Autim Tok Long Meksiko Long Ol Man i Mekim Tok Inglis

TAIM aposel Pol i stap long Atens na wetim ol poroman i bin raun wantaim em, em i mekim gut wok long haptaim bilong em na autim tok long ol man. Baibel i tok: “Long olgeta de em i go long ples bung na i toktok wantaim ol manmeri i kam i stap long dispela hap.” (Aposel 17:17) Taim Jisas i lusim Judia na i go long Galili, em i autim tok long wanpela meri Samaria long wanpela hul wara. (Jon 4:​3-​26) Olsem wanem? Yu save mekim wok long olgeta rot i op bilong autim gutnius bilong Kingdom Bilong God?

Long Meksiko i gutpela long autim tok long kain kain taim na ples long ol manmeri i save mekim tok Inglis. Ol turis i kam raun long ol ples malolo, ol stiuden bilong yunivesiti i kam i go, na ol man bilong ol narapela kantri em ol i ritaia long Meksiko ol i save go long ol pak na ol haus kaikai. Planti Witnes Bilong Jehova em ol i mekim tok Inglis ol i save gut long kirapim tok wantaim ol dispela man. Tru tumas, ol i wok long painim rot bilong toktok wantaim olgeta man i luk olsem ol i bilong narapela kantri o ol i save mekim tok Inglis. Orait, nau yumi ken stori long olsem wanem ol i save mekim olsem.

Planti taim ol Witnes bilong ol narapela kantri em ol i kam bilong autim tok long ol man i mekim tok Inglis ol i kolim tasol nem bilong ol na askim ol dispela man long ol i kam long wanem kantri. Dispela i mekim na planti taim ol dispela man i save askim Witnes long as na em i stap long Meksiko, na nau rot i op na Witnes i ken autim ol bilip Kristen. Olsem: Gloria, em i save autim tok long ol man i mekim tok Inglis long Oaxaca. Em i pilim olsem em i isi tru long kirapim tok wantaim ol man long dispela rot. Taim em i laik go bek long haus bihain long em i bin autim tok long ples bung bilong taun, tupela marit long Inglan i bin kirap toktok wantaim Gloria. Meri hia i tok: “Mi kirap nogut tru long lukim wanpela meri blakskin i wokabaut long ol rot bilong Oaxaca!” Gloria i no bel hevi long dispela tok, em i lap liklik, na em i kirap toktok long as na em i stap long Meksiko. Dispela meri i singautim Gloria i kam long haus bilong em long dring kofi. Ol i stretim taim bilong bung, na Gloria i laik givim nius Wastaua na Kirap! long dispela meri, tasol em i no laik na i tok em i no save bilip long God. Gloria i tok em i amamas long toktok wantaim ol lain i no bilip long God na em i laik save long tingting bilong em long stori “Ol Haus Bilong Mekim Lotu​—⁠Yumi Mas i Gat?” Meri i kisim nius, na em i tok: “Sapos yu ken mekim na mi bilip long wanpela God, yu mekim gutpela wok tru.” Orait nau ol i bung sampela taim na ol i toktok wantaim na dring kofi. Bihain tupela marit i go bek long Inglan, tasol ol i stori yet long rot bilong kompiuta, olsem E-meil.

Na tu, Gloria i kirap toktok wantaim Saron, em wanpela stiuden bilong Washington, D.C. Saron i stap long Oaxaca bilong mekim wok volantia bilong helpim ol meri asples na bai em inap kisim setifiket (master’s degree) bilong pinisim stadi bilong em long yunivesiti. Bihain long em i tok amamas long Saron long gutpela wok em i mekim, Gloria i tokim em long as na em yet i stap long Meksiko. Dispela i mekim na tupela i toktok gut long Baibel na long ol samting God bai mekim bilong helpim ol man i stap rabis na ol narapela man tu. Saron i tok em i kirap nogut olsem em i no bin toktok long ol Witnes long Amerika, tasol namba wan lain em i bungim long Meksiko em wanpela Witnes Bilong Jehova! Saron i amamas long stadi long Baibel na wantu em i go long ol miting Kristen.

