Pret Long Jehova​—Stap Amamas!

“Man i save pret long Bikpela . . . dispela man i ken amamas.”​—SONG 112:1.

1, 2. Pasin bilong pret long Jehova inap kamapim wanem samting?

I HATWOK long i stap amamas. Bilong man i ken i stap amamas, em i mas makim gut ol samting em i laik mekim, mekim pasin i stret, na sakim pasin nogut. Man Bilong Wokim yumi, Jehova, i givim Tok bilong em, Baibel, bilong skulim yumi long nambawan gutpela rot long bihainim. Taim yumi askim Jehova long stiaim yumi na yumi bihainim tok bilong em, yumi soim olsem yumi pret long em, na long dispela rot yumi inap i stap belgut na amamas.​—Song 23:1; Sindaun 14:26.

² Long dispela stadi, bai yumi skelim ol stori bilong Baibel na stori bilong ol man long nau. Ol dispela stori i soim olsem wanem pasin bilong pret long God i helpim man long sakim pasin nogut na long mekim pasin i stret. Bai yumi kisim save olsem yumi inap stap amamas taim yumi larim pasin bilong pret long God i kirapim yumi long givim baksait long pasin nogut yumi bin bihainim, olsem King Devit i bin mekim. Na tu, bai yumi kisim save olsem pasin bilong pret long Jehova em i gutpela samting papamama inap skulim ol pikinini long en. Tru tumas, Baibel i tok: “Man i save pret long Bikpela . . . dispela man i ken amamas.”​—Song 112:1.

Kisim Gen Amamas Yu Bin Lusim

3. Wanem samting i bin helpim Devit long tanim bel long rong em i bin mekim?

³ Olsem yumi bin stori pinis long stadi paslain long dispela, tripela taim Devit i bin lusim pasin bilong pret long God na em i mekim sin. Tasol pasin em i mekim taim Jehova i stretim em i kamapim klia olsem em i man bilong pret long God. Pasin bilong em long stap aninit na rispek long God i kirapim em long tokaut long rong bilong em, stretim pasin bilong em, na pas gut gen wantaim Jehova. Tru, rong bilong em i mekim na em yet na ol narapela i kisim hevi, tasol pasin bilong em long tanim bel tru i mekim na Jehova i orait gen long em na i helpim em. Pasin bilong Devit inap strongim ol Kristen long nau em ol i bin mekim sampela bikpela rong.

4. Olsem wanem pasin bilong pret long God inap helpim man long kisim bek amamas bilong em?

⁴ Tingim stori bilong Sonja.a Maski em i mekim wok autim tok fultaim, em i poroman wantaim ol man nogut, mekim pasin i no stret long Kristen i mekim, na ol i mas rausim em long kongrigesen Kristen. Sonja i kisim stretpela tingting, na em i kirap mekim olgeta samting em i mas mekim na bai em i ken pas gut gen wantaim Jehova. Bihain, kongrigesen i kisim em bek. Taim ol dispela samting i kamap, Sonja i no bin lusim laik bilong em long mekim wok bilong Jehova. Em i mekim gen wok painia oltaim. Bihain, em i maritim wanpela gutpela elda Kristen, na nau tupela i wok wantaim long kongrigesen. Sonja i bel hevi long em i bin lusim stretpela rot inap liklik taim, tasol em i amamas olsem pasin bilong em long pret long God i helpim em long kam bek long Jehova.

Mobeta Long Karim Hevi na No Ken Mekim Pasin Nogut

5, 6. Stori long olsem wanem tupela taim Devit i no kilim Sol i dai na bilong wanem em i mekim olsem.

