Yupela Ol Yangpela Redim Yupela Yet Long Kisim Baptais

1, 2. (a) Bilong wanem baptais em i bikpela samting? (b) Paslain long yu kisim baptais, yu mas skelim wanem ol askim? Bilong wanem?

OLSEM WANEM? Yu wanpela yangpela husat i laik kisim baptais? Sapos olsem, dispela bai opim rot bilong yu long kisim gutpela blesing tru. Olsem atikol i kamap paslain i stori pinis, disisen bilong kisim baptais em i bikpela samting. Baptais i makim olsem yu dediket pinis long Jehova—yu mekim strongpela promis olsem yu bai putim laik bilong em i stap namba 1 winim olgeta narapela samting long laip bilong yu, na yu bai mekim wok bilong em inap oltaim oltaim. Olsem na yu inap kisim baptais sapos yu redi long mekim dispela disisen, na yu yet i gat laik long mekim olsem, na yu kliagut long ol samting yu mas mekim taim yu dediket long God.

² Olsem wanem? Yu gat 2-pela tingting long kisim baptais? Papamama i laik bai yu wet liklik inap long yu kisim sampela ekspiriens moa long bihainim pasin Kristen? Sapos olsem, orait yu no ken givap. Yu ken yusim dispela haptaim long winim sampela mak bambai yu inap kisim baptais. Tingim ol mak yu inap winim long sait bilong (1) bilip bilong yu, (2) pasin bilong yu, na (3) pasin bilong tok tenkyu.

BILIP BILONG YU

3, 4. Ol yangpela inap kisim wanem skul long eksampel bilong Timoti?

³ Tingim ol bekim yu bai kamapim long ol dispela askim: Wai na mi bilip olsem God i stap tru? Wanem samting i kirapim mi long bilip olsem God yet i kamapim ol tok bilong Baibel? Wai na mi pilim olsem em gutpela long mi mas bihainim ol lo bilong God na mi no ken bihainim pasin bilong dispela graun? Ol dispela askim i no bilong kirapim yu long kisim 2-pela tingting, nogat. Ol dispela askim bai helpim yu long bihainim tok em aposel Pol i givim long ol Kristen long Rom, em i tok: “Yupela i ken save tru long laik bilong God, em dispela laik em i gutpela, na em i orait, na i gutpela olgeta.” (Rom 12:2) Bilong wanem ol Kristen long Rom i mas save tru long ol samting ol i bilip long en?

⁴ Baibel i stori olsem Timoti i save gut long ol tok bilong ol Rait Holi. Mama na bubu meri bilong em i skulim em long ol dispela tok taim em i “stap bebi yet.” Maski i olsem, Pol i strongim Timoti na i tok: “Yu mas bihainim yet ol samting ol arapela i bin lainim yu long en na helpim yu long bilip long en.” (2 Tim. 3:14, 15) Timoti yet i laikim tok i tru na em i mekim disisen long bihainim dispela rot. I no olsem mama na bubu meri bilong Timoti i tokim em long bihainim tok i tru, nogat. Em yet i mekim dispela disisen.—Ritim Rom 12:1.

5, 6. Wai na em i bikpela samting long yu mas lain long yusim “gutpela tingting” taim yu stap yangpela yet?

⁵ Olsem wanem long yu? Ating yu save long ol tok bilong Baibel inap longpela taim pinis. Sapos olsem, orait yu ken putim mak long skelim gut ol risen bilong ol bilip yu holim. Dispela bai strongim bilip bilong yu na helpim yu long sakim presa bilong ol wanlain, na ol tok giaman bilong dispela graun, na tu, yu inap sakim ol tingting kranki na ol laik nogut.

