Yu Save Long Dispela?
Wanem sensas i mekim na mama i karim Jisas long Betlehem?
Gutnius Luk i Raitim i tok, taim Sisar Ogastus i putim wanpela lo long ol i mas wokim sensas long olgeta hap em gavman Rom i bosim, orait “olgeta manmeri i go long as ples bilong ol, bai gavman i ken kisim nem bilong ol.” (Luk 2:1-3) Taun bilong Josep, waspapa bilong Jisas, em Betlehem, na Josep na Maria i bihainim tok bilong lo na i go, na nau mama i karim Jisas long Betlehem. Dispela pasin bilong rejistaim nem bilong ol man i opim rot bilong gavman long kisim takis na singautim ol man long joinim ami.
Taim ol Rom i daunim Isip long yia 30 B.C.E., ol Isip i bin wokim sensas inap planti yia pinis. Ol saveman i ting olsem ol Rom i bin bihainim pasin bilong Isip long wokim sensas, na ol i bihainim wankain pasin long ol arapela hap ol i bosim.
Wanpela lo em gavena bilong Rom husat i bosim Isip i putim long yia 104 C.E. i soim olsem ol i gat pasin bilong rejistaim nem bilong ol man. Wanpela kopi bilong dispela lo, i stap nau long wanpela laibreri (British Library), i tok: “Gaius Vibius Maximus, Gavena bilong Isip (i tok): Nau em i taim bilong i go long haus bilong ol man na wokim sensas, na yumi mas tokim olgeta manmeri husat i no stap long ples bilong ol long i go bek long as ples bilong ol, na bai ol inap bihainim gut lo bilong wokim sensas, na tu, ol inap wok strong long wokim gaden long hap graun bilong ol.”
Bilong wanem Josep i tingting long givim Maria pepa bilong katim marit, maski ol i bin makim tasol tupela long marit?
Olsem Gutnius bilong Matyu i tok, Josep i kisim save olsem Maria i gat bel taim “ol i makim em pinis bilong maritim Josep,” tasol tupela i no marit yet. Josep i no save olsem “Holi Spirit tasol i bin mekim” na Maria i gat bel, olsem na ating em ting Maria i bin slip wantaim narapela man, na em i laik katim marit.—Matyu 1:18-20.
Namel long ol Juda, taim ol i makim man na meri long marit, i olsem ol i marit pinis. Tasol tupela i no inap stap wantaim olsem man na meri marit i go inap long taim ol i stretim gut marit. Taim ol i makim man na meri long marit, dispela i olsem wanpela strongpela tok promis, olsem na sapos man i senisim tingting o sampela narapela samting i mekim na nau tupela bai i no marit, orait meri i no fri long maritim narapela man i go inap long taim em i kisim pepa bilong katim marit. Sapos ol i makim wanpela meri long maritim wanpela man, tasol dispela man i dai paslain long ol i marit, orait meri bai stap olsem wanpela wido. Tasol sapos meri i mekim pasin pamuk taim ol i makim em pinis long marit, orait em i olsem pamukmeri na em i mas i dai.—Lo 22:23, 24.
I luk olsem Josep i luksave long ol hevi Maria inap kisim sapos em i kisim sem long ai bilong ol manmeri taim ol i lukim olsem em i gat bel. Tasol maski em i pilim olsem em i mas tokim ol bikman long dispela samting, em i laik lukautim Maria na bai ol man i no ken bagarapim nem bilong em. Olsem na em i tingting long katim marit isi tasol. Sapos wanpela mama wanpis i gat pepa bilong katim marit, dispela bai makim olsem em i marit pinis.
[Piksa long pes 16]
Lo bilong sensas em gavena bilong rom husat i bosim isip i putim, 104 C.E.
[Kredit Lain]
© The British Library Board, all rights reserved (P.904)