Bihainim Pasin Bilong Man i Tok Promis Long Givim Laip Oltaim
“Yupela i mas bihainim pasin bilong God, em i laikim yupela tumas na yupela i stap olsem ol pikinini bilong em.”—EFE. 5:1.
1. God i givim wanem presen long yumi?
JEHOVA i givim presen long yumi—yumi inap pilim tingting bilong ol narapela manmeri taim hevi i painim ol, maski yumi yet i no karim dispela hevi. (Ritim Efesus 5:1, 2.) Olsem wanem yumi inap yusim gut dispela presen? Yumi mas mekim wanem na bai dispela presen i no putim hevi long yumi?
2. Jehova i pilim olsem wanem taim yumi karim pen na hevi?
2 God i tok promis long ol Kristen em i bin makim na em i tok, ol bai kisim laip oltaim long heven na ol i no inap dai moa, na “ol arapela sipsip” bilong Jisas bai kisim laip oltaim long graun. (Jon 10:16; 17:3; 1 Kor. 15:53) Ol Kristen husat i kisim laip oltaim long heven na ol Kristen husat i kisim laip oltaim long graun, ol bai i no inap karim pen na hevi moa olsem i painim yumi long nau. Taim lain Israel i stap kalabus olsem ol sleiv long Isip na karim hevi, Jehova i save long hevi i painim ol. Long nau tu, God i save long pen na hevi i painim yumi. “Taim ol [Israel] i karim pen na hevi, Bikpela tu i bin karim pen na hevi wantaim ol.” (Ais. 63:9) Sampela handret yia bihain, ol Juda i pret bikos ol narapela lain i birua long ol taim ol i laik wokim gen tempel, tasol God i tok: “Man i holim yupela em i holim kiau bilong ai bilong mi.” (Sek. 2:8, NW) Mama i save sori na laikim tru bebi bilong em, na olsem tasol, Jehova i laikim tru ol manmeri bilong em na em i save helpim ol. (Ais. 49:15) Jehova inap pilim tru hevi i painim ol narapela, na em i givim dispela presen long yumi na yumi tu inap pilim hevi i painim ol narapela.—Sng. 103:13, 14.
JISAS I BIHAINIM PASIN LAIKIM BILONG GOD
3. Jisas i mekim wanem na dispela i soim olsem em i gat pasin sori?
3 Jisas i pilim tru hevi bilong ol narapela maski em yet i no bin karim wankain hevi. Ol man nating i pret long ol hetman bilong lotu bikos ol dispela hetman i putim planti lo na daunim tru ol manmeri. (Mat. 23:4; Mak 7:1-5; Jon 7:13) Jisas i no pret long ol man o pundaun long tok giaman bilong ol, tasol em i pilim tru ol hevi i painim ol narapela. Olsem na “taim em i lukim bikpela lain manmeri, em i sori tru long ol, long wanem, ol man i bin mekim nogut long ol na ol i stap nogut tru olsem ol sipsip i no gat wasman.” (Mat. 9:36) Jisas i bihainim pasin bilong Papa bilong em na em tu i soim pasin laikim na pasin sori.—Sng. 103:8.
4. Jisas i lukim ol manmeri i karim hevi, na dispela i kirapim em long mekim wanem?
4 Taim Jisas i lukim ol man i karim pen na hevi, dispela i kirapim em long soim pasin laikim. Em i bihainim gut pasin laikim bilong Papa bilong em. Wanpela taim Jisas na ol aposel i mekim bikpela wok bilong autim tok, na bihain ol i laik i go long hap i no gat man bambai ol inap malolo. Tasol bikpela lain manmeri i kam wetim em, olsem na em i sori tru long ol na em i “skulim ol long planti samting.”—Mak 6:30, 31, 34.
BIHAINIM PASIN LAIKIM BILONG JEHOVA
5, 6. Sapos yumi laik bihainim pasin laikim bilong God, orait yumi mas mekim wanem kain pasin long ol narapela manmeri? Stori long dispela. (Lukim piksa long kirap bilong stadi.)
