Askim 2: Wanem Samting Bai Kamap Taim Mi Dai?

ROMAN i bin liklik taim gutpela pren bilong em i bin dai long kar eksiden. Em i tok: “Dai bilong pren bilong mi i bin mekim bikpela samting tru long mi. Planti yia bihain long dispela eksiden, mi bin tingting olsem, wanem samting i kamap long yumi taim yumi dai.”

Bilong wanem ol man i mekim dispela askim?

Dai em wanpela narakain samting. Maski yumi gat wanem krismas, yumi olgeta i no laik dai. Planti man i save pret long wanem samting bai kamap taim ol i dai.

Sampela i givim wanem bekim?

Planti man i bilip olsem taim man i dai, i gat sampela hap bilong em i stap laip yet. Ol i ting ol gutpela man bai kisim gutpela pe long heven, na ol man nogut bai i kisim pen oltaim long ol sin ol i bin mekim. Sampela i ting olsem taim man i dai em i pinis olgeta na ol man i lusim tingting olgeta long em.

Ol dispela bekim i kamapim klia wanem kain tingting?

Namba 1 bekim i kamapim dispela tingting olsem taim man i dai, em i no dai tru. Namba 2 bekim i soim olsem i stap bilong yumi i no gat as bilong en. Ol man i holim dispela namba 2 tingting, ating ol i gat kain tingting olsem: “Yumi kaikai na dring, long wanem, tumora bai yumi dai.”—1 Korin 15:32.

Baibel i tok wanem?

Baibel i no skulim ol man olsem taim man i dai i gat wanpela hap bilong em i stap laip yet. God i kirapim King Solomon long tok: “Ol man i gat laip i winim ol man i dai pinis. . . . Ol i save bai ol i dai. Tasol ol man i dai pinis, ol i no inap save long wanpela samting.” (Saveman 9:4, 5) Ol man i dai pinis ol “i no inap save long wanpela samting” na ol i no save liklik long ol samting i wok long kamap. Ol i no inap long pilim samting o mekim samting. Olsem na ol daiman i no inap helpim o nogutim ol man i stap laip.

God i no wokim ol man bilong i dai, em tingting we planti man i gat. Em i wokim namba 1 man, Adam, na givim rot long em long i stap laip oltaim long graun. Wanpela taim tasol we God i bin kolim dispela tok dai, em long taim em i tokim Adam long strafe bilong pasin bilong sakim tok. God i tambuim Adam long kaikai pikinini bilong wanpela diwai na em i tok lukaut olsem sapos Adam i kaikai “wantu [em] bai dai.” (Stat 2:17) Sapos Adam na Iv i bin bihainim tok, tupela na olgeta tumbuna pikinini bilong ol husat i stap gut long God, bai stap laip oltaim long graun.

Long laik bilong Adam yet em i sakim tok lukaut bilong God. Em i mekim sin taim em i sakim tok bilong God, olsem na em i dai. (Rom 6:23) I no gat wanpela hap bilong Adam i stap laip yet taim em i dai, nogat. Taim em i dai, em i pinis olgeta. God i tokim Adam: “Bai yu wok hat tru long kisim kaikai bilong yu na tuhat bai i kamap long pes bilong yu. Na bai yu hatwok oltaim inap yu dai na yu go bek long graun. Long wanem, mi bin wokim yu long graun.” (Stat 3:18, 19) Yumi ol tumbuna pikinini bilong Adam, olsem na yumi kisim sin na dai long rot bilong em.—Rom 5:12.

Maski Adam i sakim tok, God bai kamapim tru laik bilong Em long pulapim graun olgeta wantaim ol tumbuna pikinini bilong Adam. (Stat 1:28; Aisaia 55:11) Klostu nau Jehova bai kirapim bek planti manmeri em ol i dai pinis. Aposel Pol i tok long dispela taim olsem: “Bai i gat kirap bek bilong ol man i dai pinis, em ol stretpela man na ol man nogut wantaim.”—Aposel 24:15.

Roman, em mipela i kamapim tok bilong em long kirap bilong dispela atikol, em i stadi long Baibel na kisim save long tok Baibel i mekim long dai na long God Jehova. Ol save em i kisim i mekim bikpela samting long em. Ritim stori bilong em long pes 11 bilong dispela nius.

Bilong kisim sampela save moa long wanem samting i save painim man taim em i dai, lukim sapta 6 bilong buk Tru Tru Baibel i Tok Wanem? Yu ken daunlodim long www.jw.org/tpi

Jisas i Tok Wanem Long Dai?

Jisas i no wanbel wantaim ol hetman bilong lotu long taim bilong em, em ol i tok ol man i dai bai i no inap kirap bek. (Luk 20:27) Na tu, em i no skulim ol man olsem sampela hap bilong man i save stap laip yet taim man i dai. Nogat. Jisas i skulim ol man long ol samting i stap daunbilo.

Dai i olsem slip. Taim pren bilong em Lasarus i dai, Jisas i tok: “Pren bilong yumi Lasarus, em i slip. Tasol mi bai go long hap na kirapim em.” Ol disaipel bilong Jisas i no kliagut long tok bilong em. Ol i tok: “Bikpela, sapos em i slip, em bai kamap orait.” Baibel i tok: “Jisas i tok long dai bilong Lasarus. Tasol ol i ting em i tok long Lasarus i slip. Olsem na Jisas i tokaut klia long ol olsem: ‘Lasarus i dai pinis.’”—Jon 11:11-14.

Ol man i dai pinis bai kirap bek. Taim Jisas i kamap long asples bilong Lasarus, em i strongim Marta, susa bilong Lasarus, olsem: “Brata bilong yu bai kirap bek.” Bihain Jisas i mekim dispela tok promis: “Kirap bek em mi yet na laip em mi yet. Man i bilip long mi, maski em i dai, em bai kisim laip gen.” Tok promis bilong Jisas i no wanpela tok nating tasol, nogat. Long ai bilong planti aiwitnes, Jisas i kirapim bek Lasarus, maski em i dai pinis inap 4-pela de.—Jon 11:23, 25, 38-45.

Long wanpela tok hait Jisas i soim long aposel Jon, Jisas i tok promis gen olsem ol man i dai pinis bai kirap bek. Em i stori long wanpela taim bihain we dai bai larim ol man i dai pinis i stap long en, ol i go.—Revelesen 20:13.