Yu Gat Pasin Bilong i No Les Kwik?

1, 2. (a) Wanem samting inap mekim na yumi kamapim dispela askim, “Wanem taim”? (b) Bilong wanem stori bilong ol wokman bilong God long bipo inap strongim yumi?

PROFET Aisaia na Habakuk i mekim dispela askim: “Wanem taim?” (Ais. 6:11; Hab. 1:2) Taim King Devit i raitim Buk Song sapta 13, inap 4-pela taim em i mekim dispela askim: “Wanem taim?” (Sng. 13, 1, 2) Jisas Krais i mekim wankain askim taim em i luksave olsem lain pipol long taim bilong em i no gat bilip. (Mat. 17:17) Olsem na sampela taim yumi tu i mekim wankain askim.

² Wanem samting inap mekim na yumi kamapim dispela askim, “Wanem taim”? Ating yumi lukim ol man i mekim wansait pasin, yumi karim hevi bilong i go lapun, sik, o presa bilong dispela “taim nogut” i “givim hatwok” long yumi. O ating pasin kranki bilong ol narapela i mekim yumi bel hevi, na yumi mekim kain askim. (2 Tim. 3:1) Ol wokman bilong Jehova long bipo i bin mekim wankain askim, tasol God i no kros long ol, nogat. Taim yumi kisim save long dispela samting, dispela inap strongim yumi!

3. Wanem samting bai helpim yumi taim yumi bungim hevi?

³ Wanem samting inap helpim yumi taim yumi bungim hevi? Disaipel Jems em hap brata bilong Jisas, na em i tok: “Ol brata, yupela i mas wet na no ken les kwik i go inap long taim Bikpela i kam i stap.” (Jems 5:7) Yes, yumi olgeta i mas i gat pasin bilong i no les kwik. Wanem samting bai helpim yumi long kisim dispela pasin?

PASIN BILONG I NO LES KWIK I MAKIM WANEM SAMTING?

4, 5. (a) Man i gat pasin bilong i no les kwik bai kamapim ol wanem pasin? (b) Olsem wanem tok piksa bilong Jems i helpim yumi long kisim pasin bilong wet? (Lukim piksa long kirap bilong stadi.)

⁴ Baibel i tok, pasin bilong i no les kwik em wanpela pasin bilong holi spirit. Olsem na bilong kisim dispela pasin, yumi mas larim God i helpim yumi. Dispela pasin em wanpela presen i kam long God, na taim yumi kamapim, dispela i soim olsem yumi laikim God na ol narapela. (1 Kor. 13:4; Gal. 5:22) Man i no save les kwik bai kamapim ol narapela gutpela pasin. Olsem, taim hevi i kamap, man i no les kwik bai holim stretpela tingting na sanap strong na karim hevi. (Kol. 1:11; Jems 1:3, 4) Na tu, pasin bilong i no les kwik bai helpim em long i no bekim rong bilong narapela. Baibel i kirapim yumi long kisim pasin bilong wet. Baibel i stori long dispela pasin long Jems 5:7, 8. (Ritim.)

⁵ Bilong wanem yumi mas kisim pasin bilong wetim Jehova i helpim yumi? Jems i mekim tok piksa long wanpela fama husat i gat pasin bilong wet. Maski fama i wok hat long planim ol kaikai long gaden, em i no inap bosim taim bilong san na ren, o mekim ol kaikai i gro. Em i no inap hariapim taim bilong kisim kaikai long gaden. Fama i save olsem em i mas “wetim ol gutpela kaikai i kamap long graun.” Olsem tasol, yumi no inap bosim ol samting i kamap long laip bilong yumi. Yumi mas kisim pasin bilong wet long Jehova i truim ol tok promis bilong em. (Mak 13:32, 33; Apo. 1:7) Olsem dispela fama, yumi tu i mas i gat pasin bilong wet.

6. Yumi inap kisim wanem skul long stori bilong profet Maika?

⁶ Ol samting i kamap long nau i wankain long ol samting i kamap long taim bilong profet Maika. Long dispela taim, King Ahas i mekim wok king na ol manmeri i insait long kain kain pasin nogut. Ol i “save tumas long mekim pasin nogut.” (Ritim Maika 7:1-3.) Maika i luksave olsem em yet i no inap senisim pasin bilong ol dispela manmeri. Em bai mekim wanem? Em i tok: “Mi yet mi bilip long Bikpela. Bai em i harim prea bilong mi, na mi wetim em i kam helpim mi na bai mi stap gut.” (Mai. 7:7) Olsem Maika, yumi tu i mas “wetim” God long helpim yumi.

