Yu Tingim Yet?
Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:
• Wanem samting i soim olsem Jisas i gat ol brata na susa?
Long Matyu 13:55, 56 na Mak 6:3, Baibel i tok Jisas i gat ol brata na susa. Tok Grik (adelphos) ol i yusim long ol dispela ves i makim “olsem wanem man i pas wantaim narapela, dispela tok i makim brata o susa tru.” (The Catholic Biblical Quarterly, bilong Janueri 1992)—12/15, pes 3.
• Ol pait long nau i narapela kain olsem wanem? Planti taim wanem ol samting i as bilong en?
Inap sampela yia nau, ol pait i bagarapim tru sindaun bilong ol manmeri em ol pait i kamap insait long ol kantri yet—tupela lain insait long kantri ol i pait. Sampela bikpela samting i kirapim ol dispela pait em pasin birua i stap namel long sampela lain insait long kantri, kros namel long ol lotu, ol i mekim pasin i no stret long ol man, na ol lain politik i kros pait. Na narapela as em pasin bilong mangal long kisim namba na strong na mani.—1/1, pes 3-4.
• Olsem wanem yumi save Jisas i no laik ol Kristen i kolim olgeta wan wan tok bilong beten em i lainim ol man long en?
Jisas i kolim dispela beten long taim em i mekim tok antap long maunten. Inap olsem 18 mun bihain, em i kamapim gen ol bikpela tok bilong dispela beten. (Matyu 6:9-13; Luk 11:1-4) Yumi lukim olsem em i no kolim gen olgeta wan wan tok bilong beten, na dispela i makim olsem em i no kamapim wanpela beten ol i mas tingim olgeta wan wan tok bilong en na kolim kolim nating long maus.—2/1, pes 8.
• Bihain long Bikpela Tait, pisin balus i painim we lip bilong diwai oliv na kisim i go bek long sip?
Yumi no save i gat bikpela sol i stap long wara o nogat, na wara i kol o nogat. Tasol ol i tok diwai oliv inap putim nupela kru gen maski ol i katim. Olsem na ating sampela diwai i no bagarap long tait na ol inap putim nupela kru bihain long tait.—2/15, pes 31.
• Taim bikpela pait i kamap insait long Naijiria, na ol i pasim rot i go long Biafra, olsem wanem ol Witnes Bilong Jehova i stap long dispela hap i kisim kaikai bilong spirit?
Gavman i salim wanpela man bilong mekim wok long Yurop na narapela i go mekim wok long ples balus long Biafra. Dispela tupela man i Witnes. Tupela i orait long kisim ol kaikai bilong spirit i go insait long Biafra, maski ol inap kisim bagarap long en, na long dispela rot planti brata i kisim helpim i go inap long taim pait i pinis long 1970.—3/1, pes 27.
• Pasin Sekan Long Westphalia i kamapim wanem samting? Olsem wanem lotu i insait long en?
Taim sampela lain i bruk na lusim Misin Katolik dispela i mekim na Gavman Holi Bilong Rom i bruk long 3-pela lotu—Katolik, Luteran, na Kalvin. Long yia 1600 samting ol i kamapim Talatala Yunion na Katolik Lig. Orait nau wanpela kros i kamap namel long tupela lain lotu long Bohemia na bihain em i kamap wanpela bikpela pait politik bilong kisim na bosim ol narapela kantri. Ol king samting bilong lotu Katolik na Talatala i bosim ol kantri na ol i wok long stiaim ol samting i go bambai ol yet i ken kamap nambawan na kisim bikpela mani na ol bisnis samting. Bihain ol i mekim bung bilong sekan long provins Westphalia long Jemani. Klostu 5-pela yia bihain, ol i sainim Kontrak Bilong Westphalia long 1648, na dispela i pinisim Pait Bilong 30 Yia na nupela kain Yurop i kamap, em i gat ol liklik kantri insait long en na ol i gat king o gavman bilong ol yet.—3/15, pes 20-23.
• Wanem mining bilong mak, o nem, bilong “wel animal”—em namba 666?
Kamapim Tok Hait 13:16-18 i kolim dispela mak. Dispela wel animal i makim gavman bilong ol man, na em i gat “namba bilong wanpela man” i makim olsem ol gavman i kamapim pasin bilong ol man bilong graun em ol i gat sin na i no gutpela tumas. Taim ol i raitim namba 6 tripela taim olsem 666 i soim olsem em i sot tru long mak bilong samting i gutpela long ai bilong God. Ol lain i gat dispela mak ol i givim biknem, olsem lotu, long ol gavman politik o ol i wetim em long kisim bek ol na ol i ken i stap gut.—4/1, pes 4-7.