“Mi No Ken Pret Long Wanpela Samting”

“Maski sapos ol birua i kam pait long mi, mi bilip long God na mi no ken surik.” —SNG. 27:3.

OLSEM WANEM OL DISPELA SKRIPSA I STRONGIM BEL BILONG YU?

Song 27:1

Song 27:4

Song 27:11

1. Song 27 bai helpim yumi long bekim wanem ol askim?

BILONG WANEM yumi wok strong moa long autim tok maski ol samting bilong dispela graun i go nogut moa yet? Bilong wanem yumi amamas long yusim bikpela haptaim na strong bilong yumi long autim tok maski i gat ol bikpela hevi bilong mani? Olsem wanem yumi inap sanap strong yet nau long dispela taim we planti manmeri i pret long ol samting bai kamap bihain? Singsing bilong King Devit long Song 27 bai bekim ol dispela askim.

2. Pasin bilong pret inap mekim wanem long man? Tasol yumi save Jehova inap mekim wanem?

² Bilong kirapim dispela song Devit i tok: “God em i lait bilong mi na em i helpim bilong mi. Olsem na mi no ken guria long wanpela man. Bikpela tasol i save lukautim mi, olsem na mi no ken pret long wanpela samting.” (Sng. 27:1) Pasin bilong pret nogut tru inap daunim strong bilong man na em i no inap mekim wanpela samting. Tasol man i trastim Jehova i gat strongpela bel na em i no save pret nogut tru. (1 Pita 3:14) Sapos Jehova i stap olsem strongpela banis bilong yumi na yumi trastim em, orait bai yumi ‘no gat hevi na bai yumi i no pret, long wanem, yumi save, samting nogut i no inap kamap long yumi.’ (Snd. 1:33; 3:25) Bilong wanem i olsem?

‘JEHOVA EM I LAIT NA HELPIM BILONG MI’

3. Olsem wanem Jehova em i lait bilong yumi? Na yumi mas mekim wanem?

³ Taim Baibel i tok “God em i lait bilong mi,” dispela i makim olsem Jehova i save skulim yumi long tok i tru. (Sng. 27:1) Lait tru inap helpim yumi long luksave long samting i pasim rot o inap givim hevi long yumi, tasol lait yet i no inap rausim dispela samting, nogat. Yumi yet i gat wok long abrusim hevi. Long wankain pasin, Jehova i helpim yumi long luksave long as bilong ol samting i wok long kamap long graun. Em i tok lukaut long yumi long ol samting bilong dispela graun we inap bagarapim yumi. Long Baibel em i givim yumi skultok i save helpim yumi long olgeta taim. Man bilong raitim song i tok olsem ol lo bilong God i mekim na em i gat bikpela savetingting moa, winim ol birua na ol tisa bilong em. Taim yumi bihainim ol stiatok bilong Baibel, yumi tu inap kisim bikpela savetingting.—Sng. 119:98, 99, 130.

4. (a) Bilong wanem Devit i tok olsem Jehova em i helpim bilong em? (b) Jehova bai kisim bek ol wokboi bilong en long wanem taim?

⁴ Tok bilong Devit long Song 27:1, i soim yumi olsem Devit i no bin lusim tingting long olsem wanem Jehova i bin kisim bek em long bipo. Olsem, Jehova i bin kisim bek Devit long wanpela laion na wanpela bea. Na tu, Jehova i bin helpim em long daunim traipela man Goliat. Bihain, Jehova i bin kisim bek Devit long olgeta wan wan taim King Sol i bin traim long sutim em long spia. (1 Sml. 17:37, 49, 50; 18:11, 12; 19:10) Long dispela as, Devit i tok olsem Jehova em i helpim bilong em. Jehova bai kisim bek ol wokboi bilong en wankain olsem em i bin kisim bek Devit. Em bai mekim long wanem taim? Em bai mekim long taim “traipela hevi tru” i kamap.—Rev. 7:14; 2 Pita 2:9.

TINGIM OLGETA WAN WAN TAIM JEHOVA I BIN HELPIM YU

5, 6. (a) Olsem wanem ol memori inap givim bikpela strong moa long yumi? (b) Bilong wanem i gutpela long tingim ol samting Jehova i bin mekim bilong helpim lain bilong en long bipo?

