“Ran Strong Bilong Kamap Long Mak”

“Mi lusim tingting long olgeta samting bilong bipo, na mi save wok strong long kisim samting bilong bihain. Mi save ran strong bilong kamap long mak.”—FILIPAI 3:13, 14.

1, 2. (a) Olsem wanem Sol bilong Tasas i kisim wanpela wok bilong autim tok? Wanem dispela wok? (b) Em i kisim dispela wok na em i mekim wanem?

SOL bilong Tasas em i wokabaut i go long Damaskas bilong mekim nogut long ol Kristen na wantu wanpela lait bilong heven i kam daun na i lait tumas long em. Na em i harim wanpela maus i tokim em, olsem: “Sol, Sol, watpo yu wok long bagarapim mi?” Sol i tok: “Bikpela, yu husat?” Na em i tok: “Mi Jisas, yu wok long bagarapim mi. Tasol yu kirap na yu go insait long taun. Bihain bai wanpela man i tokim yu long samting yu mas mekim.”—Aposel 9:3-6.

² Bilong wanem Jisas i mekim olsem long Sol bilong Tasas? Jisas i tokim disaipel Ananaias, olsem: “Dispela man [Sol] em i wokman bilong mi. Mi makim em pinis bilong karim nem bilong mi i go long ol arapela lain na long ol king, na long ol Isrel tu.” Ananaias i bihainim tok bilong Jisas na em i go putim han antap long Sol na em i tok: “Bikpela Jisas i kamap long yu long rot, em i salim mi na mi kam, bilong yu ken lukluk gen, na Holi Spirit i ken pulap long yu.” (Aposel 9:15, 17) Ai bilong Sol i lait gen na em i kirap na i kisim baptais. Em i bung wantaim kongrigesen Kristen long Damaskas na em i wok strong long autim gutpela tok long ol Juda long Jisas em i Pikinini Bilong God.—Aposel 9:20-22.

3, 4. (a) Pol i ting olsem wanem long dispela wok? (b) Olsem wanem tingting bilong Pol i narapela kain long tingting bilong kongrigesen bilong Efesas?

³ Dispela man i wok strong long autim tok em aposel Pol. Em i laikim tru dispela wok na em i save litimapim nem bilong en. Em i pilim tru marimari bilong God. Em i tok: “Bikpela bilong yumi Krais Jisas em i givim strong long mi na em i tingim mi inap long mekim wok bilong em, na em i putim mi long dispela wok. Olsem na mi tenkyu long em. Tru, bipo oltaim mi tok bilas long nem bilong em, na mi birua long ol Kristen, na mi bikhet long em. Tasol mi no bin save gut, na mi no bilip long em na mi mekim olsem i stap. Olsem na em i sori long mi. Na Bikpela i marimari moa yet long mi, na mi bilip long Krais Jisas, na mi givim bel bilong mi long em.” (1 Timoti 1:12-14) Tru tumas, Pol i save amamas long dispela wok bilong em.—Rom 11:13; 2 Korin 4:7.

⁴ Ol dispela tok bilong Pol i soim yumi, em i laikim tru dispela wok na oltaim em i amamas long en. Em i no olsem kongrigesen bilong Efesas, em Jisas i tokim ol: “Bipo yu bilip nupela, long dispela taim yu laikim mi tru, tasol nau nogat.” (Revelesen 2:4) Oltaim Pol i tingting long ran strong bambai em i ken kamap long mak. Oltaim em i wok strong long autim tok olsem em i bin mekim long pastaim long Damaskas.

5. Taim yumi bin mekim wok bilong Jehova planti yia pinis, olsem wanem yumi inap strongim ol narapela man?

⁵ Pol i stap gut long wok Kristen inap planti yia na bihain em i tokim kongrigesen long Filipai long stori bilong em na long ol samting i bin painim em. Em i stori olsem bilong strongim ol dispela wanwok bilong em bambai ol i no ken lusim wok bilong autim tok. Taim yumi harim stori bilong wanpela man, olsem em i kisim tok i tru olsem wanem na em i kamap wanpela wokman Kristen, yumi save amamas, a? Olsem wanem? Yu stap longtaim long lain bilong Jehova na yu stap gut long wok? Yu save tokim ol narapela long stori bilong yu na ol samting i bin painim yu bambai yu ken strongim ol?

