Ol Yangpela i Laik Save
Olsem Wanem Mi Ken Mekim Ol Beten Bilong Mi i Kamap Gutpela Moa?
“Taim yu gat planti samting bilong mekim long skul, long wok, o wantaim ol pren na famili, sampela taim yu lusim tingting long husat i mas i stap nambawan tru—em God.”—Faviola, 15, Amerika.
“BETEN oltaim.” (1 Tesalonaika 5:17) “Beten long olgeta taim.” (Rom 12:12) “Yupela i mas prea long God . . . na askim em long helpim yupela.” (Filipai 4:6) Sapos yu wanpela Kristen, ating yu save gut long ol dispela skripsa. Na ating yu luksave tu olsem beten em i wanpela narakain rot tru bilong toktok. Tingim—long wanem wanem taim long de o long nait, yu inap toktok wantaim God i Gat Olgeta Strong! Na Baibel i tok: “Em i save harim beten bilong yumi.”a—1 Jon 5:14.
Tasol olsem dispela yangpela mipela i kamapim toktok bilong em long kirap bilong stori, ating yu pilim olsem i hatwok long beten. Sapos olsem, yu ken mekim wanem bilong kisim pasin bilong beten? Dispela stori bai i helpim yu long (1) luksave long samting i pasim yu long beten, (2) putim wanpela mak yu laik winim long beten bilong yu, na (3) opim “dua” bambai yu inap winim mak yu putim.
Pastaim, luksave long samting i pasim yu long beten. Wanem samting long beten i mekim na yu pilim olsem i hatwok long beten? Raitim bekim long daunbilo.
․․․․․
Narapela samting yu mas mekim, em yu mas putim wanpela mak em yu laik winim. Long daunbilo, makim wanpela bilong ol dispela mak em yu laik winim o raitim wanpela mak long hap spes i gat tok “Narapela.”
□ Mi laik beten planti taim.
□ Mi no laik kolim ol wankain tok tasol long beten bilong mi.
□ Mi laik kamapim long beten ol samting mi pilim tru long bel.
□ Narapela
Opim “Dua”
Beten em i olsem wanpela dua yu ken opim long wanem wanem taim yu gat laik long opim. Tasol planti yangpela bai i tok, ol i no save opim dispela dua planti taim o ol i surik liklik long mekim olsem. Sapos yu tu i gat wankain tingting, orait yu no ken givap! Yu luksave pinis long samting i putim hevi long yu na yu putim pinis wanpela mak. Olsem na nau yu mas i gat wanpela ki bilong opim dispela dua. Skelim sampela samting inap pasim yu, na ol samting yu inap mekim bilong winim dispela hevi.
◼ Lok: NO GAT TAIM LONG BETEN. “Sampela taim mi bisi tru na mi no gat taim long beten.”—Preeti, 20, Briten.
Ki: “Yupela i mas lukaut gut long wokabaut bilong yupela. Yupela i no ken wokabaut olsem man i no gat save. Nogat. Yupela i mas wokabaut olsem man i gat save. Nau yupela i gat taim bilong mekim pasin bilong God. Tasol dispela taim nau yumi stap long en, em i taim nogut, olsem na yupela i mas lukaut, nogut dispela taim i lus nating.”—Efesus 5:15, 16.
Samting Yu Ken Mekim: Paslain long yu beten, makim wanpela taim long de em i gutpela taim bilong beten. Yu ken raitim long pepa kain olsem yu save raitim tok bilong kirapim yu long tingim sampela samting yu mas mekim. Yoshiko, em wanpela yangpela meri i gat 18 krismas, long Japan, em i tok: “Sapos mi no makim wanpela taim stret long beten, ol narapela samting i save pulim nabaut taim bilong mi.”
◼ Lok: OL SAMTING I PULIM NABAUT TINGTING. “Tingting bilong mi i save wokabaut na mi tingim ol narapela samting na mi no tingim ol tok mi kolim long beten.”—Pamela, 17, Meksiko.
