Bihainim Gutpela Tingting​—Pret Long God!

“Sapos yu laik kisim gutpela tingting, orait pastaim yu mas aninit [“pret”, NW] long Bikpela.”​—SINDAUN 9:10.

1. Bilong wanem planti man i hatwok long kliagut long pasin bilong pret long God?

BIPO, taim ol man i tok long wanpela man olsem em i man bilong pret o aninit long God, ol i ting dispela em i gutpela tok. Tasol long nau, planti man i ting dispela tok em i samting bilong bipo na i hatwok long kliagut long en. Ating ol i kamapim kain askim olsem, ‘Sapos God em i gat pasin laikim, bilong wanem mi mas pret long em?’ Ol i ting pasin bilong pret em i samting nogut, na pret i mekim na man i no inap mekim wanpela samting. Tasol pasin bilong pret long God i gat bikpela insait bilong en, em i no wanpela samting man i pilim na em tasol, nogat. Nau bai yumi stori long en.

2, 3. Wanem samting i insait long pasin bilong pret long God?

² Long Baibel pasin bilong pret o aninit long God em i gutpela samting. (Aisaia 11:​2, 3) Em i makim pasin bilong daun olgeta na rispek tru long God, na i no laik tru long mekim samting em i no laikim. (Song 115:11) Na tu, dispela i makim olsem man i orait long ol lo bilong God na strong long bihainim, na em i gat laik long mekim ol samting God i tok i stret long mekim o i no stret long mekim. Wanpela buk i tok olsem kain pasin bilong pret em i “wanpela tingting man i gat long God na i kirapim man long bihainim savepasin na abrusim olgeta kain pasin nogut.” Olsem na i stret Baibel i tokim yumi: “Sapos yu laik kisim gutpela tingting, orait pastaim yu mas aninit [“pret,” NW] long Bikpela.”​—Sindaun 9:10.

³ Tru tumas, pasin bilong pret long God i insait long planti samting man i mekim. Man i save pret long God bai i stap longpela taim, em bai kisim savetingting na amamas, bel isi, gutpela sindaun, hop, na bilip. (Song 2:11; Sindaun 1:7; 10:27; 14:26; 22:4; 23:​17, 18; Aposel 9:31) Pasin bilong pret i poroman wantaim pasin bilong bilip na pasin laikim. Em i insait long pasin bilong yumi long pas gut wantaim God na ol samting yumi mekim long ol narapela man. (Lo 10:12; Jop 6:14; Hibru 11:7) Na tu, dispela pasin i mekim na yumi bilip tru olsem Papa bilong yumi long heven em i save tingim yumi na em i redi long lusim tingting long ol rong bilong yumi. (Song 130:4) Ol man i no laik tanim bel, ol tasol i mas pret nogut tru long God.a​—Hibru 10:​26-31.

Lain Long Pret Long Jehova

4. Wanem samting inap helpim yumi long “lain long pret long Jehova”?

⁴ Pasin bilong pret long God em i bikpela samting taim yumi laik makim ol samting yumi laik mekim na bilong God i ken mekim gut long yumi. Orait, olsem wanem yumi ken “lain long pret long Jehova”? (Lo 17:​19, NW) Planti stori bilong ol man na meri i pret long God i stap long Baibel bilong “skulim yumi.” (Rom 15:4) Bilong helpim yumi long kliagut long pasin bilong pret long God, yumi ken skelim stori bilong wanpela bilong ol dispela man, em King Devit bilong Israel long bipo.

5. Taim Devit i lukautim ol sipsip, olsem wanem em i lain long pret long Jehova?

⁵ Jehova i rausim namba wan king bilong Israel, em Sol, long wanem, Sol i pret long ol man na em i no pret long God. (1 Samuel 15:​24-26) Tasol ol samting Devit i mekim long i stap bilong em na pasin bilong em long pas gut wantaim Jehova i kamapim klia olsem em i man bilong pret long God. Kirap long taim em i yangpela yet, Devit i save lukautim ol sipsip bilong papa bilong em. (1 Samuel 16:11) Long nait taim em i stap ausait na lukautim ol sipsip, em inap lukim ol sta na ating dispela i bin helpim em long kliagut long pasin bilong pret long Jehova. Maski Devit inap kisim save long liklik hap tasol bilong ples antap, em i kisim stretpela tingting​—i stret yumi mas rispektim na givim ona long God. Em i tok: “Taim mi lukim skai yu bin wokim, na taim mi lukim mun na olgeta sta yu bin putim i stap antap, mi save ting olsem. Mipela man i wanem samting na yu save tingting long mipela? Mipela i samting nating. Bilong wanem yu save was gut long mipela?”​—Song 8:​3, 4.