6. Stori long ol samting Pol i gat nem long en long lotu Juda.

⁶ Long pas Pol i raitim long ol Filipai, em i stori long ol samting em i gat nem long en long lotu Juda. Em i tok: “Sampela arapela man ol i bilip long pasin bilong skin em inap helpim ol. Tasol mi inap ting olsem moa yet. Long de namba 8 ol i bin katim skin bilong mi. Mi man bilong Isrel. Mi bilong lain bilong Bensamin. Mi Hibru. Mi wanblut bilong ol Hibru. Mi Farisi, mi man bilong bihainim tru lo. Mi strong tru long mekim wok bilong God, olsem na mi wok long kilim sios. Sapos ol man i skelim mi long pasin bilong bihainim lo, orait mi no gat asua.”—Filipai 3:4-6.

7. Bilong wanem Pol i lusim ol dispela samting? Taim em i lusim, em i kisim wanem samting?

⁷ Ol dispela pasin bilong skin inap helpim Pol taim em i bung wantaim ol Juda. Em inap kisim biknem na ol samting bilong skin. Tasol em i tok: “Mi ting long Krais, na olgeta dispela samting mi gat nem long en, em i olsem samting nating. Mi no tok long ol dispela samting bilong Juda tasol. Nogat. Mi save long Krais Jisas em i Bikpela bilong mi, na mi pilim dispela save em i samting tru. Mi kisim pasin bilong Krais, na mi lusim pinis olgeta arapela samting. Mi tingim olgeta samting i olsem pipia nating. Mi laik holimpas Krais tasol, ․․․ Mi laik save tru long Krais. Em i kirap bek, na long dispela mi lukim strong bilong em. Mi laik save tru dispela strong. Mi laik poromanim em long pasin bilong karim pen. Na mi laik holim wankain tingting olsem em i bin tingim na i dai. Mi mekim olsem na mi ting bai mi tu mi kirap bek long matmat.” (Filipai 3:7-11) Pol i tok olsem na yumi save, em i bilip tru long Krais na long ol samting God Jehova i mekim bilong helpim ol wokboi bilong em. Olsem wanem? Yu bihainim pasin bilong Pol na yu no tingting long kisim biknem o planti samting bilong skin?

Stretpela Tingting

8. (a) Pol i stap gut long wok bilong God inap longtaim na em i tok wanem long ol samting em i laik kisim bihain? (b) Tok bilong Pol long 1 Korin 9:24-27, olsem wanem dispela tok i stret long yumi?

⁸ Pol i mekim wok bilong God inap longtaim na yu ting bihain em i les na em i no wok strong moa? Nogat. Em i raitim pas long ol Filipai na em i tok: “Ol brata, mi no ting mi kisim pinis yet dispela pasin. Mi gat wanpela tingting tasol: Mi lusim tingting long olgeta samting bilong bipo, na mi save wok strong long kisim samting bilong bihain. Mi save ran strong bilong kamap long mak na kisim namba. Dispela namba i olsem: Long wok bilong Krais Jisas, God i singautim mi bilong mi go antap.” (Filipai 3:13, 14) Em i bin i stap gut long wok Kristen; em i karim planti hevi. Em i stap kalabus long Rom na em i raitim ol dispela tok i go long ol Filipai. Tasol wok bilong em i no pinis. Sapos em i laik kisim prais bilong ol manmeri i mekim wok long kongrigesen Kristen bilong pastaim, em i mas ran strong i go long mak. Dispela prais em i olsem: “God i singautim [ol] bilong [ol i] go antap.” Olgeta strongpela Kristen i olsem man tru, maski ol i bilong kisim laip long heven o long graun, ol i mas i gat dispela kain stretpela tingting. Yumi olgeta wan wan yumi mas skelim ol wok yumi mekim na skelim tingting bilong yumi, yumi laikim tru dispela wok God i givim long yumi o nogat.