⁵ Em i gutpela moa sapos pasin bilong pret long God i mekim na man i no mekim pasin nogut. Dispela i kamap tru long Devit. Wanpela taim Sol na tri tausen soldia i ranim Devit i go, na Sol i go insait long wanpela hul bilong ston​—em dispela hap we Devit na lain bilong em i hait i stap. Ol man i stap wantaim Devit i tokim em long kilim i dai Sol. Long tingting bilong ol i luk olsem Jehova i wokim rot bilong Devit long kilim i dai birua bilong em. Devit i wokabaut isi isi i go na katim hap klos bilong Sol. Devit i save pret long God, olsem na dispela liklik samting em i mekim i kotim stret bel bilong em. Em i tokim ol lain bilong em: “Bikpela i no ken larim mi i bagarapim king bilong mi, long wanem, Bikpela yet i bin makim em na putim em i stap king.”b​—1 Samuel 24:​1-7.

⁶ Long narapela taim, Sol na lain bilong em i wokim kem na “Bikpela yet i mekim olgeta man i slip strong tru.” Devit na Abisai i go long namel stret long kem bilong Sol na sanap klostu long Sol husat i slip i stap. Abisai i laik kilim i dai Sol. Devit i tokim em long no ken mekim olsem, na i tok: “Bikpela i bin makim Sol i kamap king, na sapos wanpela man i bagarapim Sol, orait bai Bikpela yet i mekim save long dispela man.”​—1 Samuel 26:​9, 12.

7. Wanem samting i helpim Devit na em i no mekim pasin nogut?

⁷ Tupela taim rot i op long Devit i ken kilim i dai Sol, tasol bilong wanem Devit i no bin mekim olsem? Long wanem, em i pret moa long Jehova, winim pret em i pilim long Sol. Devit i gat stretpela tingting na em i pret long God, olsem na em i redi long karim hevi na em i no laik mekim pasin nogut. (Hibru 11:25) Em i bilip tru olsem Jehova bai lukautim lain bilong Em na Devit yet tu. Em i save olsem pasin bilong bihainim tok bilong God na bilip long Em, dispela bai mekim em i stap amamas, na em bai kisim planti gutpela samting. Tasol sapos em i no mekim olsem bai God i no orait long em. (Song 65:4) Devit i save olsem God bai truim tok promis bilong Em long mekim Devit i kamap king na God bai rausim Sol long taim na rot Em yet i makim.​—1 Samuel 26:10.

Pasin Bilong Pret Long God i Kamapim Amamas

8. Olsem wanem pasin Devit i mekim long taim traim i painim em i stap olsem gutpela piksa long yumi?

⁸ Yumi ol Kristen i save olsem ol man bai tok bilas na birua long yumi, na bai i gat ol narapela traim i painim yumi. (Matyu 24:9; 2 Pita 3:3) Sampela taim yumi bai i gat hevi wantaim sampela wanbilip bilong yumi. Tasol yumi save olsem Jehova i save lukim olgeta samting, harim ol beten bilong yumi, na long taim em yet i makim, em bai stretim olgeta samting i stret wantaim laik bilong em. (Rom 12:​17-21; Hibru 4:16) Olsem na yumi no ken pret long ol man i birua long yumi, nogat, yumi pret long God na wetim em i kisim bek yumi. Olsem Devit, yumi yet i no bekim rong na kalapim ol stretpela stiatok bilong abrusim ol hevi. Sapos yumi mekim olsem bai yumi stap amamas. Tasol olsem wanem dispela i kamapim amamas?

9. Stori long olsem wanem pasin bilong pret long God inap mekim man i amamas maski ol man i mekim nogut long em.

⁹ Wanpela brata i mekim wok misineri longpela taim long Afrika i tok: “Mi save tingim wanpela mama na yangpela pikinini meri bilong em. Tupela i no laik insait long ol samting bilong graun, olsem na ol i no laik baim kat politik. Sampela man i paitim tupela nogut tru na bihain tokim tupela long i go long haus. Taim tupela i wokabaut i go, mama i wok long mekim gut bel bilong pikinini meri bilong em husat i wok long krai, long wanem, em i no kliagut long as na dispela samting i painim ol. Tru, long dispela taim tupela i no amamas, tasol bel bilong ol i no gat tok. Bihain, tupela i amamas olsem ol i bin bihainim tok bilong God. Sapos tupela i bin baim dispela kat, ol manmeri bai amamas stret. Ol man bai givim tupela kol dring na danis raunim tupela i go inap ol i kamap long haus. Tasol dispela yangpela meri na mama bilong em i save olsem sapos tupela i bin brukim lo bilong God, ol bai i no inap amamas liklik.” Pasin bilong tupela long pret long God i lukautim ol, na bel bilong tupela i no kotim ol.

