Ol Elda Kristen ‘Wanwok Bilong Yumi Bilong Mekim Yumi Amamas’

1. Pol i harim wanem stori long ol Kristen long Korin na dispela i mekim em i amamas?

LONG yia 55, aposel Pol i harim olsem ol brata long Korin i tok pait namel long ol yet. Pol i laikim ol Korin olsem wanpela papa i save laikim ol pikinini bilong em, olsem na em i salim wanpela pas i go long ol bilong stretim ol. (1 Kor. 1:11; 4:15) Na tu, Pol i tokim pren bilong en Taitus long go lukim ol, na bihain em i ken go bungim Pol long Troas na tokim em long ol samting i bin kamap. Sampela mun bihain, Pol i stap long Troas na wetim Taitus long kam bambai em i ken tokim Pol long ol brata long Korin i stap olsem wanem. Pol i wari yet long ol Korin. Tasol sori tru, Taitus i no kam, olsem na Pol i go long Masedonia. Tasol bihain Taitus i bungim em long Masedonia, na Pol i amamas tru. Taitus i stori long Pol olsem ol brata long Korin i bihainim tok bilong em na ol i laik tru long lukim em. Taim Pol i harim dispela, em i “amamas moa yet.”—2 Kor. 2:12, 13; 7:5-9.

2. (a) Long pas Pol i raitim i go long ol Korin, em i tok wanem long pasin bilong bilip na amamas? (b) Bai yumi bekim wanem ol askim?

² Bihain liklik long dispela, Pol i raitim narapela pas i go long ol Korin. Em i tokim ol: “I no olsem mipela i stap bos bilong bilip bilong yupela, nogat. Bilip bilong yupela i mekim na yupela i sanap strong. Tasol mipela ol wanwok bilong yupela bilong mekim yupela i amamas.” (2 Kor. 1:24) Wanem mining bilong tok bilong Pol? Na ol elda bilong kongrigesen long nau inap kisim wanem skul long dispela tok?

BILIP NA AMAMAS

3. (a) Wanem mining bilong dispela tok bilong Pol, “bilip bilong yupela i mekim na yupela i sanap strong”? (b) Olsem wanem ol elda long nau i bihainim pasin bilong Pol?

³ Pol i kolim tupela bikpela pasin ol Kristen i mas i gat, em bilip na amamas. Pastaim Pol i stori long bilip olsem: “I no olsem mipela i stap bos bilong bilip bilong yupela, nogat. Bilip bilong yupela i mekim na yupela i sanap strong.” Pol i save olsem ol brata long Korin i stap gut long God, long wanem, ol i bilip long God na i no long wanem ol i bilip long Pol o ol arapela. Em i save olsem ol i laikim tru God na ol i laik mekim ol samting i stret. Olsem na i no gat wok long Pol i bosim bilip bilong ol brata, na em i no gat laik long mekim olsem. (2 Kor. 2:3) Long nau, ol elda i bihainim pasin bilong Pol na ol i save olsem ol brata bilong ol i bilip long God na ol i gat stretpela tingting na ol i mekim wok bilong God. (2 Tes. 3:4) Ol i no save putim ol strongpela lo insait long kongrigesen, nogat. Ol i save helpim ol brata bilong ol long wokim ol disisen long rot bilong bihainim ol stiatok bilong Baibel na ol tok i kam long oganaisesen bilong Jehova. Ol elda long nau i no save bosim bilip bilong ol brata bilong ol.—1 Pita 5:2, 3.

4. (a) Wanem mining bilong dispela tok bilong Pol, “Mipela ol wanwok bilong yupela bilong mekim yupela i amamas”? (b) Olsem wanem ol elda long nau inap bihainim pasin bilong Pol?

⁴ Pol i tok tu olsem: “Mipela ol wanwok bilong yupela bilong mekim yupela i amamas.” Ol dispela “wanwok” i husat? Em ol lain i bin wok strong wantaim Pol long helpim ol Korin. Olsem wanem yumi save long dispela? Long wankain pas Pol i salim i go long ol Korin, em i kolim nem bilong tupela bilong ol dispela wanwok taim em i tok: “Mi na Silvanus, na Timoti, mipela i autim tok namel long yupela long Krais.” (2 Kor. 1:19) Na tu, taim Pol i yusim dispela tok “wanwok” long ol pas bilong en, dispela i makim ol man i wok strong wantaim em long autim tok, olsem Apolos, Akwila, Priska, Timoti, na Taitus. (Rom 16:3, 21; 1 Kor. 3:6-9; 2 Kor. 8:23) Olsem na taim Pol i tok: “Mipela ol wanwok bilong yupela bilong mekim yupela i amamas,” em i laik tokim ol Korin olsem em na ol man i wok wantaim em i laik mekim olgeta samting ol inap mekim bilong helpim dispela kongrigesen long mekim wok bilong God wantaim amamas. Long nau, ol elda i laik mekim wankain pasin. Ol i laik mekim olgeta samting ol inap mekim bilong helpim ol brata long “belgut long Bikpela na lotu long em.”—Sng. 100:2; Fili. 1:25.

