Kamapim Pasin Olsem Yu Wetim Jehova!
“Mi yet mi bilip long Bikpela. Bai em i harim prea bilong mi, na mi wetim em i kam helpim mi na bai mi stap gut.”—MAIKA 7:7.
1, 2. (a) Taim ol Israel i stap long ples drai nating, tingting kranki i nogutim ol olsem wanem? (b) Sapos Kristen i no wok long kisim stretpela tingting, wanem samting inap painim em?
I GAT planti samting long i stap bilong yumi em yumi inap ting i gutpela o i nogut. Taim ol Israel i stap long ples drai nating, God i bin wokim mirakel na givim mana long ol. Sapos ol i gat stretpela tingting, bai ol i lukluk nabaut long dispela ples drai nating ol i stap long en na ol bai amamas na tenkyu tru long Jehova, em i bin givim dispela kaikai long ol. Tasol ol i no mekim olsem. Ol i tingim bek ol kain kain kaikai i stap long Isip na ol i toktok planti olsem mana i no swit liklik long maus bilong ol. Man! Dispela lain ol i no gat stretpela tingting liklik!—Namba 11:4-6.
2 Tingting bilong Kristen long nau tu inap mekim na em bai ting ol samting i gutpela o i nogut. Sapos Kristen i no gat stretpela tingting, ating amamas bilong em bai i pinis, na dispela i nogut tru, long wanem, olsem Nehemia i tok: “[Yumi] mas amamas long Bikpela na bai em i strongim [yumi].” (Nehemia 8:10) Stretpela tingting na bel i amamas em inap helpim yumi long i stap strong, na em i save kamapim bel isi na pasin wanbel insait long kongrigesen.—Rom 15:13; Filipai 1:25.
3. Olsem wanem stretpela tingting i bin helpim Jeremaia long taim nogut?
3 Maski Jeremaia i stap long taim nogut, em i kamapim olsem em i gat stretpela tingting long ol samting. Em i bin lukim ol samting nogut tru i kamap taim Jerusalem i bagarap long yia 607 B.C.E., tasol long tingting em i lukim ol gutpela samting bai kamap, olsem Jehova i no inap lusim tingting long ol Israel, na ol i no ken bagarap olgeta. Long Buk Krai, Jeremaia i tok: “Oltaim Bikpela i save sori long yumi na givim bel bilong en moa yet long yumi, na dispela pasin bilong en i no inap pinis. Olsem na yumi no bagarap olgeta. I olsem marimari bilong en i kamap nupela long olgeta de.” (Krai 3:22, 23) Long bipo yet na i kam inap nau, maski ol wokman bilong God i stap long taim nogut tru, ol i bin wok strong long holim stretpela tingting na bel i stap amamas.—2 Korin 7:4; 1 Tesalonaika 1:6; Jems 1:2.
4. Jisas i holimpas wanem kain tingting? Dispela tingting i helpim em olsem wanem?
4 Inap 600 yia bihain long Jeremaia, stretpela tingting i bin helpim Jisas long i stap strong na karim hevi. Baibel i tok: “Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai long diwai . . . Jisas i no wari long sem em bai i kisim, na em i dai. Na nau em i sindaun long han sut bilong sia king bilong God.” (Hibru 12:2) Maski ol man i birua long Jisas o mekim nogut long em, na maski em i mas kisim bikpela pen tru long diwai, em i tingting strong olsem “bihain em bai i stap gut na amamas moa yet.” Dispela amamas bilong Jisas em wok bilong kamapim long ples klia olsem Jehova em i Nambawan Bos bilong heven na graun na nem bilong Em i mas i stap holi, na tu, bihain em bai kamapim ol gutpela blesing tru bilong olgeta man i bihainim tok bilong God.
Kisim Pasin Bilong Wetim Jehova
5. Stori long wanpela samting inap kamap na sapos yumi gat pasin bilong wetim Jehova, dispela inap helpim yumi long holim stretpela tingting long ol samting.