Planti man bilong ol narapela kantri i kam sindaun long ol ples malolo long ol nambis bilong Meksiko, ol i tingting long painim wanpela gutpela ples kain olsem paradais. Laurel i yusim dispela tingting bilong kirapim tok wantaim ol man long Acapulco. Em i askim ol man olsem ol i ting Acapulco i olsem gutpela ples paradais, winim ples ol i kam long en, na wanem samting ol i laikim long Acapulco. Orait nau em i tokim ol man olsem i no longtaim na graun olgeta bai kamap wanpela Paradais tru. Em i mekim olsem long wanpela meri Kanada em i bungim long ofis bilong dokta bilong ol animal na long dispela rot em i kirapim wanpela Baibel stadi. Olsem wanem? Dispela pasin bilong toktok wantaim ol man i stret tu long ples yu stap long en?

“Long Ol Rot na Long Ol Maket”

Planti taim ol Witnes i kirap toktok wantaim ol man long ol rot na ol maket, olsem ples bung, na ol i askim ol olsem: “Yu save long tok Inglis?” Planti manmeri long Meksiko i save long tok Inglis, long wanem, ol i mekim tok Inglis long ples wok bilong ol o long wanem ol i bin sindaun long Amerika.

Tupela marit Witnes i bin kirap toktok wantaim wanpela lapun meri, em i sindaun long wilsia na wanpela nes i pusim em. Ol i askim dispela meri olsem em i save long tok Inglis o nogat. Meri hia i tok em i save long tok Inglis, long wanem, em i bin sindaun long Amerika inap planti yia. Em i kisim nius Wastaua na Kirap!, em i no bin ritim ol dispela nius bipo, na em i givim nem bilong em, Consuelo, na atres bilong em. Taim ol i go long dispela atres inap 4-pela de bihain ol i kisim save olsem dispela haus em i wanpela haus bilong lukautim ol lapun na ol sister Katolik i bosim. Pastaim, i hatwok long toktok wantaim Consuelo, long wanem, ol nes i tingting planti na ol i tok Consuelo i no inap toktok wantaim ol. Tupela marit i strong long ol nes i mas tokim Consuelo long ol i stap, na ol i laik tok gude long em. Wantu Consuelo i tok amamas long tupela i kam. Kirap long dispela taim, dispela meri i gat 86 krismas i amamas long stadi long Baibel long olgeta wik, maski ol sister i no mekim gutpela tok long dispela samting. Na tu, em i go pinis long sampela miting Kristen.

Sindaun 1:20 i tok: “Gutpela na stretpela tingting i olsem wanpela meri i sanap long ol rot na long ol maket na i singaut long ol manmeri.” Orait nau yumi ken stori olsem wanem dispela samting i bin kamap long ples bung bilong San Miguel de Allende. Long moningtaim tru, Ralph i kirap toktok wantaim wanpela man i gat 50 krismas samting na i sindaun long wanpela bang. Man hia i kirap nogut long Ralph i laik givim nius Wastaua na Kirap! long em, na em i stori long Ralph long laip bilong em.

Em i bin pait long Vietnam na em i bin bel hevi tru long lukim planti man i dai, olsem na taim em i stap soldia yet tingting na bel bilong em i bagarap olgeta. Bihain ol i salim em long hap bilong pait i go long kem bilong ami. Long dispela hap ol i makim em long wasim bodi bilong ol man i dai pinis bilong redim na salim i go long Amerika long sip. Nau, inap 30 yia bihain, em i kisim yet ol driman nogut long nait na em i pret. Long dispela moning, taim em i bin sindaun long ples bung, em i bin beten long bel long kisim helpim.