⁶ Taim yu stap yangpela yet na yu lain long bihainim “gutpela tingting,” dispela bai redim yu long bekim gut tok taim ol wanlain i givim ol kain askim olsem: ‘Hau na yu save tru olsem i gat God i stap? Wai na God bilong pasin laikim i larim pasin nogut i stap? Wai na yu tok olsem God i stap long bipo yet i kam inap long nau?’ Sapos yu redi gut, ol kain askim bai i no inap mekim na yu kamap slek long bilip, nogat. Ol dispela askim bai kirapim yu long lusim sampela haptaim moa long mekim stadi bilong yu yet.

7-9. Stori long olsem wanem buk Tru Tru Baibel i Tok Wanem? inap strongim bilip bilong yu.

⁷ Taim yu givim bel moa yet long mekim stadi bilong yu, dispela bai helpim yu long bekim ol askim, abrusim pasin bilong holim 2-pela tingting, na strongim bilip bilong yu. (Apo. 17:11) Yumi gat planti tul we inap helpim yu long mekim stadi bilong yu yet. Planti yangpela i kisim gutpela helpim taim ol i skelim ol pablikesen i stori gut long Nambawan Krieta bilong yumi na ol samting em i bin wokim. Olsem: Buklet The Origin of Life—Five Questions Worth Asking, na buk Is There a Creator Who Cares About You? Na tu, buk Tru Tru Baibel i Tok Wanem? bai helpim yu long strongim bilip bilong yu long ol bikpela tok bilong Baibel.

⁸ Yu stap sumatin bilong Baibel, olsem na ating yu save pinis long sampela bekim bilong ol askim i stap long dispela buk. Tasol olsem wanem? Yu bilip olsem ol bekim bilong yu i stret na i tru? Yu ken skelim gen ol het tok na ol riviu askim na tingim gut ol skripsa yu inap yusim long strongim ol bekim bilong yu, na tingim tu ol risen bilong yu long bilipim ol dispela tok. Yu ken raitim ol skripsa na ol risen bilong yu long pepa. Dispela bai helpim yu long save long olsem wanem yu inap eksplenim bilip bilong yu long ol narapela. Taim yu mekim ol dispela samting long haptaim yu yusim long mekim stadi bilong yu yet, dispela bai strongim bilip bilong yu.

⁹ Taim yu mekim ol samting bilong strongim bilip bilong yu, dispela bai opim rot bilong yu long kisim baptais. Wanpela tineja sista i tok: “Paslain long mi mekim disisen long kisim baptais, mi stadi long Baibel na luksave olsem lotu mi stap long en em lotu i tru. Long olgeta wan wan de, bilip bilong mi i kamap strong moa.”

PASIN BILONG YU

10. Bilong wanem Kristen bai bihainim ol pasin i stret wantaim bilip bilong em?

¹⁰ Baibel i tok: “Sapos bilip i stap nating, na i no kamapim ol gutpela wok, orait dispela bilip i dai pinis.” (Jems 2:17) Pasin bilong yu bai soim klia olsem yu gat strongpela bilip. Baibel i tok yu bai “wokabaut long pasin i holi na bihainim pasin bilong givim bel tru long God.”—Ritim 2 Pita 3:11.

11. Olsem wanem yumi inap “wokabaut long pasin i holi”?

¹¹ Sapos yu laik “wokabaut long pasin i holi,” orait yu mas bihainim ol pasin i klin. Tingim bek ol samting yu mekim insait long 6-pela mun i go pinis. Olsem wanem yu soim olsem yu bin trenim yu yet long kisim “save” we i helpim yu long “kliagut long wanem samting i stret na wanem samting i no stret”? (Hib. 5:14) Yu inap tingim wanpela taim we yu sakim traim o presa em ol wanlain i putim long yu? Pasin yu bihainim long skul i kamapim klia bilip bilong yu? Yu save sambai long bilip bilong yu, o yu save bihainim pasin bilong ol wanklas bambai ol i no ken tok bilas long yu? (1 Pita 4:3, 4) Yumi olgeta i gat sin. Maski ol wokman bilong Jehova i stap longpela taim long tok i tru, sampela taim ol inap surik long toktok long ai bilong planti manmeri. Tasol man i dediket long Jehova bai amamas long holim nem bilong God, na pasin bilong em bai soim klia dispela samting.

