Holim Wankain Tingting Olsem Bilong Krais
“God . . . i save mekim yumi sanap strong long bilip. Orait God i ken helpim yupela long bihainim tru pasin bilong Krais Jisas na holim dispela wanpela tingting tasol. Olsem na bai yupela i stap wanbel.”—ROM 15:5.
1. Olsem wanem tingting bilong yumi inap stiaim ol samting yumi mekim long i stap bilong yumi?
YUMI holim wanem kain tingting, dispela em i bikpela samting long i stap bilong yumi. Olsem: Sapos yumi gat tingting olsem yumi ken mekim nating tasol o yumi ting yumi mas wok strong, o yumi gat tingting olsem ol samting yumi mekim i no inap kamap gutpela o yumi ting ol inap kamap gutpela, o yumi gat tingting bilong pait na daunim ol narapela o yumi gat tingting bilong wok gut wantaim ol, o yumi gat pasin bilong toktok planti long ol samting o yumi save tenkyu long ol samting—ol dispela kain tingting i strongpela samting bilong stiaim yumi long taim sampela hevi samting i kamap. Sapos yumi gat gutpela tingting, yumi inap i stap amamas maski i gat sampela bikpela hevi i kamap. Tasol sapos man i gat tingting nogut long ol samting, i olsem i no gat wanpela samting i stret, maski i stap bilong em i gutpela na i no gat planti hevi long en.
2. Olsem wanem yumi save lain long kisim ol kain tingting na pasin?
2 Ol tingting yumi holim—maski i gutpela o i nogut—em samting yumi mas lainim. Wanpela buk dikseneri (Collier’s Encyclopedia) i stori long nupela pikinini na i tok: “Ol tingting na pasin bihain bai em i holim, pastaim em i mas kisim o lainim, olsem em i mas kisim o lainim wanpela tok ples o wanpela kain wok.” Olsem wanem yumi save lainim ol kain tingting na pasin? Tru, i gat planti samting i save lainim yumi long en, tasol sampela bikpela samting i olsem ol tingting na pasin bilong ol lain yumi sindaun klostu long ol, na ol lain yumi save poroman wantaim ol. Dispela buk yumi stori pinis long en i tok: “Yumi save lainim o kisim tingting na pasin bilong ol lain yumi poroman wantaim ol.” Long bipo tru Baibel i mekim wankain tok, olsem: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.”—Sindaun 13:20; 1 Korin 15:33.
Em i Soim Stretpela Tingting na Pasin
3. Husat i stap olsem gutpela piksa tru long ol tingting na pasin bilong em? Yumi inap bihainim pasin bilong em olsem wanem?
3 Olsem long olgeta narapela samting Jisas Krais i bin mekim, em i stap olsem gutpela piksa tru long ol tingting na pasin yumi mas bihainim. Em i tok: “Mi soim pasin long yupela, na yupela tu i mas mekim wankain pasin olsem nau mi mekim long yupela.” (Jon 13:15) Bilong i stap wankain olsem Jisas, pastaim yumi mas kisim save long em.a Yumi kisim save long i stap bilong Jisas bambai yumi ken mekim samting aposel Pita i tokim yumi long mekim: “God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” (1 Pita 2:21) Yumi laik kamap wankain olsem Jisas inap long mak tru bilong yumi. Bilong mekim olsem, yumi mas wok long kisim wankain tingting olsem bilong em.
4, 5. Rom 15:1-3 i stori long wanem kain tingting bilong Jisas? Ol Kristen inap bihainim pasin bilong em olsem wanem?
