BEKIM OL ASKIM BILONG BAIBEL

Olsem wanem dai bilong Jisas i helpim yumi?

Taim God i wokim ol man, em i laik bai ol i stap oltaim long graun na ol i no ken karim hevi bilong sik na dai. Tasol namba wan man, Adam, i sakim tok bilong Krieta na em i lus long kisim laip oltaim. Yumi ol tumbuna pikinini bilong Adam, olsem na yumi olgeta i save dai. (Rom 5:8, 12; 6:23) God tru, Jehova, i salim Pikinini bilong em Jisas i kam long graun bilong dai na baim bek gutpela laip em Adam i bin lusim.—Ritim Jon 3:16.

Dai bilong Jisas i opim rot long God i ken lusim ol sin bilong yumi na yumi inap kisim laip oltaim. Baibel i helpim yumi long piksaim long tingting laip long graun bai olsem wanem taim yumi no moa karim ol hevi bilong sik, go lapun, na dai.—Ritim Aisaia 25:8; 33:24; Revelesen 21:4, 5.

Yumi mas mekim wanem bilong tingim dai bilong Jisas?

Long nait paslain long Jisas i dai, em i tokim ol disaipel bilong em long mekim wanpela bung bilong tingim dai bilong em. Taim yumi mekim bung bilong tingim dai bilong Jisas long olgeta yia, dispela i helpim yumi long luksave olsem Jisas na Jehova i laikim tru olgeta man.—Ritim Luk 22:19, 20; 1 Jon 4:9, 10.