Papamama​—Lukautim Gut Pikinini

1, 2. (a) Wasman bilong sipsip long lain Israel i save mekim wanem ol wok? (b) Olsem wanem papamama i mekim wankain wok olsem wasman bilong sipsip?

OL WASMAN long Israel bilong bipo i save mekim bikpela wok tru i gat planti hatwok long en. Sampela taim ples i hot tumas o kol tumas, na tu, ol i mas lukautim gut ol sipsip na meme na bai ol animal na ol man i no ken bagarapim ol. Olgeta taim ol wasman i save skelim ol sipsip na helpim sipsip husat i sik o em i kisim bagarap. Ol wasman i save tingim gut ol pikinini sipsip bikos ol i no gat bikpela strong olsem ol sipsip i bikpela pinis.—Stt. 33:13.

² Papamama Kristen i mekim wankain wok olsem wasman bilong sipsip, na bihainim ol pasin em ol wasman i save bihainim. Papamama i gat wok long mekim bikpela long ol pikinini na “trenim ol olsem Jehova i makim, na putim tingting bilong em long bel bilong ol.” (Efe. 6:4) Yu ting dispela wok em isi? Nogat tru! Satan i save kamapim kain kain tok bilong pulim tingting bilong pikinini, na sin i save kirapim pikinini long kisim ol laik nogut. (2 Tim. 2:22; 1 Jon 2:16) Sapos yu gat pikinini, orait yu ken mekim wanem bilong helpim em? Yumi ken stori long 3-pela samting yu ken mekim bilong lukautim gut pikinini—yu mas save gut long pikinini, givim kaikai long em, na stiaim em.

SAVE GUT LONG PIKININI

3. Papamama i mas mekim wanem na bai ol inap ‘save long lukluk’ bilong pikinini?

³ Gutpela wasman i save skelim gut olgeta wan wan sipsip na bai em i ken save olsem sipsip i gat gutpela helt, o nogat. Yu ken mekim wankain samting long pikinini bilong yu. Baibel i tok: “Yu mas save gut long lukluk bilong lain sipsip bilong yu.” (Snd. 27:23, NW) Pastaim, yu mas skelim pasin bilong pikinini, na tu, yu mas skelim tingting na filings bilong em. Hau bai yu inap mekim dispela wok? Wanpela gutpela rot em olsem, oltaim yu mas toktok wantaim pikinini.

4, 5. (a) Papamama i ken traim wanem ol rot bilong kirapim pikinini long autim tingting na filings bilong em? (Lukim piksa long kirap bilong stadi.) (b) Yu bin traim wanem rot na pikinini i no pret long toktok wantaim yu?

⁴ Sampela papamama i lukim olsem i hatwok tru long toktok wantaim pikinini taim em i kamap tineja—ating em bai surik na les long tokaut long tingting na filings bilong em. Sapos pikinini i mekim olsem, orait yu ken mekim wanem? Taim yu laik toktok wantaim pikinini long ol bikpela samting, orait yu no ken fosim em long toktok inap longpela taim; mobeta yu traim ol narapela rot. (Lo 6:6, 7) Ating yu mas wok strong long mekim ol narapela samting wantaim pikinini. Yu ken wokabaut wantaim em o kisim em long kar na raun wantaim em, na insait long wanpela pilai, o wok wantaim em long mekim sampela wok long haus. Ol kain samting olsem inap helpim tineja pikinini long stap bel isi na em yet bai amamas long autim ol tingting na filings bilong em.

⁵ Olsem wanem sapos pikinini i no laik toktok wantaim yu? Yu ken traim narapela rot. Taim de i pinis, yu no ken askim pikinini meri long ol samting em i bin mekim long dispela de, nogat. Mobeta yu yet i tokim em long ol samting yu bin mekim long dispela de. Dispela bai kirapim em long tokim yu long ol samting i bin painim em long dispela de. Sapos yu laik save long tingting bilong pikinini long sampela samting, orait yu no ken askim em long kamapim tingting bilong em yet, nogat. Yu ken askim em olsem pren bilong em i pilim olsem wanem long dispela samting. Bihain, yu ken askim em olsem em bai givim wanem skultok bilong helpim pren bilong em.

6. Papamama i mas mekim wanem na bai ol i redi long givim taim long pikinini na pikinini i no ken pret long toktok wantaim ol?

