Baibel i Tok Wanem?

Devil i husat o em i makim wanem samting?

BAI YU BEKIM OLSEM Devil em . . .

• Wanpela spirit?

• Pasin na tingting nogut bilong man?

• Ol samting man i save tingting long en?

BAIBEL I TOK

Devil o Satan i bin toktok long Jisas na em i “traim” em. (Matyu 4:1-4) Olsem na Devil em man tru, na em i no samting i stap long tingting bilong ol man. Em i wanpela spirit nogut.

YUMI KISIM WANEM SKUL LONG BAIBEL?

• Pastaim, Devil em wanpela gutpela ensel, tasol “tok i tru i no stap long em.” (Jon 8:44) Olsem na em i kamap man bilong giaman na em i bikhet na sakim tok bilong God.

• Ol arapela ensel i bihainim Satan na bikhet long God.—Revelesen 12:9.

• Devil i pasim tingting bilong planti man, olsem na ol man i ting em i stori nating o samting i stap long tingting bilong man.—2 Korin 4:4.

Yu ting Devil inap kontrolim ol man?

SAMPELA MAN I TOK Devil i no inap kontrolim ol man, na ol arapela i pret olsem ol spirit nogut bai bosim ol. Yu gat wanem tingting?

BAIBEL I TOK

“Dispela graun olgeta i stap long han bilong Satan.” (1 Jon 5:19) Devil i bosim ol man na paulim tingting bilong ol, tasol em i no kontrolim olgeta man.

YUMI KISIM WANEM SKUL LONG BAIBEL?

• Satan i giamanim ol man na bai ol i bihainim em.—2 Korin 11:14.

• Sampela taim, ol spirit nogut inap kontrolim ol man.—Matyu 12:22.

• God inap helpim yu long “sakim Satan.”—Jems 4:7.