Mekim Gut Long Man Maski Hatpela Pasin i Pulap Long Graun
“Ol man i save laikim man i gat gutpela-pasin-sori.”—SINDAUN 19:22, NW.
1. Wanem samting inap mekim na i hatwok long kamapim pasin bilong mekim gut long man?
YU TING yu gat dispela pasin bilong mekim gut long man? Sapos olsem, i stap bilong nau inap givim hatwok long yu. Tru, Baibel i soim olsem pasin bilong mekim gut long man em i wanpela pasin holi spirit bilong God i kamapim, tasol bilong wanem i hatwok long kamapim dispela pasin maski sapos yu stap long wanpela “Kristen” kantri? (Galesia 5:22) Olsem stori paslain long dispela i kamapim, hap bekim bilong askim hia i stap insait long tok bilong aposel Jon, em i tok graun olgeta i stap aninit long wok bos bilong wanpela man i no save mekim gut long ol man, em Satan. (1 Jon 5:19) Jisas Krais i tok Satan em i ‘hetman i bosim dispela graun.’ (Jon 14:30) Olsem na ol manmeri bilong dispela graun i save kamapim wankain pasin olsem bikhet bos bilong en, wok long bagarapim man em i bikpela tingting bilong em.—Efesus 2:2.
2. Wanem samting inap mekim na i hatwok long mekim gut long man?
2 Bel bilong yumi i bagarap taim ol arapela i mekim pasin i no stret long yumi. Ating neiba i gat pasin bilong kros i mekim pasin i no stret long yumi, o man yu no save long en i no gat pasin pren em i mekim, o sampela taim pren na famili i mekim, long wanem, ol i no tingting gut. Hevi bilong stap namel long ol manmeri husat i save bikhet, bikmaus, na tok swea long ol arapela, dispela inap bagarapim bel bilong yumi. Taim ol arapela i mekim kain pasin olsem long yumi, dispela inap mekim yumi yet i belhat na yumi tingting long bekim pasin nogut long ol. Tingting olsem inap kamapim sampela hevi long helt bilong yumi long spirit o long skin.—Rom 12:17.
3. Wanem ol bikpela hevi bilong ol man i olsem traim pasin bilong ol long mekim gut long man?
3 Ol hevi bilong graun tu inap mekim na yumi hatwok long mekim gut long man. Olsem: Ol man i tingting planti, nogut ol teroris i mekim sampela samting o nogut sampela lain i tromoi bom nuklia o narapela kain bom samting i gat marasin nogut long en. Na tu, planti milion manmeri ol i stap rabis tru—kaikai, haus, klos, na marasin samting ol i gat rot long kisim i no gutpela tumas. Pasin bilong mekim gut long man i hatwok long bihainim taim i luk olsem gutpela samting i no inap kamap.
4. Wanem tingting i no stret sampela inap kisim taim ol i tingting long pasin bilong mekim gut long man?
4 Wanpela inap ting pasin bilong mekim gut long man i no bikpela samting ol i mas mekim, o em i makim olsem man i no strong. Ating em i pilim olsem ol arapela i mekim pasin i no stret long em, moa yet taim ol i no pilim tingting o hevi bilong em. (Song 73:2-9) Tasol Baibel i givim gutpela tok bilong stiaim yumi taim em i tok: “Sapos man i belhat long yu, orait bekim tok isi long em, na bai belhat bilong en i dai. Tasol sapos yu rabisim narapela man long tok bilong yu, bai yu mekim em i belhat nogut tru long yu.” (Sindaun 15:1) Pasin isi na mekim gut long man em tupela pasin holi spirit i kamapim, ol i wankain liklik na ol i gutpela helpim tru taim hevi i kamap.