⁵ Long Song 27:2, 3, yumi ken ritim stori bilong wanpela bikpela samting em inap helpim yumi long no ken pret. (Ritim.) Devit i bin tingim ol narapela narapela taim we Jehova i bin kisim bek em. (1 Sml. 17:34-37) Ol dispela memori bilong Devit i strongim em long karim ol bikpela hevi. Yu inap tingim taim we Jehova i bin helpim yu long bipo? Yu save kisim strong taim yu tingim ol dispela samting? Olsem, ating yu bin i gat wanpela hevi na yu beten planti long dispela samting. Olsem wanem? Bihain yu bin luksave long olsem wanem Jehova i bin givim yu savetingting na strong long karim dispela hevi? Yu inap tingim hau Jehova i bin helpim yu long stretim sampela hevi we i givim hatwok long yu long mekim wok bilong em wantaim amamas? O yu inap tingim olsem wanem em i bin opim rot long yu long mekim sampela wok bilong em i nupela long yu? (1 Kor. 16:9) Yu pilim olsem wanem long nau taim yu tingim bek ol dispela samting? Ol memori bilong yu long ol dispela samting i mas kirapim yu long bilip yet olsem Jehova inap helpim yu long stretim o karim ol bikpela hevi.—Rom 5:3-5.

⁶ Bai yumi mekim wanem sapos wanpela strongpela gavman i laik bagarapim ol Witnes Bilong Jehova olsem wanpela oganaisesen? I no longtaim i go pinis na sampela i bin traim long mekim olsem, tasol ol i no inap. Sapos yumi tingim ol samting Jehova i bin mekim bilong helpim lain bilong em long bipo, orait bai yumi stap strong na karim ol hevi em inap kamap bihain.—Dan. 3:28.

YUMI LAIKIM TUMAS LOTU I TRU

7, 8. (a) Long Song 27:4, Devit i askim Jehova long wanem samting? (b) Wanem dispela bikpela tempel bilong Jehova em ol i no bin wokim long han? Olsem wanem yumi lotu long God long dispela tempel long nau?

⁷ Pasin bilong laikim lotu i tru i save givim strong long yumi. (Ritim Song 27:4, NW.)a Long taim bilong Devit, “haus bilong Jehova” em haus lotu sel, long wanem, long dispela taim i no gat tempel. Devit i bin redim olgeta samting na bai pikinini bilong en Solomon inap wokim wanpela naispela tempel bilong Jehova. Planti handret yia bihain, Jisas i tok olsem taim bai kamap we ol manmeri bai i no gat wok long go long tempel long lotuim Jehova. (Jon 4:21-23) Jehova i stretim rot we yumi inap lotuim em long pasin em i laikim. Em i orait long pasin bilong yumi long lotuim em sapos yumi bilip long ofa bilong Jisas bilong baim bek ol man. Long Hibru sapta 8 i go 10, aposel Pol i tok dispela rot Jehova i stretim we bai yumi inap lotuim em, i olsem wanpela bikpela tempel “ol man i no bin wokim long han.” Pol i tok dispela tempel i kamap taim Jisas i kisim baptais na givim em yet bilong mekim laik bilong Jehova. Dispela i kamap long yia 29 C.E. (Hib. 10:10) Olsem wanem yumi lotuim God long dispela tempel? Em long rot bilong beten ‘wantaim gutpela bel na bilip olsem yumi ken go klostu long God,’ na long pasin bilong autim tok long ol arapela long Jehova na yumi no pret. Na tu, yumi lotu long dispela tempel taim yumi go long ol miting na mekim famili lotu. (Hib. 10:22-25) Pasin bilong yumi long laikim tok i tru bai helpim yumi long mekim yet ol dispela samting long dispela taim nogut bilong las de.

⁸ Long olgeta hap bilong graun, ol wokboi bilong Jehova i lusim bikpela haptaim moa long autim tok. Ol i wok long lainim ol nupela tokples, na go sindaun long hap we i no gat planti pablisa bilong autim tok bilong Kingdom. Ol i soim olsem ol i bihainim pasin bilong man bilong raitim song. Em i askim Jehova long wanpela samting tasol. Em i laik ‘lukim gutpela pasin bilong Jehova, na em i laik lukim tempel bilong em na amamas.’ Ol wokboi bilong Jehova long nau i laik bai Jehova i blesim ol, na ol i laik lotuim em maski wanem samting i kamap.—Ritim Song 27:6.

BILIP OLSEM GOD BAI HELPIM YU

9, 10. Song 27:10 i kamapim wanem tok promis?

⁹ Tok bilong Devit i kamapim klia olsem em i bilip tru long Jehova. Em i tok: “Maski papa na mama i givim baksait long mi, Bikpela bai i lukautim mi.” (Sng. 27:10) Long 1 Samuel sapta 22, yumi kisim save olsem papamama bilong Devit i no bin lusim em. Tasol long nau i gat planti manmeri em famili bilong ol i givim baksait long ol. Planti manmeri em famili i bin givim baksait long ol, ol i bin kisim helpim long kongrigesen Kristen na ol pilim olsem kongrigesen i bin lukautim ol.

