Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • wp17 no. 1 p. 5-6
  • Hau Bai Mi Amamas Long Ritim Baibel?

No gat vidio bilong dispela seksen.

Sori, popaia kamap long lodim vidio.

  • Hau Bai Mi Amamas Long Ritim Baibel?
  • Wastaua i Tokaut Long Kingdom Bilong Jehova (Bilong Pablik)—2017
  • Wankain Infomesen
  • Ol Sapta na Ves​—Husat i Raitim Long Baibel?
    Wastaua i Tokaut Long Kingdom Bilong Jehova (Bilong Pablik)—2016
  • Kaunim Baibel Long Olgeta De—Dispela Bai Helpim Yu
    Wastaua i Tokaut Long Kingdom Bilong Jehova—1995
  • Rot Bilong Stadi
    Wastaua i Tokaut Long Kingdom Bilong Jehova (Stadi)—2023
  • Rot Bilong Kisim Helpim Long Ritim Baibel
    Stap Amamas Oltaim!—Stadi Long Baibel
Lukim Moa
Wastaua i Tokaut Long Kingdom Bilong Jehova (Bilong Pablik)—2017
wp17 no. 1 p. 5-6
Meri i yusim ol tul bilong Baibel long taim em i ritim Baibel

FRAN PES STORI | KISIM HELPIM LONG RITIM BAIBEL

Hau Bai Mi Amamas Long Ritim Baibel?

Olsem wanem? Yu amamas long ritim Baibel, o yu pilim olsem i hatwok? Yumi ken stori long sampela samting yu inap mekim na bai yu amamas long ritim Baibel.

Ritim Baibel i yusim tokples bilong nau na ol tok i klia. Sapos yu ritim ol buk na nius samting i kolim ol tok bilong bipo em yu no klia long en, yu no inap amamas long rit. Olsem na painim wanpela Baibel i kolim ol tok i isi moa long kliagut long en na bai yu pilim tru ol tok bilong en. Tasol ol tok bilong en i mas stret na tru.a

Yusim nupela teknoloji. Long nau, ol man inap ritim Baibel long kain kain rot. Yu ken ritim Baibel long Intenet, o yu ken daunlodim long kompiuta, teblet, o mobail fon. Sampela Baibel em yu daunlodim, ol i gat ol tul bilong helpim yu long lukim ol narapela Baibel ves i stori long wankain topik, na tu, yu ken skelim tok bilong ol narapela Baibel. Na sapos yu laik, yu inap harim odio rekoding bilong Baibel. Planti man i amamas long harim long taim ol i kalap long bas, wasim klos, o mekim ol narapela wok. Olsem wanem? Yu inap traim wanpela rot i stret long yu?

Yusim ol tul bilong Baibel. Ol tul bilong Baibel inap helpim yu long kliagut long ol tok bilong en. Sampela buk na nius bilong Baibel i gat ol mep bilong ol ples em Baibel i stori long en, dispela bai helpim yu long save gut long stori yu ritim. Na tu, yu ken ritim ol atikol bilong helpim yu long klia long mining bilong planti tok bilong Baibel. Ol kain atikol i stap long dispela nius na long Web-sait jw.org, aninit long het tok “Bible Teachings.”

Bihainim kain kain rot. Sapos yu pilim olsem i hatwok long ritim Baibel olgeta, orait makim wanpela hap bilong Baibel em yu laikim, dispela bai kirapim laik bilong yu long rit. Sapos yu laik kisim save long ol manmeri em planti taim Baibel i stori long ol, orait ritim tasol ol skripsa i stori long ol. Blok “Ritim Stori Bilong Ol Bilipman na Meri” i soim wanpela rot yu inap bihainim. O ating yu laik ritim ol bikpela tok bilong Baibel, o bihainim stori bilong Baibel long ol samting i kamap paslain na ol samting i kamap bihain. Olsem wanem? Yu laik traim wanpela bilong ol dispela rot?

a Planti man i painimaut olsem ol tok bilong Baibel New World Translation of the Holy Scriptures i stret na i klia tru, na ol man inap bilip tru long en. Ol Witnes Bilong Jehova i wokim dispela Baibel, na i stap long winim 130 tokples. Yu ken daunlodim kopi bilong en long Web-sait jw.org o daunlodim aplikesen bilong JW Library. O sapos yu laik, ol Witnes Bilong Jehova i ken bringim kopi bilong Baibel i kam long haus bilong yu.

RITIM STORI BILONG OL BILIPMAN NA MERI

Sampela bilipmeri

Abigel

1 Samuel sapta 25

Esta

Esta sapta 2-5, 7-9

Hana

1 Samuel sapta 1-2

Maria

(Mama bilong Jisas) Matyu sapta 1-2; Luk sapta 1-2; ritim tu Jon 2:1-12; Aposel 1:12-14; 2:1-4

Rahap

Josua sapta 2, 6; ritim tu Hibru 11:30, 31; Jems 2:24-26

Rebeka

Stat sapta 24-27

Sara

Stat sapta 17-18, 20-21, 23; ritim tu Hibru 11:11; 1 Pita 3:1-6

Sampela bilipman

Abraham

Stat sapta 11-24; ritim tu 25:1-11

Devit

1 Samuel sapta 16-30; 2 Samuel sapta 1-24; 1 King sapta 1-2

Jisas

Gutnius Bilong Matyu, Mak, Luk, na Jon

Moses

Kisim Bek sapta 2-20, 24, 32-34; Namba sapta 11-17, 20, 21, 27, 31; Lo sapta 34

Noa

Stat sapta 5-9

Pol

Aposel sapta 7-9, 13-28

Pita

Matyu sapta 4, 10, 14, 16-17, 26; Aposel sapta 1-5, 8-12

OL BAIBEL STADI TUL OL WITNES BILONG JEHOVA I WOKIM

  • JW.ORG—Dispela Web-sait i gat planti tul bilong stadi, wanpela em “Bible Questions Answered.” Web-sait i stori tu long rot bilong daunlodim aplikesen bilong JW Library

  • “See the Good Land”—Dispela buklet i gat ol mep na ol piksa bilong ol ples em Baibel i stori long en

  • Insight on the Scriptures—I gat 2-pela volium. Dispela buk i stori gut long ol man, ol ples, na sampela tok em Baibel i kolim

  • “All Scripture Is Inspired of God and Beneficial”—Dispela buk i stori long taim, ples, na risen ol man i raitim ol buk bilong Baibel, na tu, em i kamapim ol bikpela tok bilong wan wan buk bilong Baibel

  • The Bible—God’s Word or Man’s?—Em i wanpela liklik buk. Paslain long ol i kamapim ol tok bilong en, ol i mekim gut wok painimaut bilong kisim ol evidens i soim olsem tru tru God em i as bilong tok bilong Baibel

  • The Bible—What Is Its Message?—Dispela buklet i gat 32 pes na i stori gut long astok bilong Baibel

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim