Mekim Stadi Bilong Yu Long Baibel i Kamap Gutpela Moa

JOSUA i gat bikpela wok tru long mekim. Em i mas go pas long lain Israel na bringim ol i go insait long Graun Bilong Promis. Tasol ol bai bungim ol bikpela hevi. Maski i olsem, Jehova i strongim Josua na em i tok: ‘Yu mas sanap strong na yu no ken pret na surik. Yu mas bihainim tru olgeta lo. Long san na long nait yu mas skul gut long olgeta lo. Na yu mas was gut na bihainim tru olgeta tok i stap long lo. Sapos yu mekim olsem, orait olgeta arapela samting yu mekim bai i kamap gutpela tasol.’—Jos. 1:7, 8.

Yumi stap long “taim nogut,” olsem na planti samting bai putim hevi long yumi. (2 Tim. 3:1) Tasol yumi inap winim ol hevi sapos yumi bihainim pasin bilong Josua long bihainim ol tok Jehova i givim. Yumi mas ritim Baibel long olgeta de na bihainim gut ol stiatok bilong en long taim bilong traim.

Planti bilong yumi i no kamap bikpela wantaim pasin bilong stadi, olsem na yumi pilim hatwok long stadi. Tasol em i bikpela samting long yumi mas stadi long Baibel. Lukim blok “Traim Ol Dispela Rot,” na painim sampela rot bilong mekim stadi bilong yu i kamap gutpela moa.

Man bilong raitim song i tok: “Stiaim lek bilong mi bilong mi ken wokabaut long rot bilong lo bilong yu, long wanem, mi save laikim tumas dispela lo.” (Sng. 119:35) Yu inap kisim bikpela amamas long skelim Tok Bilong God. Yu bai kisim planti nupela save taim yu mekim gut wok painimaut.

Em tru olsem yu no inap lidim wanpela bikpela lain manmeri olsem Josua i bin mekim, tasol yu gat ol hevi bilong yu yet. Olsem na yu mas bihainim pasin bilong Josua na stadi gut na bihainim ol skul yu kisim. Sapos yu mekim olsem, yu bai bihainim gutpela tingting na ol samting yu mekim bai kamap gutpela.