Ol Presen Yu Inap Givim Long Ol King

YU BAI givim wanem samting olsem presen long wanpela man i gat bikpela namba? Long taim bilong ol man i raitim Baibel ol spais i gat bikpela pe wankain olsem gol, olsem na ol man i save givim ol spais olsem presen long ol king.a Em risen na taim ol glasman i kam bilong givim ol presen long “king bilong ol Juda,” 2-pela bilong ol dispela presen em ol spais i gat gutpela smel.—Matyu 2:1, 2, 11.

Baibel i stori tu olsem kwin bilong Seba i go lukim Solomon na “em i givim em planti gol na hevi bilong gol i winim 4 ton. Na kwin i givim em olkain ston i dia tumas na olkain paura samting i gat gutpela smel. Kwin i givim planti bilong dispela gutpela paura long Solomon. Dispela kain paura i gutpela moa na i winim tru olgeta arapela kain paura.” (2 Stori 9:9) Na tu, ol king i salim kain kain paura i gat gutpela smel i go long Solomon bilong soim olsem ol i stap wanbel wantaim em.—2 Stori 9:23, 24.

Bilong wanem ol spais na ol paura i gat bikpela pe long taim bilong ol man i raitim Baibel? Long wanem, ol i save yusim ol spais long mekim planti wok. Olsem, ol i yusim bilong mekim ol wok lotu, ol i putim long bodi bilong man i dai pinis, na tu, ol man i yusim ol spais bilong mekim gut pes na skin bilong ol i luk nais. (Lukim blok “Wok Bilong Ol Spais Long Taim Bilong Ol Man i Raitim Baibel.”) Ol spais i gat bikpela pe, long wanem, planti man i yusim ol, na tu, ol man i mas baim ol spais long ol narapela kantri.

WOKABAUT LONG PLES NATING BILONG AREBIA

Long taim bilong ol man i raitim Baibel, sampela gras na diwai samting bilong wokim ol spais i save gro long Ples Daun Bilong Jordan. Tasol ol i save baim ol arapela spais long ol narapela kantri. Baibel i kolim nem bilong planti spais. Sampela bilong ol dispela spais em aloe, balsam, frenkinsens, mer, safron, na sinamon. Na tu, i gat ol spais olsem kumin, mint, na dil em ol i save putim bilong mekim kaikai i swit.

Ol i kisim ol dispela spais long we? Ol i kisim ol spais olsem aloe, kasia, na sinamon long ol kantri em nau ol i kolim Saina, India, na Sri Lanka. Na ol i kisim ol spais olsem mer na frenkinsens long ol diwai na bus i gro long hap saut bilong ples nating bilong Arebia i go inap long Somalia long Afrika. Na tu, ol i kisim wanpela spais em ol i kolim nad. Dispela spais i save gro long Himalaya long India.

Ol man i save kisim ol spais na wokabaut long ples nating bilong Arebia bilong i go long Israel. Buk The Book of Spices i tok, “long 1500 B.C.E. samting, kantri Arebia i gat nem olsem ples ol man i save karim ol kago samting long hap bilong Is i go long Wes.” Long dispela taim, ol man bilong karim spais i save bihainim rot i go long ol taun, ol taun i gat strongpela banis, na ol ples malolo bilong ol man i raun long kamel we i stap long Negev long hap saut bilong Israel. Lain World Heritage Centre of UNESCO i tok ol dispela hap ol man i bin stap long en i soim olsem “planti man i bin i go i kam bilong baim ol samting long hap bilong ol ples i stap long Saut Arebia i go inap long Mediterenian.”

Planti taim ol man i raun long ol kamel na ol i karim ol spais i gat gutpela smel i save wokabaut klostu 1,800 kilomita long hap bilong Arebia. (Jop 6:19, 20) Baibel i stori long lain Ismael i lusim Gileat wantaim ol kamel na karim “ol kain kain marasin na sanda ol i wokim long blut bilong diwai” bilong i go long Isip. (Stat 37:25) Ol pikinini bilong Jekop i salim brata bilong ol Josep olsem wokboi nating long ol dispela bisnisman.

“WOK BISNIS BILONG BAIM NA SALIM OL SPAIS”

Inap planti handret yia ol bisnisman bilong Arebia i save salim na baim ol spais. Ol tasol i save salim ol spais olsem kasia na sinamon i go long Esia. Lain Arebia i kamapim ol giaman stori olsem planti hevi inap painim ol man husat i laik kisim ol spais. Dispela i mekim na ol lain i stap long hap bilong Mediterenian i no wok bisnis wantaim ol lain long hap Is. Buk The Book of Spices i tok, dispela pasin bilong lain Arebia i mekim na ol i “kisim planti mani long wok bisnis bilong baim na salim ol spais.”

Lain Arebia i kamapim wanem ol stori? Herodotus, em wanpela saveman bilong Grik i stap long yia 450 B.C.E. samting i tok ol i kamapim ol stori olsem ol pisin i save yusim ol skin bilong diwai sinamon long wokim ol haus long ol ples maunten na ol man i no inap go long en. Bilong ol man i ken kisim ol dispela spais i gat bikpela pe, ol i save putim ol abus olsem trap long as bilong maunten. Orait ol dispela gridi pisin i save kisim planti tumas abus i go long haus bilong ol, na dispela i mekim haus i hevi na i bruk. Taim haus bilong pisin i pundaun, ol man inap kisim ol skin bilong diwai sinamon na salim long ol bisnisman. Olkain stori olsem i go long olgeta hap. Na buk The Book of Spices i tok: “Ol man i ting i gat bikpela wok bilong kisim ol spais, olsem na ol i salim sinamon long bikpela pe.”

Tasol bihain ol man i painimaut olsem dispela stori bilong lain Arebia i no tru. Olsem na kirap long 65 B.C.E. samting, biktaun Aleksandria long Isip i kamap ples bilong wokim na salim ol spais. Taim ol man bilong raun long sip i kliagut long ron bilong win long solwara India, nau ol i save kalap long ol sip bilong ol Rom long Isip na i go olsem long India. Taim ol man i mekim olsem, planti man moa inap baim ol spais, olsem na pe bilong en i go daun.

Long nau, pe bilong gol i winim pe bilong ol spais. Na tu, ol man i no inap givim ol spais olsem presen long ol man i gat namba. Maski i olsem, planti milion man long olgeta hap bilong graun i yusim ol spais long wokim ol pefium na ol marasin samting, na tu, ol i putim ol spais long mekim kaikai i swit. Tru tumas, planti man long nau i amamas long baim ol spais i gat gutpela smel, wankain olsem ol man i stap planti tausen yia i go pinis i bin amamas long yusim.