6. Taim Devit i luksave long biknem bilong Jehova, dispela i mekim wanem long em?

⁶ Devit i pilim tru olsem em i samting nating taim em i skelim em yet wantaim ol samting bilong ples antap. Dispela i no pretim em, nogat, dispela i kirapim em long litimapim nem bilong Jehova na tok: “Skai i soim yumi olsem God em i nambawan tru. Olgeta samting bilong antap i soim yumi gutpela wok bilong em.” (Song 19:1) Dispela pasin bilong Devit long daun long God i mekim na em i go klostu tru long Jehova na i kirapim Devit long lain na bihainim ol stretpela pasin bilong Em. Pilim tingting bilong Devit taim em i tok long Jehova olsem: “Yu tasol yu gat bikpela strong. Na yu tasol yu save mekim ol kain kain gutpela gutpela samting. Yu wanpela tasol yu God tru.” “O Jehova, skulim mi long pasin yu laik bai mi bihainim. Bai mi wokabaut long tok i tru bilong yu. Skulim mi na bai mi givim bel olgeta long pret long nem bilong yu.”​—Song 86:​10, 11; NW.

7. Olsem wanem pasin bilong pret long God i helpim Devit long pait long Goliat?

⁷ Lain Filistia i kam insait long kantri Israel, na strongpela man bilong ol long pait em Goliat, em i longpela tru inap olsem 3-pela mita, em i sutim tok long ol Israel na i tok: “Yupela makim wanpela man i kam pait long mi. Sapos em i win na kilim mi i dai, orait bai mipela i kamap wokboi nating bilong yupela.” (1 Samuel 17:​4-10) Sol wantaim olgeta ami bilong em ol i pret nogut tru​—tasol Devit i no pret. Em i save olsem em i mas pret long Jehova wanpela tasol, na i no long wanpela man nating bilong graun, maski em i strongpela man. Devit i tokim Goliat: “Mi kam pait long yu long nem bilong Bikpela I Gat Olgeta Strong, em God i bosim ol ami bilong mipela Israel. . . . Na olgeta man i stap hia bai i lukim olsem, Bikpela i save kisim bek ol manmeri bilong en long strong bilong em yet. Em i no save wari long ol man i holim spia na bainat. Nogat. Bikpela yet bai i winim dispela pait.” Long katapel na wanpela ston​—na helpim Jehova i givim em​—Devit i kilim i dai Goliat.​—1 Samuel 17:​45-47.

8. Ol man i save pret long God, em Baibel i stori long ol, ol i skulim yumi long wanem samting?

⁸ Wankain olsem Devit, ol birua inap mekim nogut long yumi o yumi inap karim ol hevi. Yumi ken mekim wanem? Yumi ken bihainim wankain pasin olsem Devit na ol narapela man i stap gut long Jehova i bin mekim​—yumi mas pret long God. Pasin bilong pret long Jehova inap daunim pasin bilong pret long man. Gutpela wokman bilong God, Nehemia, i tokim ol wanlain Israel em ol man i birua long ol, olsem: “Yupela i no ken pret long ol birua. Yupela i mas tingim gut dispela samting, Bikpela em i strongpela na olgeta man i save pret long em.” (Nehemia 4:14) Long rot bilong helpim i kam long Jehova, Devit, Nehemia, na ol narapela gutpela wokman bilong God i bin inapim wok God i givim ol. Yumi tu inap mekim olsem, sapos yumi pret long God .