5 Sapos yumi kisim wankain tingting olsem bilong Jisas, bai yumi no lusim pasin bilong amamas long Jehova, maski sampela taim ol samting i no kamap olsem yumi ting bai kamap, o long taim yumi ting ol bai kamap. Profet Maika i tok: “Mi yet mi bilip long Bikpela. Bai em i harim prea bilong mi, na mi wetim em i kam helpim mi na bai mi stap gut.” (Maika 7:7; Krai 3:21) Yumi tu inap kamapim pasin olsem yumi wetim Jehova. Yumi ken mekim olsem wanem? I gat planti rot long mekim. Wanpela i olsem: Ating yumi pilim olsem wanpela brata i gat namba em i bin popaia na i no mekim stret wanpela wok, na yumi ting ol i mas stretim hariap dispela samting. Orait sapos yumi gat pasin bilong wetim Jehova, bai yumi tingting: ‘Tru em i popaia, o tingting bilong mi yet i kranki? Sapos tru em i bin popaia, ating Jehova i larim ol samting i kamap, long wanem, em i ting dispela brata bai senisim pasin bilong em, na bai i no gat wok long kongrigesen i mas stretim em.’
6. Olsem wanem pasin bilong wetim Jehova bai helpim wanpela man em i hatwok long stretim wanpela hevi bilong em?
6 Sapos yumi gat wanpela hevi bilong yumi yet o yumi hatwok long daunim wanpela pasin kranki bilong yumi, yumi mas i gat pasin bilong wetim Jehova. Orait sapos yumi beten askim Jehova long helpim yumi, tasol hevi i stap yet, bai yumi mekim wanem? Yumi mas wok yet long traim olgeta rot bilong stretim dispela hevi, na taim yumi mekim pinis olgeta samting yumi inap mekim, orait yumi mas bilip long tok bilong Jisas, olsem: “Yupela i mas prea na askim God long givim ol samting long yupela, na em bai i givim long yupela. Yupela i mas wok long painim samting, na bai yupela i lukim. Yupela i mas paitim dua, na God bai i opim long yupela.” (Luk 11:9) Wok yet long beten, na wetim Jehova. Long taim i stret long mekim, na long pasin em yet i tingim, Jehova bai mekim ol samting bilong helpim yu olsem yu bin beten long en.—1 Tesalonaika 5:17.
7. Olsem wanem pasin bilong wetim Jehova bai helpim yumi long kisim stretpela tingting long ol tok bilong Baibel ol i wok long kamapim klia moa?
7 Taim truim bilong ol tok profet bilong Baibel i wok long kamap, ol tok bilong Baibel i wok long kamap klia moa. Tasol sampela taim yumi ting i gat wanpela tok bilong Baibel ol i mas kamapim klia as bilong en, tasol ol i no mekim yet. Orait sapos ol i no kamapim klia long taim yumi yet i laikim, yumi orait long wetim Jehova? Tingim dispela samting: Isi isi, insait long 4,000 yia, Jehova i wok long kamapim long ples klia “dispela tok hait bilong wok Krais i mekim.” (Efesus 3:3-6) Orait yu ting i gat as na yumi ken les long wet? Olsem wanem? Yumi gat tupela tingting long Jehova i bin makim wanpela lain “wokboi i gat gutpela tingting” long “skelim kaikai long [lain bilong em] long taim bikman i makim”? (Matyu 24:45) Maski yumi no klia gut long olgeta tok bilong Baibel, yumi no ken larim dispela i daunim amamas bilong yumi, a? Jehova yet i save skelim wanem taim na olsem wanem em bai kamapim klia ‘ol samting em i laik mekim.’—Amos 3:7.
8. Pasin bilong Jehova long isi long ol man, olsem wanem em i bin helpim planti man?
8 Ating sampela i bel hevi, long wanem, ol i bin mekim wok bilong Jehova inap planti yia pinis tasol ol i pilim olsem ol i no inap i stap na lukim bikpela de bilong Jehova. (Joel 2:30, 31) Tasol stretpela tingting em inap strongim bel bilong ol. Pita i tok: “Bikpela i wet yet na em i isi long yumi. Yupela i mas save, em i mekim dispela pasin, long wanem, em i laik kisim bek yumi.” (2 Pita 3:15) Jehova i wet yet, na dispela i mekim na planti tausen manmeri moa i gat stretpela bel ol i kisim save long tok i tru. Dispela em i gutpela samting tru, a? Na sapos Jehova i wet moa yet, bai yumi gat hap taim moa long “wok strong long mekim ol samting bambai God i ken kisim bek [yumi], na mekim long pasin bilong pret na guria.”—Filipai 2:12, NW; 2 Pita 3:11, 12.
