‘Ol Man Inap Lukim Ol Pasin Bilong God i Stap Hait’

Yu save bilip long God? Sapos olsem, yu inap luksave long ol samting i kamapim klia olsem em i stap? Planti samting i soim olsem i gat wanpela Man Bilong Wokim olgeta samting na em i gat savetingting, bikpela strong, na pasin laikim. Wanem ol dispela samting? Tru tru ol i soim klia olsem God i stap? Bekim bilong ol dispela askim i stap long pas aposel Pol i raitim long ol Kristen long Rom.

Pol i tok: “Kirap long taim God i wokim olgeta samting na i kam inap long nau, ol man i lukim ol samting God i bin wokim na long dispela rot ol inap save long ol pasin bilong en i stap hait. Na ol i save long bikpela strong bilong en i stap oltaim na ol i save olsem tru tru em i God. Olsem na i no gat eskius long ol i tok ol i no save long em.” (Rom 1:20) Olsem Pol i tok, ol samting God i wokim i kamapim klia hanmak bilong em. Nau yumi ken skelim gut tok bilong Pol.

Pol i tok, “kirap long taim God i wokim olgeta samting na i kam inap long nau,” ol man i lukim ol pasin bilong God. Olsem Pol i tok, kirap long taim God i bin wokim ol man, ol inap lukim ol gutpela pasin bilong God long ol samting em i bin wokim.

Ol samting i soim olsem God i stap, ol i no hait, ol i stap ples klia na “ol man i lukim.” Ol traipela samting tru i go inap long ol liklik samting tru i soim klia olsem i gat Man Bilong Wokim olgeta samting, na em i gat ol gutpela pasin tru. Ol samting God i bin wokim long graun i soim klia tru gutpela savetingting bilong God. Na ol sta samting long antap na ol traipela si i bruk, ol i kamapim klia bikpela strong bilong em. Na yumi tingim ol kain kain kaikai i swit moa long maus, na gutpela kala bilong skai taim san i kam antap na i go daun i kamapim klia olsem em i save laikim tru ol man.—Song 104:24; Aisaia 40:26.

Ol dispela mak i stap ples klia tru, a? Tru tumas, ol i stap ples klia tru, na ol man em ol i no lukim na i no laik bilip long God, ol ‘i no gat eskius long tok ol i no save long em.’ Wanpela saveman i tok piksa olsem: Wanpela draiva i no bihainim sainbot long rot i tok “Baut—Tanim i Go Han Kais.” Polisman i stopim em na sasim em. Draiva i tok em i no lukim sainbot. Tasol tok bilong en i no gat as, long wanem, sainbot i stap ples klia na ai bilong draiva i gutpela. Na tu, draiva i gat wok long lukim na bihainim ol sainbot long rot. Olsem tasol, ol samting God i wokim i soim klia olsem God i stap, kain olsem “sainbot” i stap ples klia. Yumi ol man inap wokim tingting, olsem na yumi inap lukim dispela “sainbot.” I no gat eskius long yumi givim baksait long en.

Tru tumas, ol samting God i bin wokim i olsem wanpela buk i tokaut long ol gutpela pasin bilong em. Tasol i gat narapela buk i kamapim klia planti samting moa bilong God—em Baibel. Long rot bilong Baibel yumi inap kisim save long bekim bilong dispela bikpela askim: God i tingting pinis long mekim wanem ol samting long dispela graun na ol manmeri i stap long en? Sapos yu kisim save long bekim bilong dispela askim, em inap helpim yu long i go klostu moa long God, em yumi ‘ol man inap lukim’ ol gutpela pasin bilong em long ‘ol samting em i bin wokim’ na i stap long graun.