Yu Bilip Tru Olsem Yu Holim Tok i Tru? Bilong Wanem?
“Yupela i ken save tru long laik bilong God, em dispela laik em i gutpela, na em i orait, na i gutpela olgeta.”—ROM 12:2.
1. Long taim bilong woa, ol pris pasto bilong lotu Kristendom i bin mekim wanem?
YU TING em laik bilong God long ol Kristen i go long woa na kilim i dai ol man bilong narapela kantri? Insait long 1 handret yia i go pinis, planti manmeri husat i kolim ol yet olsem Kristen ol i bin mekim olsem. Ol pris bilong ami, em ol i bilong Misin Katolik, ol i blesim ami na ol gan na ol samting em lain ami bai yusim long pait long lain Katolik bilong narapela kantri. Ol pasto bilong lotu Protestan i mekim wankain samting. Dispela samting i bin kamap long Wol Woa 2, na planti manmeri tru i bin i dai.
2, 3. Long pait bilong Wol Woa 2 na bihain long en, ol Witnes Bilong Jehova i mekim wanem? Bilong wanem?
2 Long dispela taim bilong woa, ol Witnes Bilong Jehova i bin mekim wanem? Stori bilong ol samting i kamap bipo i soim olsem ol i no insait long pait. Bilong wanem? Ol i bihainim pasin bilong Jisas na ol tok em i bin skulim ol long en. Em i tok: “Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:35) Na tu, ol i bihainim stiatok em aposel Pol i kamapim long tok em i raitim i go long ol Kristen long Korin.—Ritim 2 Korin 10:3, 4.
3 Ol Kristen tru i save larim Baibel i skulim maus bilong bel bilong ol, olsem na ol i no save lain long pait o insait long ol pait. Planti tausen Witnes i no insait long pait, olsem na ol birua i mekim nogut long ol, em ol yangpela na ol lapun, na ol man na ol meri. Planti bilong ol i karim hevi long ol banis kalabus nogut. Long taim lain Natsi i bosim Jemani, ol i kilim i dai sampela Witnes. Maski ol Witnes long Yurop i karim bikpela hevi long han bilong ol birua, ol i no lusim wok bilong autim gutnius bilong Kingdom Bilong Jehova. Ol i autim tok maski ol i stap long kalabus, banis kalabus nogut, na long ples i stap longwe tru long biktaun. Long 1994, wanpela pait i kamap long Ruanda na dispela pait i bilong bagarapim na pinisim wanpela lain olgeta, tasol ol Witnes i no insait long dispela pait. Na tu, i no longtaim i go pinis, ol i no insait long pait i kamap taim Yugoslavia i bruk i go liklik liklik.
4. Ol Witnes Bilong Jehova i no insait long pait, olsem na dispela i kirapim ol man long kisim wanem tingting?
4 Ol Witnes Bilong Jehova i no insait long pait na dispela i kirapim planti tausen man long bilip tru olsem ol Witnes i bihainim pasin bilong laikim tru God na laikim tru ol narapela. Ol i bihainim pasin bilong i stap Kristen tru. Tasol i gat ol narapela samting long wok lotu bilong yumi em ol narapela i lukim na dispela i kirapim ol long bilip tru olsem ol Witnes Bilong Jehova em ol Kristen tru.
BIKPELA WOK TRU BILONG SKULIM MAN
5. Wanem senis i kamap long wok bilong ol disaipel bilong Krais long pastaim?
5 Taim Jisas i kirapim wok bilong em long autim tok, em i kamapim klia olsem em i bikpela samting long autim gutnius bilong Kingdom Bilong God. Em i makim 12-pela disaipel long kirapim wok autim tok na dispela wok bai i go long olgeta hap bilong graun, na em i givim trening long 70 disaipel. (Luk 6:13; 10:1) Ol i redi long bringim gutnius i go long lain Juda pastaim. Tasol narapela samting i kamap! Ol disaipel bilong Jisas i mas bringim gutnius i go long ol manmeri bilong ol narapela lain. Dispela em bikpela senis tru long ol disaipel bilong lain Juda!—Apo. 1:8.