Ki: “Maus i save autim ol tingting i pulap long bel.”—Matyu 12:34, NW.
Samting Yu Ken Mekim: Sapos tingting bilong yu i save wokabaut, orait traim mekim sotpela beten—mekim olsem i go inap long taim we yu ken putim tingting olgeta long beten. Narapela samting: Beten long ol samting yu pilim tru long bel. Marina, em wanpela yangpela meri i gat 14 krismas, long Rasia, em i tok: “Taim mi kamap tineja, mi kirap pilim tru long bel olsem taim mi beten, mi toktok stret wantaim God. Dispela i kirapim mi long kamapim olgeta samting i stap long bel bilong mi taim mi beten.”
◼ Lok: KOLIM OL WANKAIN TOK. “Mi luksave olsem taim mi beten, mi save kolim ol wankain tok planti taim.”—Dupe, 17, Benin.
Ki: “Bai mi tingting long olgeta samting yu bin mekim. Yu bin mekim ol strongpela wok, na bai mi tingim dispela tu.”—Song 77:12.
Samting Yu Ken Mekim: Sapos yu luksave olsem yu save kolim ol wankain tok tasol long beten bilong yu, orait long olgeta wan wan de, yu mas raitim stret wanpela blesing yu bin kisim long dispela de. Nau tok tenkyu long Jehova long dispela blesing. Mekim olsem inap long wanpela wik olgeta, na long pinis bilong wik, yu bai luksave olsem yu bin beten long 7-pela narapela narapela samting. Mekim olsem tu long ol samting i save painim yu long olgeta wan wan de. Bruno, wanpela yangpela man i gat 21 krismas, long Brasil, em i tok: “Taim mi beten, mi traim long toktok long ol samting i bin kamap long dispela de stret.” Samantha, wanpela yangpela meri i gat 18 krismas, long Amerika, em tu i tok: “Mi traim long tingim olgeta samting i bin kamap long dispela de em ol i no wankain long ol samting i bin kamap long ol narapela de, na mi save beten long ol dispela samting. Dispela i save helpim mi long abrusim pasin bilong kolim ol wankain tok planti taim.”b
◼ Lok: TUPELA TINGTING. “Wanpela taim mi beten long wanpela hevi i bin kamap long skul, tasol dispela hevi i no pinis. I gat sampela moa hevi i kamap. Mi tingting, ‘I no gat as long mi mas beten. Jehova i no harim beten bilong mi!’ ”—Minori, 15, Japan.
Ki: “Sapos traim i kamap long yupela, orait God bai i wokim rot bilong helpim yupela.”—1 Korin 10:13.
Samting Yu Ken Mekim: Tingim: Jehova em i Man bilong “harim beten.” (Song 65:2) Olsem na taim yu beten pinis long wanpela samting, traim long kliagut long as na dispela samting i kamap. Na no ken wetim bekim yu tingting long en, mobeta yu tingim bekim em ating yu kisim pinis. Sapos yu stap strong yet olsem wanpela Kristen, ating dispela i makim olsem Jehova i bin bekim beten bilong yu—em i no rausim hevi long yu, tasol em i givim strong long yu long karim dispela hevi.—Filipai 4:13.
◼ Lok: PASIN BILONG SEM. “Mi save sem taim mi tingim olsem ol wanskul bilong mi bai tok wanem taim ol i lukim mi beten long taim bilong lans.”—Hikaru, 17, Japan.
Ki: “Olgeta samting i kamap long dispela graun, i save kamap long taim bilong em yet.”—Saveman 3:1.
Samting Yu Ken Mekim: Sampela taim ol man i lukim yu beten na ol i ting em i gutpela olsem yu beten, tasol yu no mas beten bilong ol narapela i ken lukim yu, nogat. Olsem, taim Nehemia i mekim sotpela beten long ai bilong King Artaserksis, em i kolim ol tok long tingting tasol na i no gat wanpela stori i bin kamapim olsem king i save olsem Nehemia i beten. (Nehemia 2:1-5) Yu tu i ken beten long Jehova long tingting tasol, na bai ol narapela i no ken lukim yu i mekim olsem.—Filipai 4:5.
