Go Klostu Long God

Em i Laik Bai Laip Bilong Yumi i Kamap Gutpela

Josua 1:6 -9

OL GUTPELA papamama i gat bikpela laik long lukim ol samting ol pikinini bilong ol i mekim i kamap gutpela, olsem laip bilong ol i gat as tru bilong en na ol i stap amamas. Na olsem tasol, Jehova, Papa bilong yumi long heven, em i laik bai ol samting ol pikinini bilong em long graun i mekim i kamap gutpela. Bilong soim olsem em i tingim tru yumi, em i tokim yumi long ol samting yumi mas mekim na bai laip bilong yumi i kamap gutpela. Olsem, tingim ol tok em i bin mekim long Josua, olsem i stap long Josua 1:​6-9.

Piksaim long tingting ol samting i bin kamap, olsem piksa long han sut i soim. Bihain long Moses i dai, Josua i kamap nupela lida bilong lain Israel, em namba bilong ol inap sampela milion. Lain Israel i redi long i go insait long dispela graun em God i bin promis long givim long ol lain tumbuna bilong ol. God i gat sampela skultok bilong tokim Josua. Sapos em i bihainim, dispela bai helpim em na ol samting em i mekim bai kamap gutpela. Tasol dispela skultok God i givim, em i no bilong helpim Josua tasol, nogat. Sapos yumi bihainim dispela tok, ol samting yumi mekim em tu bai kamap gutpela.​—Rom 15:4.

Jehova i tokim Josua long em i mas sanap strong na no ken pret​—Jehova i tokim em tripela taim long mekim olsem. (Josua sapta 1 Ves 6, 7, 9) Tru tumas, Josua i no ken pret na em i mas i gat strong long go pas na kisim lain Israel i go insait long Graun Bilong Promis. Tasol olsem wanem em inap sanap strong na i no pret?

Long rot bilong ol tok bilong God, Josua inap kisim pasin bilong sanap strong na i no pret. Jehova i tok: “Yu mas was gut na bihainim tru olgeta lo wokman bilong mi, Moses, i bin givim long yu.” (Josua sapta 1 Ves 7) Long dispela taim, ating Josua i gat sampela buk tasol bilong Baibel em ol i bin raitim.a Tasol i no olsem taim em i holim Tok Bilong God, ol samting em i mekim bai kamap gutpela, nogat. Bilong Josua i kisim gutpela helpim long en, em i mas mekim tupela samting.

Namba wan samting, oltaim Josua i mas putim tok bilong God long bel bilong em. Jehova i tok: “Long san na long nait yu mas skul gut long olgeta lo.” (Josua sapta 1 Ves 8) Wanpela buk i tok: “God i bin tokim Josua long tingim ol Lo bilong Em long rot bilong ‘toktok’ long dispela lo long em yet, ‘skelim long bel’ na ‘tingting’ long en.” Josua i mas ritim na tingim tingim Tok Bilong God long olgeta de, na dispela bai helpim em long karim hevi bilong ol hatwok bai kamap bihain.

Namba tu samting, Josua i mas bihainim ol samting em i lainim long Tok Bilong God. Jehova i tok: “Yu mas was gut na bihainim tru olgeta tok i stap long lo. Sapos yu mekim olsem, orait olgeta arapela samting yu mekim bai i kamap gutpela tasol.” (Josua sapta 1 Ves 8) Sapos Josua i mekim laik bilong God, orait ol samting em i mekim bai kamap gutpela, long wanem, laik bilong God i save kamap gutpela long olgeta taim.​—Aisaia 55:​10, 11.

Josua i bihainim tok bilong Jehova. Dispela i mekim na laip bilong em i gutpela na i gat as tru bilong en, na em i stap olsem man i lotuim Jehova na i stap gut long em.​—Josua 23:14; 24:15.

Olsem wanem? Yu laik bai laip bilong yu i gat as tru bilong en, olsem laip bilong Josua? Jehova i laik bai ol samting yu mekim i kamap gutpela. Tasol em i no inap sapos yu holim tasol Tok bilong em, Baibel. Nogat. Wanpela Kristen i bin stap gut long Jehova inap planti yia, em i tok: “Yu mas ritim Baibel na putim tok bilong en i go daun long bel bilong yu.” Sapos long olgeta taim yu putim tok bilong God long bel bilong yu, na bihainim long laip bilong yu ol samting yu lainim, orait olsem Josua, “olgeta arapela samting yu mekim bai i kamap gutpela.”

[Futnot]