6. Wanem samting i kirapim Pita long luksave olsem Jehova i save mekim wankain pasin long ol man bilong narapela lain?
6 Holi spirit i stiaim aposel Pita long i go long haus bilong Kornilius, em man bilong narapela lain husat i no bin katim skin. Pita i luksave olsem God i mekim wankain pasin long ol man bilong olgeta lain. Kornilius na ol wanhaus bilong em i kisim baptais. Lotu Kristen i kamap bikpela moa; ol manmeri bilong olgeta lain inap harim tok i tru na bilip long en. (Apo. 10:9-48) Nau ol i mas autim tok long olgeta hap bilong graun.
7, 8. Oganaisesen bilong Jehova i go pas long mekim wanem wok? (Lukim piksa long kirap bilong stadi.)
7 Ol man i go pas long ol Witnes Bilong Jehova long nau, ol i givim bel tru long autim gutnius na skulim ol man long olgeta hap bilong graun. Inap olsem 8 milion Witnes i givim bel tru long autim tok bilong Krais long winim 600 tokples, na ol bai mekim long planti moa tokples! Ol man i save olsem ol Witnes Bilong Jehova i save raun long ol haus na autim tok, na autim tok long ol strit, na sampela taim ol i sanapim ol tebol na ol self na putim ol buk na nius long en na bai ol man i ken lukim na kisim.
8 Winim 2 tausen, 9 handret trensleta i kisim spesel trening long trensletim tok bilong Baibel na ol buk na nius bilong Baibel. Ol i trensletim tok i go long ol bikpela tokples, na tu, ol i trensletim tok i go long planti handret liklik tokples we ol man bilong wanpela ples tasol i save long en na namba bilong ol em inap olsem planti milion. Olsem: Long Spen, planti milion manmeri i mekim tokples Katalan. Long nau, ol manmeri i kirap gen long mekim tokples Katalan na dispela tokples i senis liklik long Andora, Alicante, ol Ailan Balearic, na Valencia. Long nau ol Witnes Bilong Jehova i wokim ol buk na nius bilong Baibel long tokples Katalan, na ol i yusim dispela tokples long ol miting Kristen na dispela i helpim ol manmeri long pilim tru tok ol i harim.
9, 10. Wanem samting i kamapim klia olsem oganaisesen bilong God i laik tru long helpim olgeta manmeri long sait bilong lotu?
9 Dispela wok bilong trensletim ol tok na skulim ol man i kamap long planti kantri. Long Meksiko, ol manmeri i mekim tokples Spen, tasol planti lain namel long ol i mekim ol narapela tokples. Wanpela lain em lain Maya. Brens long Meksiko i makim trenslesen tim bilong tokples Maya long i go stap long wanpela hap bilong kantri we ol inap yusim na harim dispela tokples long olgeta de. Narapela lain em lain i mekim tokples Nepal, em wanpela bilong ol tokples ol i mekim long Nepal, na populesen bilong dispela kantri i winim 29 milion. Long dispela kantri, ol manmeri i mekim 120 tokples, tasol winim 10 milion manmeri i mekim tokples Nepal, na dispela tokples i stap olsem namba 2 tokples bilong planti arapela manmeri. Ol i trensletim ol buk na nius bilong Baibel long dispela tokples tu.
10 Wok bilong planti trenslesen tim long olgeta hap bilong graun i soim klia olsem oganaisesen bilong Jehova i tingim tru wok bilong autim gutnius bilong Kingdom long olgeta hap. Ol i bin tilim planti milion liklik nius, ol buklet, na ol magasin long ol manmeri long olgeta hap bilong graun, na ol dispela buk na nius i no gat pe long en. Ol Witnes Bilong Jehova i save givim mani long laik bilong ol yet, na dispela i helpim ol long mekim dispela wok. Ol i bihainim tok bilong Jisas, olsem: “Yupela i kisim fri, olsem na yupela i mas givim fri.”—Mat. 10:8.
Trenslesen tim i redim ol litresa long tokples Low German (Lukim paragraf 10)
Long Paragwai, ol i yusim litresa long tokples Low German (Lukim tu piksa long kirap bilong stadi)
11, 12. Ol Witnes Bilong Jehova i autim tok long olgeta hap bilong graun, na olsem wanem dispela i helpim ol narapela?