5. Wanem sampela hap we yumi gat wok long kamapim pasin bilong mekim gut long man?
5 Wok bilong kamapim ol pasin holi spirit bilong God i as bilong en i bikpela samting tru long yumi ol Kristen, olsem na i gutpela long tingim olsem wanem yumi inap kamapim pasin bilong mekim gut long man. Yu ting yumi inap kamapim dispela pasin long graun we hatpela pasin i pulap long en? Sapos olsem, wanem sampela hap we yumi ken soim olsem yumi no larim wok bilong Satan i pasim yumi long mekim gut long man, na moa yet long taim hevi i kamap? Yumi laik skelim olsem wanem yumi ken kamapim pasin bilong mekim gut long ol arapela long famili, ples wok, skul, long ol neiba, long wok autim tok, na long ol wanbilip.
Mekim Gut Long Ol Arapela Insait Long Famili
6. Bilong wanem em i bikpela samting pasin bilong mekim gut long man i mas i stap insait long famili? Olsem wanem ol inap kamapim?
6 Bilong Jehova i ken blesim yumi na stiaim yumi, yumi mas i gat ol pasin em holi spirit i kamapim na yumi mas mekim ol dispela pasin i kamap strong. (Efesus 4:32) Yumi ken stori long wok bilong wan wan insait long famili long kamapim pasin bilong mekim gut long ol arapela wanfamili. Long taim ol i mekim ol samting bilong ol wan wan de, tupela marit i mas kamapim pasin bilong tingim na mekim gut long poroman marit bilong ol na long ol pikinini bilong ol. (Efesus 5:28-33; 6:1, 2) Kain pasin olsem i mas stap ples klia taim ol wanfamili i toktok wantaim, ol pikinini i soim ona na rispek long papamama bilong ol na ol papamama i mekim stretpela pasin long ol pikinini. Kirap kwik long mekim ol tok amamas, na no ken hariap long kotim arapela.
7, 8. (a) Yumi mas abrusim wanem kain pasin sapos yumi laik soim tru pasin bilong mekim gut long man insait long famili? (b) Olsem wanem pasin bilong toktok gut wantaim i helpim famili long pas gut wantaim? (c) Yu ken mekim wanem bilong kamapim pasin bilong mekim gut long man insait long famili bilong yu?
7 Bilong mekim gut long ol arapela insait long famili bilong yumi, yumi mas bihainim dispela tok bilong aposel Pol: “Rausim olgeta kain pasin nogut, em pasin bilong kros na belhat na bel nogut, na pasin bilong tok nogut long ol arapela na pasin bilong mekim toktok i doti.” Long olgeta de, ol famili Kristen i mas toktok wantaim ol arapela long famili long pasin i soim olsem ol i rispek long ol. Bilong wanem ol i mas mekim olsem? Long wanem pasin bilong toktok gut wantaim i nambawan samting bilong helpim famili long pas gut wantaim. Bilong daunim hevi taim tupela long famili i no wanbel, traim stretim hevi na no ken tingting long winim toktok. Famili bilong amamas, em famili we olgeta wan wan i wok strong long tingim na mekim gut long ol arapela long famili.—Kolosi 3:8, 12-14.
8 Mekim gut long man i kirapim laik bilong mekim gutpela pasin long ol arapela. Olsem na yumi painim rot long mekim ol samting bilong tingim na helpim ol arapela long famili. Em wok bilong wan wan na olgeta wantaim long famili long kamapim kain pasin bilong mekim gut long man na bai famili i gat gutnem. Dispela i mekim na God bai blesim famili, na tu, long kongrigesen na long komiuniti ol bai givim ona long God husat i save mekim gut long man, em Jehova.—1 Pita 2:12.
Long Sait Bilong Wok
9, 10. Stori long sampela hevi inap kamap long ples wok, na olsem wanem wanpela inap stretim long rot bilong mekim gut long man.
9 Ol samting i save kamap long ples wok inap mekim na wanpela Kristen i hatwok long mekim gut long ol wanwok. Wok resis namel long ol wokman inap mekim na wok mani bilong wanpela Kristen inap lus, long wanem, wanpela wanwok i giaman o mekim pasin trik na nogutim nem bilong em long bos. (Saveman 4:4) Long kain taim olsem i no isi long kamapim pasin bilong mekim gut long man. Tasol tingim, pasin bilong mekim gut long man em pasin i stret long mekim, na wanpela wokboi bilong Jehova i mas wok strong na mekim ol samting em i gat rot long mekim bilong helpim man nogut long laikim em. Pasin bilong kamapim olsem yu tingim ol arapela inap helpim dispela samting. Ating yu ken mekim olsem taim wanwok i sik o i gat sampela long famili i sik. Taim yu askim tasol long man o famili i stap orait, dispela inap mekim gutpela samting long narapela man. Em nau, ol Kristen i mas wok long mekim ol samting ol inap long mekim bilong kamapim pasin wanbel na bel isi. Sampela taim gutpela tok i soim olsem yu tingim man, dispela inap kirapim man long laikim yu.
10 Sampela taim bos i strong long ol wokman i mas bihainim tingting bilong em, ating em i laik bai olgeta i insait long sampela samting bilong litimapim kantri o sampela pati i no stret wantaim Baibel. Taim maus bilong bel i pasim wanpela Kristen long insait long samting olsem, kros inap kamap. Ating long dispela taim stret i no gutpela long stori planti long olsem wanem i no stret long mekim ol samting bos i laikim. Long tingting bilong ol man husat i no tingim ol bilip Kristen, ating samting bos i laikim em i samting i stret. (1 Pita 2:21-23) Long gutpela pasin yu inap kamapim as na yu yet i no laik insait long samting hia. No ken bekim bek tok bilong sutim bel. I gutpela long Kristen i bihainim gutpela tok bilong Rom 12:18, em i tok: “Yupela yet i no ken tingting long kros na pait. Oltaim yupela i mas painim rot bilong i stap wanbel wantaim olgeta man.”
Long Skul
11. Ol yangpela i gat wanem ol hatwok long kamapim pasin bilong mekim gut long ol wanskul?
11 Em inap hatwok long ol yangpela long mekim gut long ol wanskul. Ol yangpela i laik bai ol wanklas i laikim ol. Sampela mangi i laik soim strong bilong ol na bai ol wanskul i givim biknem long ol, na long mekim olsem ol mangi i mekim nogut long sampela long skul. (Matyu 20:25) Sampela yangpela i laik litimapim save bilong ol yet long skul, long pilai spot, o long mekim sampela narapela samting. Taim ol i hambak long sampela save bilong ol, planti taim ol i no mekim gutpela pasin long ol wanklas na ol arapela sumatin, ol i gat tingting kranki olsem save bilong ol i mekim na ol i winim ol arapela. Yangpela Kristen i mas was gut long em i no ken bihainim pasin bilong ol. (Matyu 20:26, 27) Aposel Pol i tok ‘man i givim bel bilong en long ol arapela, em i no save kros kwik na em i save mekim gutpela pasin long olgeta man’ na “em i no save litimapim nem bilong em yet.” Olsem na wanpela Kristen i no ken tru bihainim ol arapela husat i no mekim gutpela pasin, em i mas bihainim tok bilong Baibel long ol samting em i mekim long ol wanskul.—1 Korin 13:4.
12. (a) Wanem samting inap mekim na ol yangpela i hatwok long mekim gut long tisa bilong ol? (b) Husat inap helpim ol yangpela taim sampela i strong long ol i mekim pasin i no gutpela?