¹⁰ Jehova i redi long lukautim ol wokboi bilong en maski ol arapela i givim baksait long ol. Olsem na yumi ken save gut olsem em bai lukautim ol taim ol arapela hevi i bungim ol. Olsem, sapos yumi wari long olsem wanem bai yumi lukautim famili bilong yumi long sait bilong skin, yumi mas save olsem Jehova bai helpim yumi. (Hib. 13:5, 6) Em i kliagut long sindaun bilong yumi na long ol samting yumi nidim.

11. Ol man i gat wanem tingting long yumi ol Witnes Bilong Jehova taim yumi soim olsem yumi bilip long Jehova? Kamapim wanpela eksampel.

¹¹ Tingim stori bilong Victoria, wanpela Baibel sumatin long Laibiria. Em i gat 3-pela pikinini, na man i bin stap nating wantaim em i lusim em. Maski Victoria i no gat haus o wok mani, em i no lusim pasin bilong stadi long Baibel, na bihain em i kisim baptais. Long wanpela de pikinini meri bilong en, husat i gat 13 krismas, i painim wanpela bek i pulap long mani. Victoria na pikinini meri i no kaunim hamas mani i stap long bek, long wanem, ol i no laik bai traim i kamap long ol long kisim samting we i no bilong ol. Olsem na wantu ol kirap painim soldia husat em i papa bilong bek. Taim ol i painim em pinis, em i tok sapos olgeta manmeri i onest olsem ol Witnes Bilong Jehova, ol man bai stap gut na bel isi. Victoria i yusim Baibel bilong soim soldia promis bilong Jehova long kamapim nupela taim. Dispela soldia i tingim tru bilip na pasin onest bilong Victoria, olsem na em i givim bikpela hap bilong dispela mani i go long Victoria. Ol man long olgeta hap bilong graun i save olsem ol Witnes Bilong Jehova i save onest long olgeta taim. Ol Witnes i bilip tru olsem Jehova bai lukautim ol, olsem na ol i save onest.

12. Bilong wanem yumi mekim yet wok bilong Jehova maski wok skin o mani bilong yumi inap lus? Kamapim wanpela eksampel.

¹² Tingim Thomas, wanpela pablisa bilong Siera Leon husat i no baptais. Em kirap mekim wok tisa, tasol klostu wanpela yia olgeta em i no kisim pe. Thomas i mas toktok wantaim edministreta bilong skul bilong kisim pe bilong en. Tasol edministreta em wanpela pris, na em i tokim Thomas olsem skul i no orait long ol bilip bilong ol Witnes Bilong Jehova. Pris i tok sapos Thomas i laik wok yet em i no ken stap moa olsem wanpela Witnes Bilong Jehova. Thomas i lusim dispela wok na em i no kisim pe bilong en. Bihain, em i kirap mekim wok long stretim ol redio na mobail fon. I gat planti eksampel i kamapim klia olsem sapos yumi trastim Jehova, yumi no ken pret na ting olsem yumi bai sot long ol samting yumi nidim. Jehova i bin wokim olgeta samting na oltaim em i save was long ol manmeri bilong en, yumi save em bai lukautim yumi.

13. Long planti kantri i stap rabis, bilong wanem ol bratasista i bisi tru long autim tok?

¹³ Long planti kantri i stap rabis, ol bratasista i bisi tru long autim tok. Bilong wanem? Wanpela brens ofis i tok olsem planti manmeri husat i amamas long stadi long Baibel, ol i no gat wok, olsem na ol i gat bikpela haptaim moa bilong stadi. Na tu, ol bratasista i gat bikpela haptaim moa bilong autim tok. Kwiktaim ol manmeri i wanbel olsem yumi stap long taim bilong las de, long wanem, ol i lukim ol hevi long hap bilong ol yet. Long narapela kantri, planti pablisa i lukautim winim 3-pela Baibel stadi. Wanpela misineri i stap winim 12-pela yia long dispela kantri, em i tok planti bratasista i gat bikpela haptaim moa long autim tok na lukautim ol Baibel stadi bikos i no gat planti samting bilong pulim nabaut tingting bilong ol.

