Holim Wankain Tingting Olsem Krais
“God i ken helpim yupela long bihainim tru pasin bilong Krais Jisas na holim dispela wanpela tingting.”—RO. 15:5.
1. Bilong wanem yumi mas kisim wankain tingting olsem Krais?
JISAS KRAIS i tok: “Yupela olgeta kam long mi. . . . Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo.” (Mt. 11:28, 29) Dispela singaut i soim tingting bilong Jisas, em i gat pasin laikim. Em i stap gutpela piksa tru yumi ken bihainim. Maski Jisas i Pikinini Bilong God na em i gat bikpela strong, em i tingim gut na pilim tru hevi bilong ol man na moa yet em ol man i karim hevi.
2. Yumi bai skelim wanem ol pasin bilong Jisas?
2 Long dispela stadi na long tupela stadi i kamap bihain long en, yumi bai stori long olsem wanem yumi inap kisim na holim “tingting bilong Krais” na bihainim long laip bilong yumi. (1 Ko. 2:16) Yumi bai skelim 5-pela pasin bilong Jisas: Pasin isi na pasin daun, mekim gut long man, bihainim tok bilong God, strongim bel, na bikpela pasin laikim.
Kisim Skul Long Pasin Isi Bilong Krais
3. (a) Jisas i givim wanem skul long ol disaipel long pasin daun? (b) Jisas i mekim wanem taim em i luksave olsem ol disaipel i no gat strong?
3 Jisas, em i Pikinini Bilong God na em i gutpela olgeta, em i bin amamas long kam long graun na wok namel long ol sinman. Na bihain sampela bilong ol bai kilim em i dai. Tasol oltaim Jisas i holimpas amamas bilong em na em i bosim gut bel. (1 Pi. 2:21-23) Sapos yumi “lukluk i go” long pasin bilong Jisas, dispela inap helpim yumi tu long holimpas amamas na bosim gut bel taim popaia na pasin kranki bilong ol arapela i mekim yumi bel hevi. (Hi. 12:2) Jisas i singautim ol disaipel bilong em long go aninit long plang wantaim em bambai ol inap kisim skul long em. (Mt. 11:29) Ol inap kisim wanem skul? Wanpela skul em olsem: Jisas i gat pasin isi, na em i no les kwik long ol disaipel taim ol i popaia. Long nait paslain long Jisas i dai, em i wasim lek bilong ol, na long dispela rot em i skulim ol long wanpela samting ol i no inap lusim tingting long en, em pasin bilong “daunim [ol] yet.” (Ritim Jon 13:14-17.) Bihain, taim Pita, Jems, na Jon i no bin ‘was i stap,’ Jisas i luksave olsem ol i no gat strong na em i sori long ol. Em i askim: “Saimon, yu slip, a? . . . Yupela i mas was na prea i stap. Nogut traim i kamap long yupela na yupela i pundaun. Tru, bel em i gat laik bilong mekim samting, tasol bodi em i no gat strong.”—Mk. 14:32-38.
4, 5. Pasin bilong Jisas inap helpim yumi olsem wanem taim ol arapela i mekim popaia?
4 Yumi save mekim wanem taim wanpela wanbilip i mekim pasin resis, o em i bel hevi kwik long samting yumi mekim, o em i no bihainim kwik ol tok i kam long ol elda o “wokboi i gat gutpela tingting”? (Mt. 24:45-47) Ating yumi pilim olsem em nomol long ol manmeri bilong graun i mekim ol pasin bilong olpela bel, tasol taim ol bratasista bilong yumi i mekim ol pasin kranki, ating yumi pilim hatwok long lusim rong bilong ol, laka? Sapos yumi save kros kwik long ol popaia bilong ol arapela, orait yumi mas askim yumi yet, ‘Olsem wanem mi inap bihainim gut “tingting bilong Krais”?’ Tingim olsem Jisas i no bin bel hevi long ol disaipel, maski ol i no bin bihainim tingting bilong em.
