Moses—Man i Gat Pasin Daun

PASIN DAUN EM WANEM SAMTING?

Pasin daun i narapela kain olgeta long pasin antap. Man i gat pasin daun i no save tingim ol narapela olsem ol i samting nating. Man husat i gat pasin daun i save tingim olsem em yet i sinman, na em i save long mak bilong em long mekim ol samting.

OLSEM WANEM MOSES I SOIM OLSEM EM I GAT PASIN DAUN?

Moses i no kisim pasin antap taim em i kisim namba. Taim wanpela man i kisim namba, pasin daun o pasin antap bilong em bai kamap ples klia wantu tasol. Man bilong raitim buk em Robert G. Ingersoll i bin stap long yia 1800 samting, em i tok: “Planti man inap karim na winim hevi. Tasol sapos yu laik save man i gat pasin daun o nogat, orait givim namba long em.” Long dispela pasin, Moses i bin stap olsem gutpela piksa long pasin daun.

Jehova i givim bikpela namba long Moses long stap olsem lida bilong lain Israel. Tasol dispela namba i no bin mekim Moses i kisim pasin antap. Olsem, tingim pasin daun em i bin mekim bilong bekim wanpela askim long raits bilong ol man long kisim graun samting long papamama. (Namba 27:1-11) Dispela askim em i bikpela samting bikos disisen em i mekim bai stap olsem wanpela lo long ol manmeri i kamap bihain.

Moses bai bekim dispela askim olsem wanem? Yu ting Moses i kisim tingting olsem em i lida bilong Israel na em i gat save long disisen em bai mekim? Yu ting em bai bihainim tingting bilong em yet, save em i gat long ol wok em i bin mekim bipo, o save em i gat long tingting bilong Jehova?

Ating man i gat pasin antap bai mekim olsem. Tasol Moses i no gat pasin antap. Baibel i tok: “Moses i kisim tok bilong ol i go long Bikpela.” (Namba 27:5) Tingim! Maski insait long 40 yia Moses i bin stap olsem lida bilong lain Israel, Moses i no mekim wok long strong na save bilong em yet, nogat, oltaim em i bilip na wet long Jehova. Long dispela stori yumi inap lukim olsem Moses i gat pasin daun tru.

Moses i no tingim olsem em wanpela tasol i mas holim namba, nogat. Em i amamas taim Jehova i larim ol arapela Israel i mekim wok profet wantaim em. (Namba 11:24-29) Taim tambu papa bilong em i tokim em long givim sampela wok em i holim i go long ol narapela, Moses i daunim em yet na mekim olsem. (Kisim Bek 18:13-24) Na klostu long taim em i dai, maski em i gat strong i stap yet, Moses i askim Jehova long makim wanpela man olsem senis bilong em. Taim Jehova i makim Josua, Moses i givim bel tru long sapotim dispela yangpela man na em i kirapim lain Israel long daun long Josua taim Josua i bringim ol i go insait long Graun Bilong Promis. (Namba 27:15-18; Lo 31:3-6; 34:7) Na tu, Moses i tingim wok em i mekim bilong stiaim lain Israel long lotuim Jehova olsem wanpela gutpela wok tru. Em i no tingim namba em i holim, nogat, em i laik bai ol manmeri i stap gut.

YUMI KISIM WANEM SKUL LONG DISPELA?

Yumi no laik bai strong, namba, na save yumi gat i mekim na yumi kisim pasin antap. Tingim: Bilong Jehova i ken yusim yumi long mekim gut wok bilong em, oltaim pasin daun bilong yumi i mas winim save yumi gat long wok. (1 Samuel 15:17) Taim yumi mekim pasin daun tru, yumi bai wok strong long bihainim ol tok bilong Baibel olsem: “Yu mas bilip strong long Bikpela. Yu no ken ting save bilong yu yet inap helpim yu.”—Sindaun 3:5, 6.

Eksampel bilong Moses i lainim yumi olsem yumi no ken tingim tumas namba o wok bos bilong yumi i olsem nambawan bikpela samting.

Sapos yumi bihainim pasin daun bilong Moses, yu ting dispela inap helpim yumi? Yes, dispela inap helpim yumi! Taim yumi mekim pasin daun tru, dispela bai mekim na bai isi long ol narapela i laikim yumi. Bikpela samting moa, God Jehova bai laikim yumi, em God husat i save mekim dispela gutpela pasin. (Song 18:35) Baibel i tok: “God i save sakim ol man i mekim pasin antap. Tasol em i save kamapim bikpela pasin helpim long ol man i gat pasin daun.” (1 Pita 5:5) Tru tumas, em as na yumi laik bihainim pasin daun bilong Moses!