Amamas Long Wetim Jehova

YU BIN kaikai wanpela prut i no mau? Em i no gat swit bilong en, a? Prut i mas i gat bikpela hap taim liklik bilong mau, na sapos yumi wetim i stap bai yumi kisim gutpela samting long en. Na i gat ol narapela samting tu, sapos yumi wet long en bai yumi kisim gutpela samting. Baibel i tok: “I gutpela sapos ol man i stap isi na i wetim Bikpela i kisim bek ol.” (Krai 3:26; Taitus 2:13) Ol Kristen i mas wetim Jehova long wanem ol samting? Sapos yumi wet long em, dispela bai helpim yumi olsem wanem?

Yumi Mas Mekim Wanem Bilong Wetim God?

Yumi ol Kristen i “wetim De bilong God i kamap.” Yumi wetim taim bilong kisim malolo long ol hevi taim Jehova i mekim save long “ol man i bin givim baksait long God” na “ol bai i bagarap olgeta.” (2 Pita 3:​7, 12) Jehova yet i amamas long pinisim olgeta pasin nogut, tasol em i wet i stap bambai em i ken kisim bek ol Kristen long wanpela rot em bai litimapim nem bilong em. Baibel i tok: “[God] i laik kamapim ples klia belhat bilong em, bai olgeta man i ken save long bikpela strong bilong em. Ol sospen bilong kisim pe nogut ol i redi pinis long bagarap, tasol em i larim ol na em i wet longtaim long brukim ol. Long wanem, em i laik bai olgeta man i ken save long . . . gutpela sindaun tru em i laik givim long ol sospen bilong kisim marimari.” (Rom 9:​22, 23) Olsem long taim bilong Noa, olsem tasol Jehova i save long gutpela taim stret bilong kisim bek lain bilong em long nau. (1 Pita 3:20) Olsem na bilong wetim God yumi mas wetim taim bilong em long kirap na pinisim ol pasin nogut.

Taim yumi wetim de bilong Jehova, ating sampela taim yumi bel hevi long lukim pasin bilong ol man bilong graun i wok long go nogut moa yet. Long kain taim olsem, yumi mas tingim tok bilong profet bilong God, em Maika, em i tok: “I no gat wanpela stretpela man i stap long kantri bilong mi, na i no gat wanpela man i save bihainim God. Nogat tru.” Na em i tok moa: “Tasol mi yet mi bilip long Bikpela. Bai. . . mi wetim em i kam helpim mi na bai mi stap gut.” (Maika 7:​2, 7) Olsem wanem yumi ken kisim dispela pasin bilong “wetim em”? Sampela taim yumi wet wet long wanpela samting na yumi bel hevi na les, olsem na yumi ken mekim wanem bilong i stap amamas na wetim God?

Stap Amamas Taim Yu Wet i Stap

Jehova inap skulim yumi long stretpela tingting. Long olgeta taim em i stap God bilong “amamas.” (1 Timoti 1:11) Em i stap amamas taim em i wet i stap, long wanem, em i wok long mekim yet ol samting bilong kamapim laik bilong em long mekim gut long ol manmeri i laikim em tru na bai ol i kamap gutpela olgeta, wankain olsem em i laik mekim long ol man taim em i bin wokim ol. (Rom 5:12; 6:23) Em i lukim gutpela samting i kamap long wok bilong em​—planti milion manmeri ol i kam long lotu i tru. Jisas i tok: “Papa bilong mi em i save wok oltaim i kam inap long nau. Na mi tu mi save wok.” (Jon 5:17) Bilong i stap amamas, yumi mas mekim wok bilong helpim ol narapela. (Aposel 20:35) Na olsem tasol, ol Kristen tru i no wet nating tasol. Ol i wok yet long helpim ol man long kisim save long ol samting God i tingting pinis long mekim bilong helpim ol man.

Ol man i stap gut long God, oltaim ol i amamas long litimapim nem bilong em taim ol i wetim em i kirap na pinisim ol pasin nogut. Yumi ken tingim Devit, em man bilong raitim song. King bilong em i bin mekim nogut long em, na wanpela gutpela poroman bilong em i kamapim em long ol birua, na pikinini bilong em i mekim nogut long em. Taim ol dispela hevi i painim Devit, yu ting em inap i stap amamas na wetim Jehova i helpim em long taim stret Jehova i makim? Song 71, ating Devit i bin raitim, i tok: “Bai mi bilip long yu oltaim na mi wet long yu i helpim mi. Bai mi litimapim nem bilong yu moa yet. Bai mi tokim ol manmeri long stretpela pasin yu bin mekim. . . . Long olgeta de bai mi tokim ol long yu bin kisim bek mi.” (Song 71:​14, 15) Devit i no bel hevi na i wet, nogat. Em i amamas, long wanem, em i wok strong long litimapim nem bilong Jehova na strongim ol narapela long bihainim lotu i tru.​—Song 71:23.