5. Ol i givim wanem askim long sampela bratasista? Yu mas mekim wanem taim yumi stori long bekim bilong ol?

⁵ I no longtaim i go pinis, ol i givim askim long sampela bratasista em ol i stap long ol narapela narapela hap bilong graun olsem, “Wanem ol tok na pasin bilong wanpela elda i mekim na yu amamas moa yet?” Nau bai yumi skelim bekim bilong ol. Taim yumi mekim olsem, tingim ol samting ol elda i bin tok o mekim na dispela i mekim yu amamas moa yet. Na tu, yu ken tingim ol samting yu ken mekim bilong helpim kongrigesen bilong yu long i stap amamas.a

“GIVIM GUDE LONG PERSIS, EM MERI YUMI LAIKIM TUMAS”

6, 7. (a) Wanem wanpela rot em ol elda i ken bihainim pasin bilong Jisas, Pol, na ol arapela wokman bilong God? (b) Bilong wanem ol brata bilong yumi i save amamas taim yumi tingim nem bilong ol?

⁶ Planti bratasista i tok olsem ol i save amamas taim ol elda i soim olsem ol i tingim tru ol. Wanpela rot ol elda i ken mekim olsem, em long bihainim pasin bilong Devit, Elihu, na Jisas. (Ritim 2 Samuel 9:6; Jop 33:1; Luk 19:5.) Ol dispela wokman bilong Jehova i soim olsem ol i tingim tru ol arapela taim ol i kolim nem bilong ol. Pol tu i save olsem em i bikpela samting long tingim na kolim nem bilong ol bratasista. Long pinis bilong wanpela pas bilong en, em i kolim nem bilong winim 25 brata na sista. Wanpela bilong ol dispela sista, em Persis. Pol i tok long em olsem: “Givim gude long Persis, em meri yumi laikim tumas.”—Rom 16:3-15.

⁷ Sampela elda i save pilim hatwok tru long tingim ol nem. Tasol taim wanpela elda i traim bes bilong em long tingim ol nem, ol bratasista i save pilim olsem em i tingim tru ol. (Kis. 33:17, NW) Ol i save amamas tru taim ol elda i kolim nem bilong ol taim ol i bekim tok long Stadi Wastaua o long ol narapela miting.—Skelim Jon 10:3.

“EM I BIN MEKIM PLANTI WOK BILONG BIKPELA”

8. Pol i bihainim pasin bilong Jehova na Jisas long wanem rot?

⁸ Pol i soim tu olsem em i tingim tru ol arapela taim em i mekim tok amamas long ol. Dispela em narapela rot ol elda i ken bihainim bilong helpim ol bratasista long mekim wok bilong God wantaim amamas. Taim Pol i raitim pas long ol Korin, em i tokim ol olsem em i amamas long wok ol i mekim. Em i tok: “Mi amamas tru long yupela.” (2 Kor. 7:4) Yumi ken bilip olsem tok bilong Pol i mekim na ol brata long Korin i pilim olsem em i laikim ol. Pol i tok amamas tu long ol arapela kongrigesen long gutpela wok ol i mekim. (Rom 1:8; Fili. 1:3-5; 1 Tes. 1:8) Long pas Pol i raitim i go long kongrigesen long Rom, em i kolim nem bilong Persis, na bihain em i tok: “Em i bin mekim planti wok bilong Bikpela.” (Rom 16:12) Ating dispela i bin strongim Persis taim em i harim dispela tok. Taim Pol i tok amamas long ol arapela, em i bihainim pasin bilong Jehova na Jisas.—Ritim Mak 1:9-11; Jon 1:47; Rev. 2:2, 13, 19.

