‘Bel Isi Namel Long Ol Man God i Orait Long Ol’

As na sampela i selebretim Krismas.

Long olgeta yia, pop na ol lida bilong lotu i save autim tok long bel isi, ol i ting Krismas bai truim tok bilong ensel olsem: “Long graun bel isi i ken i stap namel long ol man em God i orait long ol.” Sampela i go long ol ples holi bilong selebret.

Bilong wanem dispela i givim hatwok?

Bel isi bilong Krismas i save stap sotpela taim tasol. Olsem, long Disemba 1914, taim Wol Woa 1 i stap long Yurop, ol soldia bilong Briten na Jemani i kam ausait long ples hait bilong ol na selebretim Krismas wantaim. Ol i serim kaikai, dring, smok tabak, na pilai soka wantaim. Tasol dispela pasin wanbel i no stap longtaim. Long wanpela pas, wanpela soldia bilong Briten i stori long tok em soldia bilong Jemani i mekim long em olsem: “Tude yumi stap bel isi. Tumora yu bai pait bilong kantri bilong yu; mi bai pait bilong kantri bilong mi.”

Wanem ol stiatok bilong Baibel inap helpim man?

“Wanpela pikinini man i kamap pinis long yumi . . . em bai i gat ol dispela nem, . . . ‘King bilong kamapim gutpela sindaun na bel isi.’ . .  . Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.” (Aisaia 9:6, 7) Dispela tok profet long Jisas Krais i strongim bel bilong yumi, a? Jisas i no bon long graun bilong bringim wanpela de bilong bel isi long olgeta yia, nogat. Jisas em King bilong heven na em bai bringim bel isi bilong i stap oltaim.

“Yupela i ken stap bel isi long rot bilong mi [Jisas]. Long graun yupela i karim pen na hevi, tasol strongim bel! Mi winim pinis strong bilong dispela graun.” (Jon 16:33) Long nau tu, Jisas i helpim ol disaipel bilong em long stap bel isi wantaim. Em tru ol Kristen i save karim ol hevi. Tasol long rot bilong Baibel ol i kliagut long as na ol pen na hevi i stap na olsem wanem Jisas bai bringim bel isi bilong i stap oltaim. Olsem na ol i stap bel isi.

Ol Witnes Bilong Jehova i bihainim tok bilong Jisas na ol i kisim kain bel isi olsem, maski ol i bilong wanem kantri, skin kala, sindaun, o tokples. I gutpela yu yet i go long miting bilong ol long Haus Kingdom na lukim dispela pasin namel long ol. Olsem planti narapela, ating yu tu bai wanbel olsem dispela bel isi i gutpela moa winim bel isi bilong Krismas.