5 Yumi inap bihainim pasin laikim bilong God taim yumi mekim gut long ol narapela. Yumi ken tok piksa olsem: Alan em wanpela yangpela brata, na em i tingim wanpela lapun brata em ai bilong em i bagarap na em i hatwok long rit. Na tu, dispela lapun brata i hatwok long wokabaut i go long ol haus na autim tok. Alan i tingim tok bilong Jisas, olsem: “Ol pasin yupela i laik bai ol man i mekim long yupela, yupela i mas mekim wankain pasin long ol.” (Luk 6:31) Alan i askim em yet olsem, ‘Mi laik bai ol man i mekim wanem kain pasin long mi?’ Em i tok, ‘Mi laik bai ol i pilai wantaim mi!’ Tasol dispela lapun brata i no inap pilai. Tok bilong Jisas i makim olsem yumi mas askim yumi yet olsem, ‘Sapos mi dispela brata, mi laik bai ol narapela i mas mekim wanem kain pasin long mi?’
6 Alan i yangpela, tasol em inap pilim hevi bilong dispela lapun brata. Em i lukim ol samting em dispela brata i mekim na em i putim gut yau long ol tok bilong em. Dispela brata i gat hevi long ai na em i hatwok long ritim Baibel na wokabaut i go long ol haus na autim tok. Isi isi, Alan inap pilim hevi bilong dispela brata, na em i luksave long ol samting em i mas mekim bilong helpim dispela brata, na Alan i laik tru long helpim em. Sapos yumi laik bihainim pasin laikim bilong God, orait yumi tu i mas pilim hevi bilong dispela brata.—1 Kor. 12:26.
Bihainim pasin bilong Jehova na soim pasin laikim (Lukim paragraf 7)
7. Hau bai yumi inap save gut long ol narapela na pilim hevi bilong ol?
7 Sampela taim i hatwok long pilim hevi em ol narapela i karim. Planti man i bungim ol hevi we i no painim yumi. Ating sampela i kisim bagarap long bodi, karim hevi bilong sik, na karim hevi bilong kamap lapun. Sampela i bel hevi tru, o sampela samting i mekim ol i pret, o bel bilong ol i bagarap bikos ol narapela i mekim nogut long ol. Tasol sampela i stap insait long ol famili we ol i go long narapela narapela lotu o i gat papa o mama wanpis. Dispela i soim klia olsem olgeta man i save bungim hevi, na sampela taim ol i bungim hevi we i no bin painim yumi. Long kain taim olsem, hau bai yumi inap bihainim pasin laikim bilong God? Yumi mas putim gut yau i go inap long yumi kliagut long tingting bilong narapela. Dispela bai kirapim yumi long bihainim pasin laikim bilong Jehova na helpim ol narapela. Olgeta wan wan man i gat narapela narapela hevi, tasol yumi inap yusim tok bilong Baibel long strongim ol na helpim ol long sampela narapela rot.—Ritim Rom 12:15; 1 Pita 3:8.
MEKIM GUT LONG OL NARAPELA
8. Wanem samting i stiaim Jisas long mekim gutpela pasin?
8 Pikinini Bilong God i tok: “God Antap Tru . . . i save mekim gutpela pasin long ol man i no gat pasin bilong tok tenkyu na ol man nogut.” (Luk 6:35) Jisas i bihainim pasin bilong God na em i mekim gut long ol narapela. Wanem samting i stiaim Jisas long mekim gutpela pasin? Em i skelim gut olsem toktok na pasin bilong em bai mekim wanem long ol narapela, olsem ol bai amamas o bel hevi. Wanpela sinmeri i go long Jisas na em i krai na aiwara bilong em i pundaun long lek bilong Jisas. Jisas i luksave olsem meri i tanim bel pinis, na meri bai bel hevi sapos Jisas i mekim hatpela pasin na rausim em i go. Olsem na Jisas i tok amamas long em na fogivim em. Wanpela Farisi i no amamas long pasin Jisas i mekim, tasol Jisas i toktok gut long dispela Farisi.—Luk 7:36-48.