7. Bilong wanem yumi redi long wet long Jehova i truim ol tok promis bilong em?

⁷ Sapos yumi gat wankain bilip olsem bilong Maika, yumi bai redi long wet long Jehova. Yumi no olsem wanpela kalabusman husat i wet long ol bai kotim em na kilim em i dai. Em i no amamas long wet, na em i no laik bai dispela samting i kamap. Tasol yumi bilip na wet long gutpela samting bai painim yumi! Yumi redi long wet long Jehova i givim laip oltaim long yumi long taim stret, bikos yumi save olsem em bai truim tok promis bilong em! Olsem na yumi ken “sanap strong na i no les kwik, na [yumi] ken mekim wantaim amamas.” (Kol. 1:11, 12) Sapos yumi komplein na toktok planti olsem Jehova i no mekim ol samting hariap, em i no inap amamas long yumi.—Kol. 3:12.

OL LAIN I STAP GUTPELA EKSAMPEL LONG PASIN BILONG I NO LES KWIK

8. Yumi mas luksave long wanem ol samting taim yumi tingim tingim eksampel bilong ol bilip lain long bipo?

⁸ Yumi bai redi long kisim pasin bilong wet sapos yumi tingim pasin bilong ol bilip lain long wet long Jehova i truim ol tok promis bilong em. (Rom 15:4) Taim yumi tingim tingim eksampel bilong ol, yumi mas luksave long haptaim ol i mas wet, risen na ol i mas wet, na blesing ol i kisim.

9, 10. Abraham na Sara i wet inap hamas yia bilong lukim truim long tok promis bilong Jehova?

⁹ Tingim stori bilong Abraham na Sara. Tupela i “bilip na i no les kwik na long dispela rot ol i kisim ol samting God i tok promis long en.” Baibel i tok “Abraham i wet na i no les kwik,” olsem na em i kisim samting Jehova i promis long givim em—em i kamap tumbuna papa bilong planti lain manmeri. (Hib. 6:12, 15) Abraham i mas i gat pasin bilong i no les kwik bikos sampela haptaim i mas lus na tok promis bilong God bai kamap tru. Long Nisan 14, 1943 B.C.E., Abraham na Sara wantaim olgeta wanhaus bilong ol i brukim wara Yufretis na go long Graun Bilong Promis. Kirap long dispela taim, isi isi kontrak Jehova i mekim wantaim Abraham i kamap tru. Abraham i wet inap 25 yia na long 1918 B.C.E., pikinini bilong em Aisak i bon. Em i wet 60 yia gen long lukim ol tumbuna pikinini bilong em, Iso na Jekop. Tupela i bon long 1858 B.C.E.—Hib. 11:9.

¹⁰ Yu ting Abraham i kisim wanpela hap graun long Graun Bilong Promis? Baibel i tok: “God i no givim wanpela hap graun long em, nogat. Na liklik hap graun tu, nogat. Tasol em i bin tok promis long givim em dispela ples na em bai stap olsem graun bilong em na bilong ol lain pikinini bilong en. Abraham i no gat pikinini yet taim God i mekim dispela tok.” (Apo. 7:5) Inap 430 yia bihain long Abraham i brukim wara Yufretis na i go long Graun Bilong Promis, God i oganaisim lain Israel na ol i kisim dispela graun.—Kis. 12:40-42; Gal. 3:17.

11. (a) Bilong wanem Abraham i amamas long wetim Jehova i truim ol tok promis bilong em? (b) Abraham i kisim wanem blesing long pasin bilong i no les kwik?

¹¹ Abraham i wet inap longpela taim bikos em i bilip long Jehova. (Ritim Hibru 11:8-12.) Em i amamas long wet, maski em i no bin lukim truim bilong olgeta samting God i bin tok promis long en. Taim em i kirap bek long Paradais, em bai kirap nogut olsem stori bilong em na lain tumbuna bilong em i stap long Baibel.a Abraham bai amamas tru long save olsem em tu i bin insait long lain tumbuna em Mesaia i kamap long en, em samting Jehova i tingting pinis long kamapim! Tru tumas, em i kisim planti blesing long pasin bilong em long wet.

12, 13. (a) Wanem ol samting i kamap na Josep i mas kisim pasin bilong i no les kwik? (b) Wanem samting i helpim Josep long i no les kwik?

¹² Josep em tumbuna pikinini bilong Abraham, na em tu i gat pasin bilong i no les kwik. Em i karim planti hevi. Taim em i gat 17 krismas, ol brata bilong em i salim em olsem wanpela sleiv. Bihain, ol man i sutim tok giaman olsem em i laik reipim meri bilong bosman bilong em, olsem na ol i pasim em long sen na putim em long kalabus. (Stt. 39:11-20; Sng. 105:17, 18) Maski Josep i bihainim stretpela pasin, ol man i mekim nogut long em. Bihain long 13 yia, senis i kamap. Em i lusim kalabus na kamap gavana bilong Isip.—Stt. 41:14, 37-43; Apo. 7:9, 10.

