FRAN PES STORI | WANPELA WOA I SENISIM TRU I STAP BILONG OL MAN

Satan i As Tru Bilong Woa na Ol Pen na Hevi

Wol Woa 1 i pinis long Novemba 11, 1918. Ol man i pasim ol bisnis bilong ol na olgeta man i amamas na danis long ol strit. Tasol dispela amamas i no stap longpela taim. Narapela samting nogut i kamap bihain tasol long woa na i kilim i dai planti milion man moa winim ol man i dai long woa.

Em wanpela sik nogut ol i kolim bikpela sik kus bilong Spen i bin kisim ol soldia long ples pait bilong Frans long Jun 1918. Dispela sik i bin kilim i dai planti manmeri tru. Olsem, insait long sampela mun tasol, dispela sik i kilim i dai planti soldia bilong Amerika long Frans, winim namba bilong ol soldia i dai long woa. Na taim ol soldia i go bek long ples bihain long woa, ol i kisim dispela sik i go wantaim ol, na wantu sik kus i kisim ol man long olgeta hap bilong graun.

Ol yia bihain long woa, i gat bikpela hangre na ol man i sot long mani. Taim woa i pinis long 1918, i gat bikpela hangre tru long planti hap bilong Yurop. Long 1923, mani bilong Jemani i no gat strong moa. Inap 6-pela yia bihain ol wok bisnis na mani samting bilong graun olgeta i bagarap. Long 1939, Wol Woa 2 i kirap na i olsem Wol Woa 1 i no pinis olgeta yet. Wanem samting i as bilong ol dispela hevi i wok long kamap?

EM MAK BILONG LAS DE

Tok profet bilong Baibel i helpim yumi kliagut long as na sampela bikpela samting i bin kamap bipo, na dispela em i tru long Wol Woa 1. Jisas Krais i tok profet long wanpela taim we “wanpela kantri bai pait long narapela kantri” na bai gat taim bilong bikpela hangre na bikpela sik long olgeta hap. (Matyu 24:3, 7; Luk 21:10, 11) Em i tokim ol disaipel bilong em olsem ol dispela hevi ol i mak bilong las de. Buk Revelesen i stori moa long dispela na i tok ol hevi i kamap long graun bikos long wanpela woa i bin kamap long heven.—Lukim blok “Woa Long Graun na Woa Long Heven.”

Dispela seim buk bilong Baibel i stori long 4-pela man i sindaun long hos. Tripela bilong ol dispela man i sindaun long hos i makim ol hevi em Jisas i bin tok profet long en em woa, bikpela hangre, na bikpela sik. (Lukim blok “Yu Ting Fopela Man i Sindaun Long Hos i Raun i Stap?”) I klia tru olsem Wol Woa 1 i bin kirapim taim bilong hevi na ol dispela hevi i no pinis yet. Na Baibel i kamapim klia olsem Satan i bin kirapim ol dispela hevi. (1 Jon 5:19) Yu ting wanpela inap pasim strong bilong Satan long kamapim ol samting nogut?

Buk Revelesen i tokim yumi olsem Satan “i gat sotpela taim tasol bilong i stap.” (Revelesen 12:12) Em as na Satan i belhat nogut tru na em i kamapim planti hevi hia long graun. Olsem na olgeta dispela hevi i kamapim klia olsem Satan i gat sotpela taim tasol.

BAGARAPIM OL SAMTING SATAN I KAMAPIM

Wol Woa 1 i bin senisim planti samting long i stap bilong ol man. Em i kirapim wanpela haptaim we i gat ol woa, ol pait bilong daunim gavman, na ol man i no gat trast moa long ol lida bilong ol. Na tu, em i kamapim klia olsem ol i bin rausim Satan long heven. (Revelesen 12:9) Dispela man i bosim graun em i mekim pasin olsem wanpela dikteta nogut bikos em i save olsem em i gat sotpela taim tasol. Taim dispela sotpela haptaim bilong em i pinis, orait ol hevi em Wol Woa 1 i bin kirapim ol tu bai pinis.

Tok profet bilong Baibel i stap olsem as na yumi ken bilip tru olsem klostu nau Jisas Krais, King bilong yumi long heven, em bai “bagarapim ol samting Satan i kamapim.” (1 Jon 3:8) Planti milion manmeri i save beten long Kingdom Bilong God i mas i kam. Yu save mekim olsem tu? Long rot bilong dispela Kingdom, ol gutpela manmeri bai lukim laik bilong God i kamap long graun, na laik bilong Satan, nogat. (Matyu 6:9, 10) Aninit long Kingdom Bilong God, bai i no gat wanpela bikpela woa i kamap gen long graun na ol narapela woa tu bai nogat moa! (Song 46:9) Kisim save long dispela Kingdom na bai yu ken stap long dispela taim we bel isi tasol bai stap long graun olgeta!—Aisaia 9:6, 7.