9. Sapos yumi no inap wok strong tumas long mekim wok bilong Jehova, olsem wanem pasin bilong wetim Jehova bai helpim yumi long karim dispela hevi?
9 Sapos yumi gat pasin bilong wetim Jehova, bai yumi no bel hevi taim ol man i mekim nogut long yumi, o sik i painim yumi, o yumi go lapun, o sampela hevi moa i laik pasim yumi long mekim wok bilong Kingdom. Tru, Jehova i laik bai yumi givim bel olgeta long mekim wok bilong em. (Rom 12:1) Tasol Pikinini bilong God i save “sori long ol manmeri i no gat strong na i stap rabis,” na em i no strong long yumi mas mekim ol bikpela wok em yumi no inap mekim; na Jehova tu i no strong long yumi mas mekim olsem. (Song 72:13) Olsem na Jehova i laik kirapim yumi long mekim wok bilong em inap long skel bilong yumi, na yumi ken i stap isi na wetim sampela senis i kamap long i stap bilong yumi long dispela taim nau yumi stap long en o long nupela taim bai kamap bihain. “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em.”—Hibru 6:10.
10. Man i gat pasin bilong wetim Jehova em inap abrusim wanem pasin i no stret? Stori long dispela.
10 Sapos yumi gat pasin bilong wetim Jehova, bai yumi no ken kisim tingting olsem yumi yet i mas i go pas long stretim ol samting. Sampela man ol i bin bikhet na lusim bilip tru na givim baksait long Jehova, long wanem, ol i no laik wetim Jehova. Ating ol i pilim olsem i gat wok long stretim sampela tingting bilong yumi long sampela tok bilong Baibel, o stretim sampela pasin o wok insait long oganaisesen. Tasol ol i no laik tokaut olsem spirit bilong Jehova i save kirapim wokboi i gat gutpela tingting long stretim sampela samting long taim Em yet i makim, na i no long taim yumi yet i ting em i mas mekim. Na taim “wokboi” i stretim sampela tok o wok samting, dispela i mas stret wantaim laik bilong Jehova—i no long ol laik o tingting bilong yumi yet, nogat. Ol dispela man i bikhet na lusim bilip tru, ol i ting ol yet i mas i go pas long stretim ol samting, na dispela i paulim tingting bilong ol na i pundaunim ol. Tasol sapos ol i bin kisim tingting bilong Krais, ol bai amamas yet na ol bai stap yet insait long lain bilong Jehova.—Filipai 2:5-8.
11. Yumi ken mekim wanem insait long dispela taim yumi wet i stap na dispela bai helpim yumi? Taim yumi mekim olsem, yumi bihainim pasin bilong husat?
11 Tasol pasin bilong wetim Jehova i no olsem yumi les o lusim wok, nogat. Yumi gat ol wok bilong mekim. Olsem: Yumi mas stadi long Baibel na bai yumi ken kamapim olsem yumi save tingim tru ol samting bilong spirit, olsem ol gutpela profet na ol ensel i bin mekim. Pita i stori long pasin bilong ol long tingim tru ol dispela samting, na em i tok: “Ol profet i bin autim tok long dispela gutpela samting nau God i mekim long yupela. Ol i bin wok strong long painim as bilong dispela tok bilong God i kisim bek yumi. . . . Ol ensel tu i laikim tumas long kisim save long ol dispela gutpela samting God i mekim long yupela.” (1 Pita 1:10-12) Tru, yumi mas stadi, tasol yumi mas i go oltaim long ol miting tu, na yumi mas beten. (Jems 4:8) Ol man i pilim olsem ol i mas kisim ol samting bilong spirit na oltaim ol i wok long stadi na kisim ol kaikai bilong spirit na bung wantaim ol wanlotu Kristen, ol i kamapim klia olsem ol i kisim pinis tingting bilong Krais.—Matyu 5:3.
Kisim Stretpela Tingting
12. (a) Adam na Iv i no laik bai God i mekim wanem long ol? (b) Ol man bilong graun i bihainim rot bilong Adam na Iv, na wanem samting i kamap?