10, 11. Wanpela meri i pret long God na wanem gutpela samting i kamap?

¹⁰ Pasin bilong pret long God i kamapim tu amamas taim traim i painim yumi long pasin bilong tingim laip em i samting holi. Taim Mary i gat bel long namba 3 pikinini, dokta i tokim em long rausim bel. Em i tok: “Yu inap kisim bikpela hevi. Hevi inap kamap wantu tasol na yu inap i dai insait long 24 aua. Na pikinini tu bai i dai. Na tu, yumi no save pikinini bai i orait o em bai i gat sampela sik samting.” Mary i stadi long Baibel wantaim ol Witnes Bilong Jehova tasol em i no baptais yet. Mary i tok: “Mi no baptais yet, tasol mi bin wokim tingting pinis olsem mi bai lotuim Jehova na mi tingting strong long bihainim tok bilong em, maski wanem samting i kamap.”​—Kisim Bek 21:​22, 23, NW; Song 127:3.

¹¹ Long taim em i gat bel, Mary i wok yet long stadi long Baibel na lukautim famili bilong em. Bihain em i karim pikinini. Mary i tok: “Mi bin hatwok liklik long karim dispela pikinini, winim tupela narapela, tasol i no gat bikpela hevi i kamap.” Pasin bilong pret long God i helpim Mary na bel bilong em i no gat tok, na i no longtaim bihain em i kisim baptais. Taim dispela pikinini i go bikpela, em tu i lain long pret long Jehova, na nau em i mekim wok long wanpela brens ofis bilong ol Witnes Bilong Jehova.

‘Beten Long God na Em Bai Strongim Yu’

12. Olsem wanem pasin bilong pret long God i strongim Devit?

¹² Devit i pret long Jehova na dispela i kirapim em long sakim pasin nogut, na tu, dispela i strongim em long kirap kwik na mekim samting na bihainim savetingting taim hevi i painim em. Inap wanpela yia na fopela mun, Devit na lain bilong em i hait long Sol long Siklak long graun bilong ol Filistia. (1 Samuel 27:​5-7) Wanpela taim ol man i no stap, na ol lain Amalek i kam kukim taun na kisim olgeta meri pikinini na ol sipsip samting i go. Taim Devit na lain bilong em i kam bek na lukim samting i bin kamap, ol i krai. Wantu lain bilong Devit i kros long em, na ol i toktok long tromoi ston long em na kilim em i dai. Taim nogut i painim Devit, tasol em i no bel hevi. (Sindaun 24:10) Pasin bilong em long pret long God i kirapim em long beten long Jehova “na God i strongim tingting bilong em.” God i helpim Devit na lain bilong em na ol i daunim ol Amalek na kisim bek olgeta samting bilong ol.​—1 Samuel 30:​1-20.

13, 14. Olsem wanem pasin bilong pret long God i helpim wanpela Kristen long makim gut samting em i mas mekim?

¹³ Ol wokman bilong God long nau tu i save karim ol hevi, olsem na ol i mas bilip long Jehova na strong long mekim ol samting i stret. Tingim stori bilong Kristina. Taim em i yangpela em i stadi long Baibel wantaim ol Witnes Bilong Jehova. Tasol em i laik pilai piano long ol bikpela bung, olsem na em i wok long winim dispela mak. Na tu, em i pret long autim tok na em i pret long ol samting em i mas mekim taim em i kisim baptais pinis. Taim Kristina i wok long stadi long Baibel, em i pilim tok bilong en. Em i wok long lain long pret long Jehova, na em i luksave olsem Jehova i laik bai ol wokman bilong em i laikim em long bel, tingting, na strong olgeta. (Mak 12:30) Dispela i kirapim em long dediket long Jehova na kisim baptais.

