Askim
Wanem insait bilong dispela tok bilong aposel Pol, olsem: “Mi mas lusim tingting long olgeta samting bilong bipo, na mi mas wok strong long kisim dispela samting bai i kamap bihain”? (Filipai 3:13) Olsem wanem? Inap wanpela man i lusim tingting olgeta long wanpela samting?
Nogat. Planti taim yumi no inap rausim olgeta long tingting wanpela samting i bin painim yumi long bipo. Yumi save, i gat planti samting yumi laik tingim tasol yumi no inap tingim, na planti samting yumi laik lusim tingting long en tasol yumi tingim yet. Orait, Pol i gat wanem tingting taim em i raitim dispela tok long Filipai 3:13? Ol ves i stap klostu inap helpim yumi long kisim gut dispela tok.
Long Filipai sapta 3, Pol i stori long ol “samting bilong skin em inap long helpim” em. Em i stori long bipo em i save bihainim stret olgeta pasin bilong lotu Juda na em i bin skul gut na em i save strong tru long bihainim Lo—em ol samting inap helpim em long kisim biknem insait long lain Israel. (Filipai 3:4-6; Aposel 22:3-5) Tasol em i givim baksait long ol dispela samting na em i tingim olsem samting nating. Bilong wanem? Long wanem, em i painim pinis samting i gutpela moa—em dispela ‘save bilong Krais Jisas i winim olgeta samting bilong dispela graun.’—Filipai 3:7, 8.
Nambawan tingting bilong Pol i no long kisim biknem na namba long dispela graun, nogat; em i tingting long “kirap bek long matmat.” (Filipai 3:11, 12) Olsem na em i tok: “Mi mas lusim tingting long olgeta samting bilong bipo, na mi mas wok strong long kisim dispela samting bai i kamap bihain. Mi save ran strong bilong kamap long mak na kisim prais. Dispela prais em i olsem. Long wok bilong Krais Jisas, God i singautim mi bilong i go antap na i stap gut tru wantaim em.” (Filipai 3:13, 14) Taim Pol i tok long “lusim tingting long olgeta samting bilong bipo,” i no olsem em i rausim “olgeta samting bilong bipo” long tingting bilong em. Em i tingim yet ol dispela samting, long wanem, nau tasol em i bin kolim olgeta dispela samting. Na tu, long tok Grik bilong bipo, em i kolim wanpela tok i makim wanpela samting man i wok yet long mekim na em i no pinis long mekim. Em i no tok “mi lusim tingting pinis,” nogat; em i tok “mi mas lusim tingting.”
Dispela tok Grik ol i tanim olsem “lusim tingting” (e·pi·lan·thaʹno·mai) i gat narapela narapela insait, na wanpela em “i no tingim tumas,” o “les long tingim.” Wanpela buk i tok, dispela em insait bilong “lusim tingting” long Filipai 3:13. (Exegetical Dictionary of the New Testament bilong Horst Balz na Gerhard Schneider.) Pol i no save tingim oltaim ol samting em i lusim pinis. Em i lain pinis long tingim ol dispela samting olsem samting nating tasol. Ol dispela samting i “olsem pipia nating” taim em i tingim gutpela samting em i wetim—em laip long heven.—Filipai 3:8.
Tok bilong Pol inap helpim yumi olsem wanem long nau? Olsem Pol, ating wanpela Kristen i bin lusim sampela samting bilong mekim wok bilong God. Ating em i lusim wanpela gutpela wok mani bilong mekim wok painia samting. O ating famili bilong em i gat planti mani tasol nau ol i no helpim em long sampela mani moa, long wanem, ol i no laikim tok i tru. Kristen i mekim gutpela pasin tru long lusim ol kain samting olsem, tasol nogut em i wok long tingim tingim. Em i “lusim tingting”—olsem em i no tingim moa ol samting “long baksait,” long wanem, em i tingim ol gutpela samting em i wetim long bihain.—Luk 9:62.
Ating yumi inap kisim narapela tingting tu long insait bilong dispela tok bilong Pol. Olsem wanem sapos wanpela Kristen i bin mekim sampela pasin i no stret taim em i no bin kisim save yet long God? (Kolosi 3:5-7) O em i kamap Kristen pinis na em i mekim wanpela bikpela rong na kongrigesen i bin stretim em? (2 Korin 7:8-13; Jems 5:15-20) Orait, sapos em i tanim bel tru na senisim ol pasin bilong em, God ‘i wasim em pinis’ na em i kamap klin. (1 Korin 6:9-11) Samting em i bin mekim i bilong bipo. Ating bai em i no inap lusim tingting long dispela samting em i bin mekim, tasol em i bihainim savepasin sapos em i kisim skul long samting i bin painim em bambai em i no ken mekim gen dispela rong. Tasol em i “lusim tingting,” olsem: Em i no wok oltaim long kotim em yet. (Skelim wantaim Aisaia 65:17.) God i lusim pinis rong bilong em long rot bilong ofa bilong Krais, olsem na em i no ken tingim moa dispela samting bilong bipo.
Long Filipai 3:13, 14, Pol i tok em i olsem wanpela man bilong ran long resis, na em i “wok strong” long kamap long mak. Man bilong resis i save lukluk i go pas—em i no save lukluk i go bek. Olsem tasol, Kristen i mas tingim ol blesing bai kamap long bihain; em i no ken wok long tingim ol samting em i lusim pinis. Na Pol i tok moa: “Sapos yupela i gat narapela tingting, orait God bai i stretim dispela tingting bilong yupela.” (Filipai 3:15) Olsem na beten askim God long helpim yu long kisim dispela kain tingting. Pulimapim long tingting bilong yu ol tingting bilong God i stap long Baibel. (Filipai 4:6-9) Wok long tingim long bel pasin sori Jehova i mekim long yu na ol blesing dispela i bin kamapim. (1 Jon 4:9, 10, 17-19) Sapos yu mekim olsem, Jehova bai helpim yu long rot bilong spirit holi na bai yu no wok long tingim yet ol samting bilong bipo. Nogat. Olsem Pol, bai yu tingim ol gutpela gutpela samting bilong bihain.—Filipai 3:17.