Pasin Laikim Bilong Krais i Kirapim Yumi Long Soim Pasin Laikim
“[ Jisas] i laikim tumas ol manmeri bilong en i stap long dispela graun, na em i laikim ol moa yet i go inap long taim em i dai.”—JO. 13:1.
1, 2. (a) Olsem wanem pasin laikim bilong Jisas i narapela kain tru? (b) Long dispela stadi, yumi bai stori long wanem ol samting bilong pasin laikim?
JISAS i stap nambawan gutpela piksa long soim pasin laikim. Olgeta samting em i mekim—toktok, pasin, ol tok em i skulim ol man long en, na dai bilong em olsem ofa—olgeta dispela samting i kamapim klia pasin laikim bilong em. I go inap long taim Jisas i dai, em i soim pasin laikim long ol man em i bungim na em i soim moa yet long ol disaipel bilong em.
2 Pasin laikim bilong Jisas i stap olsem gutpela piksa tru em ol disaipel i ken bihainim. Dispela i kirapim yumi long mekim wankain pasin laikim long ol bratasista bilong yumi insait long kongrigesen, na long olgeta arapela man. Long dispela stadi, yumi bai skelim ol samting em ol elda bilong kongrigesen i ken lainim long pasin bilong Jisas—soim pasin laikim long ol man i mekim rong, na dispela i makim tu ol man i mekim ol bikpela rong. Yumi bai stori tu long olsem wanem pasin laikim bilong Jisas i save kirapim ol Kristen long helpim ol bratasista bilong ol long taim ol i bungim hevi bilong mani, bagarap bilong win na ren, na sik samting.
3. Maski Pita i mekim bikpela rong, Jisas i mekim wanem pasin long em?
3 Long nait paslain long Jisas i dai, aposel bilong em yet, Pita, i tok tripela taim olsem em i no save long Jisas. (Mk. 14:66-72) Tasol taim Pita i kam bek, Jisas i lusim rong bilong em—Jisas i bin tokaut pinis olsem Pita bai sori long rong bilong em na em bai i kam bek long Jisas. Na Jisas i putim bikpela wok long han bilong Pita. (Lu. 22:32; Ap. 2:14; 8:14-17; 10:44, 45) Yumi kisim wanem skul long pasin Jisas i mekim long ol man i mekim ol bikpela rong?
Bihainim Tingting Bilong Krais Long Ol Man i Mekim Rong
4. Long wanem kain taim i gutpela moa long yumi soim olsem yumi holim tingting bilong Krais?
4 Long planti samting, yumi mas soim olsem yumi holim tingting bilong Krais. Tasol i gat wanpela samting we inap bagarapim tru bel bilong yumi—em long taim wanpela insait long famili o insait long kongrigesen i mekim bikpela rong. Klostu nau pasin bilong graun bilong Satan bai pinis, olsem na spirit bilong graun i wok long pulim planti man moa long insait long ol pasin nogut. Ol dispela pasin nogut inap kalap tu long ol yangpela na ol lapun wantaim, na daunim laik bilong ol long bihainim ol pasin i stret. Long taim bilong ol aposel, ol i mas rausim sampela long kongrigesen Kristen, na stretim sampela. Na long nau tu i wankain. (1 Ko. 5:11-13; 1 Ti. 5:20) Tasol taim ol elda i soim pasin laikim bilong Krais taim ol i mekim ol dispela wok, dispela inap mekim bikpela samting long man husat i bin mekim rong.
5. Taim man i mekim rong, olsem wanem ol elda i ken bihainim pasin bilong Krais?
5 Olsem Jisas, oltaim ol elda i mas bihainim ol stretpela lo bilong Jehova. Taim ol i mekim olsem, ol i soim ol pasin bilong Jehova, em pasin isi, mekim gut long ol arapela, na pasin laikim. Taim wanpela man i mekim rong na bel bilong em i hevi tru na “bilip bilong [em] i bagarap,” ating bai i no hatwok long ol elda i “mekim pasin isi long dispela man na helpim em long stretim pasin bilong em.” (Sng. 34:18; Ga. 6:1) Tasol ol i mas mekim wanem kain pasin long man i bikhet na i no sori long rong em i bin mekim?
