ASKIM

Wanem samting i soim klia olsem lain Israel i banisim Jeriko inap sotpela haptaim tasol na ol i daunim dispela taun?

Stori i stap long Josua 6:10-15, 20 i kamapim klia olsem, ami bilong Israel i mats raunim Jeriko 1-pela taim long olgeta wan wan de, na ol i mekim olsem inap 6-pela de. Long namba 7 de, ol i mats raunim taun Jeriko inap 7-pela taim, na God i mekim strongpela banis bilong taun i pundaun. Olsem na lain Israel i kisim dispela taun. Yu ting wok painimaut bilong ol saveman i sapotim stori bilong Baibel olsem, lain Israel i banisim taun Jeriko inap sotpela haptaim?

Long bipo, sapos ol birua i laik kisim wanpela strongpela taun, ami bilong ol i save banisim dispela taun. Maski ol birua i banisim taun inap sotpela taim o longpela taim, ol i save stilim mani kago bilong dispela taun, na stilim tu ol kaikai. Tasol ol saveman i skelim hap we ol pipia bilong taun Jeriko i stap long en, na ol i luksave olsem planti kaikai i bin i stap. Wanpela buk, Biblical Archaeology Review, i tok: “Ol saveman i lukim ol pipia bilong planti sospen graun, na planti rais na wit. . . . Dispela ripot i narapela kain long ol ripot i stap long ol rait bilong ol Palestain. Wan wan haus inap i gat 1-pela o 2-pela sospen wit, tasol em narapela kain tru long lukim planti moa wit.”

Baibel i stori olsem, lain Israel i no stilim ol wit long taun Jeriko. Jehova i tambuim ol long mekim olsem. (Jos. 6:17, 18) Lain Israel i daunim taun Jeriko bihain tasol long taim bilong kisim ol wit long gaden—long dispela taim, wit i planti tru. (Jos. 3:15-17; 5:10) Planti wit i stap yet long taun Jeriko, na dispela i soim klia olsem lain Israel i banisim Jeriko inap sotpela haptaim tasol, olsem Baibel i stori long en.