¹⁴ Kristina i askim Jehova long helpim em long kamap strong long ol samting bilong spirit. Kristina i tok: “Mi save olsem sapos wanpela i laik pilai piano long ol bikpela bung, em i mas raun planti long ol narapela narapela hap, na insait long wanpela yia em i mas pilai piano inap long 400 bung samting. Olsem na mi senisim tingting bilong mi na mi tingting long kamap tisa na bai mi ken lukautim mi yet long ol samting bilong skin na mekim wok autim tok fultaim.” Long dispela taim, ol i makim pinis Kristina long pilai piano long namba wan taim long wanpela haus bilong pilaim musik i gat nem long kantri bilong em. Em i tok: “Dispela em namba wan taim na laspela taim bilong mi long pilai piano long bikpela bung.” Bihain, Kristina i maritim wanpela elda Kristen. Long nau tupela wantaim i wok long wanpela brens ofis bilong ol Witnes Bilong Jehova. Em i amamas olsem Jehova i givim em strong long makim gut samting em i mas mekim na nau em inap mekim wok long taim na strong bilong em long mekim wok bilong God.

Wanpela Gutpela Samting Papamama i Ken Givim Pikinini

15. Devit i laik givim wanem samting long ol pikinini bilong em? Em i mekim olsem wanem?

¹⁵ Devit i tok: “Ol pikinini, yupela i mas i kam na putim yau gut long tok bilong mi. Mi laik skulim yupela na bai yupela i stap aninit [“pret,” NW] long God oltaim.” (Song 34:11) Devit em i wanpela papa, olsem na em i tingting strong long givim ol pikinini bilong em wanpela gutpela samting​—em pasin bilong pret long Jehova. Long rot bilong toktok na pasin, Devit i kamapim klia olsem Jehova i no wanpela God ol man i mas pret nogut tru long em na Em i redi long kotim ol man long ol liklik rong ol i mekim, nogat. Devit i kamapim klia olsem Jehova i olsem wanpela Papa i gat pasin laikim, pasin bilong tingim narapela, na pasin bilong lusim rong bilong ol pikinini bilong em long graun. Devit i tok: “Husat inap save long olgeta rong bilong em yet?” Bilong soim olsem em i bilip tru olsem Jehova i no save skelim skelim olgeta popaia bilong yumi, em i tok moa: ‘Mi mekim sampela rong em mi no save long ol, olsem na rausim ol dispela rong na mekim mi i kamap klin.’ Devit i save sapos em i wok strong long bihainim ol lo bilong Jehova, Jehova bai orait long toktok na tingting bilong em.​—Song 19:​12, 14.

16, 17. Olsem wanem ol papamama i ken skulim ol pikinini bilong ol long pasin bilong pret long Jehova?

¹⁶ Devit i stap gutpela piksa bilong ol papamama long nau. Ralph na brata bilong em i mekim wok long wanpela brens ofis bilong ol Witnes Bilong Jehova, Ralph i tok: “Pasin papamama i bihainim bilong mekim bikpela long mipela i mekim na mipela i amamas long stap insait long tok i tru. Taim mipela i yangpela, ol i save larim mipela tu i insait long toktok ol i mekim long ol samting bilong kongrigesen, dispela i mekim na mipela i givim bel long tok i tru wankain olsem ol. Ol i helpim mipela long bilip olsem mipela inap mekim gutpela wok insait long wok bilong Jehova. Inap sampela yia famili bilong mipela i go i stap long wanpela kantri em ol i sot tru long ol pablisa bilong Kingdom, na mipela i helpim ol long kamapim ol nupela kongrigesen.