Taim yumi wetim Jehova, i no olsem yumi wetim bas na em i no kam hariap na yumi les, nogat. Em i olsem amamas papamama i kisim taim ol i wetim pikinini bilong ol i wok long go bikpela na bihain em i kamap man o meri i bikpela pinis na tupela inap amamas long em. Insait long ol dispela yia tupela i gat planti wok tru​—ol i mas skulim na stretim pikinini​—em samting bilong helpim pikinini long kamap gutpela olsem papamama i laikim. Na olsem tasol, yumi ol man i save wetim Jehova yumi kisim amamas long helpim ol man long i kam klostu long God. Yumi tu i laik bai God i orait long yumi, na bihain bai em i kisim bek yumi.

No Ken Les Long Wet

Pasin bilong wetim Jehova i makim olsem yumi wok yet long laikim em tru na yumi mekim wok bilong em na yumi no les na lusim. Tru, dispela i hatwok. Planti wokman bilong God long nau i save sindaun namel long ol lain em sampela i save tok bilas long ol man i bilip na bihainim ol tok promis bilong God. Tasol yumi ken tingim ol Israel i bin stap gut long God na ol i bilip na wet long em taim ol i stap kalabus long Babilon inap 70 yia. Wanem samting i helpim ol long mekim olsem? Ol i bin ritim ol song, na dispela i bin strongim ol. Wanpela song inap strongim bel bilong ol, ating ol i bin raitim pinis paslain long dispela taim, em i tok: “Mi bilip tru long tok bilong [God]. Mi save wet long Bikpela, na mi laikim tumas bai em i helpim mi. Na dispela em i winim laik bilong ol wasman i save wet long tulait i kamap. Yumi ol Israel, yumi mas bilip long Bikpela.”​—Song 130:​5-7.

Ol Juda husat i ritim na toktok long samting ol i bilip na wet long en, ol inap holimpas dispela bilip na ol i kisim gutpela samting long en taim ol narapela lain i kam pait na daunim Babilon. Planti tausen Juda i bin stap gut long God, kwiktaim ol i kirap lusim Babilon na ol i wokabaut i go long Jerusalem. Baibel i stori long dispela taim olsem: “Taim Bikpela i bringim mipela i kam bek long Saion, . . . mipela i singim song bilong amamas moa yet.” (Song 126:​1, 2) Ol dispela Juda i no les long wetim Jehova​—ol i wok long mekim ol samting bilong strongim bilip bilong ol. Na ol i no lusim pasin bilong litimapim nem bilong Jehova.

Na olsem tasol, ol Kristen tru i wetim God nau long taim bilong “las de,” ol i wok oltaim long strongim bilip bilong ol. Ol i save stadi long tok bilong God long Baibel, na strongim bel bilong ol narapela, na ol i autim gutnius bilong Kingdom na long dispela rot ol i wok long litimapim nem bilong Jehova.​—Matyu 24:​3, 14.

Tok Bilong Stretim Ol i Helpim Ol

Profet bilong God, em Jeremaia, em i tok: “I gutpela sapos ol man i stap isi na i wetim Bikpela i kisim bek ol.” (Krai 3:26) Mining bilong dispela tok i olsem: I gutpela sapos lain bilong God i no toktok planti long pasin bilong Jehova long stretim ol, taim em i bin larim ol birua i kam bagarapim Jerusalem. Ol i mas tingim gut pasin bikhet bilong ol na ol i mas senisim tingting na pasin bilong ol, olsem na ol hevi i bin painim ol em inap skulim ol.​—Krai 3:​40, 42.