14. God inap lukautim bikpela lain manmeri long wanem ol rot?

¹⁴ Jehova i tok promis pinis long helpim na kisim bek ol manmeri bilong en olsem wanpela lain, na yumi bilip olsem em bai truim tok promis bilong em. (Sng. 37:28; 91:1-3) Bikpela lain manmeri bai abrusim bagarap long taim bilong “traipela hevi tru.” (Rev. 7:9, 14) Olsem na God bai lukautim dispela bikpela lain manmeri taim em i no larim ol man long bagarapim ol olsem wanpela lain nau long dispela taim bilong las de. Narapela rot we Jehova bai lukautim ol, em long rot bilong givim ol olgeta samting ol i mas i gat na bai ol inap karim ol hevi na stap yet olsem pren bilong em. Na long taim bilong Armagedon, Jehova bai lukautim ol wokboi bilong em.

‘BIKPELA, LAINIM MI LONG SAMTING YU LAIK BAI MI MEKIM’

15, 16. Taim yumi bihainim ol tok God i skulim yumi long en, dispela i helpim yumi olsem wanem? Kamapim wanpela eksampel.

¹⁵ Bilong stap strong yet na no ken pret, oltaim yumi mas larim God i skulim yumi. Devit i tok: “Bikpela, yu ken lainim mi long samting yu laik bai mi mekim. . . . na yu ken bringim mi long gutpela rot.” (Sng. 27:11) Bilong kisim skul i kam long God, yumi mas putim gut yau long tok bilong Baibel na ol tok oganaisesen bilong Jehova i givim bilong stiaim yumi. Na kwiktaim bihainim ol tok yumi lainim. Olsem, planti i bin bihainim tok na lusim sampela samting bilong skin. Ol i bekim ol dinau na salim ol samting ol i no gat wok long en. So taim bikpela hevi i kamap long mani, ol i no gat bikpela wari long sait bilong mani. Nau ol i no gat wok long bekim dinau long ol samting ol i no nidim. Na tu, ol inap mekim bikpela wok moa long autim tok. Yumi mas askim yumi yet olsem, ‘Mi save kirap kwik long bihainim tok mi ritim long Baibel na long ol buk na nius em wokboi i gat savetingting i kamapim, na mi mekim olsem maski dispela i givim hatwok long mi?’—Mat. 24:45.

¹⁶ Taim yumi larim Jehova i skulim yumi na bosim wokabaut bilong yumi, orait bai i no gat as na yumi pret. Wanpela painia oltaim long Amerika i laik kisim wanpela wok long ples wok bilong em we inap helpim em na famili long mekim yet wok painia. Tasol supavaisa i tok brata i no inap kisim dispela wok, long wanem, em i no gat kolis digri. Sapos dispela samting i painim yu, bai yu bel hevi long yu insait long fultaim sevis na yu no bin go long kolis o yunivesiti? Tupela wik bihain, kampani i pinisim dispela supavaisa na narapela supavaisa i askim brata long ol mak em i laik winim. Brata i tokim em olsem em yet na meri bilong em ol i Witnes Bilong Jehova na ol i save autim tok fultaim na ol i laik mekim yet dispela wok. Tasol paslain long brata inap mekim sampela tok moa, supavaisa i tok: “Nau mi save long as na yu narapela kain! Taim papa bilong mi i laik dai, tupela wanbilip bilong yupela i kam na ritim Baibel long em long olgeta de. Mi bin promisim mi yet olsem sapos bihain mi gat rot long helpim wanpela Witnes Bilong Jehova, bai mi mekim olsem.” Long neks moning, brata i kisim dispela wok em narapela supavaisa i no laik givim long em. Taim yumi putim Kingdom i stap nambawan long laip bilong yumi, Jehova bai truim tok promis bilong em long givim yumi olgeta samting yumi mas i gat.—Mat. 6:33.

YUMI MAS I GAT BILIP NA HOP

17. Wanem samting bai helpim yumi long sakim pasin bilong pret long ol samting bai kamap bihain?

¹⁷ Devit i helpim yumi long kliagut olsem i bikpela samting tru long yumi mas i gat bilip na hop. Em i pilim olsem em bai i no gat hop sapos em i no gat bilip olsem ‘bihain em bai lukim God i mekim gut long ol manmeri bilong em.’ (Sng. 27:13) Laip bilong yumi bai olsem wanem sapos God i no givim hop long yumi na yumi no save long ol tok em Song 27 i kamapim? Olsem na nau long taim bilong las de, yumi mas beten yet long Jehova i givim strong long yumi na helpim yumi long abrusim bagarap long Armagedon.—Ritim Song 27:14.

[Futnot]

[Piksa long pes 23]

Devit i kisim strong taim em i tingim ol samting Jehova i mekim bilong kisim bek em

[Piksa long pes 25]

Olsem wanem? Taim i no gat wok mani samting, yu save tingim olsem dispela i givim rot long yu long mekim bikpela wok moa bilong Jehova?