12. (a) Olsem wanem yu inap soim olsem yu “bihainim pasin bilong givim bel tru long God”? (b) Yu mas holim wanem kain tingting long ol wok lotu yu mekim?

¹² Olsem wanem yu inap soim klia olsem yu “bihainim pasin bilong givim bel tru long God”? Yu bai mekim ol wok em ol narapela inap lukim, olsem yu go long ol miting na mekim wok autim tok. Na tu, yu bai mekim ol samting em ol narapela i no inap lukim, olsem yu yet i beten na mekim stadi. Man i dediket long Jehova bai amamas long mekim ol dispela samting. Em bai holim wankain tingting olsem King Devit, em i tok: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.”—Sng. 40:8.

13, 14. (a) Yu mas mekim wanem bambai yu inap “bihainim pasin bilong givim bel tru long God”? (b) Sampela yangpela i bin skelim ol askim na olsem wanem dispela i helpim ol?

¹³ Sapos yu laik “bihainim pasin bilong givim bel tru long God,” i gutpela yu skelim sampela askim. Kain olsem: “Taim yu beten, yu save kamapim klia ol tingting i stap long bel bilong yu?” “Ol tok yu kolim i kamapim klia olsem yu laikim tru Jehova?” “Yu save mekim wanem ol narapela samting taim yu mekim stadi bilong yu yet?” “Yu save autim tok maski papamama i no go autim tok?”^[1] Raitim bekim bilong ol dispela askim. Dispela bai helpim yu long kamap gutpela moa long sait bilong beten, stadi, na wok autim tok.

¹⁴ Sampela yangpela husat i tingting long kisim baptais, ol i raitim bekim bilong ol dispela askim na dispela i helpim ol long mekim gutpela disisen. Tilda em wanpela yangpela sista. Taim em i raitim bekim bilong ol dispela askim, dispela i helpim em long putim ol mak em i laik winim. Em i winim ol dispela mak na 1-pela yia bihain em i redi long kisim baptais. Patrick em narapela yangpela brata husat i kisim helpim long wankain rot. Patrick i tok: “Mi save pinis long ol mak mi laik winim. Tasol taim mi raitim ol dispela mak, dispela i helpim mi long wok strong moa bambai mi inap winim ol dispela mak.”

15. Wai na yu yet i mas mekim disisen long dediketim laip bilong yu long God?

¹⁵ Wanpela bikpela askim em olsem: “Bai yu mekim yet wok bilong Jehova maski papamama na ol pren bilong yu i lusim dispela wok?” Tingim: Yu dediket pinis na yu kisim baptais, na Jehova bai skelim wok yu yet i mekim. Laik bilong yu yet i mas kirapim yu long mekim wok bilong God, na yu no ken bihainim nating ol narapela, maski em ol papamama bilong yu. Taim yu wokabaut long pasin i holi na bihainim pasin bilong givim bel tru long God, dispela i soim olsem yu yet i laikim tok i tru na yu wok long winim ol mak bilong kisim baptais.

PASIN BILONG TOK TENKYU

16, 17. (a) Wanem pasin bai kirapim man long kamap Kristen? (b) Wanem tok piksa i stret long pasin bilong soim tenkyu long pe bilong baim bek man?

¹⁶ Wanpela man i save gut long Lo Bilong Moses, na em i askim Jisas: “Wanem lo i nambawan na i winim ol arapela lo?” Jisas i tok: “Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu.” (Mat. 22:35-37) Jisas i kamapim klia olsem sapos man i laikim tru Jehova long bel olgeta, dispela bai kirapim em long bihainim pasin Kristen na kisim baptais. Nambawan rot bilong strongim pasin bilong laikim tru Jehova em olsem, yu mas tingim tingim nambawan presen Jehova i givim—em ofa bilong Pikinini bilong em long baim bek ol man. (Ritim 2 Korin 5:14, 15; 1 Jon 4:9, 19.) Taim yu tingim pe bilong baim bek man na olsem wanem dispela pe i helpim yu, dispela bai kirapim yu long mekim ol samting bilong soim tenkyu bilong yu.

