BEKIM OL ASKIM BILONG BAIBEL
Yu ting ol ensel inap helpim yumi?
Bipo ol ensel i bin helpim gutpela wokman bilong God, em Daniel, na long nau tu ol i helpim ol man long harim gutnius
God Jehova i bin wokim planti milion ensel paslain long em i wokim ol man. (Jop 38:4, 7) Ol dispela ensel i strongpela spirit na ol i save mekim wok bilong God. Sampela taim God i salim ol long stiaim na lukautim ol wokman bilong em long graun. (Song 91:10, 11) Long nau ol ensel i save helpim ol man long harim gutnius em ol disaipel bilong Jisas i wok long autim.—Ritim Revelesen 14:6, 7.
Yu ting yumi mas beten long ol ensel long helpim yumi? Nogat. Beten em i wanpela pasin bilong lotu, na yumi mas lotu long God wanpela tasol. (Revelesen 19:10) Ol ensel i wokman bilong God, olsem na ol i bihainim tok bilong em, na i no tok bilong ol man. Em as na long rot bilong Jisas yumi mas beten long God wanpela tasol.—Ritim Song 103:20, 21; Matyu 26:53.
I gat sampela ensel nogut i stap?
Olsem ol man bilong graun, God i bin wokim ol ensel long i stap fri long makim ol samting ol i laik mekim, olsem ol i laik bihainim laik bilong God o nogat. Tasol sori tru, planti ensel i bikhet na sakim tok bilong God. (2 Pita 2:4) Namba 1 ensel long bikhet em Satan. Na tu, ol arapela ensel i bikhet na bihainim em na ol i kamap ol spirit nogut. Tasol Jisas i bin rausim Satan wantaim ol spirit nogut long heven na tromoi ol i kam daun long graun.—Ritim Revelesen 12:7-9.
Kirap long 1914, pasin nogut na pasin bilong pait na bagarapim man i go bikpela. Na dispela i makim olsem klostu nau God bai bagarapim Satan na ol spirit nogut. Bihain God bai kamapim paradais long dispela graun olsem i bin stap long bipo.—Ritim Revelesen 12:12; 21:3, 4.