4 Yumi mas mekim wanem bilong holim tingting bilong Krais Jisas? Sapta 15 bilong pas Pol i salim long ol Rom i helpim yumi long bekim dispela askim. Long ves 1 i go inap ves 3 bilong dispela sapta, Pol i kamapim wanpela pasin bilong Jisas i gutpela tru, em i tok: “Yumi man i gat strongpela bilip, yumi gat wok bilong helpim ol man i no gat strongpela bilip na karim hevi bilong ol. Yumi no ken ting long helpim yumi yet tasol. Yumi olgeta wan wan yumi mas wok long helpim ol brata, bai ol i ken kisim gutpela pasin na bilip bilong ol i ken kamap strong. Yumi save, Krais tu i no bin ting long helpim em yet tasol. Pasin i kamap long em olsem buk bilong God i tok, ‘Ol man i bin tok nogut long yu, na dispela tok nogut bilong ol i pundaun antap long mi tu.’ ”—Rom 15:1-3.
5 Bilong bihainim dispela tingting na pasin bilong Jisas, ol Kristen i mas redi long mekim wok bilong helpim ol narapela na mekim long pasin daun, na ol i no ken tingting long helpim ol yet tasol. Tru tumas, pasin bilong amamas long helpim ol narapela na mekim long pasin daun, em i pasin bilong ol man “i gat strongpela bilip.” Jisas i gat strong tru long ol samting bilong spirit, winim ol narapela man i bin stap long graun, tasol em i tok long em yet olsem: “Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” (Matyu 20:28) Na yumi ol Kristen tu i mas mekim wok bilong helpim ol narapela, na helpim tu “ol man i no gat strongpela bilip.”
6. Olsem wanem yumi inap bihainim pasin Jisas i bin mekim taim ol man i birua long em na tok bilas long em?
6 Narapela gutpela pasin Jisas i bin kamapim i olsem: Oltaim em i holim tingting olsem ol samting bai kamap gutpela, na ol samting em i mekim i kamapim dispela tingting. Em i no larim tingting kranki bilong ol narapela i daunim gutpela tingting bilong em long mekim wok bilong God, na yumi tu i no ken larim ol i mekim olsem long yumi. Taim ol man i tok bilas long Jisas na mekim nogut long em, em i stap isi na karim dispela hevi na em i no toktok planti long en. Em i save pinis, ol man bilong dispela graun i no gat bilip na gutpela tingting, ol bai birua long ol man i laik mekim ol samting ol narapela i laikim na “bai ol i ken kisim gutpela pasin na bilip bilong ol i ken kamap strong.”
7. Olsem wanem Jisas i soim olsem em i stap isi tasol na em i no les? Bilong wanem yumi mas mekim olsem?
7 Jisas i kamapim stretpela tingting long ol narapela samting tu em i mekim. Em i no mekim wanpela tok i kamapim olsem em i les long wetim Jehova, nogat. Em i stap isi na wetim Jehova i kamapim ol laik bilong Em. (Song 110:1; Matyu 24:36; Aposel 2:32-36; Hibru 10:12, 13) Na tu, Jisas i no les long ol disaipel bilong em. Em i tokim ol: “Yupela kisim save long mi”; em i “save mekim pasin isi long ol man,” olsem na skul bilong em i strongim ol na i givim malolo long ol. Na em i save ‘daunim em yet,’ olsem na em i no bikmaus na toktok strong long ol, o kalapim mak bilong skulim ol. (Matyu 11:29) Bilong kirapim yumi long bihainim ol dispela pasin bilong Jisas, Pol i tok: “Yupela i mas holim wankain tingting olsem Krais Jisas i bin holim. Em i stap [kain olsem] God tru, tasol em i no ting long holimpas dispela pasin bilong i stap wankain olsem God. Nogat. Em i lusim dispela pasin, na em i kamap olsem wokboi nating. Em i kamap olsem man.”—Filipai 2:5-7.
8, 9. (a) Bilong wanem yumi mas wok strong long kisim pasin olsem yumi no tingim yumi yet tasol? (b) Bilong wanem yumi no ken bel hevi sapos yumi no winim mak bilong bihainim stret pasin bilong Jisas? Olsem wanem Pol i stap olsem gutpela piksa long dispela samting?