12 Taim God i wokim namba wan man na meri, em yet i makim wanem pasin i stret na wanem pasin i no stret long bihainim, na em i no givim dispela wok long narapela, nogat. (Stat 2:16, 17) Adam na Iv i no laik bai God i soim rot long ol—ol i laik bosim wokabaut bilong ol yet, na dispela i kamapim ol hevi em yumi lukim long graun long nau. Aposel Pol i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Kirap long taim bilong Adam na i kam inap nau, 6,000 yia i go pinis, na ol samting i kamap insait long dispela taim i kamapim klia olsem tok bilong Jeremaia i stret tru. Em i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Sapos yumi ting tok bilong Jeremaia i stret, i no olsem yumi ting i no gat rot long stretim ol hevi. Em i stretpela tingting. Tok bilong Jeremaia i kamapim as na ol bikpela hevi i bin kamap insait long ol dispela planti yia ol “bikman i wok long daunim ol arapela manmeri na mekim nogut long ol.” As bilong dispela hevi i olsem: Ol man i no laik bai God i bosim ol. Ol yet i laik bosim wokabaut bilong ol.—Saveman 8:9.
13. Ol Witnes Bilong Jehova i gat wanem stretpela tingting long ol samting ol man bilong graun inap mekim?
13 Ol manmeri bilong graun i stap nogut olsem, na dispela i mekim na ol Witnes Bilong Jehova i save olsem yumi ol man i no inap stretim olgeta samting long dispela taim nau yumi stap long en. Stretpela tingting inap helpim yumi long holimpas amamas bilong yumi, tasol em i no inap stretim olgeta hevi. Long 1952 samting, wanpela pasto bilong Amerika i raitim wanpela buk (The Power of Positive Thinking) i makim olsem yumi inap stretim planti hevi sapos yumi gat stretpela tingting long en. Tru tumas, stretpela tingting i gutpela samting. Tasol ol samting i kamap i soim olsem i gat sampela samting i save pasim yumi long mekim gut ol samting yumi mas mekim bilong stretim ol hevi, olsem yumi sot long save, sot long save bilong mekim ol wok, sot long mani samting, na planti samting moa. Na ol hevi i stap long olgeta hap bilong graun ol i bikpela tumas na ol man bilong graun i no inap stretim gut, maski ol i gat stretpela tingting long en.
14. Yu ting ol Witnes Bilong Jehova i gat tingting olsem ol samting i no inap kamap gutpela? Stori long dispela samting.
14 Ol Witnes Bilong Jehova i gat stretpela tingting long ol dispela kain samting, olsem na sampela taim ol man i sutim tok long ol olsem ol i ting ol samting i no inap kamap gutpela. Tasol ol Witnes i no olsem—ol i amamas long tokim ol man long dispela wanpela Man tasol em inap stretim tru ol hevi bilong ol man. Long dispela samting tu ol i bihainim tingting bilong Krais. (Rom 15:2) Na ol i wok strong long helpim ol man long kamap pren bilong God. Ol i save, dispela wok ol i mekim bai helpim tru ol man.—Matyu 28:19, 20; 1 Timoti 4:16.
15. Olsem wanem wok bilong ol Witnes Bilong Jehova i save helpim ol man long kamap gutpela man?
15 Ol Witnes Bilong Jehova i no save givim baksait long ol hevi i stap long graun—na i no olsem ol i no lukim ol pasin nogut i save brukim ol lo bilong Baibel. Taim man bilong harim tok bilong Baibel i laik kamap wanpela Witnes Bilong Jehova, em i save senisim sampela pasin bilong em pastaim, olsem daunim pasin bilong kisim ol drak o ol kain samting olsem, em God i no orait long en. (1 Korin 6:9-11) Olsem na ol Witnes Bilong Jehova i bin helpim ol man i save laikim gutnius na ol i bin lusim pasin bilong dring longlong, kisim drak, pasin pamuk, na pasin bilong pilai laki oltaim. Ol i lain long pasin bilong lukautim gut famili bilong ol long ol samting bilong skin na mekim long pasin i stret. (1 Timoti 5:8) Taim ol wan wan man na ol famili i kisim helpim olsem, dispela i mekim na i no gat planti hevi i kamap long hap ol i sindaun long en—no gat planti man i save kisim drak, no gat planti pait i kamap insait long ol famili, na ol kain samting olsem. Ol Witnes Bilong Jehova i save stap gut na bihainim lo bilong kantri, na ol i helpim ol narapela man long senisim pasin bilong ol na bihainim gutpela pasin, na long dispela rot ol lain bilong gavman i gat wok long stretim ol hevi i save kamap long ples ol i no gat bikpela wok tumas.