5 Tingim aposel Pita. Taim Jisas i singautim em long lusim bot na wokabaut antap long wara na i go long Em, inap sotpela hap taim Pita i mekim olsem. Tasol Pita i lukim olsem win i strong tumas na em i go daun liklik insait long wara. Yu ting Jisas i kros na i tokim em: “Yu pilim nau! Nau yu save!”? Nogat! “Kwiktaim Jisas i putim han na i holim Pita. Na Jisas i tokim em olsem, ‘Yu gat liklik bilip tasol. Bilong wanem yu gat tupela tingting?’ ” (Mt. 14:28-31) Sapos wanpela brata i sot long bilip, orait yumi ken helpim em long strongim bilip, wankain olsem Jisas i bin helpim Pita. Dispela em skul yumi kisim long pasin isi Jisas i mekim long Pita.
6. Jisas i givim wanem skul long ol aposel long pasin bilong kisim biknem?
6 Pita tu i insait long tok pait bilong ol aposel long husat i nambawan tru namel long ol. Jems na Jon i laik sindaun long han sut na han kais bilong Jisas long Kingdom bilong em. Taim Pita na ol arapela aposel i harim dispela tok, ol i belhat long tupela. Jisas i save olsem ol i bin kisim dispela tingting long hap ol i kamap bikpela long en. Em i singautim ol i kam na em i tok: “Yupela i save, ol king bilong ol arapela lain i save strong tumas long bosim ol lain bilong ol. Na ol bikman bilong ol i save strong tumas long ol manmeri i mas bihainim olgeta tok bilong ol. Tasol dispela pasin i no ken i stap namel long yupela. Nogat. Man i laik i stap bikman namel long yupela, em i mas i stap wokman bilong yupela. Na man i laik i stap namba wan bilong yupela, em i mas i stap olsem wokboi nating bilong yupela.” Orait nau Jisas i tok long pasin bilong em yet, olsem: ‘Pikinini Bilong Man i no kam bilong ol man i ken helpim em. Nogat. Em i kam bilong helpim ol, na givim laip bilong em bilong baim bek planti manmeri.’—Mt. 20:20-28.
7. Olsem wanem yumi olgeta wan wan inap strongim pasin wanbel insait long kongrigesen?
7 Taim yumi tingim pasin daun bilong Jisas, dispela inap helpim yumi long stap olsem ol “man i no gat nem na i stap liklik tru” namel long lain brata bilong yumi. (Lu. 9:46-48) Dispela bai strongim pasin wanbel. Jehova i olsem papa bilong wanpela bikpela famili, na em i laik bai ol pikinini bilong em i “sindaun gut wantaim na i stap wanbel.” (Sng. 133:1) Jisas i beten askim Papa bilong em long olgeta Kristen tru i ken i stap wanbel, na em i tok “ol manmeri bilong graun i ken save, yu bin salim mi na mi kam, na yu laikim ol dispela lain bilong mi long wankain pasin olsem yu bin laikim mi.” (Jo. 17:23) Pasin wanbel bilong yumi i kamapim klia olsem yumi ol disaipel bilong Krais. Sapos yumi laikim dispela pasin wanbel, orait yumi mas bihainim tingting bilong Krais taim ol narapela i mekim pasin kranki. Jisas i save lusim rong bilong ol arapela, na em i tok yumi tu i mas mekim olsem bambai God i ken lusim rong bilong yumi.—Ritim Matyu 6:14, 15.