8 Tru, i no hatwok long tok olsem yumi laik mekim wok bilong helpim ol narapela, na ol samting ol i mas kisim em yumi laik putim dispela i go pas long ol samting yumi yet i mas kisim. Tasol taim yumi skelim gut tingting bilong yumi, nogut dispela i kamapim olsem yumi no givim bel tru long mekim dispela samting. Bilong wanem i olsem? Wanpela as, em yumi bin kisim pasin long Adam na Iv olsem yumi tingim yumi yet tasol. Na namba tu as, em yumi stap namel long ol man bilong dispela graun em ol i laik kamapim strong pasin bilong tingim ol yet tasol. (Efesus 4:17, 18) Bilong kisim pasin olsem yumi no tingim yumi yet tasol, yumi mas kisim tingting i narapela kain long tingting na pasin kranki i stap pinis long bel bilong yumi taim mama i karim yumi. Tasol yumi mas i gat strongpela tingting long mekim olsem, na yumi mas wok strong.
9 Ol pasin kranki bilong yumi i narapela kain tru long nambawan gutpela pasin Jisas i bin soim yumi long en, na sampela taim dispela pasin kranki i save mekim na yumi bel hevi. Ating bai yumi pilim olsem yumi no inap tru long kisim wankain tingting na pasin olsem bilong Jisas. Tasol tok bilong Pol i strongim bel bilong yumi, em i tok: “Mi save, i no gat wanpela gutpela samting i stap insait long mi. Mi tok long olpela bel bilong mi tasol. Tru, mi laik mekim gutpela pasin, tasol mi no inap mekim. Gutpela pasin mi laik mekim, em mi no save mekim. Na pasin nogut mi no laik mekim, em mi save mekim. Tru, long tingting bilong mi, mi laikim tumas lo bilong God. Tasol mi lukim narapela lo i stap insait long ol hap bodi bilong mi. Na dispela narapela lo i save pait long lo bilong God i stap long tingting bilong mi. Dispela narapela lo, em i lo bilong sin, na em i wok long kalabusim mi na bosim ol hap bodi bilong mi.” (Rom 7:18, 19, 22, 23) Tru, planti taim sin bilong Pol i pasim em long mekim laik bilong God inap long mak em i laikim, tasol tingting na pasin bilong Pol long laikim tumas Jehova na lo bilong Em, i nambawan piksa tru bilong bihainim. Na yumi inap kisim dispela wankain tingting na pasin.
Stretim Sampela Tingting Kranki
10. Pol i laik kirapim ol Filipai long kisim wanem kain tingting?
10 Olsem wanem? Ating sampela i gat wok long senisim sampela tingting kranki bilong ol? Yes, ol i mas mekim olsem. Long taim bilong ol aposel, sampela Kristen i gat wok long stretim sampela tingting bilong ol. Long pas Pol i raitim long ol Filipai, em i toktok long ol i mas holim stretpela tingting. Em i tok: “Mi no ting olsem mi kisim pinis dispela pasin bilong Krais [olsem laip i stap long heven long rot bilong namba wan kirap bek long matmat], na mi kamap gutpela man tru. Nogat. Tasol oltaim mi save wok strong long holimpas dispela pasin, olsem Krais Jisas i bin holimpas mi. Ol brata, mi no ting mi kisim yet dispela pasin. Tasol mi gat wanpela tingting tasol, em long mi mas lusim tingting long olgeta samting bilong bipo, na mi mas wok strong long kisim dispela samting bai i kamap bihain. Mi save ran strong bilong kamap long mak na kisim prais. Dispela prais em i olsem. Long wok bilong Krais Jisas, God i singautim mi bilong i go antap na i stap gut tru wantaim em. . . . Yumi olgeta i mas bihainim dispela wankain tingting olsem nau mi autim.”—Filipai 3:12-15.
11, 12. Long wanem ol rot Jehova i save kamapim stretpela tingting yumi mas bihainim?