Woa Long Graun na Woa Long Heven

Inap 1,900 yia paslain long Wol Woa 1 i kirap, Satan i laik givim Jisas “olgeta kingdom bilong graun.” (Matyu 4:8, 9) Jisas i sakim dispela traim, tasol bihain em i kolim Satan olsem “hetman bilong dispela graun.” (Jon 14:30) Na tu, aposel Jon i bin tok “dispela graun olgeta i stap long han bilong Satan.”—1 Jon 5:19.

Satan i gat bikpela strong bilong bosim graun olgeta, olsem na i stret long ting em i as bilong Wol Woa 1, na ol hevi em woa i bin kamapim. I stret Buk Revelesen i kamapim klia olsem kirap long 1914 i kam inap long nau, Satan i as bilong olgeta pen na hevi ol man i karim. Hia em sotpela stori bilong ol samting em Revelesen sapta 12 i stori long en:

Ves 7 Woa i kamap long heven na Maikel (Jisas Krais) i pait wantaim dispela traipela snek (Satan).
Ves 9 Satan “em man i save giamanim olgeta manmeri bilong graun,” ol i tromoi em i kam daun long graun.
Ves 12 “Yu graun na yu solwara, yupela lukaut, long wanem, Satan i kam daun pinis long yupela, na em i belhat nogut tru, em i save em i gat sotpela taim tasol bilong i stap.”

Ol yia Baibel i kolim na ol samting i kamap long graun i soim olsem dispela pait long heven i kamap bihain long Kingdom Bilong God i kirap mekim wok long heven long 1914.a Long dispela yia stret, woa i kamap long graun na woa i kamap long heven.

a Lukim sapta 8 bilong buk Tru Tru Baibel i Tok Wanem? em ol Witnes Bilong Jehova i wokim.

Yu Ting Fopela Man i Sindaun Long Hos i Raun i Stap?

Waitpela hos, man i sindaun long en em wanpela king long heven. Dispela King em Jisas Krais yet, na em i sindaun long dispela hos bilong mekim stretpela pait. (Song 45:4) Namba 1 wok bilong em, em long rausim Satan na ol ensel nogut bilong Satan long heven.—Revelesen 6:2; 12:9.

Retpela hos, man i sindaun long en i gat “namba bilong tekewe bel isi long graun.” (Revelesen 6:4) Kirap long 1914 na i kam inap long nau, woa i bin bagarapim tru sindaun bilong ol man. Inap 21 yia bihain tasol long Wol Woa 1 i pinis, Wol Woa 2 i kirap na i kilim i dai planti manmeri moa. Wanpela lain i skelim dispela samting i tok inap 60 milion manmeri i dai long Wol Woa 2. Kirap long 1945 na i kam inap long nau, ol woa i stap long ol wan wan hap, tasol planti man i dai wankain olsem long ol bikpela woa. Sampela saveman i tok winim 100 milion manmeri i dai long ol woa kirap long yia 1900 i go inap long 2000.

Blakpela hos, man i sindaun long en i holim skel bilong makim bikpela hangre. (Revelesen 6:5, 6) Long taim bilong Wol Woa 1, lain ami i blokim rot bilong ol Jemani na dispela i mekim na inap 750,000 manmeri i dai long hangre. Long 1921, winim 2 milion manmeri long Rasia i dai long hangre, na ol wankain hevi i kamap long planti hap bilong graun. Bungim olgeta, inap 70 milion manmeri i dai long hangre insait long yia 1900 i go 2000. Long olgeta yia, winim 3 milion pikinini aninit long 5-pela krismas i save dai bikos ol i sot long kaikai.

Yelopela hos, man i sindaun long en i bringim dai i kam long rot bilong ol bikpela sik. (Revelesen 6:8) Wanpela bikpela sik i bin kamap long yia 1900 samting em bikpela sik kus bilong Spen. Ol man i no save hamas tru i dai, tasol wanpela lain i tok dispela sik i bin kilim i dai 50 milion manmeri. Buk Man and Microbes i tok: “Dispela sik i bin kilim i dai planti man moa winim ol sik i bin kamap bipo. Sik bubonik i no bin kilim i dai planti man olsem.” Smolpoks, malaria, na sik TB em ol narapela sik we i kilim i dai planti handret milion manmeri long yia 1900 i go 2000.