◼ Lok: PILIM OLSEM YU NO GUTPELA TUMAS. “Jehova i save pinis long ol hevi bilong mi, na sapos mi les pinis long ol hevi bilong mi, orait mi pilim olsem em tu i les pinis. Sampela taim mi pilim olsem mi no gutpela inap long toktok wantaim em.”—Elizabeth, 20, Aialan.
Ki: “God i save wari long yupela. Olsem na olgeta hevi yupela i karim, yupela i mas putim long han bilong en.”—1 Pita 5:7.
Samting Yu Ken Mekim: Taim yu mekim stadi bilong yu yet, mekim wanpela projek. Olsem, ritim na tingim tingim long bel ol tok bilong ol dispela skripsa: Luk 12:6, 7; Jon 6:44; Hibru 4:16; 6:10; 2 Pita 3:9. Dispela ol ves bai i helpim yu long luksave olsem Jehova i gat laik long harim toktok bilong yu, na dispela i no makim olsem yu mas stap wanpela gutpela Kristen tru bambai Jehova i ken harim beten bilong yu, nogat. Man bilong raitim song, em Devit—planti hevi na taim nogut i bin painim em—em i bilip olsem “God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.”c—Song 34:18.
Jehova yet i save harim beten bilong yu na dispela i kamapim klia olsem em i tingim yu. Nicole, yangpela meri i gat 17 krismas, long Itali, em i tok: “Jehova i no givim wok long ol ensel long harim beten bilong yumi, nogat. Em yet i save harim beten bilong yumi, na dispela i kamapim klia olsem em i tingim ol beten bilong yumi olsem ol i bikpela samting.”
Bilong lukim sampela stori moa long hap “Ol Yangpela i Laik Save” long tok Inglis, lukim Web sait www.watchtower.org/ype
[Ol Futnot]
a Man Bilong Wokim yumi i no harim tasol toktok yumi mekim, nogat, em i “harim” tu tingting yumi pilim long bel.—Song 19:14.
b Lukim stori “Baibel i Tok Wanem? God i Ting Wanem Long Ol Samting Ol Man i Yusim Olsem Helpim Bilong Mekim Lotu?” i stap long pes 12.
c Sapos yu pilim olsem God i no harim ol beten bilong yu, long wanem, yu bin mekim wanpela bikpela rong, orait yu mas toktok wantaim papamama bilong yu. Na tu, “singautim ol hetman bilong sios i kam” long helpim yu. (Jems 5:14) Ol elda inap helpim yu long strongim gen pasin bilong yu long pas gut wantaim God.
SAMTING BILONG TINGIM
◼ Wanem sampela samting em ol i bikpela samting long Jehova em yu ken kolim long beten?
◼ Wanem sampela samting bilong ol narapela em yu ken beten na toktok wantaim Jehova long en?
[Blok/Ol Piksa long pes 18]
TOK OL WANLAIN I MEKIM
“Beten em i olsem wanpela notbuk em yu na Jehova tasol i save long ol tok i stap insait.”—Olayinka, Naijiria.
“Tingim olsem yu gat wanpela gutpela pren, na yu bin givim planti presen long em. Orait, wanpela taim dispela pren i no toktok moa long yu. Jehova i save pilim olsem taim yumi no beten long em.”—Chinta, Australia.
“Olgeta taim mi save pilim olsem i no stret long tokaut long ol samting mi pilim long bel. God i orait long yumi beten long em na dispela i helpim mi long luksave olsem i orait long mi ken amamas, o wari, o tingting planti, na mi ken kamapim ol dispela samting long Jehova. Nau mi inap long bosim gut tingting na bel bilong mi.”—Amber, Amerika.
[Piksa long pes 17]
Sapos dua bilong beten i lok, orait yusim ol ki i stap long Baibel bilong opim dispela dua