FRAN PES STORI | DAUNIM PASIN BILONG TINGTING PLANTI
Olgeta Man i Save Tingting Planti!
“Mi go long baim kaikai, tasol ol i salim ol swit bisket long bikpela pe! Long neks de, olgeta kaikai long stua i pinis.”—Paul, Simbabwe.
“Man bilong mi i tok em bai lusim mi na ol pikinini. Mi tingting planti long hau mi inap karim dispela hevi. Wanem samting bai painim ol pikinini?”—Janet, Amerika.
“Taim mi harim krai bilong sairen na bom i pairap, kwiktaim mi painim ples hait na slip long plua. Bihain long sampela aua han bilong mi i guria yet.”—Alona, Israel.
Long nau, ol man i save tingting planti, long wanem, ‘taim nogut i kamap na dispela i givim hatwok long ol.’ (2 Timoti 3:1) Planti i karim hevi bilong mani, woa, ol bikpela sik, famili i bruk na ol bikpela disasta samting. Na tu, ol man i gat ol hevi bilong ol yet. Sampela i tingting planti olsem: ‘Sua i kamap long skin bilong mi i makim olsem mi gat sik kensa?’ ‘Wanem samting bai painim ol tumbuna bilong mi?’
I nogat rong long tingting planti. Sampela taim yumi tingting planti na dispela i helpim yumi long mekim gut ol samting. Olsem, yumi save tingting planti paslain long wanpela eksem, danis samting, o long taim bilong intaviu long wok. Tasol pasin bilong tingting planti long olgeta taim inap nogutim helt bilong yu. Wanpela sevei long winim 68 tausen man i soim olsem pasin bilong tingting planti inap sotim laip bilong man. Dispela i stret wantaim tok bilong Jisas olsem: “Husat bilong yupela, long rot bilong tingting planti, inap skruim liklik haptaim moa long laip bilong en?” Tru tumas, pasin bilong tingting planti i no inap mekim yu i stap laip longpela taim, nogat. Olsem na Jisas i tok: “Lusim pasin bilong tingting planti.” (Matyu 6:25, 27) Tasol olsem wanem yumi inap mekim olsem?
Yumi ken bihainim ol gutpela stiatok, bilip strong long God, na wetim ol gutpela samting bai kamap. Maski yumi no bungim ol bikpela hevi long nau, ol kain hevi olsem inap painim yumi long bihain. Olsem na i gutpela yumi skelim hau Paul, Janet, na Alona i daunim pasin bilong tingting planti.