Wanpela Saveman

BAIBEL i tok: “Yupela i mas tingim taim God i singautim yupela na yupela i kamap Kristen. Planti bilong yupela i no bin i stap olsem saveman long ai bilong ol man bilong dispela graun. Na . . . planti bilong yupela i no bilong ol lain famili i gat biknem.” (1 Korin 1:26) Olsem Baibel i tok, sapos man i gat bikpela save bilong graun o biknem, dispela inap mekim na bai em i no laik kisim save long tok i tru.​—⁠Sindaun 16:5; Mak 10:⁠25.

Tasol long taim bilong Pol, sampela saveman i bin kisim save long tok i tru, na wanpela bilong ol, em Pol yet. Pol i bin kisim bikpela skul, na ating em i bilong wanpela famili i gat biknem, tasol em i givim bel long autim tok. Em i helpim yumi long save, ol man bilong dispela graun em ol i gat biknem, sapos ol i gat gutpela bel ol inap mekim wok bilong Jehova. Na ol inap mekim wok long bikpela save bilong ol bilong mekim wok bilong Jehova.​—⁠Luk 16:⁠9.

Man Bilong Tarsus

Mama i karim Pol long Tarsus, na Pol i tok, “taun bilong mi em i gat biknem.” (Aposel 21:39) Em i bin kisim save long tok Grik na sampela tok ples moa, na dispela samting i bin helpim em taim em i raun autim tok. Taim Pol i stap long Tarsus, em i kisim save long pasin bilong ol Juda na pasin bilong ol man bilong ol narapela lain, na dispela save i helpim em taim em i gat wok long autim tok long ol narapela lain. Em i save long rot bilong autim tok na bai ol inap save long insait bilong tok bilong em. (1 Korin 9:21) Tingim ol tok em i bin mekim long ol man bilong Atens na stori bilong dispela i stap long Aposel sapta 17. Taim em i stap long Atens na em i autim tok long ol man, em i stori gut long lotu bilong ol na em i kolim tok bilong wanpela saveman bilong ol.

Man Bilong Rom

Pol em i olsem man bilong Rom, na em i mekim wok long dispela namba em i holim bilong autim tok i go moa yet. Taim Pol i stap long Filipai, ol man i bin paitim em wantaim ol poroman bilong em na kalabusim ol. Na ol i no bringim ol long kot pastaim. Lo i tok ol i no ken mekim olsem long wanpela man bilong Rom, na taim Pol i tokim ol bikman long dispela samting, ol i larim Pol i stap long Filipai na em inap givim tok long kongrigesen paslain long taim em i go long narapela hap.​—⁠Aposel 16:​37-40.

Bihain, taim em i sanap long ai bilong Festus, em Namba Wan Gavman, Pol i tok em i man bilong Rom, na em i laik kot long ai bilong Sisar. Olsem na em i autim tok long namba wan bilong Rom.​—⁠Aposel 25:​11, 12; Filipai 1:⁠7.

Skul Pol i bin kisim i helpim em taim em i bikpela. Ating papa i bin lainim em long wokim haus sel na em i gat save long mekim dispela wok. Olsem na taim em i mekim wok autim tok na mani bilong em i sot, em inap mekim dispela wok long kisim liklik mani. (Aposel 18:​1-3) Na em i bin skul gut long samting bilong lotu tu. Em i tok: “Mi man bilong lain Farisi, na mi pikinini bilong ol Farisi.” (Aposel 23:⁠6) Wanpela bikpela tisa bilong ol Juda, em Gamaliel, i bin lainim Pol. (Aposel 22:⁠3) Dispela skul em i bin kisim, i wankain long skul em man i kisim taim em i go long yunivesiti long nau, olsem na ating famili bilong Pol i gat biknem.

Stretpela Tingting

Ol samting Pol i bin lain long en taim em i liklik na bikpela skul em i kisim, i makim olsem Pol inap kisim bikpela namba long lotu Juda. Tasol taim em i bilip olsem Jisas em i Man bilong kisim bek ol man, tingting bilong Pol i senis. Taim em i raitim pas i go long ol Filipai, em i stori long sampela samting em inap kisim long dispela graun, na em i tok: “Sapos mi bihainim rot bilong dispela ol samting bilong bodi, orait bai mi winim tru ol arapela man. Tasol mi lukim olgeta dispela samting i olsem samting nating, na mi bihainim rot bilong Krais. Mi no tok long ol dispela samting bilong ol Juda tasol. Nogat. Mi save long Krais Jisas, em i Bikpela bilong mi, na mi lukim dispela save tasol em i samting tru.”​—⁠Filipai 3:​7, 8.

Pol i gat bikpela save, tasol em i no tingim ol samting em inap kisim long dispela rot; na em i no mekim wok long bikpela save bilong em bilong daunim ol narapela. (Aposel 26:24; 1 Korin 2:​1-4) Em i bilip tru long Jehova, na em i tok olsem: “Mi mas lusim tingting long olgeta samting bilong bipo, na mi mas wok strong long kisim dispela samting bai i kamap bihain. Mi save ran strong bilong kamap long mak na kisim prais. Dispela prais em i olsem: Long wok bilong Krais Jisas, God i singautim mi bilong i go antap na i stap gut tru wantaim em.” (Filipai 3:​13, 14) Pol i ting ol samting bilong spirit i bikpela samting.

Tasol Pol i mekim wok long dispela save em i kisim bilong mekim wok bilong Jehova. Em i stori long ol Juda, na em i tok, “ol i strong tumas long bihainim pasin God i laikim.” Em i gat save na em i tok olsem. (Rom 10:⁠2) Bipo em i wanpela Farisi na em i bin givim bel long God na tok bilong God. Tasol taim Pol i kamap Kristen, em i kisim stretpela save, na nau em inap mekim wok long dispela save bilong mekim gutpela wok. Taim em i raitim ol tok bilong buk Hibru long Baibel, em i mekim wok long bikpela save em i kisim pinis long lain Israel, na pasin bilong lotu long tempel, na em inap kamapim long ples klia olsem pasin bilong Kristen i winim pasin bilong ol Israel.

Sampela saveman long nau tu ol i givim bel long tok i tru. Planti manmeri ol i kisim save long tok i tru, na maski ol i gat bikpela skul o nogat, o ol i gat save long mekim wanem kain wok, ol i mekim wok long dispela save bilong ol bilong mekim wok bilong Jehova. Tasol maski Kristen i kisim bikpela skul o nogat, em i mas tingting: Em i stap olsem wanem long ol samting bilong spirit. Dispela samting em i bikpela samting, long wanem em inap helpim yumi long kisim laip i stap oltaim.​—⁠Filipai 1:10.