Dispela man i kisim ol nius na Ralph i singautim em i kam long Haus Kingdom. Bihain long miting em i tok, long dispela tupela aua long Haus Kingdom em i namba wan taim insait long 30 yia em i pilim bel isi. Dispela man i stap long San Miguel de Allende inap sotpela taim tasol, tasol em i stadi long Baibel inap sampela taim na em i go long olgeta miting i go inap long taim em i go bek long ples. Ol i stretim rot bilong narapela i stadi wantaim em.

Autim Tok Long Ples Wok na Long Skul

Olsem wanem? Yu save tokaut long ol manmeri long ples wok bilong yu olsem yu wanpela Witnes Bilong Jehova? Adrián, em i save salim ol flet bilong malolo long Cape San Lucas, em i save tokaut long dispela. Dispela i mekim na wanwok bilong em, Judy, i tok: “Inap 3-pela yia i go pinis, sapos wanpela man i tokim mi olsem mi bai kamap wanpela Witnes Bilong Jehova, mi bai tok, ‘Nogat tru!’ Tasol mi bin pasim tok long bel olsem mi laik ritim Baibel. Mi bin ting, ‘Em i no inap hatwok, long wanem, mi save amamas long rit.’ Ating mi no ritim 6-pela pes yet na mi luksave olsem mi mas i gat wanpela bilong helpim mi. I gat wanpela man tasol mi ting em inap helpim mi, em wanwok bilong mi, nem bilong em Adrián. Mi bin amamas long toktok wantaim em, long wanem, em wanpela tasol i gutpela man long dispela ples wok.” Wantu Adrián i tok em bai kam wantaim poroman em i laik maritim, Katie, na ol bai bekim ol askim bilong Judy. Katie i kirap stadi long Baibel wantaim em, na i no longtaim na Judy i kamap wanpela Witnes i baptais.

Olsem wanem long autim tok long skul? Tupela Witnes i bin kisim wanpela kos bilong stadi long tok Spen long yunivesiti, tasol wanpela de ol i no go long skul, long wanem, ol i go long wanpela kibung Kristen. Taim ol i kam bek long skul, tisa i askim ol long stori long tok Spen long ol samting ol i bin mekim. Orait nau ol i autim tok long tok Spen. Dispela tisa, Silvia, em i gat laik tru long ol tok profet bilong Baibel. Em i orait long stadi long Baibel long tok Inglis na nau em i wanpela pablisa bilong autim gutnius. Sampela narapela insait long famili bilong em tu i save stadi. Silvia i tok: “Nau mi painim dispela gutpela samting mi bin wok long painim long laip bilong mi olgeta.” Tru tumas, pasin bilong autim tok long kain kain taim na ples inap kamapim gutpela samting.

Long Ol Narapela Taim

Pasin bilong mekim gut long narapela i kam long haus bilong yu, dispela tu inap opim rot bilong autim tok. Jim na Gail, em ol i mekim wok bilong God long San Carlos, long Sonora, ol i kisim save long dispela. Wanpela meri i bin raun wantaim ol dok bilong em long 6 klok moningtaim, em i stop na tok amamas long gaden bilong ol. Jim na Gail i singautim em long kam dring kofi wantaim ol. Long namba wan taim insait long ol 60 yia em i stap laip, em i harim tok bilong Jehova na ol man inap kisim laip oltaim. Ol i kirap stadi long Baibel wantaim em.

Adrienne tu i save mekim gutpela pasin long ol man bilong ol narapela kantri. Em i bin kaikai long wanpela haus kaikai long Cancún na wanpela yangpela mangi i kam askim em olsem em i bilong Kanada. Taim Adrienne i tok yes, mangi i tok em na mama bilong em ol i traim long helpim susa bilong em long mekim wanpela ripot long ol manmeri Kanada long skul. Mama, em i save long tok Inglis, i kam sindaun wantaim Adrienne. Taim em i bekim pinis olgeta askim long ol manmeri Kanada, Adrienne i tok: “Tasol i gat wanpela bikpela as na mi lusim Kanada na i kam long hia​—⁠em bilong helpim ol man long lain long Baibel. Yu laik kisim save long Baibel?” Meri hia i tok em i gat laik. Em i lusim misin bilong em inap 10-pela yia i go pinis na em yet i bin traim long stadi long Baibel. Em i givim telefon namba na atres bilong em long Adrienne, na em i kirap stadi long Baibel wantaim em.