⁶ Sapos yu laik bai pikinini i tokim yu long tingting na filings bilong em, orait yu mas redi long givim taim long em na mekim pasin we bai kirapim em long kam long yu. Sapos oltaim papamama i bisi na ol i no gat taim long toktok wantaim pikinini, dispela bai mekim na tineja pikinini i no inap tokim papamama long hevi bilong em. Orait, papamama i mas mekim wanem na pikinini i no ken pret long toktok wantaim ol? Papamama i no ken tok tasol olsem, “Sapos yu laik toktok long mi, orait kam tasol.” Mobeta papamama i mekim sampela samting moa. Ol tineja pikinini i mas luksave olsem yu no inap luk daun long hevi bilong ol o kros nating long ol. Planti papamama i save bihainim stretpela pasin. Kayla i gat 19 krismas na em i tok: “Mi inap toktok wantaim papa bilong mi long olgeta kain samting. Em i no save katim tok o sutim tok long mi, nogat, em i save putim yau tasol. Oltaim em i save givim gutpela skultok.”

7. (a) Taim papamama i laik toktok wantaim pikinini long pasin bilong kisim boipren na gelpren, olsem wanem ol inap bihainim stretpela tingting? (b) Papamama i save mekim wanem na pikinini i surik long toktok wantaim ol?

⁷ Taim yu toktok wantaim pikinini long kain samting olsem pasin bilong kisim boipren na gelpren, yu no ken tingting tasol long givim strongpela tok kaunsel, nogat. Mobeta yu skulim em long stretpela pasin em i mas bihainim. Tingim olsem: Yu go long wanpela restron na taim yu lukim lista bilong kaikai, yu luksave olsem lista i kolim tasol ol tok lukaut long olsem wanem kaikai inap bagarapim bodi. Ating yu bai lusim dispela restron na yu go painim narapela restron. Pikinini bai mekim olsem sapos em i kam long yu long kisim skultok, na yu givim ol strongpela tok lukaut tasol. (Ritim Kolosi 3:21.) Olsem na papamama i mas bihainim stretpela tingting. Emily em wanpela yangpela sista, na em i tok: “Taim papamama i toktok wantaim mi long pasin bilong kisim boipren, ol i no save yusim ol tok we i pasim mi long kisim boipren. Ol i kamapim klia olsem em gutpela samting long save gut long narapela na painim poroman marit. Dispela i mekim na mi no save surik long toktok wantaim ol long dispela samting. Mi laik bai ol tu i save long boipren bilong mi, na mi no laik haitim dispela samting long ol.”

8, 9. (a) Wanem gutpela samting bai kamap sapos yu putim yau long pikinini na yu no katim tok? (b) Taim yu yet i bin putim yau long pikinini, wanem gutpela samting i kamap?

⁸ Olsem Kayla i tok, sapos yu bihainim pasin isi na putim gut yau long pikinini, orait pikinini i no inap pret long toktok wantaim yu. (Ritim Jems 1:19.) Katia, wanpela mama wanpis, em i tok: “Mi save les kwik long putim yau long pikinini meri bilong mi. Mi no save larim em long pinisim gut toktok. Sampela taim mi save pilim taiet, na sampela taim mi pilim les tasol long mekim wanpela samting. Mi senisim pasin bilong mi, olsem na pikinini meri tu i senisim pasin bilong em. Em i save amamas moa long toktok gut wantaim mi.”

⁹ Wankain samting i painim Ronald, em papa i gat tineja pikinini. Ronald i tok: “Taim pikinini meri i tokim mi olsem em i laikim wanpela boi long skul, pastaim mi belhat nogut tru. Tasol bihain mi tingim olsem, taim Jehova i toktok wantaim ol wokman bilong em, em i save mekim pasin isi na bihainim stretpela tingting. Olsem na mi pilim olsem mi mas larim pikinini meri long kamapim tingting bilong em pastaim na bihain mi ken stretim em. Mi amamas olsem mi bin mekim olsem! Dispela em fes taim we mi inap kliagut long tingting tru bilong pikinini meri. Taim em i pinisim toktok bilong em, mi pilim olsem i no hatwok moa long mi inap toktok gut wantaim em. Mi kirap nogut olsem em i amamas long kisim tok kaunsel mi givim long em. Em i tok olsem em i laik tru long senisim pasin bilong em.” Taim yu toktok wantaim pikinini long olgeta taim, dispela bai helpim yu long save long tingting na filings bilong em. Olsem na tok bilong yu bai i gat bikpela strong long stiaim ol disisen em i mekim long laip bilong em.a

GIVIM KAIKAI LONG PIKININI

10, 11. Hau bai yu inap helpim pikinini na em i no ken lusim bilip?

