BEKIM OL ASKIM BILONG BAIBEL
Bilong wanem ol tok profet i stap long Baibel?
Bilong wanem Baibel i stori long ol samting i kamap long nau?—Luk 21:10, 11.
Baibel i stori long planti bikpela tok profet. I no gat wanpela man inap stori gut long olgeta samting bai kamap long bihain. Ol tok profet bilong Baibel i bin kamap tru, olsem na yumi ken bilip olsem Baibel em i tok bilong God.—Ritim Josua 23:14; 2 Pita 1:20, 21.
Truim bilong ol tok profet bilong Baibel i helpim yumi long bilip long God. (Hibru 11:1) Na tu, ol i strongim bilip bilong yumi long ol tok promis bilong God long ol gutpela samting bai kamap bihain. Long rot bilong ol tok profet bilong Baibel, yumi bilip na wet long ol tok promis bilong God.—Ritim Song 37:29; Rom 15:4.
Hau ol tok profet bilong Baibel i helpim yumi?
Sampela tok profet i kirapim ol wokman bilong God long mekim sampela samting. Olsem, taim ol Kristen long taim bilong ol aposel i luksave long truim bilong sampela tok profet, kwiktaim ol i lusim Jerusalem. Planti man i givim baksait long Jisas, olsem na Jerusalem i bagarap. Tasol ol Kristen husat i ranawe i go long ol maunten, ol i stap gut.—Ritim Luk 21:20-22.
Long nau, truim bilong sampela tok profet i soim olsem klostu nau Kingdom Bilong God bai pinisim olgeta gavman bilong ol man. (Daniel 2:44; Luk 21:31) Olsem na em i bikpela samting long yumi olgeta i mas sapotim wok bilong Kingdom, na bai Jisas Krais em King God i makim bai amamas long wok yumi mekim.—Ritim Luk 21:34-36.