6. Long ol man husat i bin mekim rong, ol elda i no ken mekim wanem pasin? Bilong wanem?
6 Taim ol elda na ol arapela i givim sampela tok kaunsel bilong Baibel long man i mekim rong na em i sakim o i traim long sutim tok long narapela, ating dispela bai mekim ol elda na ol arapela i belhat. Sapos ol i save pinis long ol hevi em i kamapim, ating ol bai i laik tokaut long tingting bilong ol yet long pasin bilong dispela man. Tasol pasin bilong belhat bai nogutim man na i no kamapim “tingting bilong Krais.” (1 Ko. 2:16; ritim Jems 1:19, 20.) Jisas i bin tokaut klia taim em i givim tok long ol man long taim bilong em, tasol i no gat wanpela taim em i bin mekim hatpela tok o tok bilong bagarapim bel. (1 Pi. 2:23) Long ol man i mekim rong, em i opim rot long ol i ken tanim bel na kam bek bambai Jehova i ken mekim gut long ol. Tru tumas, wanpela bikpela as na Jisas i kam long graun em long “kisim bek yumi manmeri bilong mekim sin.”—1 Ti. 1:15.
7, 8. Wanem samting i mas stiaim ol elda taim ol i harim kot insait long kongrigesen?
7 Pasin bilong Jisas long dispela samting i mas mekim wanem long tingting bilong yumi long ol man em kongrigesen i mas stretim ol? Tingim, lo bilong Baibel long mekim kot insait long kongrigesen, dispela i save lukautim kongrigesen na inap kirapim man long tanim bel. (2 Ko. 2:6-8) Sori tru olsem sampela i no laik tanim bel na kongrigesen i mas rausim ol, tasol i gutpela tru long save olsem planti tru bilong ol i save kam bek long Jehova na lain bilong em. Taim ol elda i bihainim tingting bilong Krais, ol i helpim man i mekim rong long skelim gen pasin bilong em na kam bek long kongrigesen. Bihain, ating sampela bilong ol dispela man bai i no tingim moa olgeta skultok bilong Baibel ol i bin kisim long ol elda. Tasol samting ol bai tingim yet em olsem: Ol elda i bin rispektim ol na soim pasin laikim long ol.
8 Olsem na ol elda i mas soim ol pasin em “Holi Spirit i save kirapim yumi long mekim,” na moa yet em pasin laikim bilong Krais, maski sapos ol bikhetman i no amamas long kisim tok kaunsel bilong Baibel. (Ga. 5:22, 23) Ol i no ken hariap tumas long rausim man long kongrigesen. Ol i mas soim olsem ol i laik bai dispela man i kam bek long Jehova. Olsem na taim wanpela sinman i tanim bel, olsem planti i save mekim, ating em bai tenkyu tru long Jehova na tenkyu tu long ol man husat i stap olsem “ol presen,” em pasin bilong ol i bin helpim em long kam bek long kongrigesen.—Ef. 4:8, 11, 12.