9. Yumi inap kisim wanem tingting bilong ol Kristen i olsem man tru o strongpela Kristen?

⁹ Pol i kamapim dispela stretpela tingting bilong ol strongpela Kristen, em i tok: “Sapos tingting bilong yumi i kamap olsem man tru, orait yumi mas tingting olsem dispela tok mi mekim. Na sapos yupela i gat narapela tingting, orait bai God i stretim dispela tingting bilong yupela tu.” (Filipai 3:15) Sapos yumi kisim dispela Krais Jisas i mekim bikpela wok bilong strongim ol man long spirit stretpela tingting bilong strongpela Kristen, bai wok bilong yumi i kamap gutpela. Yumi mas bihainim lek bilong Jisas, em inapim gut wok God i givim long em long graun. Olsem na em inap beten long God na tok olsem: “Mi bin soim strong bilong yu long ol manmeri long dispela graun. Mi pinisim pinis dispela wok yu bin givim mi long mekim. Papa, bipo graun i no kamap yet, mi stap wantaim yu na mi gat biknem. Nau mi laik bai yu givim dispela biknem long mi.”—Jon 17:4, 5.

10. Krais i gat wanem tingting long mekim wok bilong Jehova?

¹⁰ Sapos yumi laik amamasim God Jehova na kisim laip i stap oltaim, yumi mas kisim tingting wankain olsem bilong Krais. Pol i save long dispela samting, olsem na em i tok: “Yupela i mas holim wankain tingting olsem Krais Jisas i bin tingim. Em i stap [wankain olsem God], tasol em i no ting long holimpas dispela pasin bilong i stap wankain olsem God. Nogat. Em i lusim dispela pasin, na em i kamap man, na em i kisim pasin olsem wokboi nating. Ol man i lukim em i stap man tru. Na em i daunim em yet na i bihainim tok bilong God, i go inap long em i dai, ․․․ Bilong dispela tasol God i litimapim em na putim em antap tru. Na God i givim em wanpela nem i winim olgeta arapela nem.” (Filipai 2:5-9) Jisas i gat gutpela tingting tru! Olsem wanem? Yumi inap bihainim tingting na pasin bilong em? Sapos long pasin daun yumi wok long bihainim laik bilong God, bai yumi kisim blesing. Taim yumi mekim gut wok, gutpela samting i save kamap.

11. Ol Kristen i stap strong long spirit ol i mas mekim wanem?

¹¹ Yumi lukim tok Pol i raitim long ol Filipai na yumi save, sampela long kongrigesen ol i no strong long spirit. Ol i mas wok long kisim stretpela tingting olsem bilong strongpela Kristen. Olsem na Pol i raitim pas long ol bilong strongim ol. Long planti kongrigesen long nau tu, sampela ol i strong long spirit, na sampela, nogat. Ol strongpela Kristen, kain olsem Pol, ol i mas wok long strongim ol narapela Kristen. Krais Jisas i mekim bikpela wok bilong strongim ol man long spirit. Em i mekim gutpela pasin yumi ken bihainim. “Yumi man i save bilip strong, yumi gat wok bilong helpim ol man i no gat strongpela bilip. Ol i no inap karim hevi bilong ol, orait yumi mas helpim ol na karim hevi bilong ol. Yumi no ken bihainim laik bilong yumi yet. Yumi olgeta wan wan yumi mas wok long helpim man i stap klostu long yumi, bai em i ken kisim gutpela pasin na i kamap strongpela. Yumi save kisim strong long God wanpela tasol na em wanpela i save mekim yumi sanap strong long bilip. Orait God i ken helpim yupela long bihainim tru pasin bilong Krais Jisas na holim dispela wanpela tingting tasol. Olsem na bai yupela i stap wanbel, na wanmaus na litimapim nem bilong God, em i God na Papa bilong Bikpela bilong yumi Jisas Krais.”—Rom 15:1, 2, 5, 6.

12. Yumi mas i gat wanem tingting long prais God i laik givim long yumi?

¹² Pol i wok long strongim bilip bilong ol Kristen long Rom na em i tok: “God i save givim nating presen long yumi, em laip i stap oltaim. Dispela laip yumi kisim long wok bilong Jisas Krais, Bikpela bilong yumi.” (Rom 6:23) Jisas tu, taim em i stap long graun, planti taim em i toktok long laip i stap oltaim. Em gutpela pe tru God i laik givim long ol wokboi bilong em. God i laik bai ol wokboi bilong em i tingim gut dispela prais, long wanem dispela samting i save helpim ol long i stap gut long wok. Taim yumi mekim olsem, yumi kamapim bel bilong yumi, yumi bilip tru long ol tok promis bilong God. Long ol miting Kristen, planti taim yumi inap toktok long dispela gutpela prais Jehova i save givim long ol manmeri i stap gut long wok.