11 Ol Witnes Bilong Jehova em ol Kristen husat i givim bel tru long autim tok na skulim ol man, na ol i bilip tru olsem ol i painim pinis tok i tru. Olsem na ol i daunim tru laik bilong ol yet bambai ol inap autim dispela tok long ol manmeri bilong olgeta kantri na lain. Planti bilong ol i holim liklik mani kago tasol, lainim narapela tokples, na bihainim sindaun bilong ol man long narapela kantri na bai ol inap insait long dispela bikpela wok. Dispela wok bilong autim tok na skulim ol man long olgeta hap bilong graun em narapela samting we i kirapim planti man long bilip tru olsem ol Witnes Bilong Jehova em ol disaipel tru bilong Krais Jisas.
12 Ol Witnes i mekim ol dispela wok bikos ol i bilip tru olsem ol i painim pinis tok i tru. Tasol wanem samting moa i kirapim planti milion man long bilip olsem ol Witnes Bilong Jehova i holim tok i tru?—Ritim Rom 14:17, 18.
RISEN BILONG OL LONG BILIP
13. Olsem wanem ol Witnes i helpim oganaisesen long i stap klin?
13 Long taim bilong yumi, i gat ol Kristen em ol i bilip tru olsem ol i holim tok i tru, olsem na taim yumi skelim tok bilong ol, dispela inap helpim yumi. Wanpela man husat i stap wokman bilong Jehova inap planti yia pinis, em i tok: “Mipela i save wok strong tru long helpim oganaisesen bilong Jehova long i stap klin, na mipela i no surik long givim tok kaunsel na tok bilong stretim ol arapela.” Wanem samting i helpim ol long bihainim dispela stretpela pasin? Ol i bihainim ol lo i stap long Baibel na pasin em Jisas na ol disaipel i bin mekim. Long taim bilong ol Witnes Bilong Jehova long nau, wan wan tasol long lain bilong ol i no bihainim ol lo bilong God, olsem na kongrigesen i mas rausim ol. Tasol bikpela lain bilong ol i bihainim klinpela pasin na pasin i stret, na dispela i makim tu sampela em pastaim ol i bihainim pasin i no stret na bihain ol i senisim laip bilong ol.—Ritim 1 Korin 6:9-11.
14. (a) Planti man husat i raus long kongrigesen, ol i bin mekim wanem? (b) Wanem gutpela samting i bin kamap?
14 Olsem wanem long ol lain em kongrigesen i bihainim tok bilong Baibel na rausim ol? Planti tausen manmeri i tanim bel na lusim ol pasin nogut na kongrigesen i orait long kisim bek ol. (Ritim 2 Korin 2:6-8.) Taim kongrigesen i bihainim gut lo bilong Baibel long stretpela pasin, dispela i helpim kongrigesen Kristen long i stap klin na dispela i kirapim olgeta insait long kongrigesen long holimpas bilip. Ol Witnes Bilong Jehova i strong long bihainim ol lo bilong God, na dispela i narapela kain tru long planti lotu, olsem na planti man i bilip tru olsem ol Witnes i bihainim tok i tru.
15. Wanem samting i kirapim wanpela brata long bilip tru olsem em i painim pinis tok i tru?
15 Ol Witnes husat i stap longpela taim long tok i tru, bilong wanem ol i bilip olsem ol i painim pinis tok i tru? Wanpela brata husat i gat 54 krismas, em i tok: “Kirap long taim mi stap tineja, mi pilim olsem 3-pela bikpela tok i bin strongim tru bilip bilong mi: (1) God i stap laip; (2) God i kirapim ol man long raitim Baibel; na (3) God i yusim na blesim kongrigesen Kristen bilong ol Witnes Bilong Jehova long nau. Mi stadi inap planti yia, na oltaim mi traim long skelim ol dispela bikpela tok na painimaut sapos ol i tru o nogat. Isi isi, mi kisim ol save we i kamapim klia moa olsem ol dispela tok em ol tok i tru, na dispela i strongim tru bilip bilong mi olsem yumi holim tok i tru.”