Kamapim Pasin Laikim Bilong Krais Long Taim Bilong Pinis
9. Jisas i mekim wanem bilong soim olsem em i laikim ol disaipel bilong em?
9 Luk i stori long wanpela samting we i kamapim klia pasin laikim bilong Jisas. Jisas i save olsem bihain ami bilong Rom bai kam na banisim taun Jerusalem, na pasim rot bilong ol man long ranawe, olsem na em i soim pasin laikim taim em i tokim ol disaipel: “Taim yupela i lukim ol ami i kam raunim Jerusalem i stap, orait yupela i ken save, taim bilong taun i mas bagarap em i klostu nau.” Ol i mas mekim wanem? Jisas i kolim klia ol samting ol i mas mekim. Em i tok: “Long dispela taim ol manmeri i stap long distrik Judia ol i mas ranawe i go long ples maunten. Na ol man i stap insait long Jerusalem ol i mas lusim taun na i go long narapela hap. Na ol man i stap ausait long taun, ol i no ken i go insait long en. Dispela taim em i taim bilong God i bekim rong, olsem na olgeta tok i stap long buk bilong God, em bai i kamap tru.” (Lu. 21:20-22) Taim ol ami bilong Rom i kam banisim Jerusalem long yia 66 C.E., ol man em ol i gat pasin bilong bihainim tok, ol i mekim olsem Jisas i bin tok.
10, 11. Taim yumi skelim samting i bin kamap taim ol Kristen i ranawe lusim Jerusalem, olsem wanem dispela inap redim yumi long taim bilong “bikpela hevi tru”?
10 Taim ol Kristen i ranawe lusim Jerusalem, ol i mas soim pasin laikim bilong Krais long ol arapela, wankain olsem Krais i bin mekim long ol. Wanem ol samting ol i bringim i go, ol i mas serim wantaim ol arapela. Tok profet bilong Jisas i kamap tru taim Jerusalem i bagarap, tasol i gat narapela samting i olsem bikpela truim bilong en. Em i tok: “Bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Mt. 24:17, 18, 21) Paslain long “bikpela hevi tru” i kamap na long taim em i kamap, yumi tu bai bungim planti hevi. Sapos yumi holim tingting bilong Krais, dispela bai helpim yumi long sanap strong na karim hevi.
11 Long dispela taim, yumi mas bihainim pasin bilong Jisas na daunim ol laik bilong yumi yet na laikim tru ol arapela. Long dispela samting, Pol i tok: “Yumi olgeta wan wan yumi mas wok long helpim ol brata, bai ol i ken kisim gutpela pasin na bilip bilong ol i ken kamap strong. Yumi save, Krais tu i no bin ting long helpim em yet tasol. . . . Yumi save kisim strong long God wanpela tasol na em wanpela i save mekim yumi sanap strong long bilip. Orait God i ken helpim yupela long bihainim tru pasin bilong Krais Jisas na holim dispela wanpela tingting tasol.”—Ro. 15:2, 3, 5.
12. Long nau yumi mas kamapim wanem kain pasin laikim? Bilong wanem?
12 Pita, em man husat i bin pilim tru pasin laikim bilong Jisas, em i tokim ol Kristen long “laikim tru ol arapela manmeri bilong God” na “bihainim tok i tru.” Ol Kristen i mas “wok strong moa long laikim ol [arapela Kristen ] na givim bel bilong [ol] olgeta long ol.” (1 Pi. 1:22) Long nau em i bikpela samting moa yet long yumi mas kisim ol pasin bilong Krais. Ol bikpela hevi moa i wok long painim ol manmeri bilong God. Yumi no ken bilip long wanpela samting bilong dispela graun— em samting i kamap klia tru long hevi bilong mani we i wok long painim ol man long nau. (Ritim 1 Jon 2:15-17.) Pinis bilong dispela taim nau i wok long i kam klostu tru, olsem na yumi mas i go klostu moa long Jehova na long ol arapela Kristen, na kamapim gutpela pasin pren insait long kongrigesen. Pol i tok: “Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret. Yupela i mas strong long litimapim nem bilong ol arapela tasol.” (Ro. 12:10) Na Pita i strongim moa yet dispela tok, olsem: “Yupela i mas holim strong pasin bilong laikim tru ol arapela manmeri bilong God, long wanem, pasin bilong laikim tru ol arapela, em i save karamapim planti sin na i winim olgeta arapela pasin.”—1 Pi. 4:8.
13-15. Long taim bilong ol bikpela bagarap, olsem wanem sampela bratasista i bin soim pasin laikim bilong Krais?