Pret Long God na Karim Ol Hevi

9. Wanem ol samting i painim Devit na em i soim olsem em i pret long God?

⁹ Bihain long Devit i kilim i dai Goliat, Jehova i helpim em long winim planti pait. Tasol Sol em man bilong jeles, em i traim long kilim i dai Devit. Pastaim em i kirap nating na traim long kilim Devit, bihain em i traim long pasin giaman na trik, na laspela taim em i mekim long rot bilong ami. Maski Jehova i bin tokim Devit olsem em bai kamap king, inap planti yia Devit i mas ranawe, mekim pait, na wetim taim Jehova i makim bilong em i ken kamap king. Taim ol dispela samting i painim em, Devit i soim olsem em i pret long trupela God.​—1 Samuel 18:​9, 11, 17; 24:2.

10. Olsem wanem Devit i soim olsem em i pret long God long taim bilong hevi?

¹⁰ Wanpela taim, Devit i ranawe i go long ples bilong Akis, em king bilong taun Get long Filistia, em ples bilong Goliat. (1 Samuel 21:​10-15) Ol wokman bilong king i tok olsem Devit em i birua bilong ol. Devit i mekim wanem long dispela taim bilong hevi? Em i beten na kamapim hevi bilong em long Jehova. (Song 56:​1-4, 11-13) Tru, Devit i giaman long mekim olsem em i longlong bambai em i ken ranawe, tasol Devit i save olsem Jehova tasol i bin helpim em long abrusim bagarap long rot bilong blesim samting em i mekim. Pasin bilong Devit long bilip tru na wet long Jehova i soim olsem Devit em i man bilong pret long God.​—Song 34:​4-6, 9-11.

11. Olsem Devit i bin mekim, olsem wanem yumi ken soim olsem yumi pret long God taim hevi i painim yumi?

¹¹ Olsem Devit, yumi inap soim olsem yumi pret long God long rot bilong bilip long tok promis bilong em long helpim yumi long karim ol hevi. Devit i tok: “Yu mas putim laip bilong yu long han bilong Bikpela. Bilip strong long em, na em bai i helpim yu.” (Song 37:5) Tasol dispela i no makim olsem yumi putim tasol hevi bilong yumi long han bilong Jehova na yumi yet i no mekim wanpela samting bilong stretim dispela hevi na yumi wetim em long stretim hevi bilong yumi, nogat. Devit i no beten tasol long God i helpim em na bihain em yet i no mekim wanpela samting. Nogat. Em i mekim wok long strong na save Jehova i givim em na i mekim ol samting bilong stretim hevi bilong em. Tasol Devit i save olsem man yet i no inap mekim na ol samting i kamap gutpela. Yumi tu i mas i gat wankain tingting. Yumi mas mekim olgeta samting yumi inap mekim bilong stretim hevi bilong yumi, na bihain larim dispela hevi i stap long han bilong Jehova. Planti taim yumi yet i no inap mekim wanpela samting, yumi mas wetim Jehova i helpim yumi. Taim yumi mekim olsem yumi kamapim klia pasin bilong yumi long pret long God. Tok Devit i mekim i ken strongim bel bilong yumi, em i tok: “God em i pren tru bilong ol manmeri i save stap aninit [“pret,” NW] long em.”​—Song 25:14.

12. Bilong wanem yumi mas ting olsem beten bilong yumi i bikpela samting? Yumi no ken kisim wanem kain tingting?

¹² Olsem na yumi mas tingim olsem beten bilong yumi na pasin bilong yumi long pas gut wantaim God em i bikpela samting. Taim yumi beten long Jehova, yumi mas ‘bilip olsem God i stap na em i save mekim gut tru long ol man i wok long painim em.’ (Hibru 11:6; Jems 1:​5-8) Na taim em i helpim yumi, yumi mas “tenkyu long God,” olsem aposel Pol i tokim yumi long mekim. (Kolosi 3:​15, 17) Yumi no ken kamap olsem ol man em wanpela Kristen God i makim i stori long ol. Em i tok: “Ol i ting God em i wanpela wokboi i stap long heven. Taim ol i laikim wanpela samting, ol i laik bai ol samting i kamap wantu tasol. Na taim ol i kisim pinis samting ol i laikim, orait ol i no bisi moa long em.” Kain pasin i soim olsem ol i no pret long God.