8. Yumi kisim wanem skul long pasin bilong ol man i mekim wok bilong God inap planti yia?
8 Yumi inap kisim planti save sapos yumi bihainim bilip bilong ol wokman bilong God, em ol i bihainim pasin bilong Krais inap planti yia. Olsem Jisas, ol i pilim hevi bilong ol man i mekim rong. Ol i kisim save olsem, taim yumi bihainim Krais na mekim pasin sori, dispela bai strongim pasin wanbel, na yumi inap “helpim ol man i no gat strongpela bilip na karim hevi bilong ol.” Na tu, dispela bai kirapim kongrigesen olgeta long bihainim tingting bilong Krais. Ol dispela wokman i laik bai ol brata bilong ol tu i mekim olsem, na aposel Pol tu i bin laik bai ol Kristen long Rom i mekim olsem, na em i tok: “Yumi save kisim strong long God wanpela tasol na em wanpela i save mekim yumi sanap strong long bilip. Orait God i ken helpim yupela long bihainim tru pasin bilong Krais Jisas na holim dispela wanpela tingting tasol. Olsem na bai yupela i stap wanbel, na bai yupela olgeta wantaim i litimapim nem bilong God, em i God na Papa bilong Bikpela bilong yumi Jisas Krais.” (Ro. 15:1, 5, 6) Em nau, taim yumi wanbel long mekim lotu, dispela i save litimapim nem bilong Jehova.
9. Bilong wanem yumi mas kisim holi spirit bambai yumi inap bihainim pasin bilong Jisas?
9 Jisas i tok pasin em man i mekim long “daunim [em] yet,” dispela i poroman wantaim pasin isi, em pasin holi spirit bilong God i save kirapim man long mekim. Olsem na yumi mas stadi gut long pasin bilong Jisas, na kisim holi spirit bilong Jehova bambai yumi inap bihainim gut pasin bilong Jisas. Yumi mas beten askim God long givim holi spirit long yumi, na wok strong long kamapim ol pasin bilong en—‘laikim tru ol arapela, amamas, stap bel isi, i no belhat kwik, helpim ol man, mekim gutpela pasin, [“bilip,” NW], stap isi, na daunim laik bilong olpela bel.’ (Ga. 5:22, 23) Taim yumi bihainim Jisas long mekim pasin daun na pasin isi, yumi bai amamasim Papa bilong yumi long heven, em Jehova.
Jisas i Mekim Gut Long Ol Arapela
10. Olsem wanem Jisas i mekim gut long ol arapela?
10 Pasin bilong mekim gut long ol arapela em pasin holi spirit i save kirapim man long mekim. Oltaim Jisas i save mekim gut long ol arapela. Ol man husat i go long Jisas, ol i lukim olsem em i “amamas long ol i kam” na em i mekim gut long ol. (Ritim Luk 9:11.) Yumi inap kisim wanem skul long pasin bilong Jisas long mekim gut long ol arapela? Man i save mekim gut long ol arapela, em i gat pasin pren, pasin isi, na pilim hevi bilong ol arapela, na mekim gutpela pasin. Jisas i gat ol dispela pasin. Em i sori tru long ol man, “long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.”—Mt. 9:35, 36.
11, 12. (a) Stori long olsem wanem Jisas i bin kamapim klia pasin sori bilong em. (b) Yu kisim wanem skul long dispela stori?
11 Jisas i bin mekim sampela samting i kamapim klia olsem em i sori tru long ol man. Olsem: Wanpela meri i karim blut inap 12-pela yia olgeta. Meri i save olsem aninit long Lo Bilong Moses, dispela sik i mekim em i stap doti, na ol lain i tatsim em, ol tu bai kamap doti. (Wkp. 15:25-27) Maski i olsem, gutnem na pasin bilong Jisas i kirapim em long bilip olsem Jisas i gat strong long oraitim em, na tru tru em bai mekim. Meri i tok: “Sapos mi putim han tasol long klos bilong em, bai mi orait gen.” Na em i strongim bel na holim klos bilong Jisas na wantu tasol em i luksave olsem sik bilong em i pinis.
12 Jisas i save olsem wanpela i bin putim han long klos bilong em, na em i tanim bilong lukim husat i bin mekim olsem. Ating meri i pret, nogut ol bai krosim em long em i brukim Lo, olsem na em i guria wantaim na i kam nildaun klostu long lek bilong Jisas na tokaut long olgeta samting i bin kamap. Yu ting Jisas i hatim dispela meri i stap rabis na i karim hevi? Nogat tru! Em i tokim em: “Pikinini, yu bilip long mi, olsem na yu kamap orait gen. Yu go, na bel bilong yu i ken i stap isi.” (Mk. 5:25-34) Ating ol dispela gutpela tok i mekim gut tru bel bilong em!