“Mekim Wok Long Planti Hap”

Pasin bilong toktok long tok i tru bilong Baibel long olgeta taim rot i op, dispela i mekim na planti taim yumi ken autim tok long ol manmeri em bipo ol i no bin harim tok bilong Kingdom o ol i harim liklik tasol. Long wanpela haus kofi long taun Zihuatanejo, wanpela Witnes i singautim tupela marit bilong narapela kantri long sindaun wantaim em long tebol, long wanem, i no gat narapela spes. Tupela marit hia i bin raun long sip long planti hap inap 7-pela yia. Ol i tok ol i no amamas tumas long ol Witnes Bilong Jehova. Bihain long ol i bung long haus kofi, dispela Witnes i go lukim tupela marit long bot bilong ol na em i singautim ol i kam lukim em long haus bilong em. Ol i kisim 20 nius na 5-pela buk na ol i tok promis long painim ol Witnes long narapela hap ol i go sua.

Jeff na Deb i lukim wanpela famili wantaim naispela bebi gel bilong ol long wanpela ples kaikai long bikpela stua long Cancún. Taim ol i mekim sampela tok long bebi, papamama bilong em i singautim ol i kam kaikai pitsa wantaim ol. Ol i kisim save olsem dispela famili i bilong India. I no gat wanpela taim ol i bin harim sampela tok bilong ol Witnes Bilong Jehova, na ol i no lukim yet ol buk na nius bilong yumi. Ol i lusim stua wantaim sampela buk na nius bilong ol Witnes.

Klostu wankain samting i kamap long wanpela ailan i stap klostu long nambis bilong Yucatán. Tupela nupela marit bilong Saina i askim Jeff long kisim piksa bilong ol, na em i amamas long mekim. Orait nau em i kisim save olsem maski ol i sindaun pinis long Amerika inap 12-pela yia, ol i no lukim yet ol Witnes Bilong Jehova o harim tok bilong ol! Ol i toktok gut wantaim. Jeff i kirapim ol long painim ol Witnes taim ol i go bek long ples bilong ol.

Ating i gat sampela bikpela bung long hap bilong yu we yu ken autim tok long ol man. Taim presiden bilong Amerika i kam lukim presiden bilong Meksiko long fam bilong em klostu long Guanajuato, ol niusman bilong olgeta hap bilong graun i kam bilong stori long dispela samting. Wanpela famili Witnes i go long dispela hap bilong autim tok long tok Inglis. Ol man i harim gut tok bilong ol. Olsem: Wanpela niusman bipo em i stori pinis long sampela woa, olsem woa long Kosovo na Kuwet. Ol i sutim wanpela wanwok bilong em long gan na em i dai taim niusman i holim em long han bilong em. Taim niusman i harim tok bilong kirap bek, em i tok tenkyu long God na aiwara i pundaun, na em i amamas long save olsem laip i gat as bilong en. Em i tok, tru em i no inap lukim gen dispela tupela marit Witnes, tasol em bai i no inap lusim tingting long dispela gutnius bilong Baibel.

Olsem ol dispela ekspiriens i kamapim, planti taim yumi no ken save long ol samting i kamap long dispela kain pasin bilong autim tok. Tasol saveman King Solomon i tok: “Yu mas mekim wok long planti hap, na bihain bai yu kisim gutpela pe.” Na em i tok tu: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut, o tupela lain wantaim bai i kamap gut.” (Saveman 11:⁠1, 6) Tru tumas, “mekim wok long planti hap,” na planim planti “kaikai,” olsem Pol na Jisas i bin mekim bipo, na ol dispela Witnes long nau i save mekim long Meksiko long ol man i mekim tok Inglis.