I Gutpela Long Skelim Bilip Bilong Yu

OLSEM WANEM? Yu tingim yu yet olsem wanpela Kristen? Sapos olsem, orait yu wanpela bilong winim 2 bilion manmeri long graun em ol i tok ol i save bihainim Krais. Long nau, i gat planti tausen lotu i tok ol i Kristen, tasol bilip na tingting bilong ol i narapela narapela. Ating bilip bilong yu i narapela kain tru long ol arapela husat i tok ol i Kristen. Yu ting samting yu bilip long en i bikpela samting? Em i bikpela samting, sapos yu laik bihainim ol pasin Kristen em Baibel i tokaut long en.

Ol disaipel bilong Jisas Krais long pastaim i kisim nem “Kristen.” (Aposel 11:26) Ol i no gat narapela nem, long wanem, long dispela taim ol i gat wanpela bilip. Ol Kristen i wanbel long bihainim ol tok em Man i Kamapim Lotu Kristen i skulim ol long en, em Jisas Krais. Olsem wanem long lotu bilong yu? Yu bilip olsem lotu bilong yu i skulim ol man long ol samting em Krais i bin skulim yumi long en? Na lotu bilong yu i skulim ol man long ol samting em ol disaipel bilong Krais long pastaim i bilip long en? Olsem wanem yu inap save long bekim bilong ol dispela askim? I gat wanpela rot tasol, yu inap skelim tok bilong Baibel wantaim bilip bilong yu.

Tingim dispela: Jisas Krais i gat bikpela rispek long Baibel, long wanem, em i save olsem em i Tok Bilong God. Em i no orait long ol man i tingim tok bilong Baibel i olsem samting nating, na ol i tingim ol kastam bilong ol man i bikpela samting. (Mak 7:9-13) Dispela i kamapim klia olsem Baibel i mas stap olsem as bilong ol bilip bilong ol disaipel tru bilong Jisas. Olsem na olgeta wan wan Kristen i ken askim ol yet, ‘Ol tok em lotu bilong mi i skulim mi long en i stret wantaim tok bilong Baibel?’ Bilong bekim dispela askim, i gutpela yu skelim ol tok lotu bilong yu i skulim yu long en wantaim tok bilong Baibel.

Jisas i tok yumi mas lotuim God long pasin i tru, na Baibel inap long skulim yumi long rot bilong mekim olsem. (Jon 4:24; 17:17) Aposel Pol i tok, bilong God i ken kisim bek yumi, yumi mas “kisim stretpela save long tok i tru.” (1 Timoti 2:4) Olsem na tok i tru bilong Baibel i mas stap olsem as bilong bilip bilong yumi. Em i bikpela samting, long wanem, em rot bilong God i kisim bek yumi!

ROT BILONG SKELIM OL BILIP BILONG YU WANTAIM BAIBEL

Mipela i laik kirapim yu long ritim blok i gat 6-pela askim, na tingim ol bekim bilong Baibel. Ritim ol skripsa na tingim tingim ol bekim. Bihain askim yu yet, ‘Ol bilip em lotu bilong mi i skulim mi long en i stret wantaim tok bilong Baibel?’

Dispela sotpela eksasais bai helpim yu long skelim gut ol tok em lotu bilong yu i skulim yu long en. Yu laik skelim tu ol narapela bilip bilong lotu bilong yu wantaim tok bilong Baibel? Ol Witnes Bilong Jehova bai amamas long helpim yu long kliagut long tok i tru bilong Baibel. Yu ken askim wanpela Witnes long mekim fri Baibel stadi kos wantaim yu. O yu ken go long Web-sait bilong mipela long jw.org/tpi.

1 ASKIM: God em i husat?

BEKIM: Jehova, Papa bilong Jisas, em God bilong oltaim oltaim, em Man i gat olgeta strong na Krieta bilong olgeta samting.

BAIBEL I TOK:

“Taim mipela i beten long yupela, oltaim mipela i save tok tenkyu long God, Papa bilong Bikpela bilong yumi, Jisas Krais.”—Kolosi 1:3.

“Jehova, yu God bilong mipela, i stret tru long yu kisim glori na ona na strong, long wanem, yu bin wokim olgeta samting.”—Revelesen 4:11.

Ritim tu Rom 10:13; 1 Timoti 1:17.

2 ASKIM: Jisas Krais em i husat?

BEKIM: Jisas em Fesbon Pikinini Bilong God. God i wokim Jisas, olsem na em i gat kirap bilong em. Jisas i daun long God na bihainim laik bilong Em.

BAIBEL I TOK:

“Papa i winim mi.”—Jon 14:28.

“[Jisas] i piksa tru bilong dispela God ol man i no inap lukim, na em i fesbon bilong olgeta samting God i bin wokim.”—Kolosi 1:15.

Ritim tu Matyu 26:39; 1 Korin 15:28.

3 ASKIM: Holi spirit em wanem samting?

BEKIM: Holi spirit em strong God i yusim bilong kamapim laik bilong em. Em i no wanpela man. Holi spirit i ken pulap long ol man na strongim ol.

BAIBEL I TOK:

“Elisabet i harim gude bilong Maria na bebi i stap long bel bilong en i kalap, na holi spirit i pulap long Elisabet.”—Luk 1:41.

“Yupela bai kisim strong taim holi spirit i kam i stap long yupela.”—Aposel 1:8.

Ritim tu Stat 1:2; Aposel 2:1-4; 10:38.

4 ASKIM: Kingdom Bilong God em wanem samting?

BEKIM: Kingdom Bilong God em wanpela gavman long heven. Jisas em King bilong Kingdom Bilong God. Klostu nau dispela Kingdom bai kamapim laik bilong God long graun olgeta.

BAIBEL I TOK:

“Namba 7 ensel i winim trampet bilong en. Na ol nek i kamap long skai na ol i singaut strong olsem: ‘Wok bilong bosim ol manmeri long graun i kamap wok bilong Bikpela bilong yumi wantaim Krais bilong en. Na Bikpela bai mekim wok king inap oltaim oltaim.’”—Revelesen 11:15.

Ritim tu Daniel 2:44; Matyu 6:9, 10.

5 ASKIM: Olgeta gutpela man bai go long heven?

BEKIM: Nogat. God i makim sampela manmeri tasol bilong go long heven, em i kolim ol “liklik lain sipsip.” Ol bai mekim wok king wantaim Jisas na bosim olgeta manmeri.

BAIBEL I TOK:

“Yupela liklik lain sipsip, yupela i no ken pret. Papa bilong yupela i orait long givim Kingdom long yupela.”—Luk 12:32.

“Ol bai stap pris bilong God na bilong Krais, na ol bai mekim wok king wantaim em.”—Revelesen 20:6.

Ritim tu Revelesen 14:1, 3.

6 ASKIM: Wanem laik bilong God long dispela graun na long ol manmeri?

BEKIM: Aninit long wok bos bilong Kingdom Bilong God, graun bai kamap ples paradais na ol stretpela man bai gat gutpela helt, ol bai stap amamas na bel isi, na stap laip oltaim.

BAIBEL I TOK:

“Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—Song 37:10, 11.

“Em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.”—Revelesen 21:3, 4.

Ritim tu Song 37:29; 2 Pita 3:13.