13. (a) Olsem wanem pasin bilong Jisas i narapela long pasin bilong ol Farisi? (b) Jisas i mekim wanem kain pasin long ol pikinini?
13 Ol Farisi i gat hatpela pasin, tasol Krais i no olsem ol. Em i no yusim namba bilong em long putim sampela hevi moa long ol arapela, nogat tru. (Mt. 23:4) Long gutpela pasin na pasin isi, em i skulim ol arapela long ol pasin bilong Jehova. Jisas i stap gutpela pren tru bilong ol disaipel, oltaim em i laikim ol na mekim gut long ol. (Snd. 17:17; Jo. 15:11-15) Ol liklik pikinini i amamas long stap wantaim Jisas, na em tu i amamas long stap wantaim ol. Maski em i bisi tru, em i save lusim haptaim long stap wantaim ol pikinini. Wanpela taim, ol disaipel i traim long pasim ol manmeri long bringim ol pikinini bilong ol i kam long Jisas i ken holim ol—ol disaipel i holim yet wankain tingting olsem ol bikman bilong lotu long taim bilong ol, ol i ting ol yet i gat biknem. Tasol Jisas i no amamas long samting ol i mekim. Em i tokim ol: “Yupela larim ol pikinini i kam long mi. Yupela i no ken pasim ol. Nogat. Kingdom bilong God em i bilong kain man olsem ol dispela pikinini.” Orait nau em i yusim ol pikinini long givim wanpela skultok, na em i tok: “Mi tok tru long yupela, sapos wanpela man i no kisim kingdom bilong God olsem ol liklik pikinini i save kisim, em i no inap i go insait long en. Nogat tru.”—Mk. 10:13-15.
14. Pasin bilong tingim tru ol arapela inap helpim ol pikinini long wanem ol rot?
14 Tingim: Taim ol dispela pikinini i kamap bikpela pinis, sampela bilong ol bai pilim olsem wanem taim ol i tingim bek olsem Jisas Krais i bin ‘holim ol long han bilong en, na i askim God long mekim gut long ol’? (Mk. 10:16) Taim ol pikinini bilong nau i kamap bikpela pinis, ol tu bai tingim bek na pilim tru pasin bilong ol elda na ol arapela husat i bin tingim tru ol. Na bikpela samting moa, sapos ol arapela long kongrigesen i tingim tru ol pikinini, orait kirap long taim ol i liklik yet ol bai save olsem spirit bilong Jehova i stap wantaim lain bilong em.
Mekim Gutpela Pasin Namel Long Ol Man i No Gat Gutpela Pasin
15. Bilong wanem yumi no ken kirap nogut olsem ol man long nau i no save mekim gut long ol arapela?
15 Planti man long nau i pilim olsem ol i no gat taim long mekim gut long ol arapela. Olsem na long olgeta de, lain bilong Jehova long skul, long ples wok, long taim ol i raun, na long taim ol i autim tok, ol i save bungim ol man i kamapim pasin bilong dispela graun. Ating yumi bel hevi taim ol man i no mekim gut long yumi, tasol yumi no ken kirap nogut long dispela. Jehova i bin kirapim Pol long toksave olsem ol Kristen husat i stap long dispela “taim bilong las de,” ol bai bungim ol man husat i “laikim ol yet tasol” na “ol bai i no save long pasin bilong i stap pren bilong ol arapela.”—2 Ti. 3:1-3.