12 Na ol yangpela i mas mekim gut long ol tisa bilong ol tu. Planti sumatin i amamas long mekim tisa i kros. Ol i ting ol i smat tru taim ol i daunim pasin bilong rispek long ol tisa long rot bilong mekim ol samting i brukim ol lo bilong skul. Long rot bilong pretim narapela, ating ol bai kirapim sampela long insait long samting ol i mekim. Taim yangpela Kristen i no wanbel long mekim olsem, ating ol arapela bai tok bilas long em o mekim nogut long em. Kain samting olsem i save kamap long taim bilong skul em inap traim laik bilong wanpela Kristen long mekim gut long man. Tasol tingim, em i bikpela samting tru long stap gut long Jehova. Yu ken save gut olsem em bai strongim yu long rot bilong spirit bilong em long kain taim olsem we i gat hatwok.—Song 37:28.
Long Ol Neiba
13-15. Wanem samting inap mekim na i hatwok long mekim gut long neiba? Olsem wanem yu inap winim ol dispela hevi?
13 Maski yu stap long wanpela haus, flet, o kompaun, o long narapela hap, yu inap painim rot long kamapim pasin bilong mekim gut long man na long kamapim olsem yu tingim i stap bilong ol neiba. Dispela tu i no isi long mekim long olgeta taim.
14 Olsem wanem sapos wanpela neiba i bel nogut long yu, long wanem, em i no laikim ol man i kam long provins bilong yu, lain bilong yu, o lotu bilong yu? Olsem wanem sapos sampela taim ol i no mekim gutpela pasin long yu o givim baksait olgeta long yu? Yu wanpela wokboi bilong Jehova, olsem na wok bilong mekim ol samting yu inap mekim bilong kamapim pasin bilong mekim gut long man bai kamapim gutpela samting. Bai yu kamapim klia olsem yu narakain, dispela i litimapim nem bilong Jehova—man i nambawan tru long kamapim pasin bilong mekim gut long man. Yu no save, ating wanpela taim long bihain gutpela pasin bilong yu bai kirapim neiba long senisim pasin bilong em. Em inap kirap lotuim Jehova.—1 Pita 2:12.
15 Olsem wanem yu ken kamapim pasin bilong mekim gut long neiba? Wanpela samting em i gutpela pasin bilong famili taim olgeta i kamapim ol pasin holi spirit i as bilong en. Em samting ating ol neiba bai luksave long en. Sampela taim ating rot bai op long mekim samting bilong helpim neiba. Tingim, pasin bilong mekim gut long man i olsem yu mekim ol samting i soim olsem yu tingim i stap bilong em.—1 Pita 3:8-12.
Long Autim Tok
16, 17. (a) Bilong wanem i bikpela samting long mekim gut long man long taim bilong wok autim tok? (b) Olsem wanem yumi inap kamapim pasin bilong mekim gut long man long taim yumi mekim kain kain wok autim tok bilong yumi?
16 Pasin bilong mekim gut long man i mas makim wok autim tok bilong yumi ol Kristen, long taim yumi wok strong long bungim ol man long haus bilong ol, long ples wok, na long ol pablik ples. Yumi mas tingim olsem yumi lain bilong Jehova, na oltaim em i save mekim gut long man.—Kisim Bek 34:6.
17 Wanem ol samting i insait long wok bilong mekim gut long man long taim yu autim tok? Wanpela samting i olsem, taim yu autim tok long rot yu inap mekim gut long man taim yu stori sotpela taim na mekim gutpela pasin taim yu toktok wantaim ol manmeri. Planti taim ol rot bilong wokabaut i gat planti man i go i kam long en, olsem na was gut na bai yu no pasim rot bilong wokabaut. Na tu, taim yu autim tok long ol ples bisnis, soim pasin bilong mekim gut long man na mekim sotpela tok, long wanem, ol stuakipa i gat wok long helpim ol kastama.