9. Bilong wanem olgeta long kongrigesen i amamas taim narapela i mekim tok amamas long narapela?

⁹ Ol elda long nau i save olsem em i bikpela samting long tokim ol brata olsem ol i amamas long ol. (Snd. 3:27; 15:23) Taim wanpela elda i mekim tok amamas long ol brata, em i soim olsem em i tingim tru ol na em i luksave long wok ol i mekim. Ol elda i mas mekim tok bilong strongim ol brata na sista insait long kongrigesen. Wanpela sista husat i winim 50 krismas i tok olsem, long ples wok i no gat wanpela i save mekim tok amamas long wok em i mekim. Ol i no save tingim ol narapela na ol i save resis wantaim narapela narapela. Tasol taim wanpela elda i tok amamas long em long wok em i mekim insait long kongrigesen, em i pilim amamas. Em i tok: “Dispela i mekim mi pilim olsem Papa bilong mi long heven i laikim mi.” Wanpela papa wanpis i mekim bikpela long 2-pela pikinini, em tu i gat wankain tingting. Em i tok olsem i no longtaim i go pinis wanpela elda i tokim em olsem em i pilim tru wok dispela brata i save mekim. Tok bilong dispela elda i strongim em long givim bel yet long mekim wok bilong God. Dispela i kamapim klia olsem, taim wanpela elda i tok amamas long ol bratasista, em i helpim ol long amamas na mekim yet wok bilong God na ‘ol i no les.’—Ais. 40:31.

“LUKAUTIM KONGRIGESEN BILONG GOD”

10, 11. (a) Olsem wanem ol elda inap bihainim pasin bilong Nehemia? (b) Olsem wanem elda inap strongim bilip bilong brata o sista em i go lukim?

¹⁰ Wanem narapela bikpela rot we ol elda i ken soim pasin laikim long ol brata na helpim ol long mekim wok bilong God wantaim amamas? Kwiktaim ol i save helpim ol bratasista i gat bel hevi. (Ritim Aposel 20:28.) Taim ol i mekim olsem, ol i bihainim pasin bilong ol gutpela wokman bilong God long bipo. Olsem, Baibel i tok taim Nehemia i luksave olsem sampela Juda i bel hevi, em i mekim sampela samting bilong strongim ol. (Neh. 4:14) Long nau, ol elda i laik bihainim wankain pasin. Taim ol brata i bel hevi, ol elda i save mekim ol samting ol inap mekim bilong strongim ol. Ol elda i save go lukim ol long haus bilong ol na givim ol “presen,” olsem, ol i save mekim ol tok i strongim bilip bilong ol dispela brata. (Rom 1:11) Olsem wanem ol elda inap mekim olsem?

¹¹ Paslain long elda i go lukim wanpela brata o sista bilong strongim em, em i mas tingim gut sindaun bilong en. Olsem, elda i ken askim em yet: ‘Dispela brata o sista i gat wanem ol hevi? Mi inap mekim wanem tok bilong strongim bel bilong em? Wanem skripsa o stori bilong wanpela long Baibel bai strongim em?’ Sapos elda i tingim gut sindaun bilong brata o sista paslain long em i go lukim ol, orait em inap kamapim ol tok we inap helpim tru dispela brata o sista, na em bai i no stori nating long ol samting. Taim elda i go lukim brata o sista, em i larim ol i kamapim tingting bilong ol na em i save putim gut yau. (Jems 1:19) Wanpela sista i tok: “Taim wanpela elda i putim gut yau, dispela i save mekim gut bel bilong mi.”—Luk 8:18.

12. Husat insait long kongrigesen i mas kisim tok bilong strongim ol? Bilong wanem?

¹² Ol elda i mas strongim husat? Pol i tokim ol elda long was gut long “olgeta sipsip.” Olgeta bratasista insait long kongrigesen i mas kisim tok bilong strongim ol, dispela i makim tu ol pablisa na ol painia husat i bin mekim gut wok bilong God inap planti yia. Bilong wanem ol elda i mas strongim ol? Tru ol i gat strongpela bilip long God, tasol sampela taim ol i pilim olsem ol yet i no inap karim hevi bilong ol pasin nogut em dispela graun i kamapim. Bilong kisim save long as na sampela taim wanpela strongpela wokman bilong God i mas kisim helpim long narapela, yumi ken skelim wanpela samting i bin kamap long laip bilong King Devit.

ABISAI I “KAM HELPIM DEVIT”

13. (a) Isbibenop i makim wanem taim stret bilong kilim Devit? (b) Olsem wanem Abisai i helpim Devit long taim stret?