Taim Pasin Bilong Pret Long God i No Strong Tumas

13. Wanem taim Devit i no soim olsem em i rispek long Lo Bilong God?

¹³ Jehova i helpim Devit long taim bilong hevi na dispela i mekim na Devit i pilim tru pasin bilong pret long God na em i bilip moa yet long God. (Song 31:​22-24) Tasol tripela taim pasin bilong Devit long pret long God i no strong tumas, na em i mekim ol bikpela rong. Namba wan taim, em taim Devit i stretim rot bilong karim Bokis Kontrak bilong Jehova i go long Jerusalem long wanpela karis, na i no long rot bilong ol Livai i karim i go, olsem Lo Bilong God i makim. Taim Usia i stiaim karis i go, em i holim Bokis Kontrak na bai bokis i no ken pundaun, na wantu em i dai, long wanem, em i “ting Bokis Kontrak i samting nating na em i holim.” Tru, Usia i mekim bikpela rong, tasol bikpela samting em asua bilong Devit long em i no bin bihainim stret Lo Bilong God na dispela hevi i kamap. Pasin bilong pret long God i makim olsem yumi mas bihainim pasin bilong God long mekim ol samting.​—2 Samuel 6:​2-9; Namba 4:15; 7:9.

14. Wanem samting i kamap taim Devit i kaunim ol Israel?

¹⁴ Bihain, Satan i givim tingting long Devit long kaunim namba bilong ol man Israel i save pait. (1 Stori 21:1) Taim em i mekim olsem, Devit i soim olsem pasin bilong em long pret long God i no strong tumas, na dispela i mekim na 70,000 manmeri Israel i dai. Maski Devit i tanim bel, em na lain bilong em i kisim bikpela hevi tru.​—2 Samuel 24:​1-16.

15. Wanem samting i mekim na Devit i mekim pasin pamuk?

¹⁵ Long wanpela narapela taim tu Devit i no pret tumas long God na dispela i kirapim em long mekim pasin pamuk wantaim Batseba, meri bilong Uria. Devit i save olsem pasin pamuk na pasin bilong aigris long meri bilong narapela man i no stret. (Kisim Bek 20:​14, 17) Hevi i kirap taim Devit i lukim Batseba i waswas i stap. Pasin bilong pret long God i mas kirapim Devit long lukluk long narapela hap na tingting long narapela samting. Tasol Devit i no mekim olsem, nogat, Devit i wok long ‘lukluk’ long em i go inap pasin mangal i daunim pasin bilong em long pret long God. (Matyu 5:28; 2 Samuel 11:​1-4) Devit i lusim tingting olsem Jehova i insait long olgeta samting em i mekim.​—Song 139:​1-7.

16. Devit i kisim wanem ol hevi long rong em i bin mekim?

¹⁶ Devit i mekim pasin pamuk wantaim Batseba na kamapim wanpela pikinini man. Bihain liklik, Jehova i salim profet bilong em Natan i go lukim Devit na tokaut long sin Devit i bin mekim. Taim Devit i luksave long rong em i bin mekim, em i tanim bel na em i kirap gen long pret long God. Devit i askim Jehova long no ken rausim em i go longwe long Em na no ken rausim holi spirit long em. (Song 51:​7, 11) Jehova i lusim rong bilong Devit na daunim mak bilong strafe em i givim long Devit, tasol Em i no banisim em long ol samting nogut pasin bilong Devit i kamapim. Pikinini man bilong Devit i dai, na kirap long dispela taim na i go ol hevi i wok long painim famili bilong em. Man! Em wanpela bikpela hevi tru Devit i kisim, long wanem, pasin bilong em long pret long God i no strong tumas!​—2 Samuel 12:​10-14; 13:​10-14; 15:14.

