kisim save olsem 30 pesen bilong ol man husat i tok ol i no bilip long God ol i save beten.

Bilong Wanem Ol i Gat Tupela Tingting?

Wanpela man Inglan, nem bilong em Allan, i tok: “Mi save tok mi no bilip long God bikos mi ting lotu i kamap bilong kontrolim ol man na kisim mani. Na tu, sapos i gat God, mi ting bai i no gat planti pasin i no stret. Tasol sampela taim mi save sindaun isi na toktok long wanpela, tasol mi no save mi toktok long husat. Mi save askim mi yet olsem, ‘Hau na mi kamap na mi stap?’”

I gat sampela samting i mekim na ol man i gat tupela tingting olsem ol bai kisim bekim bilong beten bilong ol o nogat. Planti man i gat kain tingting olsem, long wanem, ol i wok long painim bekim bilong ol askim olsem:

◼ I gat wanpela Man Bilong Wokim yumi?

◼ Wai na ol lotu i save stiaim ol man long mekim ol pasin nogut?

◼ Wai na God i larim pen na hevi i stap?

Sapos yu save long bekim bilong ol dispela askim, yu ting yu bai bilip long pasin bilong beten?

[Futnot]