16. Wanpela sista i laikim tru wanem ol samting long tok i tru?
16 Wanpela sista husat i marit pinis na em i mekim wok long hetkota bilong yumi long New York, em i tok long oganaisesen bilong Jehova olsem: “Dispela oganaisesen tasol i save wok strong long autim nem bilong Jehova. Olsem na yumi no kirap nogut olsem nem bilong God i kamap inap olsem 7 tausen taim long Baibel! Mi pilim tru tok i stap long 2 Stori 16:9 (NW): ‘Ai bilong Jehova i save lukluk long ol manmeri i stap long olgeta hap bilong graun bilong helpim na strongim ol man i givim bel olgeta long em.’” Dispela sista i tok moa olsem: “Tok i tru i skulim mi long olsem wanem mi inap givim bel olgeta long Jehova na bai em i redi long yusim strong bilong em long helpim mi. Mi pilim tru na laikim tumas pasin bilong mi long pas gut wantaim Jehova. Mi amamas long wok Jisas i mekim long helpim mi long save gut long God, na dispela i strongim mi.”
17. Wanpela man em pastaim em i no bilip long God, em i pilim tru wanem samting? Bilong wanem?
17 Wanpela man em pastaim em i no bilip long God, em i tok: “Ol samting God i wokim i kirapim mi long bilip tru olsem God i laik bai ol manmeri i stap amamas, olsem na em bai pinisim pen na hevi. Na tu, ol manmeri i wok long bihainim ol pasin i nogut moa, tasol lain bilong Jehova i wok long kamap strong moa long bilip, pasin laikim, na pasin bilong givim bel tru long God. Dispela i olsem mirakel, na spirit bilong Jehova tasol inap kamapim dispela samting.”—Ritim 1 Pita 4:1-4.
18. Yu pilim olsem wanem long ol tok em 2-pela brata i mekim?
18 Narapela Witnes husat i stap planti yia long tok i tru, em i kolim ol risen bilong em long bilipim tok i tru yumi save autim, na em i tok: “Mi bin stadi inap planti yia na dispela i kirapim mi long bilip tru olsem ol Witnes i wok strong long bihainim pasin bilong ol Kristen long taim bilong ol aposel. Taim mi raun long ol narapela kantri, mi luksave olsem ol Witnes Bilong Jehova i stap wanbel long olgeta hap bilong graun. Tok i tru bilong Baibel i helpim mi long stap belgut na stap amamas.” Wanpela brata husat i winim 60 krismas, em i stori long risen bilong em long bilip tru olsem em i painim pinis tok i tru. Em i pilim tru wok em Jisas Krais i bin mekim, na em i tok: “Yumi bin stadi gut long laip bilong Jisas na wok bilong em long autim tok na yumi pilim tru gutpela pasin bilong em. Yumi bin senisim sampela pasin bilong yumi, na long rot bilong Krais Jisas yumi inap i go klostu moa long God. Yumi luksave olsem ofa bilong Krais long baim bek ol man i opim rot long God inap kisim bek yumi. Yumi save olsem em i bin kirap bek long dai. Yumi gat ol stori bilong ol lain husat i bin stap olsem aiwitnes long dispela samting.”—Ritim 1 Korin 15:3-8.
YUMI MAS MEKIM WANEM LONG TOK I TRU?
19, 20. (a) Pol i tokim kongrigesen long Rom olsem ol i mas mekim wanem? (b) Yumi ol Kristen husat i dediket pinis long God, yumi gat wanem gutpela wok long mekim?
19 Yumi stap olsem ol Kristen husat i laikim tru ol arapela, olsem na yumi no ken pasim gutpela save bilong tok i tru i stap long yumi yet, nogat, yumi mas autim long ol narapela tu. Pol i tokim ol bratasista long Rom olsem: “Sapos long ai bilong ol man yu autim dispela ‘tok i stap insait long maus bilong yu,’ olsem Jisas em i Bikpela, na long bel yu bilip olsem God i kirapim em bek long dai, orait God bai kisim bek yu. Long bel man i save bilip na em i kamap stretpela man, tasol long maus em i save tokaut long dispela bilip bilong en long ai bilong ol manmeri, na God i kisim bek em.”—Rom 10:9, 10.
20 Yumi ol lain husat i dediket pinis long Jehova na stap olsem ol Witnes bilong em, yumi bilip tru olsem yumi holim tok i tru na yumi save olsem yumi gat wok long skulim ol narapela long gutnius olsem Kingdom Bilong God i kirap pinis long mekim wok. Taim yumi mekim wok autim tok, yumi laik bai ol man i pilim tru ol tok bilong Baibel yumi skulim ol long en, na tu, yumi laik bai ol i pilim tru olsem yumi gat strongpela bilip.