Wai na Man Bilong Harim Beten i Larim Pen na Hevi i Stap?
MASKI ol man i save beten, sampela i gat tupela tingting olsem God i stap tru o nogat. Bilong wanem ol i gat tupela tingting? Ating ol i ting olsem, long wanem, ol i lukim planti pen na hevi i pulap long dispela graun. Sampela taim yu save tingting olsem i gat wanem as na God i larim pen na hevi i stap?
Yu ting God i wokim ol man bambai ol i stap olsem sinman na karim pen na hevi? Yumi no inap rispektim wanpela god husat i wokim ol man bilong i stap olsem, a? Tasol tingim dispela: Sapos yu wokabaut raunim wanpela nupela kar na lukim olsem wanpela sait bilong en i gat krungut long en, yu ting yu bai tok olsem faktori i bin wokim em olsem? Yu no inap tok olsem, a? Yu bai tok olsem faktori i bin wokim em “gut tru,” tasol wanpela man o wanpela samting i bin kamapim dispela bagarap.
Olsem tasol, taim yumi amamas long lukim gutpela disain bilong ol samting God i wokim, na luksave long olsem wanem ol i wok gut wantaim, na skelim dispela wantaim ol hevi na pasin korapsen i bagarapim sindaun bilong ol man, yumi mas kisim wanem tingting? Baibel i skulim yumi olsem God i bin wokim namba 1 man na meri i gutpela olgeta, tasol bihain ol i kamapim hevi long ol yet. (Lo 32:4, 5) Yumi amamas long save olsem God i bin tok promis long stretim dispela hevi; em bai mekim na ol man bilong bihainim tok ol bai kamap gutpela olgeta. Tasol bilong wanem em i wet inap longpela taim?
Bilong Wanem Longpela Taim i Lus?
Longpela taim i lus, long wanem, i gat dispela askim long husat i mas bosim ol manmeri. Jehova i no bin wokim ol man bilong bosim ol yet, nogat. Em yet bai stap bos bilong ol. Baibel yet i tok: “Mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Sori tru olsem namba 1 man na meri i bin bikhet na sakim wok bos bilong God. Pasin bilong ol long brukim lo i mekim na ol i kamap sinman. (1 Jon 3:4) Dispela i mekim na ol i no stap gutpela moa, na ol i kamapim hevi long ol yet na long ol tumbuna pikinini bilong ol.
Inap planti tausen yia pinis, Jehova i larim ol man i bosim ol yet, na ol samting i kamap long bipo i soim klia olsem ol man i no inap bosim ol yet. Ol dispela samting i kamapim klia olsem olgeta gavman bilong graun i save kamapim pen na hevi. I no gat wanpela gavman i bin pinisim woa, pasin raskol, pasin i no stret, na ol sik.
Olsem Wanem God Bai Stretim Bek Ol Samting?
Baibel i tok promis olsem klostu nau bai God i kamapim nupela taim i gat stretpela pasin tasol long en. (2 Pita 3:13) Ol manmeri em long laik bilong ol yet ol i soim pasin laikim long narapela narapela na long God, ol tasol bai stap laip long dispela taim.—Lo 30:15, 16, 19, 20.
Baibel i tok tu olsem, long “de bilong bikpela kot” em klostu nau bai kamap, God bai pinisim pen na hevi na pinisim tu ol man i as bilong en. (2 Pita 3:7) Bihain long dispela, King em God yet i bin makim, Jisas Krais, bai bosim gut ol manmeri husat i bihainim tok. (Daniel 7:13, 14) Wok king bilong Jisas bai helpim ol man olsem wanem? Baibel i tok: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—Song 37:11.
Jisas em King bilong heven, na em bai stretim bek ol samting i bagarap—em bai pinisim sik, pasin bilong go lapun, na dai—em ol samting i bin kamap taim ol man i bikhet long Jehova em “as tru bilong laip.” (Song 36:9) Jisas bai oraitim olgeta man husat i daun long gutpela wok king bilong em. Aninit long wok king bilong em, ol dispela tok promis bilong Baibel bai kamap tru:
◼ “Long dispela taim, i no gat man . . . bai i tok olsem, ‘Mi gat sik.’ Na Bikpela bai i lusim sin bilong ol manmeri.”—Aisaia 33:24.
◼ “[God] bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.”—Revelesen 21:4.
Yumi save olsem klostu nau God bai truim tok promis bilong em long pinisim olgeta pen na hevi, na dispela i mekim gut bel bilong yumi, a? Long nau, maski God i larim ol pen na hevi i stap yet, yumi mas bilip tru olsem em i save harim ol beten bilong yumi.
God i stap tru. Em inap harim yu, na em inap harim tu krai bilong yu taim yu pilim bikpela pen na hevi. Na em i laik tru long lukim yu i stap amamas long dispela taim we yu bai i no gat tupela tingting moa, na olgeta pen na hevi bai pinis.