Maski Hevi, Yumi Mekim Wok

13. Baibel i helpim yumi olsem wanem long kisim stretpela tingting?

¹³ Sapos yumi holim stretpela tingting, dispela bai helpim yumi long mekim wok bilong yumi nau long las taim. Tru sampela, ating bai ol i lusim bilip, tasol yumi tingting strong long holimpas bilip na yumi no ken lusim. Baibel yet i helpim yumi long i stap strong. (Rom 15:4) Taim yumi lainim ol tok bilong Baibel, yumi kirap wetim gutpela samting i kamap. Yu tenkyu long Jehova long Baibel na ol tok bilong Baibel i stori long ol gutpela wokboi bilong Jehova, olsem Pol?

14. Planti hevi i painim Pol, tasol olsem wanem em inap holim gutpela tingting?

¹⁴ Long 2 Korin 11:23-28 Pol i stori long ol hevi i bin painim em. Sapos ol kain hevi olsem i painim yumi, bai yumi mekim wanem? Olsem wanem na Pol inap sanap strong na karim ol dispela hevi? Em i tingim prais, em i tingim dispela mak em i ran i go long en. Ating wankain hevi bai painim yumi, tasol yumi mas ran strong i go bilong kisim dispela prais God i laik givim long yumi. Taim Pol i raitim pas long ol Filipai, em i kamapim gutpela tingting bilong em, em i tokim ol em i stap kalabus bilong strongim gutnius. (Filipai 1:7, 16) Em i save long as bilong kalabus bilong em. Dispela samting i bikpela samting. Taim traim o hevi i painim yumi, yumi mas save bilong wanem dispela samting i painim yumi na bai yumi inap sanap strong. Na yumi save, long dispela rot yumi inap litimapim nem bilong Jehova.

15. (a) Bilong wanem Pol i mas strongim kongrigesen bilong Filipai? Pol i tokim ol long wanem samting bilong strongim ol? (b) Pol i stap kalabus, tasol kongrigesen long Rom i ting olsem wanem long dispela samting?

¹⁵ Sampela hevi i painim ol Kristen long Filipai wankain olsem ol hevi i painim Pol long Rom. Pol i tok: “Yupela i lukim pait mi pait long en, na nau yupela i harim tok long mi pait yet. Yupela i stap poroman wantaim mi long dispela wanpela pait tasol.” (Filipai 1:30) Olsem na Pol inap raitim gutpela tok long ol bilong strongim ol. Em i tokim ol, lain soldia bilong lukautim haus bilong Sisa ol i save pinis long gutnius. Sampela ol i wok long haus bilong Sisa ol i bilip na kamap Kristen. Pol i stap kalabus, tasol kongrigesen long Rom ol i no pret o bel hevi. Ol i wok strong long mekim dispela wok God i laik bai ol i mekim. Ol i lusim pret na ol i strong moa long autim tok bilong God.—Filipai 1:12-14; 4:22.

16. Taim ol man i birua long yumi, yumi mas mekim wanem?

¹⁶ Taim ol man i birua long yumi, kongrigesen Kristen i mas i stap wanbel. Dispela samting bai helpim yumi. Pol i tok strong olsem yumi mas sanap wanbel na long wanpela tingting tasol. (Filipai 1:27-2:4) Long kain taim olsem, narapela i mas strongim narapela na bai yumi ran strong yet bilong kamap long mak. Em taim bilong bihainim pasin daun na pasin sori na mekim gutpela pasin long ol brata. Narapela i mas tingim narapela na wok long helpim em.—Skelim Filipai 2:19-21.