¹⁷ Yu inap mekim sampela samting bilong soim tenkyu bilong yu long pe bilong baim bek man. Piksaim long tingting olsem yu laik draun insait long wara na wanpela man i seivim yu. Yu ting yu bai i go long haus, draim yu yet, na lusim tingting long dispela man i helpim yu? Nogat tru! Yu bai pilim olsem yu gat bikpela dinau tru long dispela man. Yu bai pilim olsem yu mas givim laip olgeta bilong yu long mekim wok bilong em! Yumi gat bikpela dinau moa long God Jehova na Jisas Krais. Sapos i no gat pe bilong baim bek man, yumi olgeta wan wan bai i no gat rot bilong abrusim kalabus bilong sin na dai. Tasol God i soim bikpela pasin laikim long yumi, na dispela i opim rot bilong yumi long kisim laip oltaim long Paradais long graun!

18, 19. (a) Wai na yu no ken pret long stap long sait bilong Jehova? (b) Taim yu mekim wok bilong Jehova, hau bai dispela i mekim laip bilong yu i kamap gutpela moa?

¹⁸ Olsem wanem? Yu pilim tru ol samting Jehova i mekim bilong helpim yu? Sapos yu save mekim olsem, orait dispela i makim olsem yu ken dediket long Jehova na kisim baptais. Tingim, taim yu dediket long Jehova, yu mekim strongpela tok promis olsem yu bai mekim laik bilong em inap oltaim oltaim, maski wanem ol samting i kamap long laip bilong yu. Yu ting i stret long yu surik long mekim kain promis olsem? Nogat tru! Tingim olsem Jehova i laik helpim yu, na em “i save givim gutpela pe long ol man i wok strong long painim em.” (Hib. 11:6) Taim yu dediket long Jehova na kisim baptais, dispela i no inap putim hevi long yu, nogat. Laip bilong yu bai i kamap gutpela moa taim yu mekim wok bilong Jehova. Wanpela brata i gat 24 krismas na em i bin kisim baptais paslain long em i kamap tineja. Em i tok: “Sapos mi wet inap long krismas bilong mi i kamap bikpela, ating mi bai kliagut moa long ol tok bilong Baibel. Tasol mi mekim disisen long dediket long Jehova, na dispela i lukautim mi na mi no pundaun long ol wok nogut bilong dispela graun.”

¹⁹ Jehova i laikim yu tru na em i laik helpim yu, tasol Satan i tingim em yet na em i no laikim yu! Satan i no inap givim gutpela pe long ol manmeri i stap long sait bilong em. Bagarap bai painim em, olsem na em i no gat wanpela gutpela samting em inap tingting long en. Hau bai em inap givim yu ol samting we em i no gat? Satan i laik kirapim yu long bihainim rot bilong kisim bagarap, long wanem, bagarap bai painim em!—Rev. 20:10.

20. Ol yangpela i ken mekim wanem bambai ol inap winim ol mak bilong dediket na kisim baptais? (Lukim blok “Tul Bilong Helpim Yu Long Kamap Strong Long Bilip.”)

²⁰ Yes, i stret tru long yu mas dediketim laip bilong yu long Jehova. Yu ting yu redi long mekim olsem? Sapos olsem, yu no ken surik. Sapos yu nidim sampela moa haptaim long mekim disisen long dediket long God, orait yu ken bihainim ol gutpela skultok em yumi bin skelim long dispela atikol. Pol i raitim pas i go long ol Kristen long Filipai, na em i tok: “Yumi bin wok long kamap strong moa, olsem na yumi mas wokabaut stret yet long dispela wankain pasin.” (Fili. 3:16) Sapos yu bihainim dispela tok, dispela bai kirapim yu long dediket long Jehova na kisim baptais.