11 Tok bilong Pol i soim yumi olsem sapos wanpela man i kamap Kristen pinis tasol em i ting em i no gat wok long kamap strong moa, dispela man i gat tingting kranki. Em i no bin kisim tingting bilong Krais. (Hibru 4:11; 2 Pita 1:10; 3:14) Olsem wanem? Ating dispela man i no gat rot moa? Nogat, i no olsem. God inap helpim yumi long senisim tingting bilong yumi sapos yumi gat laik tru long mekim olsem. Pol i tok moa olsem: “Sapos yupela i gat narapela tingting, orait God bai i stretim dispela tingting bilong yupela.”—Filipai 3:15.
12 Tasol sapos yumi laik bai Jehova i kamapim klia stretpela tingting yumi mas kisim, orait yumi yet i mas mekim sampela samting. Yumi mas beten na stadi long Baibel wantaim ol buk na nius Kristen, em “wokboi i gat gutpela tingting” i save givim long yumi. Dispela bai helpim ol man “i gat narapela tingting” bambai ol i ken kisim stretpela tingting. (Matyu 24:45) Ol elda Kristen, em spirit bilong God i bin makim ol “i stap wasman bilong ol dispela sipsip [olsem kongrigesen] bilong God,” ol bai amamas long helpim yumi long mekim olsem. (Aposel 20:28) Yumi tenkyu tru long Jehova, em i save tingim sin i stap long skin bilong yumi na long pasin sori em i laik helpim yumi long stretim ol tingting kranki bilong yumi. Orait yumi mas larim em i mekim olsem.
Larim Ol Narapela i Skulim Yumi
13. Stori bilong Jop long Baibel i skulim yumi olsem wanem long stretpela tingting?
13 Long Rom sapta 15, Pol i soim yumi olsem taim yumi tingim tingim stori bilong sampela man i bin stap bipo, dispela inap helpim yumi long stretim tingting bilong yumi. Pol i tok: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” (Rom 15:4) Sampela gutpela wokboi bilong Jehova long bipo ol i gat wok long stretim sampela tingting bilong ol. Yumi ken tingim Jop—tingting bilong em i gutpela. I no gat wanpela taim em i bin ting Jehova i mekim pasin nogut, na maski em i bin karim bikpela pen, em i no larim dispela i daunim pasin bilong em long bilip long God. (Jop 1:8, 21, 22) Tasol Jop i laik kamapim olsem pasin bilong em i stret. Olsem na Jehova i salim Elihu bilong helpim Jop long stretim dispela tingting bilong em. Jop i no bel nogut long dispela, nogat. Long pasin daun em i tokaut olsem em i mas stretim tingting bilong em, na kwiktaim em i kirap long mekim olsem.—Jop 42:1-6.
14. Sapos ol i givim tok long yumi bilong stretim tingting bilong yumi, olsem wanem yumi ken bihainim pasin bilong Jop?
14 Olsem wanem? Bai yumi mekim wankain pasin olsem Jop i bin mekim sapos wanpela Kristen i tokim yumi olsem yumi gat sampela tingting kranki? Yumi mas bihainim pasin bilong Jop na yumi no ken “tok nogut long God.” (Jop 1:22) Sapos yumi kisim hevi long wanpela rong ol i tok yumi bin mekim, tasol yumi no bin mekim, orait yumi no ken toktok planti long en o tok em asua bilong Jehova na yumi kisim hevi. Na yumi no ken wok long painim rot bilong kamapim olsem pasin bilong yumi i stret. Yumi mas save, maski wanem bikpela wok yumi holim insait long wok bilong Jehova, yumi ‘no gutpela wokboi. Samting yumi mekim, em i wok tasol bilong yumi.’—Luk 17:10.
15. (a) Sampela disaipel bilong Jisas ol i gat wanem tingting kranki? (b) Olsem wanem Pita i kamapim olsem em i gat gutpela tingting?