13 Long olgeta hap bilong graun, ol Witnes Bilong Jehova i gat nem long soim pasin laikim bilong Krais long ol arapela. Tingim ol Witnes husat i bihainim singaut bilong givim helpim; em long taim bikpela win na ren i kamapim bikpela bagarap long hap saut bilong Amerika long 2005. Pasin laikim bilong Jisas i kirapim planti volantia, winim 20,000 manmeri, na ol i lusim ol gutpela haus na wok mani na ol i go bilong helpim ol bratasista husat i kisim hevi.
14 Long wanpela hap, win na ren i sakim solwara i go karamapim bikpela hap graun inap olsem 80 kilomita, na wara i solap i go antap inap 10 mita. Taim wara i slek i go daun, ol i lukim olsem inap 30 pesen bilong ol haus i bagarap olgeta. Ol Witnes i kam long narapela narapela kantri bilong mekim wok volantia, na ol i kam wantaim kain kain samting. Sampela i gat save bilong mekim wok, sampela i gat ol tul bilong wok, na sampela i bringim ol timba samting bilong sanapim haus, na ol i redi long mekim olgeta kain wok. Tupela susa wanblut em man bilong tupela wantaim i dai pinis, ol i putim kago bilong ol long wanpela liklik trak na ol i draiv inap 3,000 kilomita bilong i go helpim wok. Wanpela bilong dispela tupela susa i stap yet long dispela hap; em i wanpela painia oltaim na em i helpim yet komiti bilong stretim ol haus samting.
15 Ol i bin stretim o sanapim gen planti haus bilong ol Witnes na ol arapela tu, winim 5,600 haus olgeta. Ol Witnes bilong dispela hap yet ol i bin pilim olsem wanem taim ol i lukim dispela bikpela pasin laikim? Wanpela sista em haus bilong em i bin bagarap, em i go sindaun long wanpela liklik haus ka we rup bilong en i gat ol hul na stov bilong kuk tu i bagarap. Ol brata i wokim wanpela naispela liklik haus bilong em. Em i sanap long fran bilong nupela haus bilong em na em i krai, long wanem, em i tenkyu tru long Jehova na long ol brata i bin helpim em. Planti arapela Witnes ol i bin stap yet long giaman haus bilong ol inap wanpela o tupela yia samting maski ol volantia brata i wokim pinis nupela haus bilong ol. Bilong wanem ol i mekim olsem? Ol i laik bai ol volantia i ken yusim haus bilong ol. Olsem na ol i stap gutpela piksa tru long soim tingting bilong Krais!
Bihainim Tingting Bilong Krais Long Pasin Yu Mekim Long Sikman
16, 17. Long wanem ol rot yumi ken soim olsem yumi holim wankain tingting olsem Krais long ol sikman?
16 Ating planti bilong yumi i no bin bungim ol hevi i kamap long ol bagarap bilong win na ren samting. Tasol yumi olgeta i save bungim hevi bilong sik, ating yumi yet o ol arapela long famili i sik. Tingting bilong Jisas long ol sikman, dispela i stap olsem gutpela piksa yumi ken bihainim. Pasin laikim bilong em i kirapim em long sori long ol. Taim ol manmeri i bringim ol sikman i kam long em, “em i mekim orait olgeta” bilong ol.—Mt. 8:16; 14:14.
17 Long nau, ol Kristen i no gat wankain strong olsem Jisas long wokim ol mirakel bilong oraitim ol sikman, tasol ol tu i save sori long ol sikman, olsem Jisas i bin mekim. Olsem wanem ol i kamapim klia dispela sori? Taim ol elda i stretim rot long helpim ol sikman insait long kongrigesen, ol i bihainim stiatok i stap long Matyu 25:39, 40, (Ritim.) na dispela i soim klia olsem ol i holim tingting bilong Krais.a
18. Olsem wanem tupela sista i bin soim pasin laikim long narapela sista? Wanem ol gutpela samting i bin kamap long dispela?
