Yu Save Long Dispela?

Bilong wanem ol man long taim bilong raitim Baibel i yusim kolta olsem simen?

▪ Baibel i tok long ol man i bin wokim taua bilong Babel na i tok “ol i gat brik bilong wokim haus samting. Na ol i gat kolta tu bilong simenim ol dispela brik wantaim.”—Stat 11:3.

Kolta i save kamap nating. Em i save kamap long oil, na em i stap long planti hap bilong Mesopotemia we em i save boil i kamaut long graun na kamap strong olsem glu. Long taim bilong ol man i bin raitim Baibel, planti man i save yusim dispela kolta olsem simen. Wanpela buk i tok, kolta em “i gutpela bilong yusim olsem simen long ol haus ol i wokim long drai brik.”

Wanpela atikol long magasin Archaeology i stori long ol man i go raun lukim wanpela olpela taua long taun Ur bilong bipo, long Mesopotemia. Man bilong raitim stori i tok: “Kolta bilong simenim ol brik—em wanpela bilong ol fes samting i kam long ol oil bilong sauten Irak—i stap ples klia yet namel long ol brik em paia i kukim. Dispela blakpela kolta, bipo em i mekim ol lain man i stap wanbel wantaim, tasol nau em i wanpela bilong ol samting i stap olsem as na pasin birua na pait i stap insait long kantri. Ol man i bin yusim kolta bilong joinim ol brik bilong Sumeria em ol i wokim long graun malumalum na bai wara i no ken i go insait long en, na dispela i bin mekim na ol dispela brik i stap inap planti handret yia.”

Wanem kain “pepa” i bin stap long taim bilong ol man i raitim Baibel?

▪ Dispela askim i kamap taim yumi skelim tok bilong Jon em man bilong raitim Baibel, em i tok: “Mi gat planti samting long raitim yu, tasol mi no laik rait long pepa na ing.”—2 Jon 12, King Jems Nupela Testamen.

Tok Grik kharʹtes em ol i tanim olsem “pepa” i makim pepa ol i wokim long papairas, em wanpela kain pitpit i save kamap long wara. Wanpela buk i stori long pasin bilong wokim ol pepa long bun bilong dispela pitpit na i tok: “Ol bun bilong pitpit, sampela i longpela inap 3 mita, ol i save rausim skin bilong en na insait bilong en ol i save slaisim na slipim antap long narapela narapela olsem long pasin bilong wokim mat, na ol i save paitim wantaim hama ol i wokim long diwai na bihain ol i save sikirapim na smutim antap bilong en.”

Ol saveman bilong painim ol samting bilong bipo i bin painim planti olpela pepa papairas long Isip na long ol hap i stap long solwara Detsi. Long dispela hap ol i bin painim sampela papairas i gat tok bilong Baibel na i bilong taim bilong Jisas o paslain long en. Yumi ken ting olsem ol aposel i bin yusim dispela pepa long raitim ol pas bilong ol long bipo, na nau tok bilong ol dispela pas i stap long Baibel.

[Ol Piksa Kredit Lain long pes 11]

Spectrumphotofile/ photographersdirect.com