¹³ Bihain long God i makim yangpela man Devit long kamap king, em i go pait wantaim Goliat, em wanpela traipela man bilong lain Refaim. Devit i gat strongpela bel na em i kilim i dai dispela traipela man. (1 Sml. 17:4, 48-51; 1 Sto. 20:5, 8) Planti yia bihain, long wanpela pait i kamap namel long ol Israel na Filistia, Devit i pait gen wantaim narapela traipela man. Nem bilong dispela traipela man, em Isbibenop, em tu i bilong lain Refaim. (2 Sml. 21:16) Tasol long dispela taim, klostu tru dispela traipela man i kilim Devit. Bilong wanem? I no olsem Devit i pret, nogat. Baibel i tok “Devit i tait tru.” Taim Isbibenop i lukim olsem Devit i taiet, em i ting olsem dispela em gutpela taim stret long kilim i dai Devit. Tasol kwiktaim Abisai i kam helpim Devit na em i kilim i dai dispela man Filistia. (2 Sml. 21:15-17) Klostu tru Devit i dai! Ating Devit i amamas tru olsem Abisai i bin was long em na i kam hariap na helpim em na dai i no painim em. Yumi inap lainim wanem samting long dispela stori?

14. (a) Olsem wanem yumi inap karim ol hevi i luk olsem i traipela tru? (b) Olsem wanem ol elda inap helpim ol arapela long stap gut long God na kisim amamas gen? Kamapim wanpela eksampel.

¹⁴ Lain bilong Jehova long olgeta hap bilong graun i mekim yet wok bilong God, maski Satan na ol arapela i putim hevi long ol. Sampela bilong yumi i karim ol hevi i luk olsem i traipela tru. Tasol yumi trastim tru Jehova na yumi strong long stap gut long em taim ol dispela bikpela hevi i painim yumi, wankain olsem Devit i bin i gat strong bilong kilim i dai Goliat. Tasol sampela taim, yumi pilim olsem yumi no gat strong moa long pait na winim ol hevi bilong dispela graun bilong Satan. Long kain taim olsem, ol hevi we yumi inap karim, ol inap daunim yumi. Tasol wanpela elda inap luksave long hevi bilong yumi na givim helpim long yumi long taim stret. Na long dispela rot, yumi inap pilim olsem yumi ken mekim yet wok bilong God wantaim amamas. Planti bilong yumi i bin kisim helpim long dispela rot. Wanpela painia sista husat i winim 60 krismas i tok: “I no longtaim i go pinis, mi bin sik, na taim mi go autim tok, dispela i mekim mi taiet. Wanpela elda i luksave olsem mi no gat strong na em i kam toktok wantaim mi. Mipela i toktok long wanpela stori bilong Baibel we i strongim mi. Mi bihainim ol tok em i givim long mi, na dispela i helpim mi.” Sista i tok moa: “Dispela elda i kamapim pasin laikim taim em i luksave olsem mi no gat strong na em i helpim mi.” Yumi amamas tru long save olsem yumi gat ol elda husat i tingim yumi na oltaim ol i redi long helpim yumi, olsem Abisai i bin redi long helpim Devit.

OL I SAVE OLSEM POL I LAIKIM OL

15, 16. (a) Bilong wanem ol brata na sista i laikim tru Pol? (b) Bilong wanem yumi laikim ol elda bilong yumi?

¹⁵ Ol elda i save wok hat tru. Ating sampela taim ol i no save slip gut, long wanem, ol i wari long ol brata na sista, na ating sampela taim ol i kirap long biknait na beten long ol o ol i go helpim ol. (2 Kor. 11:27, 28) Tasol olsem Pol, ol elda i amamas long mekim wok em ol i mas mekim. Pol i raitim pas i go long ol Korin na em i tok: “Mi bai amamas long givim olgeta samting bilong mi na olgeta strong bilong mi bilong helpim yupela.” (2 Kor. 12:15) Pol i laikim tru ol brata, olsem na em i “givim olgeta samting” bilong em yet bilong strongim ol. (Ritim 2 Korin 2:4; Fili. 2:17; 1 Tes. 2:8) Olsem na ol brata i laikim tru Pol.—Apo. 20:31-38.

¹⁶ Yumi tu i laikim ol elda bilong yumi na yumi tenkyu long Jehova olsem em i save mekim wok long ol bilong lukautim yumi. Yumi amamas olsem ol i save tingim yumi olgeta wan wan na ol i save kam lukim yumi bilong strongim yumi. Na yumi amamas olsem oltaim ol i redi long helpim yumi taim yumi pilim olsem yumi yet i no inap karim ol hevi bilong yumi. Tru tumas, ol kain elda olsem i save wok hat long mekim yumi i stap amamas.