15 Bipo, sampela man i bin harim tok bilong Jisas tasol ol i gat tingting kranki. Wanpela taim Jisas i mekim wanpela tok i hatwok long kisim gut. Olsem na “planti bilong ol [disaipel] i tok olsem, ‘Dispela tok em i hevi tumas. Husat inap long harim?’ ” Yumi save, ol man i bin mekim dispela tok ol i gat tingting kranki, na dispela i mekim na ol i no laik harim moa ol tok bilong Jisas. Baibel i tok: “Jisas i autim dispela tok pinis, na planti disaipel bilong en i lusim em, na ol i go bek, na ol i no wokabaut moa wantaim em.” Tasol yu ting olgeta i gat tingting kranki? Nogat. Baibel i stori moa olsem: “Olsem na Jisas i askim 12-pela disaipel olsem, ‘Ating yupela tu i laik lusim mi na i go?’ Saimon Pita i bekim tok olsem, ‘Bikpela, bai mipela i go long husat?’ ” Orait nau Pita i bekim askim bilong em yet: “Tok bilong yu tasol i save givim laip i stap gut oltaim oltaim.” (Jon 6:60, 66-68) Em nau, Pita i gat gutpela tingting tru, a? Orait taim ol buk na nius bilong yumi i kamapim insait bilong sampela tok bilong Baibel o i kamapim klia wanpela skripsa em bipo yumi no bin kisim gut as bilong en, na pastaim yumi hatwok long bilip long dispela nupela save yumi kisim, i gutpela sapos yumi bihainim wankain tingting na pasin olsem Pita i bin kamapim, a? Em i pasin kranki tru sapos yumi lusim wok bilong Jehova o yumi mekim sampela tok i narapela kain long “ol dispela gutpela tok,” long wanem, i gat sampela tok em pastaim yumi hatwok long kisim gut.—2 Timoti 1:13.
16. Ol hetman bilong lotu Juda long taim bilong Jisas ol i kamapim wanem tingting i nogut tru?
16 Ol hetman bilong lotu Juda long taim bilong Jisas ol i no bin kamapim wankain tingting olsem bilong Jisas, nogat. Ol i pasim tok pinis long bel olsem ol i no ken harim tok bilong Jisas, na ol i kamapim dispela tingting bilong ol taim Jisas i kirapim bek Lasarus long matmat. Ol man i gat stretpela tingting na ol i lukim dispela mirakel Jisas i bin mekim, ol bai ting dispela i kamapim long ples klia tru olsem God i bin salim Jisas i kam. Tasol Baibel i tok: “Olsem na ol bikpris wantaim ol Farisi ol i singautim ol kaunsil i kam bung na ol i tokim ol olsem, ‘Bai yumi mekim wanem? Dispela man i save wokim planti mirakel. Sapos yumi larim em i mekim dispela kain pasin, orait bai olgeta manmeri bai i bilip long em. Na ol Rom bai i kam na bagarapim tempel bilong yumi wantaim ol lain bilong yumi.’ ” Orait ol i mekim wanem? “Long dispela de tasol ol bikman i stat long wokim toktok bilong painim rot bilong kilim Jisas i dai.” Na ol i tingting tu long pinisim dispela man i kamapim long ples klia olsem Jisas em i man bilong wokim ol mirakel. “Ol bikpris i wokim toktok long kilim Lasarus tu i dai.” (Jon 11:47, 48, 53; 12:9-11) Em i samting nogut tru sapos yumi kisim wankain tingting olsem ol dispela lain na yumi bel nogut o bel hevi long ol samting em yumi mas amamas tru long en! Na dispela kain tingting inap bagarapim tru yumi!
Bihainim Stretpela Tingting Bilong Krais
17. (a) Wanem samting i kamap na Daniel i kamapim tingting olsem em i no pret long ol man? (b) Olsem wanem Jisas i kamapim olsem em i gat strongpela bel?