Winim Ol Samting i Laik Pasim Rot

17. Maski sik i painim yumi, tasol bilong wanem yumi mas ran strong yet i go long mak?

¹⁷ Wanpela wanwok na poroman bilong aposel Pol em Epafrodaitas. Em i mekim wok bilong Bikpela na sik i painim em na klostu em i dai pinis. Em i sik, tasol em i no larim dispela samting i pasim em long mekim dispela wok em i laik mekim. (Filipai 2:25-30) Long 2 Korin 12:7 Pol i stori long sik bilong em i olsem “nil bilong sutim skin” bilong em. Ating em i gat wanpela sik long ai bilong em na em i tok olsem. Em i beten long God bambai dispela sik i ken lusim em, tasol God i no tekewe dispela samting long em. Pol i gat sik, tasol em i save tingim mak na dispela samting i helpim em long ran strong i go. Em i no bel hevi long em i gat sik, strong bilong Krais i helpim em long karim dispela hevi.—2 Korin 12:9.

18. Pol i gat wanem stretpela tingting long ol samting bilong skin?

¹⁸ Pas Pol i raitim long ol Filipai (4:11-13) i stori tu long ol samting yumi mas kisim bambai yumi inap long i stap laip. Sapos Kristen i sot long ol dispela samting, ating dispela bai traim em, em bai ran strong yet bilong kamap long mak o em bai les. Em bai bihainim tingting bilong strongpela Kristen na wok long stretim dispela hevi na mekim wok bilong autim tok tu wantaim, o em bai bel hevi na lusim dispela wok? (Skelim Aposel 18:1-4.) Maski Pol i sot long kaikai o em i gat planti, em i save tingim wok bilong autim tok pastaim. Taim em i gat planti samting, em i no kirap na lusim bikpela hap taim long ol amamas, em i ran strong i go bilong kamap long mak na kisim prais.

19. Taim hevi i painim yumi, Filipai 4:6, 7 i tok yumi mas mekim wanem? Na wanem samting bai kamap?

¹⁹ Pol i no stori long olgeta kain hevi na traim inap painim ol Kristen. Tasol taim hevi i kamap na dispela samting inap pasim yumi long mekim wok bilong autim tok, yumi strongpela Kristen na yumi mas beten long Jehova olsem Filipai 4:6, 7 i tok. Na bai Jehova i givim bel isi long yumi na helpim yumi long tingting gut na winim dispela hevi na mekim yet wok bilong em. Pasin bilong beten i helpim yumi long i stap strong long bilip na ran strong i go bilong kamap long mak.

20. (a) Ol brata sista i bin i stap longtaim long tok i tru na i stap gut long wok, gutpela pasin bilong ol i strongim yumi olsem wanem? (b) Yumi mas mekim wanem? Bilong wanem yumi mas mekim olsem?

²⁰ Planti brata sista long ol kongrigesen long nau ol i bin mekim wok bilong Jehova inap longtaim pinis. Olgeta ol i bin karim hevi long wok bilong Bikpela. Tasol Jehova i bin helpim ol, olsem na ol i ran strong yet bilong kamap long mak na kisim prais. Yumi tenkyu long Jehova long ol dispela gutpela brata sista ol i sanap strong na mekim wok bilong Kingdom wankain olsem ol brata sista long kongrigesen Kristen bilong pastaim. Ol i lukluk i go long prais. Ol yangpela na nupela brata sista, sapos ol i skelim ol wok Pol i bin mekim o ol wok ol gutpela brata sista long nau i mekim, ol i ken save olsem wanem ol dispela brata sista i bin karim hevi bilong ol na sanap strong na dispela samting bai helpim ol. (Aposel 9:2; Hibru 13:7) Oltaim yumi mas wok long strongim ol brata bambai yumi inap i stap gut long dispela wok yumi bin kisim na yumi ken sanap wanbel na ran i go bilong kamap long mak na kisim dispela prais Jehova i laik givim long yumi. Olsem bai yumi inap amamas long wok wantaim ol gutpela brata sista na mekim wok bilong Jehova i go inap long olgeta taim bihain.—Filipai 3:13-16.

Sampela Tok Yumi Ken Tingim

◻ Pol em i bilong wanem lain na em i gat nem long wanem ol samting? Olsem wanem em i mekim wok long dispela bilong strongim ol brata?

◻ Olsem wanem pasin bilong Krais na Pol i makim stretpela tingting bilong strongpela Kristen?

◻ Taim ol man i birua long yumi, yumi mas mekim wanem na bai ol man i ken save yumi sanap wanbel?

◻ Bilong wanem yumi mas ran strong yet bilong kamap long mak?

[Piksa long pes 12]

Krais Jisas i mekim bikpela wok bilong strongim ol man long spirit