Taim Jehova i stretim yumi, dispela i save helpim yumi, kain olsem pasin bilong prut long kamap bikpela na i mau. Ol tok bilong God long stretim yumi, Baibel i tok long en olsem: “Em i save kamapim kaikai olsem bel isi bilong stretpela pasin long ol manmeri i save kisim dispela stretim.” (Hibru 12:​11, King Jems Nupela Testamen) Prut i mas i gat bikpela hap taim liklik bilong go bikpela na mau, na olsem tasol, taim God i skulim yumi, i mas i gat haptaim i lus pastaim bilong yumi ken senisim tingting na pasin bilong yumi. Olsem: Sapos yumi bin mekim sampela pasin i no stret na ol i tekewe sampela wok bilong yumi insait long kongrigesen, pasin bilong yumi long wetim God bai helpim yumi na yumi no bel hevi na lusim wok bilong Jehova. Long kain taim olsem, tok bilong Devit bai strongim bel bilong yumi, em i tok: “[God] i save kros long sotpela taim tasol. Na em i tingting gutpela long yumi na i mekim gut long yumi olgeta taim yumi stap long graun. Aiwara i ken kam daun long nait, tasol long moningtaim bai yu amamas gen.” (Song 30:5) Sapos yumi wok long kisim pasin bilong wetim Jehova na bihainim ol tok kaunsel yumi kisim long Baibel na oganaisesen bilong God, taim bilong yumi long “amamas gen” em bai kamap.

Haptaim i Mas Lus Bilong Kamap Bikpela

Sapos yu yangpela o nau tasol yu kisim baptais, ating yu gat bikpela laik long kisim sampela wok insait long kongrigesen Kristen. Tasol i mas i gat bikpela haptaim liklik bilong kisim pasin bilong man i bikpela pinis long ol samting bilong spirit na bai yu inap mekim gut ol dispela wok. Olsem na taim yu yangpela yet yu mas wok strong long mekim ol samting bilong helpim yu long kamap strong long ol samting bilong spirit. Olsem: Taim yu yangpela yet em i gutpela taim bilong ritim Baibel olgeta, wok long kisim ol gutpela pasin Kristen, na lain long pasin bilong kamapim ol disaipel. (Saveman 12:1) Sapos long pasin daun yu wetim Jehova, orait taim bilong em long wokim rot bilong yu long kisim wok insait long kongrigesen em bai kamap.

Na bilong mekim wok bilong kamapim ol disaipel, yumi mas i gat pasin bilong wet na no ken les. Fama i mas wok long putim wara long ol kaikai em i planim inap long taim God i mekim i kru na kamap bikpela. Na i wankain tu long wok bilong kamapim ol disaipel. (1 Korin 3:7; Jems 5:7) Bilong putim pasin bilong bilip na tenkyu long Jehova long bel bilong ol man, yumi mas stadi wantaim ol long Baibel i go inap planti mun o yia. Bilong wetim Jehova yumi mas wok strong na no ken les, maski pastaim ol sumatin i no bihainim ol tok ol i lainim. Sapos ol i kamapim olsem ol i tenkyu liklik long Jehova, ating dispela i makim olsem spirit bilong Jehova i wok long kirapim ol. Sapos yu wok strong na yu no les, ating bai yu lukim Jehova i mekim sumatin i kamap strong na i kamap wanpela disaipel bilong Krais, na bai yu amamas.​—Matyu 28:20.

Wet i Stap na Kamapim Pasin Laikim

Pasin bilong wet i stap inap makim olsem yumi gat pasin laikim na bilip long man, na dispela i kamap klia long stori bilong wanpela lapun bubu meri, em i save sindaun long ples wesan bilong Andes long Saut Amerika. Em wantaim narapela sista wanbilip, tupela tasol i Witnes Bilong Jehova long ples bilong ol. Tupela i save amamas tru long wetim ol wanlain Kristen i kam lukim ol. Wanpela taim, wanpela wasman raun i laik mekim namba wan raun bilong em long lukim tupela, na em i paul long rot. Em i mas baut na bihainim rot i go bek long hap em i bin kirap long en na traim gen, olsem na em i lusim sampela aua moa long rot. Em i biknait pinis na bihain em i lukim ples i stap longwe liklik. I no gat pawa long dispela hap, olsem na em i kirap nogut long lukim wanpela lait. Em i amamas tru taim em i kam kamap pinis long ples na em i lukim olsem dispela lait i kamap long wanpela lam em bubu meri i wok long holim i go antap! Em i bilip tru olsem wasman raun bai kam, olsem na em i wet i stap.

Yumi tu i gat pasin bilong isi na i no les kwik, olsem na yumi amamas long wetim Jehova. Yumi bilip tru olsem em bai truim ol tok promis bilong em. Na olsem dispela wasman raun, yumi tenkyu long ol narapela i save wetim yumi. Olsem na yumi ken save, Jehova i amamas long ol manmeri i save wetim em. Baibel i tok: “[God] i save amamas long ol manmeri . . . i save bilip long em i save sori long ol oltaim.”​—Song 147:11.

[Piksa long pes 18]

Ol manmeri i wok strong long litimapim nem bilong God ol i amamas long wetim Jehova