Bihainim Tingting Bilong Jisas
1 Yumi no bin lukim Pikinini Bilong God, tasol long rot bilong ol tok ol i raitim long laip na wok bilong Jisas, yumi kirap laikim em tru. (1 Pi. 1:8) Em i bihainim laik bilong Papa bilong em, na em i lusim bikpela namba bilong em long heven na i kam daun long graun. Taim em i stap long graun, em i no tingim em yet na em i mekim wok bilong helpim ol arapela na i givim laip bilong em bilong baim bek ol man. (Mt. 20:28) Baibel i tok: “Yupela i mas holim wankain tingting olsem Krais Jisas i bin holim.” Olsem wanem yumi ken bihainim pasin bilong em long daunim laik bilong em yet?—Fl. 2:5-8.
2 Taim Skin i Les: Maski Jisas i gutpela olgeta, skin bilong em i save les. Wanpela taim em i bin “wokabaut i kam na em i tait,” em i autim gut tok long wanpela meri Samaria. (Jo. 4:6) Planti Kristen long nau i gat wankain hatwok. Taim ol i mekim wok skin long olgeta de, ating ol i pilim olsem ol i no gat strong moa bilong mekim wok autim tok. Tasol sapos yumi autim tok long olgeta taim, bai yumi pilim olsem wok autim tok i givim yumi nupela strong long ol samting bilong spirit.—Jo. 4:32-34.
3 Narapela taim Jisas na ol disaipel bilong em i go long hap i no gat man bilong ol i ken malolo liklik. Tasol planti man i kisim save long dispela na ol i ran i go paslain long ol na bungim ol. Jisas i no les long ol, nogat, em i “sori tru long ol” na em i kirap “givim planti tok long ol.” (Mk. 6:30-34) Yumi mas i gat wankain tingting bilong yumi ken kirapim na mekim ol Baibel stadi. Yumi mas wok strong na laikim tru ol manmeri. Sapos yu no lukautim wanpela stadi long nau, no ken les long painim wanpela.
4 Tingim Pastaim Ol Samting Bilong Spirit: Wok painia haptaim inap helpim yumi long tingim moa ol wok bilong spirit. Wanpela yangpela sista i tok: “Mama bilong wanpela pren bilong mi i strongim mitupela long mekim wok painia haptaim wantaim em long wanpela mun. Mi amamas tru long mipela i bin mekim olsem. Mi bin amamas long save gut moa long ol brata na sista, na i no longtaim na ol i kamap olsem famili bilong mi. Mi bin amamas tu long mi gat rot long autim tok bilong Jehova long planti man moa na lainim ol long ol gutpela tok i tru bilong Kingdom. Olgeta dispela samting i mekim na mi go klostu moa long Jehova na oganaisesen bilong em.”—Sng. 34:8.
5 Yumi olgeta i gat pait namel long laik nogut bilong skin na laik bilong mekim ol samting Jehova i orait long en. (Ro. 7:21-23) Yumi mas sakim pasin bilong ol man bilong dispela graun long tingim skin bilong ol yet na i no laik taitim bun. (Mt. 16:22, 23) Jehova inap helpim yumi long mekim olsem long rot bilong holi spirit bilong em. (Ga. 5:16, 17) Taim yumi wet long taim God i kisim bek yumi na yumi stap long nupela taim God bai kamapim, gutpela sapos yumi bihainim tingting bilong Jisas na tingim Kingdom pastaim na putim laik bilong ol narapela i go pas long laik bilong yumi yet.—Mt. 6:33; Ro. 15:1-3.
[Askim Bilong Stadi]
1. Jisas i gat wanem kain tingting?
2. Planti Kristen i gat wanem hatwok? Wanem samting inap helpim ol long winim dispela samting?
3. Olsem wanem yumi ken bihainim pasin bilong Jisas long amamas long skulim ol man?
4. Olsem wanem wok painia haptaim inap helpim yumi long bihainim tingting bilong Krais?
5. Bilong wanem yumi mas wok long taitim bun bilong bihainim tingting bilong Jisas?