Nius i Kam Long Olgeta Hap
◼ Long nau, Web-sait bilong ol Witnes Bilong Jehova (www.watchtower.org) i kamapim ol stori long 314 tokples. Las yia, ol man i bin sekim dispela Web-sait inap 22 milion taim—olsem 60,000 taim long olgeta wan wan de.
◼ Long 2007, Saina “i gat 106 man em ol i gat mani olsem 1 bilion dola bilong Amerika, tasol [long 2006] i gat 15 man, na long 2002 i no gat wanpela.”—CHINA DAILY, SAINA.
◼ “Ripot bilong sampela kantri i soim olsem mani ol i kisim long takis bilong tabak i winim—inap 500 taim—mani ol i tromoi bilong daunim pasin bilong kisim tabak.”—WOL HELT OGANAISESEN, SWISELAN.
◼ Namba bilong ol man i bihainim lotu Islam i winim pinis namba bilong ol man i bihainim lotu Katolik. Long 2006, namel long olgeta man long graun, inap 19.2 pesen i bihainim lotu Islam na 17.4 pesen i bihainim lotu Katolik.—REUTERS NEWS SERVICE, BRITEN.
Amamas na Helt
Inap longtaim tru ol man i ting lain bilong amamas na lain i gat stretpela tingting long ol samting, helt bilong ol i gutpela moa winim lain em bel bilong ol i no stap isi, ol i gat hatpela pasin, na ol i no ting gutpela samting inap kamap. Ol saveman i tok lain i gat “pasin bilong amamas,” bodi bilong ol i no gat planti marasin cortisol—em marasin i save kamap planti moa taim bel i no stap isi na inap kamapim kain kain sik. Na i gat “tupela marasin protin em ol i kamap planti long taim sik i kisim olgeta hap bilong bodi,” tasol dispela tupela marasin i liklik tru long bodi bilong ol man bilong amamas. Dokta Andrew Steptoe bilong University College, London, i tok: “Pasin bilong amamas em i no samting yumi kisim tasol long papamama, nogat, em samting i kamap long pasin bilong pren gut wantaim ol arapela na yumi pilim olsem yumi gat gutpela wok long mekim.”
Ol Bebi Inap Skelim Pasin
Ol saveman long Yale University, Amerika, i tok, ol bebi i gat 6-pela mun “na ol i no kirap yet long toktok, ol inap skelim pasin bilong ol man.” Ol bebi namel long 6-pela mun na 10-pela mun, ol i lukluk long wanpela toi i laik i go antap long liklik maunten, na sampela toi i helpim em, tasol sampela i laik pusim em i go bek. Nius Houston Chronicle i tok, bihain ol i “givim ol dispela toi long ol bebi bambai ol i ken makim toi ol i laik pilai long en. Klostu olgeta i makim toi i gat pasin helpim, na ol i no makim toi i no gat pasin helpim.” Nius i tok dispela i soim olsem “ol bebi tu inap save long husat i gutpela poroman na husat i poroman nogut, na ol inap save wanem toi ol i laikim.”
Gutpela Ples Tru Bilong Glasim Ol Sta
Wanpela lain saveman i bin wokim wanpela haus i gat ol robot long en bilong glasim ol sta, long Dome Argus, em wanpela ples i stap antap tru olsem 4,000 mita antap long mak bilong solwara, long Is Antaktik. Hap em haus i sanap long en i stap longwe long Saut Pol inap 1,000 kilomita tasol, na em i kol tru na sampela taim ples i tudak tru. Win i drai na inap 4-pela mun long olgeta yia ples i stap tudak tasol. Dome Argus em i gutpela ples tru bilong glasim ol sta. Lifan Wang, dairekta bilong Chinese Center for Antarctic Astronomy, em i tok, teleskop long dispela hap inap “kisim ol gutpela piksa i klostu wankain long ol piksa em teleskop long ples antap i save kisim. Pe bilong mekim dispela samting i daun tru long pe bilong salim teleskop i go long ples antap.”