17. Stori long bel hevi i save kamap taim man i mekim rong.

¹⁷ Long nau tu, sapos yumi no pret long God na yumi mekim pasin pamuk, yumi inap karim bikpela hevi inap longpela taim. Tingim bel hevi bilong wanpela yangpela meri marit taim em i kisim save olsem man bilong em husat i Kristen i bin mekim pasin pamuk taim em i wok i stap long narapela kantri. Dispela meri i kirap nogut tru na bel hevi stret, na em i putim pes insait long han bilong em na i krai nogut tru. Hamas wik o mun i mas pinis pastaim na bai em i ken bilip na daun long man gen? Yumi inap abrusim ol kain hevi olsem sapos yumi pret long God.​—1 Korin 6:18.

Pasin Bilong Pret Long God i Helpim Yumi Long Sakim Pasin Nogut

18. Satan i laik mekim wanem? Em i mekim long wanem rot?

¹⁸ Satan i mekim na stretpela pasin bilong ol man i wok long bagarap hariap, na em i laik tru long bagarapim stretpela pasin bilong ol Kristen tru. Bilong mekim olsem, em i traim long bagarapim bel na tingting bilong yumi long rot bilong ol samting yumi lukim na harim. (Efesus 4:​17-19) Bai yu mekim wanem taim yu lukim piksa bilong pasin pamuk, bungim ol man nogut, o harim ol tok nogut?

19. Olsem wanem pasin bilong pret long God i helpim wanpela Kristen long winim traim?

¹⁹ Tingim André,b em wanpela elda Kristen, papa, na wanpela dokta long Yurop. Taim André i wok nait long haus sik, ol meri wanwok i save raitim ol liklik pas na putim long pilo bilong em. Long ol dispela pas ol i save askim em long slip wantaim ol. André i sanap strong na em i sakim tok bilong ol. Na tu, em i painim wok long narapela hap bambai em i no ken stap wantaim ol lain i laik pulim em long mekim pasin nogut. André i bihainim savetingting taim em i pret long God, na dispela i kamapim gutpela samting. Olsem: Long nau em i mekim wok haptaim long brens ofis bilong ol Witnes Bilong Jehova long kantri bilong em.

20, 21. (a) Olsem wanem pasin bilong pret long God i ken helpim yumi long sakim pasin nogut? (b) Stadi i kamap bihain long dispela bai stori long wanem samting?

²⁰ Taim man i tingting long ol samting nogut, dispela inap kirapim em long lusim pasin bilong em long pas gut wantaim Jehova na kisim samting i no bilong em. (Jems 1:​14, 15) Long nau, i gat ol man, ol ples, na ol samting yumi ken mekim, na ol amamas em ol inap mekim na yumi no tingim moa ol stretpela pasin. Tasol sapos yumi pret long Jehova, bai yumi no go klostu long ol dispela samting, bai yumi lusim ol. (Sindaun 22:3) Maski yumi pilim sem taim yumi lusim ol o yumi pilim olsem yumi lusim sampela samting bilong yumi yet, dispela em samting nating. Tasol sapos God i no orait long yumi, dispela em i bikpela samting tru. (Matyu 5:​29, 30) Pasin bilong pret long God i makim olsem yumi no laik tru long mekim pasin i no stret, olsem lukim ponografi, yumi no ken lukim “ol samting i no gutpela.” Sapos yumi mekim olsem, yumi ken bilip tru olsem Jehova bai ‘mekim gut long yumi’ na givim ol samting yumi mas kisim.​—Song 84:11; 119:37.

²¹ Tru tumas, pasin bilong pret o aninit long God em i gutpela rot long bihainim. Na tu, em gutpela rot bilong i stap amamas tru. (Song 34:9) Stadi i kamap bihain long dispela bai stori gut long dispela samting.

[Ol Futnot]

Yu Inap Stori Long Dispela?

• Wanem ol pasin i insait long pasin bilong pret long God?

• Olsem wanem pasin bilong pret long God i daunim pasin bilong pret long man?

• Olsem wanem yumi ken soim olsem yumi gat stretpela tingting long beten?

• Olsem wanem pasin bilong pret long God inap pasim yumi long mekim pasin nogut?

[Piksa long pes 23]

Devit i lain long pret long God taim em i lukim ol samting Jehova i wokim

[Ol Piksa long pes 24]

Bai yu mekim wanem taim wantu wanpela traim i painim yu?