9. Olsem wanem yumi inap bihainim pasin bilong God long mekim gut long ol narapela? Stori long wanpela eksampel.
9 Olsem wanem yumi inap bihainim pasin bilong God na mekim gutpela pasin? Aposel Pol i tok: “Wokboi bilong Bikpela i no gat wok long pait, nogat. Em i gat wok long isi long olgeta man.” (2 Tim. 2:24) Sapos ol man i gat savetingting, ol bai soim pasin isi long olgeta man. Ol bai skelim gut ol tok na pasin ol i mekim bambai dispela i no ken bagarapim bel bilong ol narapela. Tingim olsem wanem yumi inap soim gutpela pasin taim ol dispela samting i kamap: Long ples wok, supavaisa i no mekim gut wok bilong em. Yumi bai mekim wanem? Sapos wanpela brata i lusim miting inap planti mun na bihain em i kam bek gen long miting, yumi bai tok wanem long em? Sapos yumi go long haus bilong ol man long autim tok, na man bilong haus i tok, “Mi bisi ya.” Yumi bai soim olsem yumi tingim em? Long haus, poroman marit i askim yu olsem, “Wai na yu no tokim mi long samting yu plen long mekim long Sarere?” Bai yu bihainim gutpela pasin na bekim tok bilong em? Sapos yumi pilim tingting bilong ol narapela na tingim olsem tok bilong yumi bai mekim ol i pilim amamas o bel hevi, yumi bai mekim ol tok na pasin i kamapim klia olsem yumi bihainim pasin bilong Jehova long mekim gut long ol man.—Ritim Sindaun 15:28.
BIHAINIM SAVETINGTING BILONG GOD
10, 11. Olsem wanem yumi inap bihainim savetingting bilong God? Stori long wanpela eksampel.
10 Sapos yumi tingim ol hevi we i no painim yumi, dispela inap helpim yumi long bihainim pasin bilong Jehova long yusim savetingting na luksave long ol hevi inap kamap long ol pasin yumi mekim. Savetingting em wanpela bikpela pasin bilong Jehova, olsem na em inap luksave stret long ol hevi inap kamap long ol pasin yumi mekim. Yumi ol man i no inap save stret long ol samting bai kamap bihain, tasol yumi ken tingim ol hevi inap kamap sapos yumi mekim wanpela samting. Lain Israel i no tingim ol hevi inap kamap sapos ol i sakim tok bilong God. Maski God i mekim planti samting bilong helpim ol, Moses i save olsem ol bai mekim pasin i no stret long ai bilong Jehova. Long ai bilong olgeta manmeri bilong Israel, Moses i tok: “Ol lain Israel i no gat gutpela tingting. Tingting bilong ol i sot tru. Sapos ol i gat tingting, ol inap save long as bilong dispela samting i bin bagarapim ol.”—Lo 31:29, 30; 32:28, 29
11 Sapos yumi laik bihainim savetingting bilong God, yumi ken piksaim ol hevi inap kamap long pasin yumi mekim. Sapos yu gat boipren o gelpren, orait yu mas was gut; nogut yu pundaun long pasin pamuk. Yumi no laik tru long mekim samting we inap bagarapim pasin bilong yumi long i stap pren bilong Jehova! Tingim dispela skultok: “Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.”—Snd. 22:3.
ABRUSIM OL TINGTING NOGUT
12. Olsem wanem pasin bilong tingim tingim ol laik nogut inap bagarapim yumi?
12 Man i gat savetingting i luksave olsem pasin bilong tingim tingim wanpela samting i kain olsem paia. Paia inap helpim yumi sapos yumi mekim stretpela wok long en, kain olsem yumi yusim paia long kukim kaikai. Tasol paia inap kukim haus na kilim man i dai sapos yumi no kontrolim. Olsem tasol, sapos yumi tingim tingim ol pasin bilong Jehova, yumi inap bihainim ol pasin bilong em. Tasol sapos yumi tingim tingim ol pasin doti, dispela inap bagarapim yumi. Yumi inap pundaun long pasin pamuk. Tru tumas, sapos oltaim yumi tingim tingim ol laik nogut, dispela inap mekim na yumi no stap gut moa long ai bilong God!—Ritim Jems 1:14, 15.
13. Ating Iv i laik kisim wanem kain sindaun?
13 Tingim samting i kirapim laik bilong Iv long kaikai prut tambu bilong “diwai bilong givim gutpela save long wanem samting i gutpela na wanem samting i nogut.” (Stt. 2:16, 17) Snek i tokim em: “Yutupela i no inap i dai. Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God. God i save long dispela, olsem na em i tambuim yutupela long kaikai pikinini bilong dispela diwai.” Iv “i lukim dispela diwai i naispela tru na i gat ol gutpela pikinini tru bilong kaikai i stap long en.” Iv i mekim wanem? Em “i kisim pikinini bilong dispela diwai na i kaikai. Na em i givim sampela long man bilong em, na man tu i kaikai.” (Stt. 3:1-6) Iv i laikim samting em Satan i toktok long en. I no gat wok long narapela man i tokim Iv long wanem samting i gutpela na wanem samting i nogut. Em yet inap mekim disisen long dispela samting. Iv i tingim tingim tok bilong Satan, na dispela i kamapim hevi! Long rot bilong Adam, “sin i kamap long graun. Na sin i bringim dai i kam.”—Rom 5:12.