¹³ Yu ting pasin nogut ol man i mekim long Josep i mekim em i belhat? Yu ting em i lusim pasin bilong bilip long God Jehova? Nogat. Wanem samting i helpim Josep long i no les kwik? Em i bilip long Jehova. Em i luksave olsem Jehova i stap wantaim em. Tingim tok em i mekim long ol brata bilong em, em i tok: “Yupela i no ken pret. Mi no God na bai mi kotim yupela. Tru, yupela i bin pasim tingting bilong bagarapim mi. Tasol God i bin larim yupela i mekim dispela pasin, long wanem, em i tingting long helpim planti manmeri, bai ol i no ken bagarap. Na yupela i lukim pinis dispela wok em i mekim.” (Stt. 50:19, 20) Josep i luksave olsem pasin bilong em long wet i kamapim gutpela samting.

14, 15. (a) Olsem wanem Devit i soim olsem em i gat pasin bilong i no les kwik? (b) Wanem samting i helpim Devit long i no les kwik?

¹⁴ King Devit tu i karim planti hevi long han bilong ol birua. Taim Devit i liklik mangi, Jehova i makim em long kamap king bilong Israel. Tasol em i mas wet inap 15 yia long mekim wok king. (2 Sml. 2:3, 4) Insait long dispela haptaim, King Sol i wok long painim rot bilong kilim Devit.b Olsem na sampela taim Devit i ranawe i go long ol narapela kantri o em i go i stap long ol keiv long ples drai nating. Taim Sol i dai long pait, Devit i wet gen inap 7-pela moa yia na bai em i mekim wok king long Israel.—2 Sml. 5:4, 5.

¹⁵ Bilong wanem Devit i no les kwik? Long Buk Song sapta 13, em i tok: “Mi bilip bai yu marimari long mi oltaim. Na mi amamas long yu bai helpim mi. Yes, bai mi singim song bilong litimapim nem bilong Bikpela. Long wanem, em i bin mekim gut tru long mi.” (Sng. 13:5, 6) Devit i bilip olsem Jehova bai kisim em bek, na tu, em i tingim ol samting Jehova i bin mekim bilong lukautim em. Devit i save olsem pasin bilong i no les kwik bai kamapim gutpela samting.

16, 17. Olsem wanem Jehova na Jisas Krais i stap nambawan gutpela eksampel long pasin bilong i no les kwik?

¹⁶ Jehova i stap nambawan gutpela eksampel long pasin bilong i no les kwik, na em i laik bai yumi tu i kisim dispela pasin. (Ritim 2 Pita 3:9.) Long gaden Iden, Satan i sutim tok long wok bos bilong Jehova. Maski i olsem, God i wet inap planti tausen yia bambai ol manmeri i save olsem tok bilong Satan i no tru. God i “wet” long mekim holi nem bilong em. Long dispela taim, “ol manmeri i bilip long Bikpela” na wet long em i helpim ol bai kisim planti blesing.—Ais. 30:18.

¹⁷ Jisas tu i gat pasin bilong i no les kwik. Taim em i kam long graun, em i stap gut long God na givim ofa bilong baim bek ol man long yia 33 C.E., tasol em i wet inap long wok king bilong em i kirap long yia 1914. (Apo. 2:33-35; Hib. 10:12, 13) Long pinis bilong Wan Tausen Yia bilong Jisas i stap king, em bai pinisim olgeta birua bilong em. (1 Kor. 15:25) Maski yumi wet longpela taim, yumi ken bilip tru olsem gutpela samting bai kamap.

WANEM SAMTING BAI HELPIM YUMI?

18, 19. Wanem samting bai helpim yumi long kisim pasin bilong i no les kwik?

¹⁸ Yumi olgeta wan wan i mas i gat pasin bilong i no les kwik. Wanem samting bai helpim yumi long mekim olsem? Beten askim God long givim yu holi spirit, na bai yu kisim pasin bilong i no les kwik. (Efe. 3:16; 6:18; 1 Tes. 5:17-19) Askim Jehova long helpim yu long sanap strong na i no les kwik.

¹⁹ Tingim ol bilipman olsem Abraham, Josep, na Devit. Ol i no les kwik long lukim truim bilong ol tok promis bilong Jehova. Ol i bilip long Jehova bikos em bin mekim gut long ol. Ol i no tingim ol yet na ol samting ol i nidim. Taim yumi tingim ol gutpela blesing ol i kisim long pasin bilong i no les kwik, dispela i strongim yumi long wet long God i truim ol tok promis bilong em.

20. Yumi mas tingting strong long mekim wanem?

²⁰ Maski yumi bungim ol hevi, yumi mas tingting strong long “wet” na i no les kwik. Tasol sampela taim yumi bai mekim dispela askim, ‘Bikpela, wanem taim?’ (Ais. 6:11) Maski i olsem, holi spirit bilong God inap strongim yumi long mekim wankain tok em Jeremaia i bin mekim. Em i tok: “Mi no ken wari long ol arapela samting. Bikpela wanpela tasol em inap long mi. Olsem na mi wet strong long em i helpim mi.”—Kra. 3:21, 24.