17 Ol wokboi bilong Jehova i save holim stretpela tingting long ol samting. Ol birua bilong Daniel i bin wokim toktok long kamapim wanpela lo i tok, inap 30 de ol man i no ken beten long wanpela god o long wanpela man—ol i mas beten long king tasol. Daniel i save pinis olsem dispela lo i laik pasim rot bilong em long i stap gut wantaim God. Orait olsem wanem? Em bai lusim pasin bilong beten long God inap 30 de? Nogat. Em i wok yet long beten long Jehova inap 3-pela taim long olgeta de olsem em i save mekim oltaim, na em i no pret long mekim. (Daniel 6:6-17) Jisas tu i no larim ol birua i pretim em. Long wanpela de Sabat, em i bungim wanpela man han bilong en i dai pinis. I gat planti Juda i stap, na Jisas i save ol i no ken amamas sapos em i oraitim wanpela man long de Sabat. Em i askim ol long kamapim tingting bilong ol long dispela samting. Tasol ol i no laik bekim wanpela tok long em. Olsem na em i kirap na oraitim dispela man. (Mak 3:1-6) I no gat wanpela taim Jisas i bin surik long mekim wanpela wok bilong em sapos em i ting i stret long mekim long dispela taim.
18. Bilong wanem sampela man i save birua long yumi? Tasol yumi mas ting olsem wanem long dispela tingting kranki bilong ol?
18 Ol Witnes Bilong Jehova long nau ol i save olsem ol tu i no ken pret taim ol birua i mekim sampela tok bilong daunim ol. Sapos ol i pret, ol i no bihainim wankain tingting olsem bilong Jisas. Planti man ol i save birua long ol Witnes Bilong Jehova—sampela i save mekim, long wanem, ol i no gat stretpela save long ol Witnes, na sampela ol i mekim, long wanem, ol i bel nogut long ol Witnes o long ol tok ol i autim. Tasol yumi no ken larim dispela pasin birua bilong ol i daunim stretpela tingting bilong yumi long ol wok o bilip bilong yumi. Yumi no ken larim ol narapela i makim pasin yumi mas bihainim long lotuim God.
19. Olsem wanem yumi ken kamapim wankain tingting olsem bilong Jisas Krais?
19 Long olgeta taim Jisas i soim olsem em i gat stretpela tingting long ol disaipel bilong em na long ol samting God i laik bai em i mekim, maski i hatwok tru long mekim olsem. (Matyu 23:2, 3) Yumi mas bihainim pasin bilong Jisas. Tru, ol brata bilong yumi ol i no gutpela olgeta, tasol yumi tu i wankain. Na yumi bai i go we bilong painim ol gutpela poroman na ol pren i save stap gut long yumi olsem ol brata bilong yumi i stap long olgeta hap? Yumi no inap painim long ol narapela lain, a? Tru, Jehova i no kamapim klia yet as bilong olgeta tok bilong em i stap long Baibel. Tasol wanem lain bilong lotu i klia gut long as bilong planti tok bilong Baibel, winim yumi? I no gat wanpela, a? Olsem na oltaim yumi mas holim stretpela tingting, em dispela tingting Jisas Krais i bin holim. Wanpela rot bilong kisim dispela tingting, em yumi mas save long olsem wanem yumi ken bilip na wet long Jehova. Bai yumi toktok long dispela samting long stori i kamap bihain long dispela.
[Futnot]
a Buk Nambawan Man Tru i Winim Olgeta Narapela Man, em Sosaiti Wastaua Bilong Nu Yok i wokim, i stori long i stap na wok bilong Jisas.
Yu Inap Stori Long Dispela?
• Olsem wanem tingting bilong yumi i save stiaim ol samting yumi mekim long i stap bilong yumi?
• Stori long tingting bilong Jisas Krais.
• Tingting na pasin bilong Jop inap skulim yumi long wanem samting?
• Wanem stretpela tingting yumi mas holim taim ol man i birua long yumi?
[Ol Piksa long pes 7]
Kristen i gat stretpela tingting em i save wok strong long helpim ol narapela
[Piksa long pes 9]
Taim yumi beten na stadi long Baibel, dispela i helpim yumi long kisim tingting bilong Krais