18 Tru, i no olsem man i mas i stap elda bambai em i ken mekim gutpela pasin long ol arapela. Tingim stori bilong Charlene husat i gat 44 krismas. Em i kisim kensa na dokta i tok em i gat tenpela de tasol bilong i stap laip. Olsem na man bilong em i wok hat tru long mekim ol wok bilong lukautim em. Orait nau, tupela sista long kongrigesen, em Sharon na Nicolette, ol i lukim dispela na ol yet i redi long givim taim na strong bilong ol long lukautim Charlene. Bihain long tenpela de, Charlene i stap laip yet i go inap sikspela wik, tasol dispela tupela sista i soim yet pasin laikim bilong ol long Charlene i go inap long taim em i dai. Sharon i tok: “I hatwok taim yu save olsem dispela brata o sista bai i no inap kamap orait. Tasol Jehova i bin strongim mipela. Dispela hevi i mekim na mipela i go klostu moa long Jehova na mipela yet tu i pas gut wantaim.” Man bilong Charlene i tok: “Oltaim mi bai tingim gutpela pasin bilong dispela tupela sista long helpim mipela. Ol i gat stretpela tingting na dispela i bin helpim tru Charlene long karim hevi, na i strongim tru bel na tingting bilong mi. Oltaim mi bai tenkyu long dispela tupela sista. Ol i daunim ol laik bilong ol yet, na dispela i bin strongim mi long bilip long Jehova na laikim tru lain brata bilong yumi.”
19, 20. (a) Yumi bin skelim wanem faivpela samting long tingting bilong Krais? (b) Yu tingting strong long bihainim wanem pasin?
19 Long dispela stadi na tupela arapela stadi em yumi bin skelim pinis, yumi bin skelim faivpela samting long tingting bilong Jisas, na yumi bin stori long olsem wanem yumi inap bihainim tingting na pasin bilong em. Yumi mas ‘mekim pasin isi na daunim yumi yet,’ olsem Jisas i bin mekim. (Mt. 11:29) Yumi mas wok strong tu long mekim gut long ol arapela, maski ol popaia bilong ol i stap ples klia. I gutpela yumi strongim bel na bihainim olgeta lo bilong Jehova, maski ol hevi i painim yumi.
20 Yumi mas soim pasin laikim bilong Krais long olgeta bratasista bilong yumi “i go inap long taim [yumi] i dai,” olsem Krais yet i bin mekim. Dispela kain pasin laikim i kamapim klia olsem yumi ol disaipel tru bilong Jisas. (Jo. 13:1, 34, 35) Yes, “oltaim [yumi] wan wan i mas givim bel bilong [yumi] long ol arapela.” (Hi. 13:1) Yumi no ken surik long mekim olsem! Tingting strong long yusim laip bilong yu long litimapim nem bilong Jehova na helpim ol arapela! Jehova bai blesim ol wok em yu givim bel tru long mekim.
[Futnot]
a Lukim dispela stori “No Ken Tok Tasol: ‘Yu Go Hatim Skin na Kisim Kaikai’ ” long Wastaua bilong Julai 1, 1987.
Yu Inap Stori Long Dispela?
• Taim man i mekim rong, olsem wanem ol elda i ken bihainim pasin bilong Krais?
• Bilong wanem em i bikpela samting moa yet long yumi mas bihainim pasin laikim bilong Krais nau long dispela taim bilong pinis?
• Long pasin yumi mekim long ol sikman, olsem wanem yumi ken soim olsem yumi holim tingting bilong Krais?
[Piksa long pes 17]
Ol elda i laik bai ol man i tanim bel na kam bek long Jehova
[Piksa long pes 18]
Ol Kristen husat i lusim Jerusalem, olsem wanem ol i soim olsem ol i holim tingting bilong Krais?
[Piksa long pes 19]
Ol Witnes Bilong Jehova i gat nem long soim pasin laikim bilong Krais