¹⁰ Gutpela wasman i save olsem wanpela sipsip inap lusim lain sipsip bilong em. Ating dispela sipsip i lukim gras i stap klostu liklik, olsem na em i go, na bihain em i go longwe moa na stap longwe long lain sipsip. Long wankain pasin, isi isi pikinini inap bihainim pasin we bai bagarapim em long sait bilong bilip. Ating em i bihainim ol poroman nogut o ol amamas nogut. (Snd. 13:20) Hau bai yu inap helpim pikinini na em i no ken bihainim kain pasin olsem?

¹¹ Taim yu skulim pikinini, yu mas hariap long helpim em sapos yu luksave long ol samting we inap pundaunim em. Sapos pikinini i gat ol pasin Kristen, tasol em i no bihainim yet ol dispela pasin, orait yu mas strongim em long bihainim ol dispela pasin. (2 Pita 1:5-8) Taim yupela i mekim Famili Lotu long olgeta wik, dispela em gutpela taim tru long helpim pikinini. Wok Kingdom bilong Oktoba 2008 i tok: “Ol het bilong famili i gat wok Jehova i givim long ol, olsem ol i mas stretim ol samting bambai famili i ken insait long famili Baibel stadi long olgeta taim.” Olsem wanem? Yu bihainim dispela rot bilong lukautim gut pikinini? Yu ken save tru olsem pikinini i pilim tru pasin bilong yu long lukautim em long sait bilong bilip.—Mat. 5:3; Fili. 1:10.

12. (a) Olsem wanem Famili Lotu i helpim ol yangpela? (Skelim tu blok “Ol i Amamas Tru.”) (b) Famili Lotu i helpim yu olsem wanem?

¹² Carissa em tineja, na em i stori olsem Famili Lotu i helpim famili bilong em. Em i tok: “Mi amamas olsem mipela olgeta inap sindaun na toktok wantaim. Taim mipela i mekim olsem, dispela i helpim mipela long pas gut wantaim na mekim ol samting mipela i amamas long en. Oltaim Papa i save mekim Famili Lotu. Mi lukim olsem em i tingim tru dispela samting, na dispela i kirapim mi tu long holim wankain tingting olsem em. Na tu, dispela i kirapim mi long rispektim em olsem papa bilong mi na man husat i go pas long lukautim mipela long sait bilong lotu.” Brittney em wanpela yangpela sista, na em i tok: “Famili Lotu i helpim mi long pas gut wantaim papamama bilong mi. Mi pilim olsem ol i laik putim yau long ol hevi bilong mi na ol i tingim mi tru. Dispela i helpim famili bilong mipela long i stap strong na stap wanbel.” Taim yu givim kaikai bilong strongim bilip bilong pikinini—moa yet long taim bilong Famili Lotu—dispela em nambawan rot bilong lukautim gut pikinini.b

STIAIM PIKININI

13. Papamama i ken mekim wanem bilong kirapim laik bilong pikinini long mekim wok bilong Jehova?

¹³ Gutpela wasman i save holim stik na yusim dispela stik long stiaim na sambai long lain sipsip bilong em. Nambawan tingting bilong em i olsem, em i laik stiaim ol sipsip i go long ples i gat “gutpela gras.” (Ese. 34:13, 14) Sapos yu papa o mama, ating yu laik stiaim pikinini long mekim wok bilong Jehova, a? Yu laik bai pikinini i pilim wankain olsem man bilong raitim song, em i tok: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.” (Sng. 40:8) Ol yangpela husat i holim kain tingting olsem, ol bai dediket long Jehova na kisim baptais. Ol i mas mekim olsem taim ol i kamap strong long bilip na ol i laik tru long mekim wok bilong Jehova.

14, 15. (a) Papamama Kristen i mas wok strong long kirapim pikinini long mekim wanem? (b) Wanem ol samting inap kirapim tineja pikinini long kisim 2-pela tingting long lotu i tru?