16. Bilong wanem ol Witnes Bilong Jehova i no save insait long ol lain i strong long stretim ol hevi bilong graun?
16 Orait yu ting ol Witnes Bilong Jehova i bin helpim ol man bilong graun long senisim pasin bilong ol? Inap 10-pela yia i go pinis, i gat olsem 3,800,000 Witnes ol i save autim gutnius, tasol nau i gat klostu olsem 6,000,000. Olsem na insait long dispela 10-pela yia i gat 2,200,000 Witnes moa i autim tok, na planti bilong dispela lain ol i bin lusim ol pasin i no stret taim ol i kamap Kristen. Em nau, i stap bilong planti manmeri i kamap gutpela! Tasol dispela namba i liklik tru taim yumi skelim wantaim namba bilong ol nupela pikinini i bin kamap long graun insait long 10-pela yia i go pinis—ol inap olsem 875,000,000! Ol Witnes Bilong Jehova i bin kisim bikpela amamas long helpim ol manmeri i gat laik long harim gutnius, tasol ol i save, wan wan tasol namel long ol manmeri bilong graun bai kirap na wokabaut long rot bilong kisim laip. (Matyu 7:13, 14) Ol Witnes i wetim ol hevi i pinis na gutpela pasin i kamap long graun, na ol i save, God wanpela tasol inap kamapim ol dispela senis. Tasol taim ol i wetim dispela samting i kamap, ol i no go insait long ol lain i strong long stretim ol hevi bilong graun, em sampela bilong ol dispela lain i gat gutpela tingting na ol i mekim, tasol planti taim ol i lukim wok bilong ol i no kamap gutpela, na sampela taim dispela wok i save kamapim ol pait nogut.—2 Pita 3:13.
17. Jisas i bin mekim wanem bilong helpim ol man i stap long hap bilong em? Tasol em i no mekim wanem?
17 Dispela rot ol Witnes Bilong Jehova i bihainim i kamapim klia olsem ol i bilip strong long Jehova, olsem Jisas i bin mekim taim em i stap long graun. Long dispela taim bipo Jisas i bin wokim ol mirakel na oraitim sik bilong ol man. (Luk 6:17-19) Na tu, em i bin kirapim bek sampela man i dai pinis. (Luk 7:11-15; 8:49-56) Tasol em i no pinisim ol sik o daunim indai, em birua bilong ol man, nogat. Em i save, i no taim yet bilong God long mekim olsem. Jisas em i gutpela olgeta, olsem na yumi ken ting em inap mekim planti samting bilong stretim ol bikpela hevi i kamap long wok politik na long sindaun bilong ol man. Sampela man ol i laik bai em i kamap king na pinisim ol dispela hevi, tasol Jisas i no laik mekim olsem. Baibel i tok: “Ol manmeri i lukim dispela mirakel o mak em i bin wokim, na ol i tok, ‘Tru tumas, em i dispela profet God i bin tok long salim i kam long graun.’ Jisas i harim dispela tok na em i save, ol i laik i kam holimpas em na mekim em i kamap king bilong ol. Olsem na em i lusim dispela ples na em wanpela tasol i go bek gen long maunten.”—Jon 6:14, 15.
18. (a) Olsem wanem Jisas i kamapim klia olsem oltaim em i save wetim Jehova? (b) Kirap long 1914, wok bilong Jisas i senis olsem wanem?