18. Olsem wanem pasin bilong skelim gut ol samting i insait long mekim gut long man long taim yumi autim tok?
18 Taim yu go long ol haus na autim tok, yusim gut tingting. No ken stap long wanpela haus longpela taim tumas. Olsem wanem? Yu inap save long taim man i kirap pilim les o kros long yu stap yet? Ating long hap bilong yu, ol Witnes Bilong Jehova i go long ol haus planti taim. Sapos olsem, tingim tru ol lain long haus, olgeta taim kamapim pasin bilong mekim gut long man. (Sindaun 17:14) Taim wanpela man i kamapim as na em i no inap putim yau long tok bilong yu, wanbel long tok bilong em. No ken lusim tingting olsem wanpela brata o sista Kristen bilong yu bai kam lukim dispela man sotpela taim bihain. Sapos yu bungim man i no mekim gutpela pasin, wok strong moa long kamapim pasin bilong mekim gut long man. No ken apim nek bilong yu o mekim pes drai, bihainim pasin isi na toktok. Wanpela Kristen i gat pasin bilong mekim gut long man i no laik kirapim man bilong haus long tok pait. (Matyu 10:11-14) Ating wanpela taim dispela man bai putim yau long gutnius.
Long Ol Miting Kristen
19, 20. Bilong wanem pasin bilong mekim gut long man i mas i stap insait long kongrigesen? Olsem wanem ol i ken kamapim dispela pasin?
19 I bikpela samting tu long mekim gut long ol wanbilip. (Hibru 13:1) Yumi insait long wanpela bikpela lain brata i stap long olgeta hap graun, olsem na pasin bilong mekim gut long man i mas i stap namel long yumi.
20 Sapos tupela o tripela kongrigesen i yusim wanpela Haus Kingdom, em i bikpela samting long mekim gut long ol lain bilong ol arapela kongrigesen, mekim pasin i soim olsem yu rispek long ol. Pasin bilong resis i no helpim pasin wanbel i kamap long taim i gat wok long stretim taim bilong ol miting na ol wok olsem klinim na stretim Haus Kingdom. Mekim gut long ol arapela na tingim ol maski sapos sampela tingting i pait wantaim. Long dispela rot pasin bilong mekim gut long man bai win, na Jehova bai blesim tru pasin bilong yu long tingim ol arapela.
Oltaim Mekim Gut Long Man
21, 22. Olsem Kolosi 3:12 i tok, yumi mas strong long mekim wanem?
21 Pasin bilong mekim gut long man i insait long planti samting long laip bilong yumi. Olsem na yumi mas mekim dispela pasin i olsem bikpela hap tru bilong pasin Kristen bilong yumi. Mekim gut long man i mas kamap wanpela pasin yumi mekim long olgeta taim.
22 Gutpela yumi olgeta i mekim gut long ol arapela long olgeta wan wan de, na long dispela rot yumi bihainim tok bilong aposel Pol: “God em i makim yupela pinis, na yupela i stap ol lain manmeri bilong en, na em i save laikim yupela tru. Olsem na yupela i mas kisim olkain pasin olsem. Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela.”—Kolosi 3:12.
Yu Tingim Yet?
• Wanem samting i mekim na i hatwok long wanpela Kristen long kamapim pasin bilong mekim gut long man?
• Bilong wanem em i bikpela samting long kamapim pasin bilong mekim gut long ol arapela insait long famili?
• Wanem sampela samting i mekim na i hatwok long mekim gut long man taim yu stap long skul, ples wok, na long ol neiba?
• Stori long olsem wanem ol Kristen inap mekim gut long man long taim ol i autim tok.
[Piksa long pes 18]
Taim olgeta long famili i mekim gut long ol arapela, dispela i kamapim pasin wanbel na pasin bilong wok gut wantaim
[Piksa long pes 19]
Yu inap mekim gut long man taim sik i kisim wanpela wanwok o wanpela long famili bilong em
[Piksa long pes 20]
Jehova i strongim ol lain i save kamapim pasin bilong mekim gut long man maski ol arapela i tok bilas long ol
[Piksa long pes 21]
Taim yu helpim neiba i gat hevi, i olsem yu kamapim pasin bilong mekim gut long man