¹⁴ Olsem wanem sapos pikinini i no kamap strong long bilip, na em i kisim 2-pela tingting long bilip bilong em? Wok strong long kirapim pikinini long laikim tru God Jehova na pilim tru olgeta samting God i bin mekim. (Rev. 4:11) Dispela bai kirapim pikinini yet long mekim disisen long lotuim God.

¹⁵ Long nau, olsem wanem sapos pikinini i kisim 2-pela tingting? Hau bai yu inap lukautim gut pikinini na helpim em long luksave olsem nambawan gutpela rot em long mekim wok bilong Jehova, na dispela bai helpim em long i stap amamas long olgeta taim? Luksave long samting i kirapim pikinini long holim 2-pela tingting. Olsem: Tru tru pikinini man bilong yu i no wanbel long tok bilong Baibel, o em i surik tasol long sambai long bilip bilong em taim em i stap wantaim ol wanlain bilong em? Tru tru pikinini meri bilong yu i no laikim savetingting i stap long ol lo bilong God, o em i pilim tasol olsem em i stap wanpis na ol narapela i no tingim em?

16, 17. Long wanem ol rot papamama inap helpim pikinini na bai em yet i ken pilim tok i tru na mekim i kamap olsem samting bilong em yet?

¹⁶ Yu inap helpim pikinini long daunim pasin bilong holim 2-pela tingting long tok i tru. Olsem wanem yu inap helpim pikinini? Planti papamama i save givim wanpela askim long pikinini na dispela i save kirapim pikinini long kamapim tingting bilong em. Ol i save askim pikinini olsem: “Yu pilim olsem wanem long stap olsem Kristen? Olsem wanem dispela i helpim yu? Dispela i pasim yu long mekim wanem ol samting? Taim yu skelim ol blesing yumi kisim long nau na ol blesing yumi bai kisim long bihain, yu ting ol dispela blesing i winim tru ol samting yu no inap mekim? Wai na yu pilim olsem?” Taim yu givim ol dispela askim, yu mas yusim toktok bilong yu yet na toktok long pasin i soim olsem yu tingim tru pikinini, na i no olsem yu laik painim rong long em. Taim yu toktok wantaim pikinini, yu ken stori long Mak 10:29, 30. Ating sampela yangpela bai raitim tingting bilong ol long pepa. Long wanpela sait bilong pepa, ol bai raitim ol samting ol i no inap mekim, na long narapela sait, ol bai raitim ol blesing ol i kisim. Dispela inap helpim yu long luksave long hevi bilong pikinini na yu inap painim rot bilong helpim em. Yumi save amamas long yusim buk Baibel i Tok na buk Pasin Laikim Bilong God long stadi wantaim ol man i laik save long tok i tru, olsem na yumi mas amamas moa yet long stadi wantaim ol pikinini bilong yumi yet! Yu mekim olsem, o nogat?

¹⁷ Bihain, pikinini yet bai mekim disisen olsem em bai lotuim God, o nogat. Yu no ken ting olsem em bai bihainim nating bilip bilong yu. Pikinini i mas pilim tok i tru na mekim i kamap olsem samting bilong em yet. (Snd. 3:1, 2) Sapos i luk olsem pikinini i hatwok long mekim olsem, orait kirap gen long helpim em. Helpim em long skelim ol dispela askim: “Wanem samting i mekim na mi save olsem God i stap? Wanem samting i kirapim mi long bilip tru olsem God Jehova i laikim mi? Wai na mi bilip olsem ol lo bilong Jehova i stap bilong helpim mi?” Lukautim gut pikinini na bihainim pasin isi na stiaim em na bai em i ken luksave olsem rot Jehova i makim em nambawan rot bilong bihainim.c—Rom 12:2.

18. Olsem wanem papamama inap bihainim pasin bilong Jehova, em Nambawan Bikpela Wasman?

¹⁸ Olgeta Kristen i laik bihainim pasin bilong Nambawan Bikpela Wasman. (Efe. 5:1; 1 Pita 2:25) Papamama i mas save long lukluk bilong lain sipsip bilong ol—ol gutpela pikinini—na wok strong long stiaim ol na bai ol inap kisim ol blesing em Jehova i redim bilong givim long ol. Olsem na lukautim gut pikinini na helpim em long bihainim rot bilong tok i tru!