¹⁷ “Samting i helpim mipela long wokabaut long stretpela rot, em i no ol strongpela lo, nogat, pasin bilong papamama long bilip olsem Jehova em i wanpela man i stap tru na em i gat gutpela pasin, dispela i helpim mipela. Ol i wok strong long kisim save gut long Jehova na mekim ol samting bilong amamasim em, na pasin bilong ol long pret long God na laikim em i lainim mipela. Taim mipela i mekim rong, papamama i no mekim mipela i pilim olsem Jehova i no laikim mipela moa, nogat; ol i no kros na putim nating sampela tambu long mipela. Planti taim ol i save sindaun na toktok wantaim mipela, na sampela taim Mama i save krai taim em i toktok wantaim mipela na bai mipela i ken pilim tru tok bilong ol. Na tru tumas, mipela i bin pilim tru tok bilong ol. Long rot bilong toktok na pasin bilong papamama, mipela i kisim save olsem pasin bilong pret long Jehova i gutpela samting tru, na stap wanpela Witnes bilong em i samting bilong amamas, na i no wanpela hevi.”​—1 Jon 5:3.

18. Bai yumi kisim wanem samting sapos yumi pret long trupela God?

¹⁸ Long “las tok Devit i autim” yumi ken lukim dispela tok: “King i mas i stap aninit [“pret,” NW] long God na bosim ol manmeri long stretpela pasin. Sapos em i mekim olsem, orait ol manmeri bai i amamas long em olsem ol i save amamas long san i lait gut long moning.” (2 Samuel 23:​1, 3, 4) Solomon, pikinini bilong Devit husat i kisim ples bilong papa bilong em, em i kisim save olsem dispela tok em i tru, long wanem, em i askim Jehova long givim em “gutpela tingting na save” na bai em inap “save wanem pasin i gutpela na wanem pasin i nogut.” (1 King 3:9) Solomon i luksave olsem pasin bilong pret long Jehova em i savepasin na rot bilong i stap amamas. Bihain em i kamapim bikpela tok bilong Buk Saveman na em i tok: “Bilong pinisim olgeta toktok, mi laik tok olsem, namba wan samting long laip bilong yumi man i olsem. Yumi mas aninit [“pret,” NW] long God tasol na bihainim ol lo bilong em. God bai i kotim yumi long olgeta pasin yumi bin mekim, em ol gutpela pasin na ol pasin nogut na ol pasin hait.” (Saveman 12:​13, 14) Sapos yumi bihainim dispela tok, bai yumi kisim save olsem pasin bilong ‘daunim yumi yet na stap aninit [“pret,” NW] long Bikpela,’ em i savepasin na bai yumi stap amamas, na tu, ‘bai yumi gat planti mani samting na biknem, na bai yumi stap gut.’​—Sindaun 22:4.

19. Wanem samting bai helpim yumi long kliagut long pasin bilong pret long Jehova?

¹⁹ Yumi kisim save olsem ol stori bilong Baibel na stori bilong ol man long nau i kamapim klia olsem pasin bilong pret long God em i bikpela samting long i stap bilong ol wokman tru bilong Jehova. Dispela kain pasin bilong pret bai pasim yumi long mekim ol samting i no amamasim Papa bilong yumi long heven, na tu, em bai helpim yumi na yumi no pret long ol birua bilong yumi, na i strongim yumi long karim ol hevi i save painim yumi. Olsem na yumi olgeta, ol yangpela na lapun i mas strong long stadi gut long Tok Bilong God, na tingim tingim long bel ol samting yumi lainim, na go klostu long Jehova long rot bilong beten oltaim long em. Taim yumi mekim olsem, bai yumi “save gut long God” na bai yumi kliagut long “pasin bilong stap aninit [“pret,” NW] long Bikpela.”​—Sindaun 2:​1-5.

[Ol Futnot]

Yu Inap Stori Long Dispela?

Olsem wanem pasin bilong pret long God i

• helpim man long tanim man long sin em i bin mekim?

• mekim man i stap amamas taim traim na pasin birua i painim em?

• strongim yumi long mekim laik bilong God?

• gutpela samting papamama i ken skulim pikinini long en?

[Piksa long pes 26]

Pasin bilong pret long Jehova i mekim na Devit i no kilim i dai King Sol

[Ol Piksa long pes 29]

Pasin bilong pret long God em i gutpela samting papamama i ken skulim ol pikinini long en