14. Olsem wanem Baibel i helpim yumi long abrusim pasin nogut?
14 Taim Iv i mekim sin long gaden Iden, em i no mekim pasin pamuk. Tasol Jisas i tok lukaut long pasin bilong tingim tingim ol pasin doti. Em i tok: “Man husat i wok long lukluk long wanpela meri na aigris long em, long bel em i mekim pinis pasin adaltri.” (Mat. 5:28) Pol tu i tok: “No ken tingting long ol laik bilong bodi yupela i laik inapim long bihain.”—Rom 13:14.
15. Yumi mas bungim ol gutpela gutpela samting long wanem hap? Bilong wanem?
15 Sapos yumi tingim tingim olsem yumi gat planti mani kago na yumi no givim bikpela haptaim long mekim wok bilong God, dispela inap bagarapim yumi. “Ol maniman i ting, mani bilong ol i banisim ol, na bai ol i stap gut, olsem taun i gat strongpela banis.” (Snd. 18:11) Jisas i mekim tok piksa long hevi bai kamap long man “i bungim ol gutpela samting bilong em yet, tasol em i stap rabis long ai bilong God.” (Luk 12:16-21) Jehova i save amamas taim yumi mekim ol samting i stret wantaim laik bilong em. (Snd. 27:11) Yumi save amamas tru taim God i orait long yumi bikos yumi “bungim ol gutpela gutpela samting bilong [yumi] long heven”! (Mat. 6:20) Wanpela bilong ol dispela gutpela samting em olsem, yumi inap i stap pren bilong Jehova.
NO KEN TINGTING PLANTI
16. Wanem wanpela rot bilong daunim pasin bilong wari tumas?
16 Sapos yumi lusim bikpela haptaim na strong long bungim “ol gutpela gutpela samting bilong [yumi] long graun,” dispela inap putim bikpela presa long yumi. (Mat. 6:19) Jisas i yusim tok piksa long kamapim klia olsem “ol wari bilong laip long dispela taim na strong bilong mani long giamanim man,” inap karamapim tok bilong Kingdom. (Mat. 13:18, 19, 22) Long sampela man, maski ol i save wari long mani o nogat, oltaim ol i save tingting long ol hevi inap kamap sapos ol i gat planti mani. Sapos yumi no bosim gut tingting yumi holim, yumi inap kisim bagarap long sait bilong bodi na long sait bilong bilip. Yumi mas trastim Jehova na tingim olsem “sapos man i save wari oltaim, em bai i bel hevi tru na tingting bilong en bai i bagarap. Tasol sapos man i mekim gutpela tok long wantok bilong en, orait wantok bai i belgut tru.” (Snd. 12:25) Sapos wanpela man i pilim tingting bilong yumi na em i mekim ol gutpela tok bilong strongim yumi, dispela inap mekim yumi amamas. Sapos yumi autim tingting bilong yumi long papamama, poroman marit, o wanpela pren yumi trastim na em i holim wankain tingting olsem God, dispela bai helpim yumi long daunim pasin bilong tingting planti.
17. Olsem wanem Jehova i helpim yumi long daunim pasin bilong tingting planti?
17 Jehova tasol inap pilim tru ol wari bilong yumi. Pol i tok: “Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God. Na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela long rot bilong Krais Jisas.” (Fili. 4:6, 7) Tingim ol lain i lukautim yumi na bai i no gat wanpela samting i bagarapim yumi long sait bilong bilip—ol wanbilip, ol elda, gutpela wokboi, ol ensel, Jisas, na Jehova yet.
18. Taim yumi tingim tingim ol samting, hau bai dispela i helpim yumi?
18 Pasin bilong tingim tingim ol samting inap helpim yumi long bihainim ol pasin bilong God, olsem pasin laikim. (1 Tim. 1:11; 1 Jon 4:8) Yumi bai stap amamas sapos yumi soim pasin laikim, tingim hevi inap kamap long pasin yumi mekim, na abrusim pasin bilong wari tumas. Yumi mas yusim gut presen God i givim—pasin bilong piksaim ol samting long tingting. Yumi mas piksaim ol gutpela samting bai kamap bihain na bihainim ol pasin bilong Jehova, em pasin laikim, pasin bilong mekim gut long ol man, bihainim savetingting, na stap amamas.—Rom 12:12.