18 Jisas i no laik insait long wok politik o wok bilong helpim sindaun bilong ol man, long wanem, em i save, taim bilong em long kamap king na mekim wok bilong oraitim sik bilong olgeta man bilong graun i no kamap yet. Na taim em i go antap long heven na kisim laip olsem spirit i no inap i dai, em i amamas long wetim taim Jehova i bin makim bilong kirap na mekim ol dispela wok. (Song 110:1; Aposel 2:34, 35) Tasol long 1914 Jisas i kamap King long Kingdom bilong God, na kirap long dispela taim em i go olsem “man i winim pait na em i wok long winim planti pait moa.” (KTH 6:2; 12:10) Yumi amamas tru long i stap aninit long wok king bilong em, tasol sampela lain em ol i tok ol i Kristen ol i no laik kisim save long ol tok Baibel i mekim long Kingdom!
Wet i Stap—Samting Bilong Bel Hevi o Bilong Amamas?
19. Wanem taim pasin bilong wet i stap i save mekim man i “bel hevi,” na wanem taim em i save mekim bel bilong man i amamas?
19 Solomon i save pinis olsem pasin bilong wet i stap em inap mekim na man i bel hevi. Em i tok: “Sapos man i ting long kisim wanpela samting na i wet nating longpela taim, bai em i bel hevi moa yet.” (Sindaun 13:12) Tru tumas, sapos i no gat as na man i wetim wanpela samting na dispela i no kamap, ating em bai i bel hevi tru. Tasol taim yumi wetim wanpela bung bilong marit, o nupela pikinini i kamap, o bung gen wantaim ol lain yumi laikim ol tumas, dispela inap givim bikpela amamas long yumi, maski yumi mas wet longtaim yet long dispela de. Na sapos yumi mekim wok insait long dispela hap taim long redim ol samting bilong dispela de, orait amamas bilong yumi bai i bikpela moa yet.
20. (a) Wanem ol gutpela samting tru yumi wet long lukim na yumi bilip tru olsem ol bai kamap? (b) Olsem wanem yumi ken i stap amamas taim yumi wetim Jehova i kamapim tru ol laik bilong em?
20 Taim yumi bilip strong olsem samting yumi wet long en bai kamap tru—maski yumi no save wanem taim em bai kamap—orait dispela hap taim bilong wet em i no ken mekim yumi i “bel hevi,” nogat. Ol man i stap gut long lotuim God ol i save, Taim Bilong Wan Tausen Yia Bilong Krais i Stap King i klostu pinis. Ol i bilip tru olsem ol bai lukim sik na dai i pinis olgeta. Ol i amamas tru long wetim taim ol bai sekanim planti milion milion manmeri em ol bai kirap bek long matmat, na famili bilong ol yet wantaim. (KTH 20:1-3, 6; 21:3, 4) Nau long dispela taim ol samting bilong graun i wok long bagarap, tasol ol i amamas long wetim taim ol bai lukim Paradais i kamap long graun. (Aisaia 35:1, 2, 7) Olsem na long dispela taim yumi wet i stap, yumi mas bihainim pasin bilong gutpela tingting na ‘oltaim yumi mas wok strong long mekim wok bilong Bikpela’! (1 Korin 15:58) Wok yet long kisim ol kaikai bilong spirit. Wok long mekim ol samting bambai yu ken pas gut moa yet wantaim Jehova. Wok long painim ol narapela em bel bilong ol i kirapim ol long mekim wok bilong Jehova. Wok long strongim bel bilong ol wanbilip. Mekim wok inap tru long skel bilong yu long dispela hap taim Jehova i larim i stap yet. Sapos yu mekim olsem, orait yu no ken “bel hevi” long wetim Jehova. Bel bilong yu bai i amamas moa yet!
Yu Inap Stori Long Dispela?
• Olsem wanem Jisas i soim olsem em i bihainim pasin bilong wetim Jehova?
• Long wanem taim ol Kristen i mas i gat pasin bilong wetim Jehova?
• Bilong wanem ol Witnes Bilong Jehova i amamas long wetim Jehova?
• Yumi ken mekim wanem na bai pasin bilong wetim Jehova i mekim bel bilong yumi i amamas?
[Ol Piksa long pes 12]
Jisas i tingim amamas em bai kisim bihain na em i sanap strong na karim hevi
[Piksa long pes 13]
Maski yumi mekim wok bilong Jehova inap planti yia pinis, yumi inap mekim na bai amamas bilong yumi i stap yet
[Ol Piksa long pes 15]
I stap bilong planti milion manmeri i kamap gutpela taim ol i kamap Witnes Bilong Jehova