16. Insait long kongrigesen, olsem wanem yumi ken mekim gut long ol arapela olsem Krais i bin mekim?
16 Tasol gutpela pasin insait long kongrigesen Kristen i save givim nupela strong long man, na dispela i narapela olgeta long pasin bilong ol man bilong graun. Taim yumi bihainim pasin bilong Jisas, yumi olgeta wan wan inap strongim dispela gutpela pasin. Yumi inap mekim olsem long wanem rot? Planti insait long kongrigesen ol i gat sik o ol narapela hevi, na i mas i gat man bilong helpim na strongim bel bilong ol. Long dispela “taim bilong las de,” ol kain hevi olsem i wok long i go bikpela, tasol ol dispela hevi i no nupela samting. Long taim bilong ol man i bin raitim Baibel, ol Kristen i bungim ol wankain hevi. Olsem na pasin bilong helpim ol arapela em i bikpela samting long nau, wankain olsem long taim bilong ol Kristen long bipo. Pol i bin tokim ol Kristen long “strongim bel bilong ol man i save pret [“bel hevi,” NW] na long helpim ol man i no strong,” na “isi isi long olgeta man.” (1 Te. 5:14) Dispela i makim olsem yumi mas mekim gut long ol arapela olsem Krais i bin mekim.
17, 18. Wanem sampela rot we yumi ken bihainim pasin bilong Jisas long mekim gut long ol arapela?
17 Ol Kristen i gat wok long “helpim ol Kristen brata” long wankain pasin olsem Jisas yet bai mekim; yumi mas tingim tru ol lain brata em yumi save long ol inap planti yia pinis, na ol arapela em nau tasol yumi bungim ol. (3 Jo. 5-8) Jisas i bin i go pas long sori long ol arapela, na yumi tu i mas mekim olsem, na redi oltaim long givim nupela strong long ol arapela.—Ais. 32:2; Mt. 11:28-30.
18 Yumi olgeta wan wan inap mekim gut long ol arapela taim yumi tingim tru ol na pilim hevi bilong ol. Yumi mas painim rot long mekim olsem! Pol i tok: “Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret. Yupela i mas strong long litimapim nem bilong ol arapela tasol.” (Ro. 12:10) Dispela i makim olsem yumi mas bihainim pasin bilong Krais, na mekim gutpela pasin long ol arapela, na lain long “mekim tru pasin bilong laikim tru ol arapela.” (2 Ko. 6:6) Pol i stori long dispela pasin laikim bilong Krais, na i tok: “Man i save givim bel bilong en long ol arapela, em i no save kros kwik na bekim pasin nogut ol i mekim long em. Nogat. Em i save mekim gutpela pasin long olgeta man. Em i no save bel nogut long ol man i gat planti samting. Em i no save litimapim nem bilong em yet.” (1 Ko. 13:4) Yumi no ken bel nogut long ol bratasista bilong yumi, nogat, yumi mas bihainim dispela tok: “Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol, olsem God i lusim sin bilong yupela long nem bilong Krais.”—Ef. 4:32.
19. Wanem ol gutpela samting bai kamap taim yumi bihainim pasin bilong Krais long mekim gut long ol arapela?
19 Ol gutpela samting bai kamap taim yumi wok strong long kisim pasin bilong Krais long mekim gut long ol arapela long olgeta kain taim. Spirit bilong Jehova bai mekim gut wok bilong en insait long kongrigesen, na kamapim ol pasin em holi spirit i as bilong en. Na tu, taim yumi bihainim pasin bilong Jisas na helpim ol arapela tu long mekim olsem, yumi bai amamas na wanbel long mekim lotu, na dispela bai mekim God i amamas. Olsem na long ol pasin yumi mekim long ol arapela, oltaim yumi mas wok strong long bihainim pasin isi na mekim gut long ol arapela, olsem Jisas i bin mekim.
Yu Inap Stori Long Dispela?
• Olsem wanem Jisas i soim olsem em i save ‘isi long ol man na daunim em yet’?
• Long wanem ol rot Jisas i mekim gut long ol arapela?
• Namel long ol man i no gutpela olgeta, wanem sampela rot we yumi ken isi long ol man na mekim gut long ol olsem Krais i bin mekim?
[Piksa long pes 8]
Sapos bilip bilong wanpela brata i no strong moa olsem Pita, bai yumi helpim em long strongim bilip?
[Piksa long pes 10]
Olsem wanem yu inap mekim kongrigesen i kamap ples we narapela i mekim gut long narapela?